曾跟無數巨星合作的一代粵語片女星夏萍本月5日因病離世，終年81歲，今日在萬國殯儀館地下孝思堂設靈。
靈堂橫匾寫上「往生淨土」四字，靈堂照是夏萍面帶笑容的彩色照，靈堂中前方擺了三個心形花牌，分別署名契仔林家棟、兒子德基一家及女兒惠兒，多位圈中人也送上花牌悼念，包括錢嘉樂與太太湯盈盈、胡楓、謝賢、汪明荃、羅家英、吳君如、杜琪峯、劉青雲夫婦、黃子華、吳卓羲、佘詩曼等。
契仔林家棟接受傳媒訪問時淚崩 (相關新聞：https://bit.ly/2He9Yu1)
(綜合報道)
【排期註冊】前港姐季軍許亦妮未婚夫職業一欄竟然…
2011年港姐季軍許芷熒（Whitney、前名：許亦妮）於本月九日在社交網宣佈結婚喜訊，並已經過了大禮。
日前，二人在港入紙排期註冊結婚，其擬結婚通知書曝光。
Whitney未婚夫名為馮家柱（Alexander），比她年長三歲，報稱住址為跑馬地，但職業一欄則未有填上。而許芷熒的住址則申報在觀塘區。
(綜合報道)
【場面感人】契仔林家棟激動淚崩 透露契媽夏萍遺願
資深演員夏萍今日在萬國殯儀館設靈，契仔林家棟於下午4時10分到達殯儀館，戴上口罩的他略有倦容，他表示想先幫手打點，說罷匆匆行入靈堂。
其後約於4時30分，除下口罩的他步出接受訪問，期間數度落淚，他透露契媽夏萍表示想土葬，因為她怕火。
講到夏萍的壽年眾說紛紜，家棟表示是81歲：「佢身份證寫大啲因為當年嚟香港嗰陣方便搵嘢做，但我都照計番佢講過嘅81歲，其實佢嘅嘢我唔係知太多，因為佢性格倔強，唔係好想講自己嘢。（你哋有咩難忘回憶？）喺電視台合作廿幾年，我好欣賞佢咁率直，成日用粗口鬧我，大家互相問候，好開心，佢又好關心我，我畀蚊咬佢會幫我𢱑，好似阿媽照顧小朋友咁。」
問到夏萍的身故原因，他表示契媽七月底中風，加上高血壓及糖尿病：「醫生用藥物去維持生命，但年紀大好難做大動作嘅醫治，我當時喺大陸開緊工，有問醫生可唔可以捱到我返嚟，結果捱到兩星期，我見到佢最後一面！」
此時家棟激動得哭了出來，問到夏萍遺願，他說：「佢擔心走咗之後會點，我話有我喺度唔使擔心，我可以做嘅就係陪住佢，十年前已經想安排佢入護老院，但佢唔肯，之後佢喺屋企跌低，十個鐘先有人知，我同杜Sir（杜琪峯）即刻安排佢入安老院，三日內搞掂，佢成日問唔知走之後會點，我話我叫得你做阿媽，你叫得我做仔，我一定會照顧你到尾！」他再忍不住抹眼淚，非常感人！
(綜合報道 / on.cc)
【至於否認年底娶宣萱嘅古天樂就…】49嵗宣萱慶生 歐陽震華送祝福
宣萱（Jessica）昨日（8月18號）49歲生日，她在微博上載慶生的照片，留言：「非常感謝大家的祝福！❤️❤️❤️ 愛你們！ 」
相中的宣萱一身便服打扮，笑容滿面，把梳乎厘當生日蛋糕，雖然簡簡單單，但從她臉上由衷的甜笑，我們大概已經知道她過了一個愉快生日。
除了大批粉絲向偶像送上祝賀，她的老友歐陽震華也在微博上載一張早前孖老婆去捧宣萱舞台劇場的三人合照，並留言：「Happy birthday Jessica 🎂🎂🌹🌹@宣萱」
可是，未見早前網上瘋傳將於年底娶宣萱、事後已否認傳聞的古天樂送上生日祝福。
(綜合報道)
【自己覺得值得】雯雯開腔護張致恒：唔通就要判人死刑
張致恒（Steven）上月宣佈將與粉絲雯雯結婚，並已誕下兒子天寶。
而早前Steven的連串桃色糾紛，幸好已經暫告一段落…
事件似乎已雨過天晴，成功「以一敵四」的雯雯昨日抱B宣示主權後，今日再發功，直言會原諒Steven的一切，她說﹕「世界上冇人唔會做錯事，你同我都一樣都會有錯嘅時候，至於值唔值得原諒，每個人都會有唔同睇法，而我覺得都未畀機會，唔通就要判人死刑，感情事從來冇分對與錯，自己覺得值得就繼續。」
或許雯雯亦承受好大壓力，表示即使全世界不看好，也希望與Steven行下去，她說：「就算全世界幾唔睇好係（喺）度鬧，自己選擇嘅就要努力同佢一齊行落去。至於小朋友成長會係點，開心唔開心好同唔好，都唔係你同我可以去做結論，既然佢已經嚟到呢個世界，就俾（畀）空間佢去行佢嘅人生，所以希望大家可以停止去傷害同侮辱，一個只擁有一顆天真嘅心，無論發生幾唔愉快嘅事，都係會帶住笑容的小朋友，我仍然相信每個人都有善良嘅心。」
雯雯發文開腔護未婚夫Steven
(IG / 綜合報道)
【網民紅娘上身狂拉紅綫】湯洛雯愁爆發文 羅天宇回覆…
藝人湯洛雯（Roxanne）琴日突然於社交網罕有晒出一張愁爆相，表示：「有點累的感覺，身和心。」
令唔少網民都紛紛留言問佢究竟發生咩事！Roxanne仲留言：「…」而舊愛羅天宇就回覆：「…」
靚湯好友莊思明見到隨即笑佢哋：「唔好喺度打波（摩）斯密碼！」靚湯睇到就反擊話：「佢抄我㗎！」
一班網民見到就紛紛留言叫佢同羅天宇復合，個個紅娘上身大讚佢哋兩個好合襯~
不過靚湯今日發文澄清同羅天宇只係好朋友，唔係復合亦冇曖昧，更斬釘截鐵表示將來都唔會有咁嘅機會：「有些東西留在過去便好，所以希望大家不要每一次我有一些淡然的post，就跟感情扯上關係。」
佢承認依家心情唔係咁好，但表示真係同呢件事無關，又強調「不是就不是」，立場相當強硬！看來要令一衆「紅娘」失望了！
(綜合報道)
【回復單身】宋慧喬一洗昔日柔弱 新形象超霸氣
因合作神劇《太陽的後裔》定情的37歲女星宋慧喬，與33歲男神宋仲基上月正式離婚，結束20個月的短暫婚姻，震驚全亞洲，不少粉絲都覺得替這對金童玉女感到可惜！
離婚或多或少有損「雙宋」形象，但喬妹在廣告界的地位卻明顯無受影響，由她代言的產品輪流推出新廣告，以行動支持失婚後重新出發的喬妹。
而由喬妹代言的鞋履品牌今日公開新一輯廣告，大晒美腿的她化上煙燻妝，展現強勢的一面，一反她昔日柔弱的形象！
新形象一洗柔弱姿態，霸氣盡現，大家覺得如何？
縱然愛情上暫時失意，但事業蒸蒸日上，也是一件令人羡慕的事情！
(綜合報道 / on.cc)
【BB界KOL】嵗半Lucy學爸爸李燦森做掌上壓爆笑 網民：腩上壓
李璨琛囡囡李元元（Lucy）憑住可愛包包面、圓碌碌身形獲不少網民喜愛，自開了囡囡Lucy的IG後，亦不時更新可愛照，其IG追蹤人數已經達八萬多，早已是BB界KOL。
Lucy最近就學爸爸做運動，李燦森做掌上壓時，Lucy當然「有樣學樣」在旁跟住做…
不過她就展示自創的「腩上壓」，非常搞笑！
影片可見，元元的「腩上壓」個肚全程貼住個地下，不過她認真得非常搞笑！
Lucy自創「腩上壓」，連拍片的媽媽都忍不住狂笑~
不少網民就笑指Lucy的「腩上壓」是史上最流嘅掌上壓，還問Lucy會否收學生~
(IG / 綜合報道)
【近二億豪宅曝光】周杰倫疑急放豪宅 網民：連一千呎都買唔起
最近有日本地產中介喺朋友圈放售疑似台灣天王周杰倫（周董）喺日本嘅豪宅，呢間豪宅位於日本原宿，根據平面圖睇總共有2層高，有巨型大廳同巨型廚房外，仲有個超大平台，究竟呢間豪宅有幾大呢？
裝修一流啊！
巨型客廳同大電視，望到都覺得好羡慕！ 
唔通呢個就係天王成日出入嘅厨房？
另一邊客廳~
答案係實用面積有成717.01平方米，即係大約7,718呎咁大，售價係26億8000萬日圓（約1.98億港元），唔怪得之網友就話1,000呎都買唔起啦。
不過呢間豪宅嘅賣點並唔係在於佢嘅裝修有幾豪華或面積有幾大，而係可以近距離見天王周杰倫一面，面對面簽約，到時仲可能攞到親筆簽名添！
但好多網友都質疑，既然畀得起接近二億，又點會諗唔到辦法見到佢呢？直情包場睇佢演唱會都得啦！
據知呢間日本豪宅周杰倫只係買入無耐，咁急賣出，網友都諗緊佢係咪等錢使呢？
（綜合報道 / on.cc）
【讀廣州幼稚園】李蘊用兩個月為囡囡做心理準備：老師得閒會發訊息畀我
藝人李蘊（Renee）婚後育有一對仔女，媽媽為大女羅紫晞（晞晞）報讀廣州幼稚園。
話咁快晞晞就要返學喇！Renee喺社交網上載出多張晞晞返幼稚園嘅相，晞晞返全日制幼稚園，第一次有咁長時間見唔到屋企人，但晞晞冇有怕，佢喺學校同其他同學仔玩得好開心，又自己孭住個書包…
仲好親切咁跟住老師入班房，見到有同學喊住搵媽咪，晞晞亦好叻咁安慰佢哋唔好喊，認真好叻女！
Renee留言：「晞晞三歲幾..開始讀幼稚園..媽媽要學識放手啦！琴（尋）日開學..你一起身就係咁講『我忍唔住啦！我要返學啦！』可見你幾咁期待呢個新嘅階段。」
Renee仲話晞晞好適應校園生活：「老師一得閒就會發訊息話俾（畀）我知你嘅情況，老師話你好努力去適應！食嘢瞓覺上堂都叻叻！好彩呢兩個月同你做足心理準備！令到你第一日返學順利度過！不過放學接你嘅時候你終於忍唔住喊咗兩下（吓）撒嬌，媽媽覺得你好叻叻啦！我哋都要繼續加油！」
三嵗晞晞最後見到媽咪接放學忍唔住流咗幾滴眼淚，但係已經好叻女架喇！
(facebook / 綜合報道)