吳若希（Jinny）因為又痾又嘔，加上出玫瑰疹，噚晚無綫台慶頒獎禮都缺席，要留喺屋企養病。
Jinny雖然病咗，但都好捧場，一直睇住電視，唔單止祝福蕭正楠同黃翠如結婚，同門師妹菊梓喬（Hana）憑《但願人長久》奪「最受歡迎電視歌曲」。
佢都即刻喺Hana嘅Ig留言：「恭喜呀一姐」仲加多三個拍手掌emoji圖案。
如果話「禍從口出」，Jinny今次喺Hana嘅Ig留言，唔知算唔算係闖咗禍呢？即係咁，Jinny同佢Hana傳為爭做一姐不和，已經唔係今時今日嘅事，曾幾何時，Jinny被傳媒追問，Hana加入星夢娛樂，會唔會影響佢一姐地位時，Jinny當時仲答：「公司冇一姐，但越來越多新人，我都要勤力工作，攞番自己新入行嗰團火出嚟！」所以Jinny呢個留言，唔少Hana嘅歌迷都質疑佢留言動機，紛紛留言話佢「葡萄」Hana，有人甚至叫佢唔應該嘗試破壞一件值得高興嘅事，Hana則禮貌回覆Jinny：「謝謝Jinny」然後就hashtag寫「我那會是一姐」。
Jinny自己都有睇到Hana歌迷嘅留言，佢仲cap咗圖貼喺自己Ig，然後留言：「我真心ga，點解要咁話我」再加兩個笑到滴汗嘅emoji公仔。當然，Jinny喺自己「主場」留言，網民反應就好唔同，好多人都叫佢唔駛唔開心，叫佢唔駛理其他人講乜，而過往經常同網民「駁火」嘅Jinny，今次都算處理得唔錯，有網民「踩場」鬧佢，佢都只係答咗句：「係呀係呀，好啦好啦，你話點就點啦」EQ真係高咗喎！
(ig / facebook / appledaily)
