【人妻開IG分享麻甩老公點滴】吸17萬人follow

2019-07-26

好多人都話：相見容易同住難。結佐婚，日對夜對，見到另一半冇手尾又唔做家務，真喺火都黎！

不過，與其嗌交，不如智取。日本就有位人妻，影低曬老公日常冇收尾嘅證據，仲喺社交網站開埋account，同大家分享佢老公嘅罪證。佢將用戶名改為「gomi_sutero」，在日文中可解作「掉垃圾」。當中紀錄了丈夫（有時喺女兒）喺屋企冇手尾嘅罪證。

「gomi_sutero」約1年前開始經營，帳戶幾乎隔幾日就有新相，讓網民欣賞到丈夫那近乎「行為藝術」的陋習。

好似呢張圖咁，飲剩一啖，再放翻落雪櫃，咁咪唔駛洗囉。

有位唔好嘥，垃圾唔一定放喺垃圾桶。

唔冚就放入雪櫃，成個雪櫃都臭晒。喂，好好架啦，佢起碼放佐落雪櫃。

成個背囊放係門後面，。佢漏低咗個腦呀真係。

而管理帳戶嘅妻子就係簡介中「利申」兩夫妻關係很好，又話老公對帳戶絕不知情：「請不要告知你附近身高180厘米的男人！如果你了解我們，請保密！哈哈！」還補充：「打令，如果你發現了這個（IG），請原諒我！（大笑）。」

妻子表明「在等到老公識得掉紙巾（換廁紙）的日子來臨前，會繼續經營此帳戶」。網民都大讚佢夠曬風趣幽默，覺得佢哋生活好有情趣，更喺一種另類放閃添～

【張致恒原來患性上癮症？】三種徵兆斷定患病

2019-07-26

藝人張致恒（Steven）宣布完結婚兼做咗老竇無耐，就陸續爆出佢一腳踏五船嘅消息，關係七國咁亂。其實佢喺2016年曾承認性上癮一事，當時佢話：「係咁多年一直好困擾自己嘅問題，希望有一日可以解決到。」

其實性上癮係指任何與性有關行為過多，以致影響患者日常生活及對家人、朋友或伴侶造成困擾。美國性健康促進協會制訂咗標準，如有以下三種徵兆之一，就有可能患上性上癮症：

一．是否覺得自己無法控制自身的某種性行為？

二．某種失控的性行為是否已造成嚴重影響？

三．是否會不由自主、不斷地想到某種失控的性行為？

性上癮絕對唔係罕見情況，有好多名人都係患者之一：

奧斯卡金像影帝Michael Douglas、

震驚中外嘅荷里活淫魔監製Harvey Weinstein、

同埋高爾夫球名將「老虎」活士。

如果真係患有性上癮就應該要及早醫治，除咗要搵專業嘅心理專家協助外，仲要檢查係咪生理問題，同埋要訓練增強個人意志力，以及學識轉移注意力適當發泄等。

（on.cc）

【處處留情】溝女王張致恒情史厚過電話簿！

2019-07-26

張致恒被爆一腳踏五船，原來出道18年嘅佢喺感情路上一直戰績彪炳，女朋友唔係歌手就係Model，但每次分手皆因佢衰偷食。

梁皓恩（April）

2017年張致恒公告同模特兒梁皓恩拍拖，並喺社交網曬合照放閃，佢公開戀情皆因過去「個底太花」，想以行動俾對方安全感，更認定佢係結婚對象。

傅珮嘉

2004年張致恒同大佢3年嘅歌手傅珮嘉發展姐弟戀，惟戀情只係維持咗3年，因為偷食網友Fiona同埋情慾對話曝光，及後佢公開表示對唔住傅珮嘉。

鍾舒漫

2008年張致恒被爆同鍾舒漫喺公屋同居，但玩暗撻唔肯承認，有傳因偷食嫩模孫旗導致3年情玩完。孫旗自爆張致恒奪走初夜後玩消失，佢都承認衰鹹濕玩一夜情。

莊端兒

與孫旗「玩完」之後，Steven同身材出眾嘅35E莊端兒撻着，及後傳他趁莊端兒外遊，搭上富貴台妹Doris，更到訪佢屋企。莊端兒得知後決心分手，事後Steven承認性上癮要接受治療。

台妹Doris

本有Model女朋友嘅張致恒2016年被影到帶富貴台妹Doris返歸度春宵，劈腿曝光，他再自責衰鹹濕：「我控制唔到！」

（on.cc）

【黃疸指數300】黃澤鋒夫婦心痛女兒被針桔拒絕再入院

2019-07-26

52歲黃澤鋒本月初初為人父，同齡太太陳麗麗分娩時經歷「生死一瞬間」，拼命為佢生下愛女「小黃妃」（Miracle）。老來得女，兩公婆非常感恩，堅持餵人奶。

但初生B女有黃疸病，指數近300要照燈去黃，政府醫院好緊張，要陳麗麗日日覆診，逼佢帶BB入院，仲坐緊月嘅陳麗麗就唔想BB抽血捱痛，再受桔針，轉為睇私家醫生：「醫院好緊張，日日要我覆診，日日逼我帶BB入院，我話睇吓私家醫生觀察吓先。一嚟囡囡出世時，因為我妊娠毒血爆發，馬上要全身麻醉分娩，囡囡都要吊抗生素，同住ICU監察，我唔想佢咁細個人仔，抽血驗黃疸指數時又再插針，同老公都好心痛呀！另外，我坐緊月又餵緊人奶，到時要日日撲去醫院兩轉餵奶，自己傷元氣，啲奶質量又無咁好，阿女啲黃咪退得慢囉！所以貴啲都要睇私家醫生跟進，改用半人奶半奶粉一周，o依家黃疸有好轉，由14（私家醫生計法）跌落12，醫生建議可試多一周，觀察吓再決定需唔需要入院。」

仲話：「好彩聽私家醫生建議改咗餵半人奶半奶粉，黃疸指數開始回落，o依家暫時唔使入院照燈。」

出生時重6磅嘅「小黃妃」，目前開始收水，體重正常，唯一擔心係黃疸。新生嬰兒黃疸是指嬰兒於出生後一個月內，皮膚及眼白有發黃現象，主要原因是嬰兒血液中的膽紅素過高所引致。若黃疸指數急劇上升，可引致嚴重的後遺症，如失聰、弱智、痙攣等，或對腦細胞造成永久性的傷害。

雖然食奶粉BB易去黃，但陳麗麗堅持餵人奶：「我咁嘅年紀仲上到奶，而且BB又肯埋身食奶，唔只囡囡抵抗力好啲，吸啜時仲幫到BB將來顎骨發展，盡可能加埋奶粉一齊餵。」

至於新手爸爸黃澤鋒除左努力搵錢養家，仲幫手湊女，照顧老婆情緒：「產婦情緒好勁，一嚟料就大件事，照顧得妻女唔好係我嘅責任，佢有個寶貝女揸手，我唔敢發惡，乜都就晒老婆！鬼叫係我前世欠咗個女咩！o依家『小黃妃』識得蝦我，會對住我發脾氣扭抱，十幾日人仔都恰死我，反而好怕媽媽。不過，對住B女我冧晒啦！我呵佢叫唔好喊，BB就會收聲，每次換片，就好似中六合彩咁，日日都派『黃金』畀我；而且我落手掃風，掃幾秒就搞掂，呢方面係我強項。依家心繫阿女，每當有空檔就趕返屋企睇妻女，始終年紀唔細，好好珍惜同家人相處時間，我諗係做咗爸爸之後最大嘅改變。」

【曾遭女士強吻】蕭正楠返內地工作再熱都要著厚衫

2019-07-26

蕭正楠（Edwin）、劉佩玥（Moon）同張頴康等昨日（25日）為劇集《十二傳說》宣傳，並公布首集七天跨平台總收視錄得28.2點，成績不俗！

蕭正楠對收視感到開心，劇集喺內地同步播放，拍檔林夏薇同佢講有很多內地朋友追看，都帶挈咗佢去內地工作嘅機會。講到任達華喺內地工作嗰陣被襲擊，阿蕭直言想向華哥表達關心。

阿蕭表示若然之後要返內地工作，他講笑話要著厚啲嘅衫，就算再熱都加件棉質衫喺中間，會加倍留意有無人衝上台，仲自爆曾俾女人強吻！所以佢對任達華嘅意外感同身受：「電光火石間真的很難按得住，所以華哥身手算不錯，已將受傷程度減到最小。」阿蕭你都要小心啲呀！

（明報）

【送水輝大小姐公開戀情】林淑敏曾擔心觀眾會唔鍾意

2019-07-26

喺劇集《愛．回家之開心速遞》入面飾演「送水輝」嘅許家傑同「大小姐」林淑敏，喺劇入面一直都要玩地下情，唔可以俾龍家同「大小姐」政治婚姻嘅對家商家發現。

估唔到佢哋前晚終於有突破性發展，「大小姐」終於勇敢向全世界公開同「送水輝」關係，即使冇得做接龍集團話事人，佢都冇所謂，令到唔少網友拍手叫好，話佢哋終於可以光明正大拍拖！

林淑敏許家傑都好多謝觀眾對佢哋嘅支持！

許家傑接受訪問，話好開心同林淑敏合作得好開心：「都成年半同大小姐合作，真係合作得好開心，希望可以帶多啲開心同正能量畀大家。（大家好開心劇中你哋光明正大拍拖！）感覺好似同觀眾一齊成長，由唔識到初戀、地下情，大家都認識我哋多咗。」

而林淑敏話好多謝大家支持，起初會擔心光明正大咁拍拖，觀眾會唔鍾意：「依家呢一刻，我覺得觀眾有負評唔緊要，最緊要係佢哋返去屋企開開心心咁開個電視睇，呢個係我最想做嘅事。」

呢一對《愛．回家》CP一直都好受歡迎，深得觀眾喜愛，佢哋公開戀情一定令唔少網友睇到笑曬口！淑敏姐唔需要咁擔心〜

（on.cc / TVB）

【前日仲同張致恒見面】April:唔係好相信見到嘅嘢

2019-07-26

張致恒（Steven）舊愛梁皓恩（April）喺社交網發出恐怖留言，大家都非常擔心佢會諗唔開。據知April原來真係想尋死，佢仲同朋友話對住呢件事頂唔順，尋晚已經有幾個朋友陪住佢，話佢情緒暫時穩定下來，朋友亦已通宵陪佢，又話佢即將返回同Steven同居愛巢。

有媒體就聯絡佐April本人，對於Steven突然Post話結婚同已經生佐BB，April表示相當驚訝：「我哋前兩日都仲喺埋一齊，我都想知發生咩事啊，你哋有冇人搵到佢？」又說：「問題係我都未搵到佢都唔知發生咩事！好恐怖啊！」

April就透露今年曾經同Steven分開過，但前排已經再喺翻埋一齊。仲話佢哋前日都仲有見面。April表示：「對上一次見佢係前日凌晨，佢出發去泰國同kenny拍嘢之前，之後都有訊息聯絡，（知唔知佢已經同人生咗BB？識唔識嗰個女人？）我完全唔知道發生咩事，唔識，我都係今日先知，（Steven瞞住你偷食？）點計都係，上年同佢好地地，我哋所有朋友都知道，（點睇Steven宣布結婚兼已做老竇？）事情太突然，好混亂，佢仲未同我聯絡嘅話，我真係唔知究竟發生咩事，坦白講我仲係唔係好相信見到嘅嘢，完全相信唔到，（你依家會點樣形容Steven呢個人？）真心唔知應該點答，前兩日仲見緊……」

【橫掃八個獎】「細龍太」陳偉琪出戰荷里活凱旋而歸

2019-07-26

藝人陳偉琪（Vicky）早前去到荷里活參加「WCOPA」世界表演藝術錦鏢賽，橫掃八個獎項，當中包括演藝獎項同樂器大獎，凱旋而歸，真係好威水！

花了唔少時間同心機練習嘅她非常開心，直言成功挑戰自己，覺得參賽嘅最大得着唔係贏獎項，而是過程中學到挑戰自己比挑戰他人更重要。

因為今次無助手隨行，每日都要一腳踢處理各項問題，當中包括著高跟鞋搬運大豎琴去會場：「酒店行去會場有一段距離，拉到索晒氣！今次去到一個人生路不熟嘅地方，真係有種由零開始嘅感覺，但係我幾喜歡呢種咁獨立嘅感覺。」辛苦曬啦〜

Vicky仲透露此行認識到嚟自世界各地嘅表演高手：「好多參賽者都好叻，比賽期間大家亦好團結，會互相幫忙整頭化妝，完全唔會有敵意，感覺好舒服。」被問到有冇桃花，佢話：「桃花就冇，不過確實識咗好多朋友，其中一位嚟自澳洲唱歌劇嘅女仔，佢原本唔想參加Final，但經我鼓勵決定參加，結果攞咗全場大獎，戥佢高興！」

Vicky都有喺IG同FANS報喜，仲表示雖然自己唔喺香港，但都好關心近日香港嘅情況：「一直都沒有機會跟你們報喜。這次代表香港比賽，真的是挑戰了自己，也托大家的祝福，獲得好成績。每一項參賽的項目都拿到獎，而當中，豎琴表演更進入final show。在 LA 的日子雖然很累，每天搬豎琴，為比賽不同項目準備，但還是很擔心我們的家。希望在這個時候，帶點喜訊給大家。無論再艱難的日子都會過去的。💪」多謝Vicky忙住比賽都為香港打氣！

（on.cc / Instagram）

【一腳踏五船】張致恒舊愛尋死第四者曝光：週一見

2019-07-26

張致恆（Steven）尋日晏晝宣布結婚，正當所有人都以為佢未來太太喺早前認愛嘅舞台劇演員April。劇情竟來個峰迴路轉，佢嘅結婚對象竟然喺佢嘅粉絲雯雯？！!隨後Steven再曬出同一家三口全家福曬幸福，原來已經做埋老竇。深夜舊愛尋死，竟又引爆「一腳踏五船」嘅消息！仲爆過tvb啲劇集！

Steven日前在社交網站中宣佈結婚，但新娘唔係大家熟悉嘅April。深夜再爆與粉絲雯雯結婚，二人仲已有一子。Steven仲留言話以往自己年少輕狂，但好感激雯雯咁話。

當大家以為Steven同April已經撇清關係之時，April喺夜晚突然甫咗一張Steven的背影相，又發出恐怖控訴！April留言：「May i know what’s going on？點解忽然世界末日？」更恐怖係佢Hashtag話：「我怕過唔到今晚！」及「被偷走的那五年！」

其後Steven嘅舊愛梁皓恩（April）喺張「全家福」下留言爆二人仲有關係，仲話Steven爭佢好多錢：「我呢？你會唔會覺得你有嘢要同我講？你想逃避到幾時，一個電話都唔面對？你所有衫褲鞋襪同所有嘢都仲喺我度，你嗰啲愛我嘅message呢？先幾日仲有喎？你仲爭我好多錢，right？你唔打畀我嘅話，醫院見。」

April留言一出，好多網友都留言勸佢唔好做傻事，其中一位網民就自爆第四者身分，仲透露有第五同第六者嘅存在「他這些天也跟我說他愛我！唔該april覆ig私信。受害者不是你一個，依家我仲有兩個女仔等你。」

第四者仲係社交網站上留言：「你想讓全世界知道你是個好人，但我們都讓身邊人知道我們是白癡。」疑是回應張致恒宣布喜訊一事，其後佢仲表明「週一見」，似乎喺要公開同張致恆關係嘅證據。

小四仲表示自己喺受害者，話自己成晚訓唔著。佢今早仲喺社交網再次發文表示：「我是真的睡不着，我真的不知道有多少個女孩子被玩的團團轉，被大話精一直騙，人貴在有自知之明，抱歉你沒有。」

【愛犬成狂】羅仲謙爆楊怡好鍾意聞腳！呼籲領養代替購買

2019-07-26

藝人羅仲謙喺星皓電影《小Q》入面扮演對相當愛護犬隻嘅導盲犬訓練員，原來私底下佢亦都係個「愛犬之人」〜佢4歲就開始養狗，婚後同楊怡暫未有B，但其實早已躍升為做三隻狗狗嘅「父母」㗎啦！佢話：「自己『仔女』梗係錫啦！我本身有隻混種大狗，而阿怡就養咗兩隻小貴婦狗，點知狗仔每次見到大狗都會好惡咁叫，所以直至依家，佢哋幾兄弟都只可以隔住窗見面咋！」

並自爆因老婆關係，他同狗狗亦愈嚟愈親密，接受到同佢哋一齊瞓、錫錫咁，仲踢爆老婆有個特殊癖好，就係索狗仔腳喇！佢話搞到自己間中都會聞吓佢哋嘅體味：「覺得好得意！」除此之外，佢話老婆從來都唔會入場欣賞以犬隻為題材嘅電影：「睇完個心會好唔舒服，不過今次因為我有份參演，所以佢破例一次。」兩公婆仲係好SWEET〜

談到新片，阿謙坦言接拍嘅時候冇諗咁多，但愈拍就愈了解得多，依家除咗想票房有佳績外，更希望喚醒社會責任，令大家明白導盲犬對視障人士嘅重要性，認為一般人可能對佢哋產生抗拒，搭車拒載、食肆其他食客會嫌佢哋有體味等等，幸得有正義之士為佢哋發聲。仲揚言會慎重考慮成為導盲犬寄養家庭，真係愛心爆棚！❤

最後，阿謙仲分享咗以往家中「寶貝」嘅故事，呼籲大家要領養代替購買呀！

（on.cc）

梁皓恩 （April）

傅珮嘉

鍾舒漫

莊端兒

台妹Doris

梁皓恩（April）