下周日(20日)「大寒」過後，香港將再迎寒流。據天文台九天天氣預報，預料一股東北季候風補充會在下周初抵達華南沿岸，該區氣溫顯著下降。。。
天文台預測，香港明日(19日)短暫時間有陽光，稍後有一兩陣雨，氣溫17至20度。後日(20日)是廿四節氣的「大寒」，多雲及有幾陣雨，氣溫18至21度。下周一(21日)部分時間有陽光，初時有一兩陣雨，氣溫顯著下降，全日介乎14至18度。下周二天晴乾燥，早上相當清涼，氣溫介乎13至18度。自動分區天氣預報更顯示，位於新界的上水、大埔、石崗、流浮山，下周二早上氣溫可能跌至10度或以下，打鼓嶺氣溫更可能低至9度。早上相當清涼，市民出門上班要着番件大褸！
隨後下周三(23日)至再下個周日(27日)一連5日天晴乾燥。
此外，天文台指，受一股偏東氣流影響，周末期間華南沿岸雲量較多及有幾陣雨。受乾燥的大陸氣流影響，下周大部分時間華南普遍晴朗，內陸地區日夜溫差頗大。
「大寒」是廿四節氣中的最後一個，傳統認為天氣比「小寒」時節還要冷，為一年中最為酷寒的一天。
(綜合報道/on.cc)
歌手鄭欣宜（Joyce）日前在其社交平台的限時短片突然公布「已結婚」。
見她一面素顏躺在一個留有鬚子的男性友人的大髀度，狀甚親暱。
不過兩人似老友多過似情侶，因為欣宜已經多次同呢個鬍鬚男子傳緋聞，而欣宜亦講過兩人係死黨。
對此欣宜的經理人回覆傳媒：「個男仔之前已經被報道過好多次，佢係Joyce最好嘅朋友，佢哋一齊參加朋友嘅婚禮，Joyce話自己有結婚，佢講笑啫！」
(on.cc)
冬季流感高峰期持續，據了解，政府諮詢微生物專家的意見，擬安排爆發流感的幼稚園及幼兒中心停課。有幼稚園今日向家長發出通告，指收到衞生防護中心通知，幼稚園將於下周停課。食物及衞生局副局長徐德義就表示，今年流感高峰期幼兒中心及幼稚園爆發流感的數字較以往的高。衞生署衞生防護中心總監黃加慶表示，非常時期要加強防疫措施，故今早已建議183間幼稚園及幼兒中心明日開始停課7天，截至下午兩時半再增加8間。
政府去年宣佈全港小學、幼稚園、幼兒中心提早放農曆新年假期，但今年擬縮減停課規模。據了解，政府決定停課前，曾諮詢微生物專家意見。專家之所以建議局部停課，是因去年疫情較今年嚴重。去年冬季流感高峰期「未到頂」已有兩名兒童流感死亡，加上公院兒科病房入住院高達150%；今年縱然短短一周內有過百間幼稚園及幼兒中心爆發，主要是6歲以下幼童受影響，但暫未有兒童流感死亡個案；目前兒科病房入住率約110%，也未及去年嚴重。故此專家只建議有爆發的幼稚園及幼兒中心停課，希望及早截斷傳播鏈，也避免兒科病房進一步逼爆，減輕公院兒科病房負擔。專家意見認為，目前未有爆發的幼稚園及幼兒中心，可以不需停課。
對於停課一周後學校復課後會否於農曆新年假前再爆發流感，專家意見認為難以永遠停課，停課期間至少可減少爆發，減輕兒科病房壓力。家長也應趁此時段，帶未接種疫苗的兒童盡快接種疫苗。
多間傳媒報道，今次當學校於96小時內錄得3宗或以上流感個案，經衞生防護中心確認便可停課七日。有關做法較中心網上的指引收緊。根據衞生防護中心網上資料，中心以往考慮學校爆發流感的停課安排時會參考疫苗可預防疾病科學委員會去年8月建議的指標。委員會建議的停課指標包括(一)學校有一向健康的學童因流感而死亡、(二)有兩名或以上學童因流感而入住深切治療部、或(三)學童的流感疾病發病率達20%或以上。如達到其中一項指標，建議停課時間為7天。當時並不包括今天政府擬採用的指標，即96小時內錄得3宗或以上流感個案。
食物及衞生局副局長徐德義今早出席公開場合時指，中心一直緊密監察冬季流感高峰期發展，並參考專家意見，如政府去年在流感爆發時使用停課措施。對於今年高峰期爆發群組集中在幼童，徐德義指政府目前已有新計劃到部分小學進行到校注射，當中有300多間小學完成，相信會減少校舍爆發流感機會，而當局亦會考慮是否於幼兒中心及幼稚園推行相關措施。
(apple daily)
台灣藝人周杰倫於2015年1月同昆凌於英國Selby Abbey教堂行禮，喺古堡Castle Howard舉行婚宴，豪花2千萬港元，周杰倫噚晚喺IG貼出同老婆昆凌喺佛羅倫斯嘅旅行相，慶祝結婚4周年，留言﹕「We gonna start this romantic adventure “Back to Back” 結婚周年快樂!」
周杰倫同昆凌重遊5年前嘅旅遊地點，估計二人喺2014年登記註冊後，前往佛羅倫斯玩，見周杰倫喺Ig大晒甜蜜照，一時拖住愛妻隻手行，一時同愛妻背對背擺靚pose影相。
而周杰倫噚日凌晨喺Ig貼咗一張單人相，喺意大利老橋（Ponte Vecchio）取景，背脊靠在橋邊chok個型pose。
此舉居然令呢個位置成為「打卡聖地」，唔少fans去同一個地點，擺出同周杰倫一樣嘅pose。
周杰倫就喺Ig story擺出fans相，笑言啲fans完全唔知偶像喺樓上望住佢哋。今日係周杰倫40歲正日生日，唔少fans留言祝佢生日快樂!
而昆凌都有PO放閃相，留言：「5 year challenge! More to go! @jaychou #10yearchallenge#5yearchallenge #happyanniversary」
五年前同一個Pose，真係好Sweet呀！
(綜合報道/apple daily)
劇集《大帥哥》演員張衞健、蔡思貝、楊秀惠、洪永城等晚上在將軍澳電視城為劇集慶功。當中第二十四集講到譚凱琪飾演的天嬌被洪永城殺害，錄得七天跨平台總收視31.8點，成為2018年二線（9點半時段）劇集單集收視冠軍！《大》播出時因檔期等因素未被看好，但播出後香港、內地以至星馬也錄得好收視，可謂吐氣揚眉。
祝捷會上監製徐正康直言收視理想是「打勝仗」，高層曾勵珍一上台先與張衞健擁抱，她指劇集在內地、星馬反應很好，不少人追問何時開拍續集，她望向張衞健說：「最緊要係劇集嘅靈魂人物，佢令到大家感受到嗰份熱誠，大家都搏命去拍。」
張衞健指拍劇是希望帶給香港人歡樂，相信已經做到，他笑說：「既然慶功宴公司請，咁不如我今晚請揼骨、修甲。」徐榮大爆游說「大帥哥」拍續集，對方態度開始軟化，洪永城笑說：「時裝劇唔鍾意，未來題材都得，2046或者外星人都可以。」
張衞健受訪時被問到是否拍攝續集，他笑說：「一個角色嘅醞釀有時好快，有時要啲時間，《大帥哥》關於軍閥嘅題材，喺我腦入面醞釀咗差唔多三年，期間冇同人講過，要諗我嘅演繹適唔適合今時今日嘅張衞健。如果Hea做就冇得好講，一個月都可以開機。」
他亦對《大》收視好感開心，並指一直祈禱有足夠體力和靈感去應付，希望能將歡樂帶給觀眾：「見到啲基層朋友，夜晚返屋企睇電視劇已經係最大嘅快樂，所以香港人係好需要TVB，希望公司可以製作更多好戲畀大家睇。」
問到成功帶給觀眾快樂，可會激發他醞釀新角色？張衞健笑謂現在要為三個女人煩惱，包括是媽媽、老婆、外母：「就快過年，但我分身乏術不知點算，因為我媽幾十歲，身體不適合去北京過年，但我外母又幾十歲，又不想舟車勞頓那麼勞碌，但我老婆當然要陪她媽媽，而我又要陪阿媽陪老婆喇，但帶我阿媽去北京陪阿外母，又不是很對路，叫她們來港好似拜見我媽，又好似不對路，所以我現在不知該如何處理，真是大帥哥都搞唔掂。」
問到會否相約一齊去旅行？佢就笑笑口話：「問題在我阿媽喜歡的東西，我外母未必喜歡，她們都喜歡的東西，我老婆又未必喜歡，而我喜歡的東西，她們三個就一定不喜歡，所以一起去旅行又是盞搞的一件事，現在要搞掂這個年關先。」
(綜合報道)
佢時不時都會上載囡囡嘅得意相，兩母女餅印咁真係超Sweet！次次都令網民狂派Like，大讚勁可愛！
賈曉晨（JJ）同樊少皇於2015年拉埋天窗，婚後兩年更成功造人，誕下囡囡升呢做爸爸媽媽！
眨吓眼小飯兜已經1歲幾啦，仲好識擺甫士添！
遺傳咗爸媽優良基因嘅小飯兜五官好精緻，人仔細細已經識得將手指仔擺喺唇邊影相，電死人喇！
連媽咪都留言笑佢：「哎喲餵（喂）！這是性感嘴唇pose嗎？」
唔少網民都讚小飯兜生得好靚女，有其母必有其女咁話！
女星袁詠儀（靚靚）現身其主演電影《家和萬事驚》的首映，見她比之前消瘦不少。
她解釋去年接了一套劇需要先瘦後肥，所以為此減肥：「但因為某啲政策問題，一直未開拍，我又唔敢肥番，不過大家見我瘦咗都話幾好。」
她透露花了近兩個月時間，靠運動及食營養餐減了十五至二十磅：「有一段時間仲瘦，但有啲乾，唔好睇，所以我肥番少少。」
問到開拍的話，要增肥幾多？她說：「前期越瘦，後面就唔使咁肥，我為咗唔好咁肥，所以就要咁瘦，我估之後都要肥番二十磅，好似以前咁。我以前都係幸福肥，唔係真係好肥。（你呢世都係幸福肥。）我呢世都係幸福得唔得？以前冇動力減肥，而且又冇人嫌我肥。依家老公（張智霖）好大壓力，佢以前唔覺自己肥，但依家好多人見到我哋都會話你老婆就瘦咗好多，你就⋯⋯（怕你瘦咗有第二春？）好少會發生喺我身上。」
問到靚靚瘦了後，可有獲老公稱讚？她直言：「佢冇乜點講，佢話瘦咗影相好睇啲，佢好少講，但從佢癡望我嘅眼神我睇得出。」靚靚稱現時仍有接其他工作，未有被嫌太瘦，反而個個都讚她狀態好，希望可以一直保持這個狀態。
另外，靚靚在台上講到住屋問題，被問到將來會否為小朋友畀首期買樓？靚靚坦言自己有所準備，但最好當然是他們能自食其力：「有需要就會適當咁幫，如果幫晒佢哋諗，佢就會好癈，我唔想咁。」
(on.cc)
李佳芯聽完都想效法買桃花：「我冇買過，因我唔識分桃花定梅花。」被提議搵馬太（馬國明母親）了解買花，但李佳芯取笑佢話：「我得一個馬太（黃心穎）電話。」但馬明就扮懵，並反問係唔係講緊馬德鐘太太。
馬國明同李佳芯昨日喺九龍塘出席賀年活動，李佳芯指以往新年喺屋企負責擺放全盒食物，而馬國明家中每年都買桃花，細個會喺桃花下不斷兜圈。直至現時有事業有愛情，佢都會保持習俗：「梗係要，行多幾個圈添，因為都係人緣，都想行桃花運，喺劇中放肆，現實中都可以。」
至於會唔會同「馬太」黃心穎夾錢買樓？佢笑笑口認自己好花心：「未傾呢個，未來馬太好多個，我形象好花心。」李佳芯就想以個人名義買樓，感覺會較穩陣，唔打算同男友合資。
(綜合報道)
蔡卓妍(Sa)同男友石恆聰拍拖年幾，時不時就被傳出婚訊，不過向來對感情事以低調態度處理嘅Sa，就以「唔係事實，所以唔回應！」嚟應付傳媒，不過今次罕有地。。。
Sa由以前少女跳跳紮形象，配合風趣可人演繹多部作品，直至近幾年開始，Sa開始轉型走熟女路線，早年曾接拍《雛妓》，獲提名金像獎影后，最近Sa喺新片《非分熟女》中，演出十分破格，不過Sa表示男友石恆聰唔會介意。Sa飾演嘅小敏，有性障礙問題，結婚4年仍然係處女，老公（吳浩康飾演）忍受唔到冇性生活，最終選擇同小敏離婚，之後小敏遇上由法國返港嘅廚師家豪（吳慷仁飾演），因為家豪嘅出現，令小敏鼓起勇氣跳出框框，尋回自己靈與慾！
雖指香港人思想開放，但實際上，講到性問題，大多數人都難以啟齒，唔敢正視問題，這正正是小敏內心世界，如果有呢方面嘅問題，Sa又會唔會收收埋埋﹖Sa話：「小敏面對愛情、家庭、工作，成個環境畀佢好多壓力，令到佢有口難言，其實我覺得幾反映到社會嘅人，唔係淨係小敏嗰種遭遇，有好多大家好想爭取嘅嘢，但因為種種原因，會懷疑應唔應該出聲，我諗大家會有呢個共鳴，應該安分去生活，定係非分一啲想法。」
今次嘅角色較為沉重，喺片場，要唔要收埋自己培養情緒？有冇帶住唔開心嘅情緒收工？Sa表示：「呢個角色同我本身係幾相反，基本上同導演傾劇本嘅時候，佢都叫我演一個同我自己相反嘅你就得，所以對於我嚟講，又唔係話幾大難度，我只要想像一個我平時唔會咁樣嘅我；呢幾年，我拍嘅戲同以前好唔同，由《雛妓》開始打後，唔同嘅地方在於自己點樣去揣摩角色，點樣去理解劇本，我覺得O依家同以前唔一樣，O依家一睇就會知道自己應該點去演，人係需要經歷，O依家處理角色係容易咗。」
今次Sa喺《非分熟女 》中，有好多大膽場面，當中被戲中老公吳浩康摸胸兼摸下體，佢哋相識多年，拍攝時有冇尷尬？Sa笑住話：「我係黐晒嘢架，黐到好厚架，所以係零感覺，我諗吳浩康都係掂到啲好硬嘅嘢。」其實拍攝呢類場面，男演員反而緊張過女演員，Sa話：「係呀，佢幾緊張，拍嘅時候，佢出晒汗，有時係要cut機，抹完汗再嚟過。」
提到Sa同吳慷仁喺廚房全裸做愛嘅一幕最為激烈，Sa話：「有遮到架，呢套係一套戲，大家唔需要太過焦點，我好欣賞吳慷仁，佢好有心地要成為一個好好嘅演員，所以佢乜都嘗試，每一日都會傾劇本，研究點樣拍得順利啲，因為嗰啲動作戲都幾難拍，因為又要就鏡頭，呢場戲拍咗一日，但之前有日放假，我哋係特登返片場試機位，嗰日又一日。」講到事前溝通，Sa認為最重要係互相信任，雖然同吳慷仁第一次見，但Sa大讚對方好gentlemen。回想呢場戲，Sa坦言覺得拍得好辛苦：「喺鏡頭前面睇，兩個好似好自娛，但其實好辛苦，首先嗰張枱係好凍、好硬，跟住現場仲有10幾個人，喺心態上要高度集中，如果唔集中，好可能就要NG，好彩我哋呢場一take過。」
同吳慷仁拍呢場戲，有冇同男友石恆聰備案﹖Sa話：「佢好free，因為佢喺外國長大，同埋佢好鍾意睇戲，佢睇戲睇得仲多過我。」每次睇完戲，男友有咩評語﹖Sa笑指：「呢啲唔使叫，自動波啦！」畀唔畀男友探班﹖Sa好大方咁話：「佢要嚟咪嚟囉！冇所謂，拍戲之嘛，我拍戲成功與否，都冇乜所謂，現階段係幾舒服，就算部戲得唔得，唔會對我有好大影響，所以我好自由地選擇我嘅劇本，好自由地拍唔同嘅戲。」
對於有影評大讚Sa嘅演技相比起《雛妓》有進步，問到有冇信心角逐今年金像獎影后？Sa處之泰然咁話：「我覺得O依家係好舒服嘅狀態，一套戲成唔成功唔係一個人，最重要係自己盡咗力，唔好輸個人，O依家比較得心應手去處理角色，心態好重要，如果畀好大壓力自己，又或者好有目的地去做所有嘢，你會好痛苦，而且唔會做得好，你一定要最relax先做到最好嘅嘢。」
Sa同男友石恆聰拍拖年幾，時不時就被傳出婚訊，不過向來對感情事以低調態度處理嘅Sa，就以「唔係事實，所以唔回應！」嚟應付傳媒，事實上，Sa直言現階段未有計劃過。係咪想事業有所成就，得到影后一獎先諗人生另一個階段﹖Sa話：「唔關所有嘢事，到時個天會話畀你聽，你要行邊一步，暫時處於好開心嘅狀態。」
人漸大，思想成熟咗，諗法會深層次，再加上經歷上一段婚姻失敗，從而令Sa對婚姻有唔同睇法：「我以前試過好衝動，所以我O依家會更加覺得，婚姻真係一個承諾，呢個承諾係包含好多嘢，唔係話O依家好開心，兩個人我愛你你愛我，就去做一樣嘢，有好多嘢要砌好晒先，我覺得一定要計劃好先可以行呢一步，暫時處於我好開心，佢好開心，大家相處好舒服嘅狀態。」
提到好姊妹阿嬌結婚當晚，佢親手將花球送到Sa手上，似乎阿嬌心急過Sa﹖Sa笑住指：「一個祝福啫，佢送個花球畀我之後，我今年拍咗4套電影，有3套都要着婚紗，唔緊要，拍戲啫！其實我都唔急，都唔知大家急乜嘢，問個天啦！」
(Apple daily)
黑面黑出星途來嘅落選港姐工藤佑采，網上言詞一向尖峰火辣，曾先後狂寸莊思明、黃心穎、無綫等，點知又畀佢寸到獲網友瘋狂洗版撐，真係估你唔到！
眼見佢破壞力驚人，不過都仲有人大膽挑機，今次就有不知名網友喺社交網Inbox佢，仲……仲開到聲問價，呢個舉動，果然成功辣㷫咗工藤佑采！
工藤佑采二話不說直接公開對方帳號同二人對話，冇打格無遮無掩畀大家一覽無遺，對話內容就見到對方先用英文問佢有冇需要接Job，跟住再用中文問多次佢有冇興趣賺外快，更開出$5000，面對咁嘅侮辱工藤佑采即刻爆粗回佢：「Fxxx oxx」同大便emoji，點知對方再開出$7000，又話只係約出嚟飲嘢，工藤佑采問佢話唔明對方指嘅「外快」係咩，跟手再整多個舉中指Gif回敬，最後對方就用日文答佢多謝就結束對話。
面對咁嘅騷擾，工藤佑采嬲到震發文話：「任何人唔好再發無聊信息畀我！如果你提出性交易，咁我會報警！」唔少網友都讚佢做得好，今次仲輪到佢可以出嚟「鞭人屍」，女仔遇到網上騷擾真係要出聲！
(on.cc)
