佘詩曼(阿佘)憑住《延禧攻略》「嫻妃」一角再度爆紅。劇中同佢爭寵嘅女星，年齡全部都細過佢，好似飾演魏瓔珞嘅吳謹言，現實生活中係28歲，而演富察皇后嘅秦嵐就37歲、演高貴妃嘅譚卓係35歲。
阿佘戲中角色設定為23歲嘅「嫻妃」，雖然比現實年齡43歲要「後生」20年，感覺有少少勉強，但佢勝在有演技搭夠。其實，阿佘除咗要逆齡拍戲，仲要出席唔同活動，不過次次見佢仍然容光煥發，都應該好有一套護膚攻略。
阿佘喺劇入面嘅角色係相當怕老，原來佢戲裡戲外都好貫徹，佢講到現實生活中同戲入面角色一樣，唔願接受皺紋，更講笑皺紋係「最討厭的東西」，佢早前對傳媒大講護膚心得：「我後生時覺得要預防，所以20年前已搽頸霜、面霜，搽得好足，手肘都好緊要，所以o依家仲可以。」
講返當日拍攝《延禧》時係夏天，要拍足兩個月，皮膚好受挑戰，面對45度高溫，皮膚非常缺水，更笑言要同劇中女主角交換保濕方法，最後發現撐傘搽防曬，再加敷面膜最有效。除咗做足護膚，阿佘平時養生都好注重，就最鍾意食生果同大量飲水，先keep到無瑕肌。
此外，黃子華曾喺多次訪問中都大讚呢位合作多年嘅拍檔keep得好，佩服阿佘每次拍完通宵戲，第二朝早上見面，個個想殺人咁嘅樣，唯獨阿佘皮膚依然白裏透紅，仲可以笑面迎人。
阿佘就同大家分享佢嘅秘密武器，雖然佢只係薄施脂粉，但唔少網民不停留言讚佢靚女。心情大靚嘅阿佘話：「女人要愛錫自己，尤其係大家工作咁忙，一定要好好注意身體，要keep到好精神，我每朝早上都會空肚飲滴雞精，暖笠笠又可以補身，加一個紫薯夠高纖維，健康得嚟又有營養，可能因為咁，唔化妝面色都紅卜卜，好氣色應該由內調理，先可以靚到出嚟。」
(綜合報道)
Brendan就快做哥哥啦~
(按此了解更多)
