郭可盈、熊黛林、謝玲玲林恬兒兩母女、何超瓊等昨晚到灣仔會展出席拍賣會預展晚宴。郭可盈表示要開眼界，好好欣賞珍品。
郭可盈指女士們都愛鑽石：「自己偏好紅寶石、綠寶石，以前覺得綠寶石係年紀大先戴，而家都覺得好sharp。自己都有儲少少寶石，有保值功能，都可以代代相傳。」問到是否老公送？她說：「兩樣都有，最珍貴嘅物質就係鑽飾，因為係恆久嘅心意，唔會過時。」
談到最近生活，原來郭可盈要忙着應付女兒考試：「今日先考完，而家要安排暑期活動。個女而家愛上韓國女團BLACK PINK，咁啱6月佢哋喺澳門開騷，安排咗去，點知原來冇得坐。仲以為我買VIP握手位可以坐，原來VIP位最靚先要企，好彩我體力都OK，今次同老公三個人一齊去。不過唔係個女，都唔會體驗到韓流。」
女兒愛上韓流，會否讓女兒到韓國學藝？郭可盈說：「一定唔會喇，讀好書先，佢都鍾意表演，而家先9歲。佢都有跳K-pop，又會學BLACK PINK又唱又跳，我仲幫佢拍片，我都有一齊跳少少。」郭可盈說女兒好學：「佢其實識唱啲歌，仲會睇番歌詞翻譯了解係咩意思，小朋友學嘢真係好快，最緊要係鍾意，要正面，但唔好迷戀。」
(apple daily)
應屆港姐亞軍鄧卓殷（Amber）最近被指搭上「大隻仔」郭子豪。
她出席慈善節目拜神儀式時否認拍拖，澄清只是帶對方返教會：「知佢工作上生活上有壓力，佢有同我分享吓，於是帶佢返教會。（佢有冇分享感情事？）冇乜，呢樣唔清楚。（佢有冇追求你？）只係一齊返教會，依家我會專心工作。（影到你哋睇樓盤疑似準備同居？）唔係，嗰日返完教會，咁啱得閒陪佢睇。」
對於有指郭子豪背女友Karen暗撻她，蒙上第三者之名，Amber直言知道入行後要面對輿論壓力，自己沒有放在心上，亦不認識Karen，對方感情事要由他們回應。她又指不知子豪晚上會否出席，即使合照也不會尷尬。
提到被網友起底公開其舊相被質疑整容，她笑說：「睇番舊相好驚訝，但我只箍過牙，相中我冇修眉冇化妝。（被公開）都幾殘忍。」
(on.cc)
名媛張天愛早前接受車淑梅訪問，近年致力在內地開辦學校，輔助有需要的孩子學習藝術文化。唔講唔知，年底將「登六」的她，依然抱着青春樂觀的心態，笑言自己大概只有30歲左右，因為有一半時間都是在睡覺，由於她工作時常與小孩在一起，感覺一切都好簡單、好自然。
她表示要向父親張有興學習多作貢獻，媽媽平日亦愛助人，張天愛說媽咪以前駕車送父親到立法局後，會在大會堂向等巴士的人大叫：「邊個要去跑馬地？有順風車坐！」現時大部分時間在北京的張天愛，亦會經常回港探望年屆96歲的爸爸，她讚父親過往多次戰勝病魔，可以無恙再站起來，是「Superman」爸爸。回想當年母親病重，為了沖喜，不足20歲的張天愛第一次結婚，結果很快就離婚收場，她坦言：「先後四次婚姻都係因了解而分開，我係藝術家追求『變』，但婚姻卻要求穩定，每次結婚都開心，離婚好難過。我覺得自己害咗嗰啲男士，以後有人追都唔會心軟，我唔會結第五次婚，連我爸爸都勸我唔好再結。我真係想設立一間婚姻學校，可以喺婚前教授男女點樣成為好丈夫、好太太。」
張天愛常說對自己好的人太多，直言曾有30人想跟她結婚，而自己只結過幾次，笑言不算犯錯太多。當年張天愛未有被第一段婚姻嚇怕，後來跟邢李㷧結婚，她自問當時工作太忘形，時常忘記自己已為人妻、人母，即使自己的只是小公司也希望做出成績，加上自己很固執，簡直就像「和事業結了婚」，後來跟邢李㷧和平分手，可幸女兒同樣得到父母的愛。張天愛覺得邢李㷧很幸運，因後遇上林青霞，她說跟青霞本來就是朋友，互相支持，對於林青霞常為自己開解女兒，說親生媽媽只是工作忙，不要對自己有誤會，令她十分感動。她認為青霞很有愛心，時常聽她的女兒訴說感情事，亦比自己更有耐性。她說：「我哋係一家人，但唔係成日飲飲食食。我知道佢哋成日喺一齊，外面有咩傳聞亦唔使理，我唔使問，知道佢哋成日一齊就夠。」
張天愛和羅素在一起的第四段婚姻，最終是因為文化差異而分開，她解釋：「我唔習慣去美國生活，嗰邊嘅人紋身、粗口我難接受。至於要佢跟我去中國，佢係明星、有位置嘅人，佢又接受唔到。我哋分開咗但依然好愛對方。」張天愛笑言一直對自己的名字有誤解，「我以為自己得到上天嘅愛，直至一位西藏大師解說，要我早啲覺醒，呢個係一個好苦嘅名，我從上天得到好多，要回報，要擔起個天，要我天天付出愛。」
(on.cc)
藝人胡鴻鈞最近忙於趕拍無綫劇《降魔的2.0》，受訪時當時全程背對記者，以免造型提前曝光！
有消息指他上周六拍攝吊威吔場口，怎料從高處墮下，撞傷頭部，清醒地由白車送院接受治療，有人拍到他在醫院坐着輪椅，目前仍在留院。而他的唱片公司老闆何哲圖亦封嘴避談此事，《降》監製亦未有回覆。
無綫副總經理（節目及製作）杜之克接受東網訪問，他說：「公司每日製作咁多節目，難免有小小事故，今次唔係咩嚴重事件，唔會當作宣傳咁樣做，今次亦冇所謂嘅封鎖消息。」他又指藝員部會作統一的回答，亦承認《降》拍攝進度有所影響。
(on.cc)
現年44歲嘅男神吳彥祖（Daniel）最近到法國出席康城影展，依然咁靚仔，不過原來上個月佢差啲死！
話說佢有一個星期四食完飯凌晨12點幾突然嘔，以為只係食錯嘢，捱到第二朝去睇醫生，醫生淨係開咗胃藥同止嘔藥畀佢！到咗星期六，佢都唔係好舒服，仲以為係食錯嘢：「一係突然之間冇嘢，一係就發燒要食消炎藥，我等緊呢兩樣嘢，但一直冇嚟到，好乸痛，即係好似畀人踢『春X』咁，每10分鐘踢一次！」而身邊兄弟就笑佢鍾意SM，死過翻生嘅Daniel竟然話：「有少少！」
由星期五睇完醫生後開始屙：「唔係屙爛屎，飲水屙水，每10分鐘就去廁所！」所以索性唔飲水，兩日冇屙尿！佢話：「冇人睇到我幾咁痛苦！」因為老婆Lisa S.唔喺屋企得番家傭同個女，又成日出去玩！咁點解唔去醫院？因為佢話佢住嗰區去親醫院都係大單嘢，即係中槍有血案嗰啲，所以如果佢去到話係食錯嘢，就可能叫佢坐喺度等，所以費事去！之後佢向家姐求助，家姐上到去見佢唔對路，即刻帶佢去白人區、離屋企30分鐘車程嘅醫院！
醫生一見到就話佢個肚好脹，即刻做CT Scan（電腦斷層掃描），發現係盲腸發炎引致盲腸潰爛，仲爆咗，要即刻開刀！醫生話平時啲人如果係咁最多頂到2個鐘，點解可以頂到3日？雖然即刻開刀，但都抆唔到盲腸出嚟，因為入面全部腫晒，如果堅持要攞有機會整穿其他位置，就會好麻煩！最後只係洗腸，吊消炎藥吊咗一星期，盲腸仍留喺體內。咁會唔會翻發？就要等半年睇吓點，只有7%會出現！
最辛苦係……
而總共前後加埋佢有9日冇食嘢，暴瘦15磅，到依家都未肥番！不過佢講笑話最辛苦就係喺病床上冇嘢做，睇吓電視啦，點知全部都係飲食廣告！而佢當時有打電話同老婆講要開刀，不過避重就輕，Lisa S.之後揸咗10幾個鐘車返去搵佢，知道咁嚴重後都忍唔住鬧佢做乜忍咁耐！
而本身嗰個星期日佢會去加國滑雪，好彩取消咗或者件事早咗發生，因為嗰度係山區，醫院冇咁先進，有乜嘢就大鑊了！但最驚嘅係，醫生話做咗呢種手術10年都未見過咁嚴重，如果佢再等多一日就會死！
(on.cc)
郭富城和老婆方媛三年抱兩，大女Chantelle快滿兩歲，「城嫂」方媛4月為郭富城再添一女，一家四口幸福滿瀉！
早前趁母親節，方媛在社交網首晒「二寶」相片，B女頭髮濃密，同姐姐一樣！
坐足月的她在社交網上載新相。見她穿上一件白色短身上衣，和一條貼身的高腰裙露出纖腰，手腳纖瘦的她身形回復苗條，狀態大勇。
不少網民大讚她神速回復狀態，她自己則留言問大家裙子好不好看。
(on.cc)
藝人鍾欣潼（阿嬌）上年今日同有台灣「醫界王陽明」之稱嘅賴弘國喺美國洛杉磯舉行婚前派對，同年十二月喺香港註冊正式成為夫婦，兩人經常在網上晒恩愛。
上年賴弘國生日，阿嬌在美國時間凌晨12點貼兩人婚禮當日嘅kiss kiss相，寫上Happy birthday，仲@埋老公ig。不過阿嬌當日錯手tag錯人，擺了大頭佛。
阿嬌今年提早為老公慶祝30歲生日，佢喺社交網甫咗張同老公嘅合照，張相仲有個生日蛋糕，原來阿嬌順道提早3日同老公慶祝30歲生日，佢仲留言話：「終於等到你過30歲生日啦！」
個蛋糕色彩繽紛，仲有大大隻字「SUPERMAN」嚟形容老公真係冧！
今年阿嬌就好醒目，再次甫相兼Tag名就叻豬冇錯！
(綜合報道)
熊黛林（Lynn）、郭可盈、何超瓊、謝玲玲和林恬兒兩母女等在灣仔出席「佳士得」拍賣貴賓酒會，Lynn穿上一條黑色斜膊晚裝裙，露肩騷美腿，身材fit到爆，已回復未生孖女前一樣身形。她說﹕「我夏天就自動瘦，抱BB等於做運動，相比起生之前已經瘦番9成，希望可以再瘦啲。」
Lynn透露稍後會拍一部大陸電視劇和一部電影，兩部都是時裝，但未可透露角色，預計要離開香港個多星期，她說：「諗到要離開佢哋好唔捨得，下個月就過去，至少十日八日，劇組好好，知我要返嚟探個女，個幾星期就畀我返港一次，老公都批准咗，知我喺屋企無聊，仲話要帶埋BB嚟探我，今次都係生完之後真正出山。」
Lynn表示與老公郭可頌剛由福岡旅行返港，計劃拍完電視和電影後，會再與老公到陽光與海灘地方旅行，並承認會暫時掉低兩個女，過二人世界。
她說：「都係，我哋幾個月去一次旅行，而家揀定泳衣。但老公好保守，唔可以太性感，影得靚都唔畀我擺上網，有一次喺溫泉影咗個背脊，佢都唔畀我post，可能怕人睇蝕。」
(apple daily)
14年嫁給會計師老公馮柏基，17年誕長女Kyra，日前再誕下重7磅多的二女Kaitlyn，兩年抱兩，Icy今日在社交網貼相分享喜訊，她擁着兩女在懷中，幸福滿瀉。幼女Kaitlyn酣睡，胞姊則好奇伸手摸妹妹。還有母女大手牽小手的相片，十分溫馨。
有過上胎生產經驗的黃婉曼（Icy），這胎輕鬆多了，她全程保持良好狀態，Icy今早接受《蘋果》電話訪問，成功「卸貨」，她開心說：「今胎狀態真係好，我都好安心。可能係第二胎，我都有啲經驗，心情係淡定啲嘅，手術室生完，唔知太攰定太安心，後半段仲瞓着咗，醫生剖腹手勢好好，我恢愎得好快。」
Icy產後還安排一歲多長女Kyra來醫院親親妹妹，Icy續說：「最開心係家姐對一個小生命出現好快適應，我有代BB送咗份禮物畀佢，佢又分咗最鍾意食嘅糖畀妹妹。我喺生前一、兩個月都有同大女講家姐照顧BB嘅故事，當佢見到BB時都知道要幫佢換尿片，BB喊就要飲奶，佢都係一位好家姐嚟。」
為了BB健康，Icy第二胎都有餵人奶，她說：「餵過人奶嘅媽咪都遇過好多挫折，好似奶水唔夠呀，BB唔肯飲，同埋BB唔識飲，但今胎好好，BB好識埋身飲奶，相對嚟講好有成功感，我都好開心。」
Icy會閉關坐月，調理好身子後就要為將軍澳麵包新店搞開張，非常忙碌。Icy夫婦雖已有兩女，但他們喜歡小朋友，兩個肯定未夠數，待新店業務上軌道，Icy必定會再追仔。
(apple daily)
女星張栢芝尋日（24日）39歲生日，日前佢就去到北京提前慶祝，栢芝仲感動落淚，睇嚟非常感觸！
而正日又點過呢？
佢凌晨喺社交網上載生日卡，上面寫住：「Happy B-DAY Mom I love you so much」原來係仔仔親手寫㗎！二仔Quintus仲佢仲以英文多謝栢芝對佢無微不至嘅照顧，所以希望多謝佢，仲大讚栢芝係最好嘅媽媽「Thank you for being the best mom ever」仲配咗個拎住氣球加心心嘅小朋友，甜在心頭嘅栢芝就留言：「❤️❤️❤️❤️❤️」
網民都大讚：「超懂感恩的小Q，超級棒的媽咪」、「等小Q長大了 女神一定會很幸福的 三個寶寶都會對你很好很好」、「生日快樂 永遠是最美的女神」
(on.cc)
