女星莫文蔚於銅鑼灣出席腕錶活動，莫文蔚戴上共值130萬的首飾及手錶現身，高貴優雅。

她透露收藏了不少腕錶，由小時候爸爸送贈第一隻腕錶給她時，已有戴錶的習慣，而長大後因工作辛苦時，亦會買錶獎勵自己。

她透露對黃金及玫瑰金的款式情有獨鍾：「我唔鍾意啲太誇張嘅錶，係以實用為主。（老公有冇送錶？）我送畀佢多，佢反而會送戒指畀我，每一年送一隻，由結婚開始佢新創嘅慣例，結婚八年至依家都收咗好多隻。（過咗七年之癢？）其實都冇癢過，同老公都仲好sweet，我之前忙工作成日掉低老公，依家見住佢仲係好有拍拖嘅感覺同熱情，小別勝新婚。」

莫文蔚自言過往太投入工作，未能兼顧到家庭，所以將會休息一年陪老公。

問到是否因老公詐型？她說：「佢冇，但我自己都要識做。（休息造人？）都幾十歲，唔造啦，好好享受二人世界。」

問到是否減產，不再太頻撲？她說：「都會，會出少啲活動，想搞多啲幕後嘅創作工作，例如音樂劇。（有冇心水男主角？）我之前參加大陸真人騷，識咗內地歌手華晨宇，同佢做咗好朋友，亦好欣賞佢唱歌風格，把聲好入戲，都有同佢傾過，如果音樂劇成事，會預佢一份。另外亦會同哥哥（莫理斯）一齊搞電影，但就唔會以投資者身份。」

(on.cc)

藝人黃翠如出席活動，佢一見到同場嘅洪永城（Tony）女友梁諾妍後，便立即上前擁抱兼合照，更大爆：「我唔同你影相會畀人鬧㗎。」

講到Tony吩咐代為照顧女友，佢爆料指：「佢搵咗我幾日，Call咗我4次，叫我一定要照顧阿嫂，我從來冇覺得自己喺佢心目中係咁重要，所以呢張合照一定要影，唔係佢有排煩。（叫佢阿嫂有咩反應？）其實之前都有玩過一次，不過叫阿嫂好似冇咩反應，可能未滿意Tony啦！（Tony識咗呢位女朋友之後乖咗？）佢一向都好乖，不過佢哋真係好夾，Tony一直都好鍾意啲運動型嘅女仔。」

問到黃翠如有冇好消息公布？佢表示：「套劇尋日先煞科，呢排忙開工都冇乜點瞓，成日要4、5點起身，好少見到Edwin（蕭正楠）。（所以好難造人？）見面都難，同埋依家享受做老婆先。」

提到早前下廚炮製鮮蝦粉絲煲，佢指老公畀足90分，但就被曹永廉彈：「啲材料係Edwin同阿廉買嘅，阿廉不停話我買外賣返嚟當自己煮，啲小三好煩，成日想搞禍我哋。嚟緊佢哋兩個一個月飛三個國家，去新加坡、美國同馬來西亞做嘢，有排冇得見，可能到時係佢哋有好消息。」

(on.cc)

於上年4月下嫁任職科學家嘅林潤生（Albert Lam），婚後火速造人，Abo現已懷孕七個月，早前由老公操刀拍大肚寫真留倩影。

相中見她雖然捧著孕肚，但手腳依然纖瘦，表示懷孕期間一直有做瑜伽，不想太肥，影相都靚啲，她說：「因為係第一胎，我好想留番一輯倩影畀自己，同埋一直以來我冇諗過自己會有小朋友，係因為遇到Albert我先想有小朋友，相信佢會係100分好爸爸，所以咁私密嘅相當然由佢操刀啦。」

Albert為了影到老婆靚靚，花了不少時間，Abo說：「本來我都有為佢準備咗衫一齊影，但最後佢影完我已經收晒太陽，今次冇佢份，唯有等到34周再影。」

她又笑言自己不怕痛，會選擇順產，看來已經非常期待小生命到來。

前港姐冠軍曹敏莉胞妹曹敏寶（Abo）和老公Albert (資料圖片)

曹敏寳與姐姐曹敏莉一家人 (資料圖片)

(綜合報道)