郭富城日前宣布太太方媛（Moka）再度佗B（相關新聞：https://goo.gl/EsVXUZ）！三年抱兩，城城就梗係好開心啦！由佢嘅表情同眼神完全感受到佢幾咁興奮滿足～
嚟到聖誕佳節，佢究竟會點同老婆方媛慶祝呢？城城冇因為方媛大肚就匿埋屋企唔出街，趁住大時大節兩公婆出咗去行街食飯，城城仲用「老公視角」影咗方媛企喺聖誕樹下嘅靚相。
一身黑色打扮外加鬆身大褸，方媛個孕肚就暫時未顯露出嚟。
之後方媛晒出城城攬到佢實兼頭貼頭嘅甜蜜合照，兩個都笑瞇瞇，城城仲開心到V晒！
上年結婚到依家，都未見過佢哋咁高調曬恩愛！
方媛仲留言玩互動讚老公放閃：「謝謝每個節日在身邊的陪伴和驚喜，小小的感動，大大的幸福（居然愈來愈會拍照了）。」
好多網民都留言話隔住個mon都feel到佢哋嘅幸福！
(綜個報道/on.cc)
吳綺莉19歲女兒卓林同31歲嘅女友Andi今年喺加拿大成婚。
雖然早前回港遇到阻滯要媽媽吳綺莉幫手，不過話晒已經係成家嘅人，所以日前吳綺莉都話卓林已經同太太搬走。
媽媽喺出席活動時話：「人要自我反省，睇吓自己啱定唔啱，要時間去學習。」
今日係卓林婚後首個聖誕，兩人排除萬難先可以結婚，難得佳節緊係要放下閃啦，兩人喺佢哋嘅公司IG放上咗一張粉紅色系嘅合照，寫上：「Love for all. All is one.」
另外，喺佢哋嘅個人IG都分別貼上自己嘅單人照，卓林寫道：「Climb a mountain not for the world to see but to see the world.」（攀上高峰不是為了給世界看見，而是為了看見世界）。
而Andi則寫上一篇文章，講述聖誕，又祝福大家每一日都可以同聖誕一樣咁開心，仲話：「Dec 25th. A day to think of those who are hungry, lonely, hurt, and lost. I will not accept more than i need.」（12月25號，這是一個想像別人正感受飢餓、孤獨、受傷與迷失的日子。我不會多拿我不需要的東西。）
(apple daily)
未知是否已經佗穩咗嘅關係，有網民拍到兩人去咗日本旅行，照片所見佢哋喺一間商場閒逛，唔知係咪商量緊買咩BB用品呢？網民形容自己見到佢哋非常激動，更覺得佢哋夫妻感情很好，應該係嚟日本過聖誕！
內地女星趙麗穎早前與内地男星馮紹峰結婚後，有指遲遲未搞婚禮嘅原因係因為趙麗穎大肚，佗住BB仔，仲傳出已經懷孕7個月，明年3月係預產期。
(on.cc)
無綫藝員蕭正楠與曹永廉在油塘出席聖誕節活動，提到兩人以「情侶檔」亮相，曹永廉說：「冇啦，我都失咗戀，大家都知，交畀黃翠如啦。」
蕭正楠笑說：「佢都鬆晒啦，我講佢啲皮膚。」蕭正楠被問到宣布與黃翠如婚後首個聖誕，跟以往有甚麼不同？他說：「冇分別，都係開工，之前已經開咗Party。（互送禮物？）唔使啦，大家都忙，已經好Sweet。」
蕭正楠透露明年兩兄弟會拍住搵銀，包括到美加舉行「老廉蕭騷」演唱會，在數千人前獻唱，曹永廉說：「一般啦，我唱開萬幾人，做住先啦，叫佢練吓歌先啦。（會唔會做棟篤笑？）未諗，到時再算，我哋上到台都會亂嚟，出年會有好多合作，演唱會之外，我覺得我哋仲差個廣告。」
提議拍前列腺廣告？蕭正楠即說：「你見佢個頭髮整到咁高，就知佢可以拍海狗丸啦。姚子羚拍節目送咗紙尿片畀佢，可以考慮吓，仲唔瀨畀人睇。」曹永廉說：「你幫我換尿片，呢張海報都幾溫馨喎。」他又指兩人六月將會一齊開劇，還會私下相約去旅行。
講到唐詩詠被指明年有機會做人妻？
蕭正楠說：「似喎，唔出奇。」曹永廉說：「啲人結婚都唔出聲，冇人知。」
(on.cc)
陳豪同陳茵媺（Aimee）婚後有三個寶貝仔女，佢哋時不時都會喺社交網同大家分享家庭樂。
但因為三個小朋友仲細，時間方面又好難遷就，所以好難先可以一家人一齊去旅行。
早前Aimee一拖三返加拿大，真係超犀利！
陳豪唔得閒一齊去，Aimee唯有帶埋仔女去台灣探老公班。
不過今個聖誕終於有機會啦！陳豪拍完劇集《殺手》之後就同太太陳茵媺帶埋三子女，一家五口飛去澳洲，過一個熱辣辣聖誕節！
陳豪之前接受訪問就提過：「這個旅程安排了很耐，年年都想去，但都要開工，只能去較近的泰國和新加坡，上次返加拿大我無去，真是考起太太Aimee（陳茵媺），今次有我可以分擔。（小朋友愛欺負爸爸？）講中，又不是恰，是爹哋較和善容易『點』，媽咪就難一些，因為每次望到小朋友的眼神充滿住愛，就很易被懾去。」
呢日陳茵媺喺IG PO咗幾張相。兩公婆難得可以拍拍拖～
一家人遊覽悉尼的景色之餘，更跟當地的聖誕老人合照，不過這位聖誕老人卻是穿短褲，相當特別。
陳茵媺更安排一家人穿上親子聖誕睡衣，並透露做了一個聖誕晚餐，有焗火雞、龍蝦及蛋糕，仲準備咗聖誕襪送給小朋友。一早plan好哂超Sweet！
一家五口畫面超溫馨！
(綜合報道)
上年喺IG貼咗張戴住情侶戒指嘅手，揸住酒杯嘅相，大方認愛！
之後就間唔中都會捕獲佢哋拍拖，一杯咖啡兩份飲夠哂Sweet～
今日係聖誕節，沈卓盈（沈大師）當然有節目，讀者梁先生分享咗沈大師孖經營內衣褲出口生意男友Calvin拍拖出巡，兩人喺葵芳一間精品店內選購聖誕禮物。
當日下午，着住小波點連身裙嘅沈大師素顏出動，佢戴上口罩，可能人多太翳焗，相片睇到沈大師拉低口罩唞唞氣，梁先生就話：「我先見到沈大師，以為佢一個人行，見佢喺度睇聖誕卡，但睇睇吓見到有個男人行近，應該係佢男友，佢哋挨到好埋，隔咗一陣，又各自行開睇嘢，佢哋都逗留咗喺店內好耐。」
沈大師同圈外男友Calvin感情穩定，節日當前，孖咇去買聖誕禮物。沈大師前晚回覆傳媒時話：「我哋嗰日同媽咪飲完茶，就去咗買聖誕禮物。」佢仲話：「買咗十幾份禮物，拎到手都軟，我屋企人全部有份。」問到沈大師送乜嘢畀男友？佢話：「冇喎，我哋協商咗，唔使送畀大家，如果佢預備咗畀我，我冇所謂，25號就會喺屋企開party。」而乖巧嘅沈大師連男友Calvin父母都準備好禮物，認真細心。
咁喺邊個人嘅屋企開party？沈大師答：「一個好溫暖嘅屋企。」係男友Calvin屋企定自己香閨？沈大師再避答：「一個開心嘅屋企囉。」始終冇正面回答。沈大師續話：「到時大家姐、姨甥女都會嚟，人大個咗，好想多啲時間陪屋企人。」
童話世界裏面，負責送禮物係聖誕老人，沈大師就笑言自己係「聖誕老婆」，唔通恨做人妻？佢即改口話：「我做聖誕老婆婆呀！」佢咁靚女，點都冇資格做老婆婆喇。沈大師成功融入男友家中，到底係咪有計劃明年出嫁？沈大師甜笑：「希望喇，隨緣。」
(綜合報道/apple daily)
「今年，對我們來說是非常有意義的一年，新的成員來到了我們的生命裏，懷着喜悅的心情，想在這個溫暖的日子裏與你們一起共享❤Wish you all have a Merry Christmas & Happy New Year.」
現年49歲的台灣音樂才子陶喆與江佩蓉（Penny）結婚四年，期間曾不幸經歷小產，二人互相扶持走出傷痛，終於喺10月時宣布有喜消息，預產期喺明年3月！趁住聖誕節，佢哋第一次晒出一張黑白嘅大肚寫真同埋分享即將做父母嘅心情。
照片中太太Penny身穿間條衫，下身配牛仔短褲，露出一個大大孕肚，佢用手搭住陶喆嘅膊頭，而陶喆則用雙手扶住太太嘅腰，佢哋嘅眼神同時望住即將出世嘅BB，畫面既甜蜜又溫馨。
(on.cc)
上年十月結婚，今年7月出席活動時宣布懷孕，之後佢同老公一起拍攝大肚寫真，仲要係喺水底影超唯美！
之前佢喺肚皮上面畫咗個BB仔樣，令網民勁估佢係咪佗B仔？
終於開估！原來係小公主～
雖然冇曬囡囡正面照，但係嘴仔特別萌！
今日聖誕節（25日）「跳水皇后」吳敏霞公布喜訊！佢上載首張全家福與剛出生的囡囡可愛腳印的照片上微博，並發文：「感謝大家的祝福〜我們喜迎西西小千金。」
隨後老公張效誠轉發寫道：「一家人，新征程，歡迎西西。」
照片所見，眼神中洋溢幸福的喜悅，非常溫馨，恭喜！
張效誠上個月還曬出寶寶超聲波照為吳敏霞慶生，吳敏霞也配上「愛心」與丈夫互動。據悉張效誠給自己寶寶的英文名字Cecilia，非常好聽。
看到吳敏霞產女，網民也紛紛送祝福：「嘴巴太好看了吧」、「恭喜啦小嘴好可愛」、「新一代跳水皇後誕生」、「祝福祝福 希望以後仍是體育健將」、「恭喜跳水皇後，小公主報到」、「好可愛的小天使啊。母子平安，祝福祝福」。
(綜合報道)
今日係聖誕節，藝人唐詩詠就約咗蕭生蕭太蕭正楠同黃翠如、C君同DJ女友黃天頤等好友一齊開P慶祝，非常熱鬧！
另外，蕭正楠亦有晒出應節相，不過主角就唔係蕭太，而係佢哋隻愛犬「小六」，蕭生仲冧爆留言：「我想將雙手的溫暖付托在你肩上 我想將鼓掌的聲線盤旋在你光環上 若你無言讓天使合唱 祝大家聖誕節快樂！特別係平安夜同聖誕節要開工嘅人……包括我 #小六 #今晚陪唔到你玩 #底褲仔穿返（番）低啲。」講到咁深情，網民都問蕭生係咪借小六過橋，其實想向太太示愛呀！
唐詩詠就喺社交網留言：「多謝你地（哋）嘅愛，願所有人都幸福。」仲晒出四個女仔嘅合照。
透露：「下年呢個時候，就變成有三位可愛人妻嘞（喇）🌹」
咦？！三位人妻？有邊個先？唔少網友都笑問係咪包括詩詠自己喎！
（ig / 綜合報道）
太陽娛樂公司老闆周焯華（洗米華）同Mandy Lieu爆出婚外情後，與老婆陳慧玲（Heidi）感情出現裂痕。
當時老婆堅決要離婚，不過經過成年嘅努力，洗米華最後都勸掂老婆唔離婚，成功挽救到頭家唔使散哂。
呢輪見佢個大仔周柏豪經常放爸爸同Heidi互動嘅片出嚟，可以睇到洗米華同老婆感情好好。
一家人去旅行。
之前洗米嫂生日，洗米華冧爆送上一套花型圖案嘅鑽石頸鏈及戒指，更親自為老婆戴上！
早兩年聖誕節，洗米華都去咗英國陪Mandy。
今年竟然有人見到佢留喺澳門過，冇去英國。
兩公婆一齊打韆鞦，又教細女周善潼(Damiana)盪韆鞦，睇到佢哋真係冇晒芥蒂，畢竟之前洗米嫂出現公開場合，次次都刻意同老公保持距離。
今日周柏豪就貼咗一條片，片中佢哋喺超市入面，唔知係咪買定嘢準備今晚開party。
不過未買嘢食之前先鬥力氣，身形fit爆嘅洗米嫂，即場接受阿仔柏豪挑機，喺超級市場內比試下腰力同腳力，柏豪留言︰「gym at……」仲tag寫住leg day，片中洗米嫂孭住3歲細女善潼，而阿哥柏豪就孭住16歲嘅阿妹梓潼，周柏豪提出要做十下深蹲，3歲同16歲嘅體重相差咁多，洗米嫂就做得好輕鬆，周柏豪顯得好吃力，佢仲負責數做咗幾多下，每叫一下，佢都好吃力咁數，而佢身後嘅梓潼就笑唔停，仲豎起姆指，周柏豪就忍唔住話︰「好重。」
結果不敵洗米嫂，條片由洗米華個家姐拍嘅，喺條片仲聽到洗米姐旁白︰「點解喺超級市場發生呢啲事？我返樓上食嘢喇，呢度係超級市場，o依四仔乸係咪低能！」
(綜合報道/apple daily)
