【單文柔笑笑口】但陳展鵬就面黑黑咁話⋯

2018-09-16

41歲陳展鵬日前宣佈迎娶28歲女友單文柔，上年《蘋果》率先發現佢哋兩人上山頂食宵夜，感情發展一日千里，準新郎陳展鵬話婚禮計劃喺下個月舉行，不過佢唔會大排筵席廣宴親友，只係屋企人同親友食個飯。」

超強颱風山竹逼近香港，噚日下晝3點改發三號強風信號，之後預告午夜前後改發8號烈風或暴風信號，查實因為呢個颱風來勢洶洶，唔少市民晨早做好準備，除咗去搶購貼窗膠紙之外，仲去超市、街市掃貨，陳展鵬喺改發三號風球嘅前夕，同未婚妻單文柔喺銅鑼灣揸車去咗旺角，不過佢哋唔係去搶購膠紙或者去超市掃貨，而係去咗花墟買花！

噚日大約下午兩點左右，陳展鵬喺銅鑼灣耀華街揸車去咗旺角花墟，最初陳展鵬坐喺車上面，而戴住一幅金色太陽眼鏡、着住一條黑色連身裙兼踢拖嘅單文柔就自己落車入咗一間花舖，最初問到佢婚禮嘅籌備情況，單文柔都笑笑口話：「籌備得七七八八喇，我諗住買花返屋企擺。」

單文柔同職員有傾有講，想揀啲花可以擺得耐啲，最後睇中百合同二包白蘭花，呢個時候陳展鵬落車行入舖頭，主動問完記者嘅身份之後，煞有介事咁關心記者：「打風喎，小心呀，十號風球喎，天雨路滑喎，因住啲篷冧落嚟！」

之後陳展鵬又若無其事咁同啲職員打招呼，行入舖頭揀花，嗰陣陳展鵬刻意背住迴避鏡頭，叉晒腰咁左望右望，單文柔就問未婚夫買乜花好，突然間聽到單文柔話：「唔好偷影喇，過嚟影喇！」陳展鵬接住話：「乜你哋學埋啲衰嘢，鍾意偷影，過嚟一齊影呀嘛！」原來佢哋係發現有主婦買花，順手一齊影下準新人。最後陳展鵬同單文柔擾釀一輪，買咗一束價值$130嘅花就離開。

喺佢哋準備俾錢嘅時候，陳展鵬又發現有途人影相，於是佢又再大大聲話：「你要影咪過嚟影，唔使偷影喇！」單文柔當然附和，臨走嗰陣陳展鵬面燶燶咁行上車，不過佢有幫單文柔開車門，臨上車前女嘅講拜拜，男嘅就強顏笑一笑，就開車走人，原來講到底，係唔鍾意俾人影佢去花墟買花。

(蘋果日報)

【預防勝於治療】卵巢早衰或會影響生育

2018-09-16

女性四十歲前若發現經量漸減、經期縮短、周期異常，小心卵巢提早衰退。註冊中醫師指出，若卵巢早衰卻不及時治療，可致更年期提前，影響生育。壓力大、嗜煙酒又情緒暴躁可令情況惡化，中醫按「滋補肝腎」及「疏肝理氣」幫婦女補身，在四個主要穴位上按壓或施針灸可補肝腎氣血，改善體質。

基督教聯合那打素社康服務註冊中醫師張淑君說，女性的月經、懷孕、生產都會傷血，所以女性本質易血少氣旺，亦因此情緒易波動。肝鬱氣滯可致月經問題；而「經水出諸腎」，腎與生殖有關，腎虛則令經量少及經期縮短。從表徵看，肝鬱腎虛婦女四十歲前，臉部皮膚較多斑，皮膚乾燥、生細紋、長白髮、骨頭易酸痛，已代表身體肝腎功能開始不足，生育能力開始下降。

婦女常熬夜晚睡、失眠、吸煙、焦慮、情緒不穩都可致卵巢早衰。張淑君解釋，晚上十一時至凌晨一時是經絡走到膽經的時間、凌晨一時至三時走到肝經，此段時間睡覺才可養血排毒抗衰，熬夜則錯過良機。此外，家族遺傳、生育次數多、流產多、其他婦科病或做過卵巢手術，都可致卵巢早衰。她每年接獲約十宗卵巢早衰新症，近兩、三年更有增加趨勢，估計與社會環境、女性工作、育兒、生育、經濟壓力大有關。

卵巢早衰「防重於治」，婦女若發現超過四個月沒來經、或經量減少，均需正視。預防卵巢早衰靠「滋潤肝腎」或「疏肝理氣」的中藥為主，同時可配合養血、補腎的食療。此外，按壓或穴位針灸都可防卵巢早衰，例如位於膝頭下近外側的「足三里」穴位可補氣血、腳眼位的「太溪」、「三陰交」穴可補腎水和健脾，「太沖」穴位可防止肝火旺盛。配合草本香氛熱療，更可紓緩患者情緒。

張淑君又提醒，婦女要養好卵巢應避免吃寒涼和肥膩食物，脂肪酸會增加衰老機會，早睡早起，保持心情輕鬆亦非常重要。

食療圖表：兩款滋補肝腎抗衰食療

雙耳青春露
材料：黑木耳10克、白木耳10克、去核紅棗6粒、杞子10克、百合10克

做法：將材料洗淨，黑白木耳加水浸泡後加入其他食材打成泥狀。加1000毫升水大火煮開，水沸後轉小火煮30分鐘至軟爛，加入25克黑糖即可飲用

效用：黑木耳有活血補血之效，白木耳可滋陰潤肺，紅棗可益氣養血，枸杞子滋補肝腎、百合潤肺安神，整體有養血潤膚安神之效

注意：腹瀉者不適合飲用

抗衰健髮湯
材料：熟地30克、杜仲30克、何首烏15克、陳皮3克、排骨250克

做法：將材料洗淨及浸泡半小時後，加上1500毫升水煲煮1小時後飲用

效用：熟地可補腎填精、杜仲補腎壯腰、何首烏可養血烏髮

注意：感冒不宜飲用

資料來源：基督教聯合那打素社康服務註冊中醫師張淑君

(on.cc東網)

【就快「卸貨」】無懼強風佗住巨肚照行山

2018-09-16

懷有九個月身孕、即將「卸貨」嘅佢一向都好鍾意做運動，呢日佢同老公齊齊去咗行山，仲喺社交網分享短片。

片中見到Rosemary同老公齊齊自拍，又拍低山頂下嘅景色，見山上都非常大風，但Rosemary完全唔怕，仲同老公笑晒口擺個靚甫合照添。

唔少網民都叫佢要小心，仲話佢腹大便便、咁大風都去行山真係好「牙煙」，總之真係要小心呀！

(on.cc東網)

【世紀大和解】靚靚同佢破冰貼頭合照

2018-09-16

噚晚兩人出席護膚品牌晚宴，同場仲有Ball Queen薛芷倫，喺佢嘅感染力之下，促成三人頭貼頭合照，薛芷倫喺中間，左邊係靚靚、右邊係。。。

張新悦同袁詠儀（靚靚）於97年拍攝電影《戇星先生》傳不和，當年仲係新人嘅張新悅，一度俾靚靚批評不專業。

噚晚兩人出席護膚品牌晚宴，同場仲有Ball Queen薛芷倫，喺佢嘅感染力之下，促成三人頭貼頭合照，薛芷倫喺中間，左邊係靚靚、右邊係張新悦，薛芷倫今日喺IG貼咗呢張相，佢仲留言話：「世紀合照，世紀大和解。」另外仲有一張，佢哋三個加埋汪詩詩準備開飯，不過汪詩詩就坐咗喺張新悦同靚靚中間。

《蘋果》問番張新悅，噚日同袁詠儀破冰，世紀同枱及合照一事，佢透過短訊回覆話：「是的，噚晚係一起拍戲20年後第一次同枱食飯。」問佢有冇同靚靚重提舊事？張新悅就話：「大家都係講關於湊仔嘅嘢！我生咁多小朋友記性差，舊事唔記得了，哈哈。20年後再有機會遇見以前一起工作的人感覺良好。當晚是我喜愛護膚品牌的10周年慶祝宴會，與美麗的裝飾，人和美食度過，是一個愉快的晚上。希望傳媒不要認為我們有甚麼問題了。」

(蘋果日報)

【卓韻芝打風照擺喜酒】原來「山竹」係好意頭！

2018-09-16

卓韻芝同自己細5年嘅梁子賢昨日無懼颱風山竹，喺中環外國記者會舉行婚禮，姊妹團鄭秀文（Sammi）、蔡卓妍（阿Sa）、梁詠琪（GiGi）等一身粉紅，而阿芝就以一身白色low cut婚紗，蹺住老公，兩人戴上自製結婚戒指，約於8點20分見傳媒。

記者一見到佢哋，就同梁生梁太打招呼，兩個人聽見新名銜都笑得好開心，不過老公明顯怕醜。記者起哄叫佢哋錫錫，但兩人都怕醜，阿芝不斷推：「唔使啦，唔好呀。」但梁生喺眾人要求下，都有借位扮錫面。

訪問時，老公就先行告退，由阿芝一人受訪，佢首先多謝傳媒冒住風雨出席，打風結婚真係打唔甩，阿芝話噚晚有留意風向：「自己都有上網搵下『山竹』究竟係一樣點嘅植物，原來山竹又叫做夫妻果，所以都相信個（颱）風會俾我同朋友聚會咗先。」

阿芝又話擔心賓客安全：「啲長輩食完會叫佢哋快啲返屋企，所以都想快啲完咗訪問，等我多啲時間同朋友傾下偈。」今次宴會都請咗好多賓客，佢話：「百幾二百個，唔算好多，但場地有限，一直都加緊人，無辦法啦。」

(蘋果日報)

【超強颱風下的新娘子】才女卓韻芝一早向GiGi取經

2018-09-15

39歲才女卓韻芝同34歲從事電影美術嘅「閃電俠」梁子賢共諧連理，阿芝今晚嘅婚宴會喺中環外國記者會舉行婚禮，仲安排咗最索姊妹團，有鄭秀文（Sammi）、蔡卓妍（阿Sa）、梁詠琪（GiGi)等，阿芝今晚西式婚宴要簡約，佢想跟出席友人盡興。(相關新聞：https://goo.gl/JGJnED)

原來阿芝低調於本月10號先搞中式擺酒，當日主要宴請至親，阿芝的親友都由加拿大同挪威坐長途機返嚟，見證佢嘅幸福。阿芝當日着裙褂出嫁，俞琤不但做主婚，仲要送酒，令一對新人好感動。婚宴當日還搞咗過大禮同接新娘，新郎同兄弟團殺到，婆婆叫阿芝房中等候，婆婆掛住同孫女婿傾偈，一時太興奮忘記叫阿芝出嚟，直至阿姨提醒，認真搞笑。

升呢「人妻」嘅阿芝，佢仲向早已加入人妻行列GiGi同Sammi取經，阿芝認為兩夫妻相處要終身去學，因為佢相信會喺老公身上學懂好多嘢，佢大老公有耐性肯付出，情人眼裏出「靚仔」。

姊妹團之一嘅阿Sa，黃昏時段喺ig貼咗張GiGi、Sammi嘅姊妹團合照，仲留咗個tag「#打風都打唔甩」。

(apple daily)

【龔嘉欣被爆生孖仔】孫慧雪：要植入晶片跟蹤兩個女

2018-09-15

龔嘉欣同孫慧雪今日喺銅鑼灣皇室堡出席Catwalk Show，佢哋同一班小朋友行catwalk，嘉欣大讚小朋友記位好叻，事後佢表示本身好鍾意小朋友，以前有幫張頴康嘅囡囡餵奶，問佢幾時可以生小朋友？嘉欣話：「我都想早啲，但要諗清楚，要揀個合適對象結婚先，我想生兩個，有伴吖嘛，最好年紀近啲，好似我同哥哥相差一年，如果龍鳳胎或者孖胎就最好，一次搞掂；雖然屋企冇呢個基因，但有次上玄學節目，師傅話我生孖仔。」

阿雪指爸爸同叔叔係孖仔，所以屋企有孖胎呢個基因，佢話：「如果我再生對孖仔就大鑊，生孖女仲慘，老公話會有雙重擔心，要植入晶片跟蹤兩個女，好似打風咁，我要去超市買定BB嘢食。」

提到阿雪早前喺網上呻，疑似同老公嗌交，佢話：「生咗小朋友嘅夫妻係咁，大家都好緊張個小朋友，例如報學前班，又會諗報邊間好，用中文定英文面試好，大家都會爭拗，不過最後我會say sorry，因為小朋友喺度，我唔想嗌交。」

此外，嘉欣最近拍緊新劇《殺手》，同黎耀祥同陳豪有好多肉搏埋身戲，所以搞到周身瘀，佢話：「祥哥好有成績，佢練到有4嚿腹肌，我都有馬甲線，但想多兩嚿腹肌。」

(apple daily)

【無情山竹來勢洶洶】關心妍帶囡囡賣旗

2018-09-15

超強颱風「山竹」逐漸逼近本港，天氣非常熱，不過都無阻歌手關心妍（Jade）嘅善心。今日Jade就帶埋囡囡楊榮心（心心）去賣旗，仲喺社交網分享相片，並留言：「山竹來臨之前帶 #楊榮心去做第一次義工賣旗，心心好叻叻賣到好多旗 #智樂FUN紛賣旗日2018 」見到戴住粉紅色嘅皇冠兼拎住星星權杖嘅心心好叻，化身粉紅小天使跟住媽咪一齊賣，仲好開心同媽咪影相，簡直萌爆！網民都留言話身教真係好重要，Jade果然係好媽媽，仲叫Jade賣完就快啲同心心回家做好防風措施呀！

Jade接受訪問時話：「我係大人都熱到濕晒，心心咁細個、咁矮，可能太貼地關係，佢仲熱得犀利，加上早上10點幾呢個時候，佢習慣咗個瞓覺，所以就呆啲，不過佢好受歡迎，好多人因為佢好得意，所以主動嚟買旗。（Jade嘅吸引力輸畀個女？）係呀，我都唔夠佢嚟，可能我哋賣旗嗰度好多講普通話同英語，唔係好多人識得我啦，不過因為太焗，我哋買咗45分鐘旗都走啦，但心心第一次賣旗，收穫都好好，幫個慈善機構籌到錢，可以幫到啲住院小朋友買玩具同提供更多服務。」問到打緊風嘅銅鑼灣咩情況，佢話：「好少人囉，可能啲人去晒避風，或者趕住去買糧，平時銅鑼灣呢個時候都好多人，但我都奇怪點解條街咁少人。」

講到「山竹」被指係十級巨風，有冇做足防風措施？佢話：「家中啲落地玻璃窗已黐好膠紙，亦已買定蔬菜畀囡囡食，記得上次『天鴿』襲港，我住嗰度被風吹到屋都震，今次又話吹東南風，我屋企嗰座向應該好食風，所以都有啲驚，今晚會叫老公快啲返屋企。」

(on.cc)

【一直傳奉子成婚】蕭正楠爆單文柔已經無拍《美女廚房》

2018-09-15

藝人黃翠如與蕭正楠以情侶檔到青衣出席活動，與粉絲們玩遊戲，阿蕭更與男粉絲即場對唱，被翠如取笑：「佢唱歌好過你呀！」阿蕭更自爆因工作未能與翠如在中秋佳節團圓，但會提早打邊爐慶祝。

提到二人經常拍拖出活動，下一步是否影婚紗相？阿蕭笑說：「我哋兩套劇《師奶Madam》同《幕後玩家》都影咗兩次啦，唔使影，問公司拎番咪得囉！（係咪可以跳過直接結婚？）問佢（翠如）啦！佢忙到見唔到人。」翠如聞言笑說：「我今晚都開到聽朝，膠紙都冇時間黐（預防颱風）！」談到可以停工結婚？阿蕭說：「我哋有我哋節奏。」