藝人陳豪出席「童跑同樂馬拉松」活動，透露已第四年參與。
問到為何不帶同三個小朋友出席，他笑謂：「帶埋佢哋就會做湊仔公，全程照顧住佢哋。（老婆陳茵媺話平時有同你爭湊仔？）呢個好自然啦！小朋友都黐我哋，平時出街都會睇佢哋食唔食得飽，穿唔穿得暖。」
相關新聞：【原來仔仔會同小公主鬥…陳茵媺爆陳豪超識湊小朋友】https://goo.gl/zWwT43
真係廿四孝爸爸！難怪幾個小朋友都咁嗲爸爸啦～
正在休息的他表示計劃與太太出埠二人世界，但否認是造人之旅：「應承咗每年都會有一次，到時媽咪會嚟香港照顧小朋友，仔女都講道理，會早啲同佢哋講，等佢哋有心理準備。」
而陳琪則帶同大女現身，笑指被對方嫌棄跑得慢：「佢話跑到終點打畀我，咁佢就可以攞第一名，叫我慢慢跑，家姐平時喺屋企有玩吓跑步機，細女反而成日想做香港小姐，細佬就鍾意唱歌多啲，如果唱得叻，等佢大個畀佢參加歌唱比賽。」
(綜合報道/on.cc)
昨晚《大帥哥》播出大結局，在劇中飾演馬炭的洪永城由忠變奸，再由奸變忠，最後犧牲性命與蒙大帥同歸於盡。大結局睇到成班網民都眼濕濕，仲係咁話唔夠喉，希望再出續集！
洪永城喺張衞健昏迷中同對方告別，稱自己同羅義都鍾意飲洋酒，叫張衞健倒喺地下畀佢，最後洪永城微笑住講：「保重啦!大哥!」
相關新聞：
【網民感動到喊 大帥哥張衞健：唔要權唔要勢唔要錢只要⋯】https://goo.gl/7Amwu1
【入行18年終於憑《大帥哥》彈起 「天嬌」譚凱琪：做豬年新娘都唔錯】https://goo.gl/rTerZN
在劇中與張衞健有大量對手戲的他，坦言在張衞健（Dicky）身上學會毅力，做事追求極致，更自爆拍《張保仔》時是模仿Dicky，但自愧四成功力都沒有。
洪永城喺IG上載跟張衞健合照，還撰寫一封信給對方，多謝一路以來的帶領，感情真摰動人，更謂張衞健就是他心目中的最佳演員。
全文如下：
張衛健大哥：
大哥，你成功了！
記得剛開始拍攝《大帥哥》時，言談間得知你的冀盼 – 做一套老少咸宜的劇集。與你所願的，播出後，成為城中熱話。「久違了一家人、一起看同一部電視、坐在同一沙發上、一起討論、一起感動⋯⋯」。當中，所有製作團隊、演員、編劇以及擔當靈魂人物的你確實造就了這家傳戶曉的劇集。我知道對你來說，這些都比獎項來得重要。
其實尚未與你合作，你的大名和事蹟早已紅遍電視城。一個半月連續拍西遊記而不回家、要家人為你帶來替換的內衣物、每朝早0600需要兩位劇務大哥抬你上車到拍攝場地，直至2800 依然需要抬你返回電視城，如是者，連續幾個月……聽說有次，坐船前往西貢小島拍攝，你大字形的睡姿躺在船上，化妝師替你貼孫悟空的面毛，因為太專心，暈船嘔吐在你臉上。也有一件事可能連你也不知，以我印象只跟一個媒體提及？拍攝張保仔的時候，其實我是模仿你的，以你出演的孫悟空借鑒，希望做到生動活潑中不失霸氣。腦海回想，再親身於現場見證你的演出，我自覺真是遙不可及，自愧不如，四成功力都沒有。
過去兩個月，城中熱話都離不開大帥哥，許多對你的讚美，很厲害的演員等等。經自我審視，倒問自己，你是否真的那麼勁？反思過後，你的確是我認識的演員中處理戲裡戲外最好的一人、要知道作為演員除了演技外，很多戲外的層面都要處理。可能有人不認同你的做法，但至少你清楚地說出你的要求，令大家明白。在我觀察中，你將所有工作細節都安排得妥妥當當，是多麼難的一件事! 我記得你曾說過「我份人一係唔做，一做就做到最極致、最好。」你真正教曉我的是那領導能力和解決問題的毅力，而不只是外界說的演技。
多謝你，多謝你這段時間帶領着我，也帶領着觀眾們，享受這兩個月的娛樂。 「你瞧這些白雲聚了又散，散了又聚，人生離合，亦復如斯。」不在TVB見，那就在江湖相見吧。
我心目中的最佳演員 – 張狄奇。
備註：最後一天的拍攝，我還是沒膽子邀請你與我拍照，這幅是你主動找我拍的，希望日後我有少許成就，再找你拍照。
洪永城 ‧ 馬炭
二零一九年一月十一日
真係好感動！唔少網民大讚洪永城手字好靚，不過之後洪永城就澄清原來係搵人幫佢代筆嘅！
(綜合報道/IG/on.cc)
台灣組合S.H.E.嘅成員陳嘉樺（Ella）自從生咗囝囝「勁寶」升呢做媽咪之後，時不時都會同大家分享育兒日常。
Ella早前出席護膚品牌活動，分享自己多年的保養心得，她說悟出了一個道理，做足保養才會愈來愈漂亮，每晚都會在洗完澡後，按摩臉部，她驕傲地說，老公早上看到她時竟說：「妳幹嗎一大早化妝。」
提到育兒心得，Ella直言一直以「輕鬆」的態度對待兒子勁寶，包括桌上不消毒及食物掉到地板上也會照吃。
她自爆早前一家三口去旅遊時，發覺勁寶揀飲擇食，她即時嬲爆：「我是真的生氣，但老公後來問我，你不是常常說是Relax的媽媽，我才發現對啊，我並沒有這麼Relax。」
Ella說自己發脾氣後，兒子頻說媽媽很惡，怕怕，眼神表達出「媽媽怎麼了？」的表情。
Ella事後回想自己小時候也很挑食，會瞞着媽媽把飯倒給豬和牛吃。
(綜合報道/on.cc)
尋晚《大帥哥》大結局喇！唔知大家有冇依依不捨嘅感覺？話晒張衞健要再出山拍劇，不知要等到可年可月可日，而佢都講過：「要沉澱吓，睇睇有冇機會先！」希望真係仲有機會喺公仔箱見到佢啦！
講番尋日嘅劇情，一開場張衞健叫晒昇威鎮嘅鎮民嚟公審洪永城，完全係佢一場Solo戲，「一輪嘴式」嘅對白，網民都話消化唔切，不得不佩服佢嘅記憶力，同埋講出嚟嘅對白字正腔圓！
後來Dicky同洪永城及蔡思貝入咗一間教堂，張衞健和洪永城用手槍以「俄羅斯輪盤」方式對決，輪流一人開一槍，向蔡思貝講出真心話，當洪永城開最後一槍時，先知原來張衞健冇入子彈，一直當佢兄弟，全心全意保護佢。但洪永城未有領情，即刻逃離教堂。後來蒙大帥喺昇威鎮大開殺戒，當李嘉同張衞健抗敵時，洪永城及時揸軍車出現，並叫張衞健一聲「大哥」，洪永城同張衞健一路追殺蒙大帥，將手榴彈投去蒙大帥所坐的軍車，最後洪永城犧牲咗，洪永城喺夢中向張衞健告別，呢一幕睇到有啲心酸！
洪永城喺張衞健昏迷中同對方告別，稱自己同羅義都鍾意飲洋酒，叫張衞健倒喺地下畀佢，最後洪永城微笑住講：「保重啦!大哥!」
狄奇醒番，先知馬炭已死。
相關新聞：
【《大帥哥》大結局 洪永城親筆寫信畀張衞健：大哥，你成功了！】https://goo.gl/W1JEKv
【入行18年終於憑《大帥哥》彈起 「天嬌」譚凱琪：做豬年新娘都唔錯】https://goo.gl/rTerZN
蒙大帥一死，張衞健最後統一南海四鎮，成為大軍閥。蔡思貝因為唔想做大帥夫人而坐船離開，而張衞健就踩單車追蔡思貝，後尾仲跳埋入河上船，張衞健向蔡思貝講甘願為她放棄大帥哥之位，唔要權唔要錢唔要勢，佢仲表白：「人魚王子會一直拖着人類女仔隻手，直到永遠，信我。」一路將「誰大誰惡誰正確」掛喺口邊嘅大帥哥，最後都選擇咗愛情。
網民大讚呢幕令人感動到喊！仲有網民係咁話想睇續集，話咁快就到大結局！
而尋晚張衞健都同一班大帥哥嘅演員飯敍睇大結局，其中簡淑兒就變咗小粉絲問張衞健影合照，佢喺IG上載合照話：「等到慶功宴先敢問影合照，當小fan有得同偶像同劇 。」
(綜合報道/on.cc)
藝人張美妮與圈外老公KK於2013年結婚，二人一直都話好鍾意小朋友，早前終於有好消息，宣布造人成功！
依家懷孕4個多月，呢日張美妮到電台受訪，見佢肚皮開始隆起，但仍然手腳纖幼，佢表示：「個肚係呢個月開始咁大，但手腳都未係肥，可能我平時做開運動，所以行路都仲係健步如飛，老公成日提我行慢啲。（重咗幾多？）11磅左右。」
問到懷孕可有不適？佢就話：「呢個星期腰下面近屁股開始有啲痛，之前真係好彩一次都未嘔過，不過就有失眠，一晚起身4、5次，醫生話可能係荷爾蒙轉咗所以咁，但依家已經冇事。」
美妮亦透露預產期是6月頭，表示本身想順產：「但啲朋友係咁嚇我，搞到我都有啲驚，但醫生話我適合嘅，所以遲啲再睇情況。」
佢仲話依家都有接少少工作：「一個月一次公司節目，同埋啲Annual Dinner，啲客都好好，如果唔做嘢我又驚生活太單調。」美妮笑笑口話打算工作到生B前：「啲人話前二後八，不過我唔知到時情況點樣。」
問到老公可緊張佢佗B？美妮即話：「係呀，佢覺得我論盡，叫我小心啲，同埋車出車入，盡可能都陪我做嘢。」
咁係佗仔定女？佢就答：「其實係知嘅，但想新年見到親戚朋友先講，畀個喜悅佢哋。（新年都係留喺香港過？）係呀，本身想去個Babymoon，但老公想穩陣啲，就話等BB出世後再去。」
(綜合報道/on.cc)
剛「升呢」做爸爸嘅王祖藍到新城電台接受薛家燕訪問。
談及愛女Gabrielle即大讚好乖，似自己鍾意瞓覺，夜晚最多起身兩次，所以佢同老婆李亞男（Leanne）都有覺好瞓：「同埋又有陪月姨姨幫手，係Leanne有時會起一次身，但之後都會瞓番。（依家最叻幫囡囡換片？沖涼？）最叻係唔理佢！餵奶都有嘅，但換片就冇，真係唔好理啦！又陪月、又阿媽、又老婆，咁多個女人睇住，佢啲骨好似軟腍腍，敢抱佢，但好似連掃風都唔啱手勢，佢哋點睇我做都唔順眼！」
講到Gabrielle的樣子，祖藍開心指大部人都話似老婆，尤其是對眼：「係一個好消息！佢開頭未收水就好似成日水腫嘅我咁，一收水就精緻晒！（日日都黐住囡囡？）冇㗎！唔理佢㗎！唔好成日畀佢黐，黐死夜晚就會喊住扭計，有時我都好狠心。」
他表示之後未必會做「炫娃爸爸」，要睇當時心情，順其自然不會刻意。
日前39歲生日的祖藍指囡囡就是今年的最佳禮物，希望囡囡腳頭好帶挈首部執導的賀歲片創佳績：「今年有成5、6部賀歲片，所以都非常緊張，但同時都要有信心，我哋特別在係有歌舞元素。」
對於生日願望，慈父上身的他希望Gabrielle能健康成長，問到囡囡改好中文名？祖藍笑謂未諗好：「可能最後好求其改一個，都係自己諗，最緊要唔好畀人改到花名。」
(on.cc)
張學友嘅巡迴演唱會返到嚟香港開最後15場，佢喺演唱會入面都講笑話，一返到香港就緊張，試過感冒同抽筋，啲老人病出晒嚟。
而頭場嘅表現絕對唔失禮，但有時去到高音位，就唱到得好肉緊，唔知係咪感冒影響，唱高音有時仲拆拆地，不過Fans都依舊「收貨」！
唱至中段他叫全場Fans揮動入座後送贈的特製螢光棒（可由大會控制全場螢光棒顏色），一片藍海營造溫馨氣氛，令Fans聽到如癡如醉！
呢一晚喺嘉賓席上仲有個重量級嘉賓，就係學友大女張瑤華（Zoe）啦！
Zoe上年18歲，《蘋果》喺中環見過佢，佢當時一個人搵路上美容院做facial。呢晚Zoe捧場，坐喺嘉賓席聽爸爸唱歌唱得如癡如醉，睇到興奮又會揮動打氣棒。
無獨有偶，劉德華早幾星期喺紅館開騷，6歲女兒劉向蕙都入場，睇嚟四大天王都準備好俾接班人出場喇。
(綜合報道/apple daily)
去年再婚的潘源良將舉行二次唱作音樂會，預告屆時會「夫妻檔」表演，又坦言太太的出現令他展開人生新一頁！提到舊愛李麗珍，雖然兩人再沒聯絡，但他依然祝福對方，如此有情有義，難怪外界封他為「癡心情長劍」！
著名填詞人潘源良縱橫詞壇多年，又身兼導演、編劇及講波，熱愛廣東話的他決定二月中，在藝術中心與幾位音樂人舉行二次唱作音樂會，論盡社會民生，「貼地」又「貼心」，與大家訴說愛情、成長經歷等話題。對於二次唱作，他表示：「有啲歌唱出嚟大家共鳴就會好大，但嗰樣嘢對我嚟講係好懷舊，我覺得音樂可以不斷Update，點解歌詞唔可以？所以我希望呢樣嘢同廣東話可以引起大家多啲創作。」
提到去年9月與同為音樂人的太太Rita在加拿大結婚，他笑言屆時會一起上台表演：「希望到時合作唔會出現問題。」至於突然再婚，潘源良坦言：「最重要係遇到適當嘅人，大家都有睇見嘅方向，我就覺得我應該要咁做。」更指太太出現為他帶來改變：「始終係人生另一頁，有好多計劃、未來嘅打算，做好自己本分，同埋不時同對方討論、商量。」
重情重義的他曾與李麗珍四合四離，亦有傳他曾出錢照顧珍妹兩母女的生活，與筆下不少情歌一樣都是「癡心情長劍」，對此他坦言：「我係不斷希望向前努力同計劃嘅人，過咗去嘅嘢我通常只會記得好嘅，以前嘅嘢我會放低。」並坦言不會邀珍妹睇騷：「唔想有太多誤解，我當然祝福佢，希望佢開心快樂，但到此為止㗎啦，唔會再有啲咩邀請或連繫，對任何一方都唔公平，包括所有愛護我哋嘅人，唔想佢哋再喺呢個方向諗。」
(on.cc)
「大小姐」林淑敏接受電台訪問，她開心《愛．回家之開心速遞》有30.5點收視：「近期第一次有咁好成績，仲要淨係計電視，冇計跨平台，難得假期都咁好收視。」
講到網友話依家淨係睇《愛》，佢就話：「好感動呀！（成績咁好會唔會慶祝？）希望有飯食。（你請咪得？）嗰集唔關我事㗎，叫佢哋請，哈哈。」但她亦謂希望可以拍多些劇：「呢兩年拍處境劇都學識好多嘢，都希望可以拍其他劇試吓。」拍其他劇會唔會離開《愛．回家》？
她亦透露《愛》劇的人和事都好好：「故事又好開心，大家都好似變咗一家人咁，有場戲Terry（李偉健）要扶我，佢話可能要掂一掂我大髀，我話得啦，係我細佬，完全唔覺得有抽水嘅感覺。」問到老公可有晚晚支持？她說：「如果佢喺屋企係一定要睇，因為我要問書。（如果佢答唔到咁點？）迫佢睇多次，有時睇重播我會逼佢一齊睇，有時佢都會厭。」
講到之前奪得「最佳女配角」，她坦言工作有增加：「但希望再多啲。（老公心痛你太操勞？）我唔驚佢心痛我，我驚可能狀態會下降，但So Far都應付到，我飲食都檢點。（新年都忍到口？）忍到，最多嗰3日留喺屋企瞓，哈哈。」
(on.cc)
之前左擁右抱嘅「洗米華」周焯華，周旋喺老婆陳慧玲（Heidi）同情人Mandy Lieu之間，享盡風流快活。
不過，呢排洗米華頻頻黐住家人在社交網蒲頭，反而Mandy Lieu就完全冇晒影，令人懷疑佢同Mandy嘅關係危危乎。
身為太陽娛樂揸弗人嘅洗米華，同前妻育有兒子周柏豪，與現任洗米嫂育有兩女周梓潼（Virginia）同周羨童（Damiana），傳聞跟情人Mandy Lieu育有兩女一子，由於洗米華早年已經同首任老婆離婚，長子周柏豪由繼母Heidi照顧長大，兩繼母子感情好好；往年聖誕及新年假期，洗米華都會陪Mandy度假，但今次就陪洗米嫂同子女享受家庭樂。
今日周柏豪喺社交網晒全家福並#「family」，孖父母一齊逗妹妺Damiana，相中嘅Damiana將餅乾仔遞畀哥哥周柏豪，洗米華就伸長條脷氹細女扮爭食，仲捉實Damiana嘅一雙腳仔，不過最後都係輸畀大仔~
洗米嫂同周柏豪都笑得好開心，成張相充滿「溫馨」兩個字，網民都留言：「你爸爸的樣子也太可愛了吧」、「洗米華同洗米嫂很有夫妻相」。
其實唔止洗米華同洗米嫂有夫妻相，噚日周柏豪在社交網都有晒自己嘅伸脷相，原來兩父子都係有鋪伸脷癮，好鬼搞笑。
(Apple daily)
