於14年患上結腸癌，已切取腫瘤並已康復三年多，今次再經歷癌症，患上前列腺癌二期，不過今次多了同伴侶相伴，令他勇敢抗癌，笑言今次有伴侶照顧特別「冧」，現已成功切除腫瘤，並已出院回家休息。
鄧達智（William）去年6月，與醫生男友陳梓欣（Clement）在英國註冊結婚，找到人生伴侶，昨日有傳媒報道，指他新婚不久兩個月，他身體出現不適，泌尿系統指數不正常，入院檢查，確診前列腺癌二期，幸好有專業醫療下，日前入院進行切割手術，兩日前已出院回家休養中。
《蘋果》今日致電William，他聲線精神，說話有力，他笑言：「好運係二期，唔好運就係三期，就擴散咗。」提到如何發現泌尿系統出現問題，皆因他14年患過結腸癌，之後手術成功切除後，要定期做身體檢查，他表示：「自己小便從來無問題，今次見到溫拿廣告就aware，男性係有泌尿系統係幾脆弱，去到咁上下年紀就要小心，加上我有家庭醫生，每年會三、四次去驗血，就驗埋呢樣，驗完發現PSA（前列腺特異抗原指數）高咗，有3個月我唔知點辦，連Clement都唔講，3個月之後再驗，雖然低返，由9點幾去到6，但6都比正常4.5有事。」
問到為何不與Clement分憂，William表示一向性格不想煩人，上一次腸癌都是做完手術才通知家人：「因為佢做醫學科學，咩都factual，佢對人好nice、好sweet，唔係靠感覺做人，就算我鬧情緒，佢feel唔到，我係唔想我因為我有病，而令佢特別關心，唔想人哋畀額外關心，因為呢個原因唔想話畀佢知。」最後，到上年 11月底，因腹部有隱痛要去養和照內窺鏡，向Clement提出做泌尿檢查，才向他提出之前的檢驗結果，他起初有點怪責，之後大家齊齊去搵醫生好友研究如何處理這個病。
William的癌症屬二期，腫瘤有1cm大，要由機械人電鋸臂進行微創手術：「醫生幫我檢查定咗位，做埋組織檢查，知道割幾多，但位置有啲危險，靠近邊，怕切割時候影響啲神經。」最後，他搵了兩個泌尿科醫生及之前為他做腸癌切除手術的醫生在場監察，合共三個醫生為他做手術，麻醉後手術進行了8小時，他表示：「之前有考慮過去美國做電療，不過好多醫生朋友研究過，電療過咗第三期，手術已割唔清，無理由呢個stage做電療，電療會影響其他器官，有傷害，到時先返轉頭做手術，就未必做得到切除部份手術。」原本手術定於上年12月才做，由於他想忙完手頭上工作，之後還與Clement去了印度旅行才回能進行。
幸好，手術相當順利，William康復進度理想，現在需要處理傷口康復及定期檢查血指數，不似其他癌症需要有數年的觀察期，他表示：「離開手術室已吊住鹽水、尿袋，因靜脈曲張帶住按摩器，好似一個死人咁，木乃伊縛住嘢冇得郁，醫生見到我情況好，可能我做手術時流血唔多，好快拎走鹽水，淨係尿袋，我冇話畀護士聽去咗洗頭，兩、三日冇洗頭，我又唔理咁多，」提到患上男人最痛的前列腺癌，亦令他相當擔心有後遺症：「因為有啲人做完之後，會徘徊喺好運就兩星期，唔好運就三個月以上，但係會好番，會失禁。我發覺醫生幫我拔走尿喉，隨後我喺醫院上上落落散步，唔覺得有失禁迹象，醫生都驗過我冇，又忍到尿，所以醫生話我好勁，恢復返咁快。返到屋企，又去銀行整嘢，又約朋友飲茶，行嚟行去，唔需要擔心失禁，呢幾日落嚟好好，我呢幾日飲多啲水，我都覺得好神奇。」
除了憂心會有失禁問題，William亦擔心此病影響性功能：「做完手術未出院，反應係正常，好多人話有一段時間先番嚟，我覺得反應得好快，比預期想像好，希望繼續好落去，雖然我唔係20、30同40歲，呢樣嘢唔係最重要，始終都係覺得有好過冇，但係竟然神奇，做完手術兩日已番咗嚟。」
William與Clement去年6月在英國註冊結婚，新婚半年再患上癌病，由於他的不愛煩人性格，令他不敢對Clement透露病情，直至去年11月要到醫院例行檢查內窺鏡照腸時，才敢向對方告知病情，而本身是醫生的Clement隨即找名醫，在旁陪伴William進行治療。這一次抗癌過程，他有Clement陪伴，令他有不一樣的看法：「我都試過有啲朋友走咗，有風險，我全身麻醉8個鐘，唔係簡單，所以上一次有諗過，反正我都miss阿媽、阿嫲、家姐，我唔介意anytime要bye bye，係唔會遺憾；但係今次喺麻醉嗰陣多咗第二個想法，Clement有自由身，冇人因為另一個人而生存唔到落去，可能有另一個旅程等緊佢，唔擔心，不過呢兩個想法冇同佢講。」
手術過後，現正康復中，William表示更會活在當下：「感恩有呢啲moment，身邊有個人，過去從來冇呢啲感覺，雖然我有好多關心我嘅朋友。Besides有朋友親密關懷，嗰種屋企人面對，從來未試過，關懷係實際同感情兩方面都有，今次係感覺得到，佢會同我入院、出院，出院有幾困難？叫架的士就得，我可以四點幾出院，但係要等到佢七點幾嚟到陪我出院，係有啲嘢畀佢感覺到，兩個人一齊去面對一啲嘢，寧願等多幾個鐘等佢接我出院，係比較親暱嘅處理方法。」
現在，William留在家休養，不過不會因病而計劃與Clement同居，因為二人工作各有各忙：「因為我冇搬我嘅嘢去佢度，周末先會一齊過，平時夜晚一齊食飯。我嘅工作要畫嘢、寫嘢，好多嘢都喺自己屋企，好唔方便。」William表示除了有Clement關懷外，好多身邊朋友關心，更煮食給他，而他亦自訂了餐單：「每日輪流飲冬蟲草、花膠湯，另外係海參同松茸，補得嚟要清潤，要啖湯水，飲多啲水同出街行。」
(apple daily)
冧盡大小情人！
