藝人余德丞與蔡思貝因合作拍攝旅遊節目而認識，之後惹上緋聞，關係撲朔迷離。
問可想與思貝拍劇？他表示原來兩人之前合作了無綫電視電影《警察故事2019》，當中兩人飾演情侶，但笑言只得幾場戲：「我只係點綴一下角色，但都算有個真正嘅交流，就係我揸車佢搭車，佢諗緊第二啲嘢，我逼佢同我結婚，就係咁。（冇親熱鏡頭？）冇喎，諗住大家喺一齊遊吓車河，但點知喺車入面，因為我逼婚佢唔理我，跟住就鬧交。」
問可想再與思貝拍劇演情侶奉旨親熱？他笑言：「咁真係要問監製先得，會唔會想將我同佢擺埋一齊咁做，但工作還工作，不論對手係邊個都要做，所以唔會特別強求，最緊要合情合理。」
(on.cc)
藝人陳敏之同林盛斌（Bob）尋晚兩家人齊齊圍埋打邊爐，咁烚吓烚吓之際，敏之嘅囝囝雷子樂同Bob三女林機兒（機機）咁啱就坐埋一齊，而喺電光火石之間，陳敏之同Bob嫂就忽發奇想，決定嚟個對親家，仲愈食愈有機，有「好消息」公布！
咁子樂本身就同機機同枱食飯好正常，敏之就突然拍片，爆料指原來子樂睇中咗機機，兩個小朋友都唔知咩事，點知Bob就嗌機機望住子樂，不過就點都估唔到年紀細細嘅子樂大發冧功，喺佢同機機對望時，將頭仔愈靠愈埋，啲大人紛紛起哄係咁Wow。
面對住又相機拍片，又有咁多雙目光，再加埋子樂嘅頑強攻勢，機機都忍唔住怕醜起上嚟，忽然低頭食嘢兼偷笑，餘光仲掃去望鏡頭，成個少女樣出晒嚟。
之後Bob嫂亦喺社交網大讚子樂，講到明鍾意子樂活潑主動，睇嚟今次「相睇」成功，兩位媽咪應記一功喇！
(on.cc)
藝人陳松伶（松松）接受電節目主持車淑梅訪問，問到松松被指當年離開無綫時被傳有情緒病？她說不想細究原因，反而想分享自己重新振作的經歷。
她坦言覺得其他人，甚至藥物都不能幫助自己變得強壯，一定要自愈，要自己照顧自己，她說：「好彩我喺上海工作嘅時候，遇到張鐸，佢畀咗我好大嘅空間。最差嘅情況係曾經唔想見人，唔想出門口，不過我依家已經好番，唔想再提！」
遇上張鐸的時候，松松以為他的年紀比自己大，怎料他竟比自己小8年，松松的反應是「得啦！多謝晒，唔使喇！」，起初她覺得這是一個錯誤的決定，但最終被張鐸感動了。
提到松松最近到廈門探老公張鐸班，不慎在雨中跌倒，更連翻幾個觔斗，更暈低了15秒，她的面撞瘀了，膝頭更掉了一塊肉，她打趣地說已拍照留念。其實這一次並非松松首次腳部受傷，她在17歲時放學回家煮飯，煲了眉豆雞腳湯，誰知把湯打翻了，燙到自己的腳，又跌傷了屁股，住院和在家休息各一個月，現在她腳上還留有疤痕。
問到松松當年和黎明演電視劇《天涯歌女》時，可有意亂情迷，她說：「仲有郭富城、林家棟、黎耀祥，佢哋都有教我演戲。依家佢哋已經係獨當一面、首屈一指嘅實力派演員。」至於與他們合作，有沒有談戀愛的感覺，松松說：「一見到已經嗒晒糖，好靚仔，好容易入戲，不過只係甜滋滋咁閃咗一下，因為我實在太忙。」
(on.cc)
歌手吳若希（Jinny）出席美莊園尖沙咀總店開幕活動，任剪綵兼獻唱嘉賓，Jinny說早上剛陪囡囡上完芭蕾舞興趣班，而快將兩歲的囡囡剛為N班面試，正等待好消息。
對於早前她與老公陪囡囡面試黑老公面一事(相關新聞：https://bit.ly/2D0o00m)，Jinny一臉茫然說：「喺公眾場合好少黑佢面，最多冇表情，返屋企就會反佢白眼。嗰日發生乜事呢？淨係Focus喺個女度，有女喺度，我唔理老公，冇印象有黑面。（幼稚園面試由入門口開始計分，所以緊張？）有聽聞，我好似冇叫過佢，冇印象有同佢講過嘢。（你哋一齊去喎？）係一齊去，記得等得耐有叫佢帶女出去，冇耐到阿女，印象中冇同佢講嘢，係有打過電話畀佢時急急地。」
她透露女兒本月23日兩歲生日，去年生日拍了一輯寫真及去主題樂園玩，今年撞正復活節假期，可能遲少少去。
有女萬事足的她，不諱言同老公感情淡咗，她說：「係，我哋唔係好熟，基本上好少傾我哋嘅嘢，一係傾個女，一係傾工作。」
她透露老公會將澳門的紙品生意正式搬來香港，她負責做介紹人助老公創業，問會否收佣？她笑言一家人冇特別計：「生意係佢負責，我自己錢自己袋，希望佢做好啲，順順利利。」
(on.cc)
已故藝人陳百強（Danny）父親陳鵬飛離世，終年95歲。資深傳媒人查小欣證實消息，並在社交網發文悼念：「據知老人家有福氣，走得安詳，吃完早餐，上了洗手間後頭暈，跟着便走了。」
問她陳爸爸是否4月5日離世？她說：「應該是，因為今早收到消息話係尋日。」她又透露陳爸爸生前點滴：「只知（陳爸爸）去世前如常返舖頭及飲茶，每日中午一點幾，他都會去陸羽同仔女一齊飲茶。」至於陳爸爸仙遊原因，她表示不太清楚，因其家人似乎想保持低調。
而跟陳爸爸長子陳百靈相熟的DJ車淑梅回覆東網，表示已致電慰問陳百強長兄陳百靈，她指陳百齡表示：「阿爸去得非常安詳，沒有半點兒痛苦的迹象，多謝大家關心。」又表示一年多前曾欲聯絡陳爸爸接受訪問，重溫陳百強的軼事，不過陳家指父親健康欠佳而婉拒了。
去年環球唱片公司曾舉行陳百強60歲冥壽紀念演唱會，環球董事總經理黃劍濤表示：「尋晚收到呢個消息，非常shock，非常尊敬呢位長輩，稍後一定會出席喪禮，送對方最後一程。」
(on.cc)
今年53歲的郭富城凍齡有術，身形更是fit到漏，當年更是青靚白淨小生，風靡萬千少女！
不過城城10年前上內地節目受訪的影片最近翻Hit，在訪問中，城城暢談當年入行的往事，自爆竟然被人嫌醜！
他表示18歲那年進入無綫藝員訓練班，雖然成績拿了全班第一名，但老師竟然要他不要得意：「你的外形，是我們同班同學裏最差的一個！」
主持人聽到男神竟然被指醜樣，當堂嚇傻：「老師眼睛有問題吧？」
不過城城謙虛地說：「因為那個時候我長得一點也不帥，到現在我也不覺得自己帥。」
被問到當時訓練班有哪些同學時，城城就表示有林文龍、麥長青：「他們這個時間都比我帥！」
而「全班最醜郭富城」昨日（5日）更登上微博熱搜！
網民都表示如果城城都不叫靚仔，誰會敢認自己是美男子呢？
其實城城曾經兩次入讀藝訓班，包括1984年第2期藝員招募班成為舞蹈員，同期有謝天華、鄧萃雯等。
而第二次就是1988年第14期藝訓班，同期就有城城提到的林文龍及麥長青外，還有林家棟、黃德斌等人。
(on.cc)
鄧紫棋（G.E.M.）解約風波至今仍未解決，不過無損G.E.M.開騷心情，依然專心佢嘅巡唱。
不過唔知佢近排係咪攰過頭，出名係「小巨肺」嘅佢搞到要吸氧氣開騷，見佢雙眉微蹙攞住氧氣罩不停吸，個樣都幾辛苦。
之後佢喺社交網留言話：「人生第一次，吸氧氣開演唱會⋯真難忘！Needed some oxygen！Lol. Unforgettable！」真係唔好咁操勞喇！
據工作人員透露，昨日係G.E.M.雲頂演唱會第一場，雲頂位於馬來西亞蒂迪旺沙山脈，海拔約2千米。喺呢度唱歌兼跳舞需要用特別多體力，佢唱到一半返後台換衫時，出現頭暈徵狀，最後要吸氧氣去維持體力。
出名扮嘢叻嘅王祖藍早幾年曾經上演過呢幕，當時佢喺內地一個綜藝節目扮G.E.M.唱歌，中途唔夠氣要攞個氧氣嚟吸。
估唔到王祖藍一個搞笑演繹竟然可以預測到G.E.M.喺雲頂發生嘅情況！
(on.cc)
47歲的黎姿（現名黎珈而／英文名：Gigi）於08年嫁給身家上億的商人馬廷強，並生了一對8歲孖女及6歲孻女，二人結婚11年依然好恩愛。
日前黎姿與老公馬廷強現身中環置地廣場，但不是二人世界，而是相約4位女士疑似洽談公務。
當日下午5時左右，貴為上市公司CEO的黎姿一身行政人員打扮，化上淡妝，樣貌零瑕疵，同以前做演員時候一樣咁省鏡。
黎姿與同行女士在商場內行了大約20分鐘，她拿着一張紙邊行邊講，有時會駐足指手劃腳，其他人即圍住細心聆聽，而老公則坐在輪椅上尾隨在後。
馬廷強好貼心，見大家行到有點倦意，即建議到附近餐廳坐下「醫肚」。
他們最初選擇露天位置，但因為只能坐4個人，之後轉到室內。黎姿早前透露自己有老花，她一坐低即戴上老花眼鏡，繼續拎住張紙不停講、不停講。
其間有人發現記者，黎姿起初有點愕然，問是否傾公事？她說：「唔係，朋友傾偈啫。」
同枱全部女士，馬廷強似乎有點納悶，大約6時便撇低老婆先行離開。馬廷強獨自坐電梯去到置地文華酒店旁等上車，其間自己企起身，等了一會司機便落車幫手拎輪椅到車尾箱，而馬廷強則自己上車，他還禮貌地說：「天氣凍番又落雨，小心冷親呀。撞到朋友啫，我哋傾偈咋。」
其實馬廷強一直都是黎姿的最強後盾，有傳當年二人結婚，馬廷強以7,000萬 港幣購入位於西半山的蘭心閣複式單位，作為送給黎姿的結婚禮物。
有指黎姿的弟弟黎嬰在07年遇上車禍，昏迷3個月差點變植物人，令黎家上下都好徬徨，幸有馬廷強在黎姿身邊給予無限量的支持，亦替其渡過難關，讓黎姿感動不已，當時已認定他是可以付託終身的好男人。
(apple daily)
26歲的人妻吳若希，跟澳門闊少老公何兆鴻（Alex）育有囡囡Giselle（乳名淼淼），今年4月才滿2歲的淼淼，已經要預備接受香港的填鴨式教育。
日前吳若希和老公帶囡囡到幼稚園面試PN班，被讀者黃小姐透過「爆相爆片」分享過程，吳若希着白恤衫襯黑色背心裙，以「斯文媽媽」look現身，全力以赴望為囡囡加分。
當日是進行第2次面試，幼稚園主力睇家長的表現，黃小姐在電話表示：「嗰日下晝3點9，見到吳若希同佢老公帶囡囡去2nd in，入到學校吳若希刻意背住門口企，全程好有耐心陪囡囡玩，不過佢老公就掛住玩手機，唔知係咪覺得尷尬呢？」
入到課室之後，面試正式開始，黃小姐說：「佢老公仲掛住玩手機，似乎唔係好熟悉程序，因為入課室已經開始計分，2nd in父母要答問題，應該要表現得好熱衷，我見到吳若希都有啲黑面睥住老公，不過佢囡囡就好乖，冇走嚟走去，亦冇扭計。」
問到吳若希表現親切嗎？黃小姐說：「ok，雖然冇特別打招呼，但有小朋友同佢囡囡玩，佢都踎低同其他小朋友玩，只不過佢老公好似好忙咁。」
從讀者提供影片所見，吳若希全程笑容滿面，好有耐性又彎腰又蹲下逗囡囡和小朋友，表現得好有愛心。
早前吳若希在社交網展開「30 days婚變challenge」，連續30日讚老公為婚變闢謠。
完結後Alex亦在IG撰文向老婆示愛：「如果陪伴係用時間去衡量，咁我應該每日掛住你86400次。見不到，會掛住你。見到，也會掛住…這女人常常問我，『我係咪好惡？我係唔係好野蠻？我係唔係好任性？』此時此刻，我只可以引用某天王的金句『係，你好惡，你好野蠻，你好任性，但，係我揀的。』多謝妳，多謝妳給這個溫暖的家，多謝你給我那麼打意的小女孩，沒有你，我甚麼都不是，沒有你，我不會撐到今天。I Love you until the end of my life.」
(apple daily)
藝人鍾嘉欣成年冇蒲頭，最近佢終於返港出席活動，今次佢仲留足3星期，機會難得，佢就即刻約咗大班藝人好友出嚟飯局。
尋晚佢就約咗4年前一齊拍電視劇《華麗轉身》嘅演員見面，就好似阿姐汪明荃、黃心穎、王君馨、劉松仁同方力申等，阿姐仲爆料話因為岑麗香仲坐緊月，不能參加飯局，如果唔係場面仲熱鬧！
當中阿姐同黃心穎等就喺社交網放出合照，阿姐好感慨咁話當時拍得好開心，同事們都結下好好嘅友誼，非常難得！
而尋晩嘉欣仲帶埋囝囝出席，阿姐猛讚BB非常可愛、人見人愛添！
而心穎就話原來尋晚劉松仁係驚喜現身，搞到佢都要即刻捉實對方嚟個Selfie～
睇佢哋又齊人又團結，今餐飯局簡直係難得兼難得啦！
(on.cc)
