藝人袁偉豪（Ben）尋日（10日）38歲生日，佢就約埋「將軍澳福利會」一班會友胡定欣、胡蓓蔚、單立文齊齊慶生，咁當然都唔少得女友張寶兒啦，Book好晒餐廳準備晒Cake，都真係唔話得，之後又齊齊合照。
而Ben同張寶兒齊孖到實煙韌切蛋糕，當眾放閃。
不過……喺咁重要嘅日子，Ben就喺社交網吐心聲，講到出口生日佢其實係想同第二個女人慶祝…
Ben口中嘅女士，其實係指佢媽媽，趁住今日母親節，佢都好識做咁冧媽媽，大晒孝順仔一面：「其實每年生日朋友問我想怎樣慶祝？想要乜嘢禮物？其實我只想簡簡單單跟大家吃飯聚一聚，我已經係滿足！因為生日其實應該要為我媽媽慶祝一下，因為生我出來的人是我媽媽👩感激有你們福利會的朋友 P.S 過去一年我活得很充實」
真係孝順，抵錫！
(on.cc)
今日係一年一度嘅母親節，已經係三子之母嘅藝人張栢芝，呢日喺社交網甫出囝囝送畀佢嘅母親節禮物，就係一個手作紙製獎盃，上面仲寫住「1st」，二仔謝振南（Quintus）解釋因為覺得張栢芝係世界上最好嘅媽咪，相信聽到呢句栢芝都冧晒，無論照顧三位小朋友有幾辛苦都會覺得係值得！
個獎盃入面仲寫住「From Quintus To Ceccillia」，睇真啲Quintus寫錯咗媽咪個英文名，應該係「Cecilia」先啱。
而5月12日對栢芝嚟講除咗係母親節之外，撞啱仲係Quintus嘅9歲生日！
栢芝請咗一大班小朋友同囝囝一齊慶祝，佢仲準備咗一個波鞋款嘅蛋糕，Quintus喺切蛋糕時笑得好開心，而栢芝亦好照顧在場嘅小朋友，一早預備咗好多禮物分派畀佢哋。
雖然忙住湊仔，不過栢芝都有喺社交網甫出同媽咪嘅合照講一聲「母親節快樂」。
之後栢芝再上載Quintus生日會嘅花絮，佢哋成班人去咗泳池到玩，栢芝仲同Quintus比試水中立，睇嚟佢哋真係玩得好開心。
(on.cc)
藝人陳凱琳在情人節誕下兒子鄭承悅（Rafael），令到今個母親節有雙重意義，輪到自己要照顧BB更覺媽媽偉大，陳凱琳說：「第一個母親節自己都係媽媽，感觸好大，由生BB出世開始，自己人生都改變，冇諗過喺事業開始嘅階段結婚、生仔，但係感覺比以前得到嘅所有更加幸福。」
「小嘉穎」的出現令到整個家庭充滿生氣及溫馨氣氛，她希望BB健健康康，快高長大。更勾起小時候媽媽不辭勞苦的愛護，她說：「喺加拿大時，媽咪放低咗工作做全職家庭主婦，最記得媽咪每日都會突登煮一啲熱辣辣嘅飯餸，喺午飯前放喺學校儲物櫃，等我哋日日都好幸福有熱辣辣嘅午飯食，仲有每日接送返學放學。」
陳凱琳指會承傳媽媽給兒子最好的營養，現時會堅持餵人奶，到BB長大會親手煮一些好味道的食物，讓BB快高長大。
陳凱琳自言成長時亦有乖、有百厭的時候，到做了媽媽更明白到媽咪實在受了不少冤屈，加倍感受到媽媽的耐性、愛心，自己也會以媽媽為榜樣關懷兒子，她說：「我同媽咪每日都好溫馨，冇佢嘅支持、鼓勵，都未必仲喺娛樂圈。依家媽咪又經常嚟探BB，有時見我好攰又叫我去瞓覺幫我睇住BB，媽咪真係好偉大。」
陳凱琳小時候跟媽媽的合照
(on.cc)
港姐出身的單文柔去年與陳展鵬結婚，上月誕下愛情結晶品Quinta「小豬比」，剛坐完月的她正努力學習當一位新手媽媽，面對愛女經常眼碌碌四圍望，即使一個手勢、一個笑容都會令她大感甜蜜！
故趁住做媽咪之後第一個母親節，單文柔執筆寫信給囡囡，表示望能成為她長大的玩伴，並叮囑囡囡要吃得飽、睡得好，字裏行間濃濃母愛。
談到湊B難忘事，單文柔接受訪問時滔滔不絕，她說：「記得有次幫佢掃風，初生BB頸骨好軟，托住佢條頸時，唔小心叉住佢條頸，佢好似窒一窒咁、透唔到氣咁，仲即刻成個人坐直瞪大眼望住我，不過冇嬲同唔高興，個樣仲好萌，呢個情景到呢刻都好記得，點解自己咁大意。」
更指曾有段時間因乳線炎，未能餵母乳給囡囡，令囡囡谷便便，至後來可以恢復餵奶時，沒料囡囡的便便暢通之餘，便便量比平日還要多：「當時換完片冇耐，同佢玩完就打側身抱佢，點知發現佢半個身都係便便，嚇到我呆咗，但佢都只係瞪大眼望住我，冇喊，名副其實『屎撈人』咁樣，好崩潰。」
作為新手媽媽，單文柔不諱言出院後的心理及生理也感到驚慌，因展鵬忙於開工，雖然有陪月姐姐同傭人姐姐，但最信任的仍然是枕邊人，幸而日復日不斷學習，從餵奶到如何觸摸囡囡，直至掌握到竅門，才慢慢把緊張放下。
做媽媽真係唔簡單，要繼續加油呀！
(綜合報道/on.cc)
無綫處境劇《愛．回家之開心速遞》中有幾對螢幕情侶都深受觀眾歡迎。
有「龔燁」同「熊若水」
「大小姐」與「送水輝」
「熊尚善」同「潮偉」
仲有「博士」同「Mandy」！
而「博士」馬貫東向來對感情事相當低調，不過昨日佢突然喺社交網發文，疑似宣布同圈外女友分手。
佢提到：「與妳我有關的回憶不會抹去，都在心裏，謝謝妳的一切。我們之間沒有涉及其他人，只是現在換了角色，帶上祝福，回到最初。願妳我未來更幸福。」
唔少網友及圈中好友，包括阮政峰、周嘉洛、蘇韻姿及謝芷倫等，都紛紛留言送上關心。
內地女星章子怡在2015年為老公汪峰誕下囡囡「醒醒」，一直想追第二胎的她早前被爆再度懷孕，故將會停工專心安胎。
章子怡亦一直未有開腔回應傳聞，昨日她一家三口現身深圳，她化身「跟得夫人」為老公演唱會撐場，適逢昨日是兩公婆的結婚四周年，她在社交網分享多張演唱會綵排的相片。
相中甚有表演欲的「醒醒」在台上手拖着爸爸跳舞，畫面十分溫馨。
而章子怡上載全身照，她身穿黑色外套及短褲，坐在台上聽老公唱歌，身形纖瘦的她未見孕味。
她留言：「我們的結婚紀念日！剛好是峰哥深圳演唱會綵排，餘音繚繞，醒寶翩翩起舞！我珍愛，我們共度的美好時光，就這樣認真美好地生活吧。」
汪峰亦有留言冧爆老婆：「老婆，日子是我們一起走過的；愛是我們共同鑄就的；未來是我們攜手創造的；這一生一世是我們永生相守的；結婚紀念日快樂！愛你，老婆！願你快樂幸福！」
(on.cc)
無綫劇集《鐵探》尋晚播出大結局，相信大家對「梓Sir」袁偉豪（Ben）上訴得直大感痛快，而「老婆」王君馨對佢不離不棄，亦相當令人動容。
今日係Ben嘅38歲生日，王君馨喺社交網為好拍檔慶生，仲分享咗啲拍攝花絮並留言：「大家知唔知，原來呢一場碼頭戲就係全套鐵探最尾嘅一場戲。
嗰日見到垶Sir，嘩咗一下，睇到佢咁多個月嘅努力沒有白費，效果驚人！
戥呢位好拍檔開心和驕傲。好開心係呢套劇裏面可以做你老婆呢個角色，可以一直睇住你嘅journey。😊 尋日終於播完大結局，因為拍緊唐人街，冇得喺現場祝你生日快樂，上年拍攝鐵探的第一場就是你生日😆，真係好橋，希望呢套劇集就係你最好嘅生日禮物！Happy Birthday Ben! 🎂 繼續做你喜歡做的事！支持你！👊💪」
網友除咗紛紛留言祝Ben生日快樂之外，仲大讚佢哋好襯：「你哋真係有夫妻相好襯，今年最佳螢幕情侶係你哋喇，之前牙佬花曼都係咁襯，今次仲襯！」
亦有唔少網友話期待佢哋再合作，仲話之前喺劇集《城寨英雄》佢兩個最後陰陽永隔，今次《鐵探》又係咁，下次一定要Happy Ending呀！
（on.cc）
「千憶新抱」李徐子淇（Cathy）出席活動，她透露兩星期前剛到約旦敍利亞難民營探訪，令其感受甚深：「當中八萬個難民營，有一半都係小朋友，由於太多人好似變成迷你城市。之前自己都探訪過好多貧窮地區，今次好唔同，因為原本敍利亞嘅生活唔差，可以四餐溫飽同小朋友有書讀，所以佢哋係過緊一個平凡生活，但全因戰爭變成一無所有。」
又指戰爭對我們而言是很遙遠的事，但今次能親身有機會與他們談天，感受到其痛苦。
Cathy還透露在難民營中，每星期接近有100個嬰兒出世：「佢哋喺營中出世係冇任何國籍，亦冇權利保障同自由，所以狀況係好慘，我哋都有興建兒童教學中心同保護中心，盡力幫佢哋。而阿仙奴球隊，亦喺當地整咗幾個足球場，仲有前隊員教佢哋踢波，希望小朋友有正常生活。」
另外，談到明天是母親節，她指會一家人吃飯慶祝…
「一家人齊整已經好感恩，加上之前去完難民營，見到好多媽媽同自己家人失散，所以可以一家人食飯已經好開心。（小朋友送咩禮物畀你？）通常係小勞作，都好滿足！」
（on.cc）
內地女星范冰冰一直被傳會喺今年復出，言猶在耳，早前就已傳出佢鐵定參演荷里活大製作《355》，跟手又有內地導演透露二人快將有新作，似乎已經整裝待發，準備以最佳狀態正式復出…
她早前素顏現身西藏大昭寺禮佛，不少網民注意到她的樣子似乎有點不一樣。
其招牌「駝峰鼻」竟離奇消失，以往的駝峰鼻是鼻樑上有個突起硬塊…
原本的鼻子
但近日發現冰冰的鼻子變得比以前平滑筆直，因而傳出是為了順利復出改運而「修改」了。
大家覺得是否冰冰的鼻子整容了？
(綜合報道 / on.cc)
現身出席慈善晚宴，為其自家旗袍品牌在慈善晚宴主持大局，同時她亦宣佈懷第二胎，現已五個月身孕，可謂好事成雙。
育有歲半兒子的她表示，第二胎佗女：「所以特別開心，預產期九月。（計劃之中？）係，但冇諗過咁快中，依家都返少咗工，都係Home Office。」
已育有一個仔仔的時裝設計師蔡毅明宣佈再度有喜！恭喜恭喜！
說為籌備是次時裝騷，花了不少時間和心血，同時又要湊仔，因此覺得頗為辛苦。
她說：「今次全程嘔，又好易攰，特別辛苦，覺得好多媽媽好犀利，事業要好堅持先得。（幾時休息？）真係需要，有啲攰，要瞓多少少。」她說最搞笑是一月時一決定做show，便驗到再度有喜，憑第一胎經驗是會輕微孕吐，點知第二胎由知道一刻開始便嘔吐大作，妊娠反應提早出現，雖然期間比較辛苦，但最終都順利完成旗袍騷。
(on.cc)
