宣布求婚成功，佢喺IG晒出拖住未婚妻隻手嘅相，目測鑽戒有兩卡咁大粒，佢留言：「年紀漸長，很多朋友都有『she says yes』的po文，今日，到我了，she said yes。謝謝，新年快樂。#共你熱戀可抵擋冰天雪地#全世界講一次恭喜」

C君（鄭詩君）去年曾經在農夫演唱會的棟篤笑環節中，向觀眾透露會在2019年迎娶拍拖3年的港台DJ女友黃天頤。C君果然講得出做得到，皆因他昨晚於IG宣佈求婚成功，更貼出拖着未婚妻黃天頤的照片，而黃天頤手上更戴上一隻約兩卡重的鑽戒。C君在IG寫着：「年紀漸長，很多朋友都有『she says yes』的po文，今日，到我了，she said yes。謝謝，新年快樂。#共你熱戀可抵擋冰天雪地#全世界講一次恭喜」。

至於未婚妻黃天頤則在自己的IG貼出與C君擁抱的照片，寫着：「雖然我完全聽唔到求婚主題曲《無得比》，但睇到你口震震同我講很久前你已經覺得呢段關係可以圓滿，呢個畫面先係真正嘅無得比。多謝 @ckwancheng 同埋所有人，坐緊月嘅，北京返嚟嘅，要返工嘅都喺齊度，難得咁人齊。一個愛字，不能代表你們的心意，但我愛你，也愛你們。」張繼聰、薛凱琪、容祖兒、黃翠如等均有留言祝福一對準新人。

C君表示：「我哋原本決定咗今年係婚期，知道要book場地可能要早一年去做，我哋早咗兩、三個月去睇場地，真係搵到個好鍾意。其實我女友覺得，你又未求婚，又book咗場地喇，你會唔會唔求婚架？當然佢會咁諗，或者係求婚冇咁細緻，咁我咪同佢講，成個場地點佈置，要搵啲咩人，佢自己picture唔到當晚係點，我就喺佢唔知情下，搵人砌咗成個迷你版嘅場地佈置擺咗喺屋企。」

C君繼續補充：「佢今日要返工，希望佢收工即刻見到呢樣嘢，佢一收工返嚟，見到成間屋唔同咗，我就喺呢個唔同佈置下求婚，中間有一段告白，喺佢未喊之前自己已經喊咗。呢樣嘢其實都幾激動同熱血，令自己好感動。我平時收集佢朋友啲電話，一路都唔知道我認識佢啲朋友，當佢戴上戒婚之後，所有人一齊出嚟慶祝，點知佢都估到一半。」

C君又指今日對他們來說有特別意義：「點解會揀今日去求婚，因為呢個日子，呢個日數，二號呢個日數，對我哋有紀念作用，例如我哋拍拖嘅日子、佢嘅生日嘅日子，諸如此類，另外仲有一個好大原因，希望係農曆新年前，做咗呢樣嘢，因為我哋農曆新年面對雙方好多家長，親戚聚會時候，非常名正言順。佢將會係大家新抱、孫新抱，而我亦都係佢屋企嘅女婿咁樣一個狀態，仲有兩日，就大家能夠開開心心。」問到是否「雙喜臨門」？佢話：「女友冇BB住，如果有就唔使求婚啦，你問吓陸永有冇同佢老婆求婚。（咁佳期是何時？）今年內，會擺酒，因為想氹老人家開心。」

提到告白內容會不會「熱血」，C君表示：「熱唔熱血我唔知，但我求婚揀選嘅音樂，我自己認為有啲熱血，係黃貫中，係我一個偶像，佢嘅歌曲叫《無得比》，一首咁嘅歌，呢首歌其實都好熱血，到底佢係唔係一首情歌，唔知阿Paul當時寫嘅時候心情係點，有好多唔同講法，但如果呢首歌攞嚟做一首求婚嘅歌，有權係一首好熱血嘅歌，而我亦覺得一個求婚、一個婚禮過程，係好須要熱血。」

他的未婚妻、港台DJ黃天頤接受《蘋果》訪問表示：「好開心，都有感動到眼濕濕。」之前完全估不到C君會求婚？天頤說：「估唔到呀！我今朝趕住返公司報榜（歌曲流行榜）。」