今年1月結婚，當時旦哥仲親自飛去布吉恭賀一對新人！
八月仲宣佈有喜！
早排喺《是咁的，法官閣下》飾演「四眼律師」，獲網民大讚夠哂省鏡！
話咁快BB已經搶閘喺聖誕前報到啦～
今日陳華鑫喺社交網報喜，貼咗張相，仲留言話：「我們家的小公主出嚟過聖誕節。」
宣布誕下6磅5安士的小公主，正式榮升做媽媽！見囡囡瞓喺BB床，眼長長、嘴細細似足媽咪咁靚女，床頭仲有隻小熊公仔。
其實上個月陳華鑫擺過一張靚靚嘅大肚相出嚟，醫生診斷出佢子宮頸短，有機會早產，所以要臥床休息(相關新聞:https://goo.gl/KuMKnN)，不過當時佢話預產期係12月尾，所以都叫早咗少少。
陳華鑫喺IG都有留tag講「好彩妳足磅」，陳華鑫今日回覆傳媒講起添女好開心：「係呀，女仔嚟，重6磅5安士。我係自然分娩，辛苦，但係接受到。因為我生得好快！由陣痛到生用咗四個鐘，但未改名呀。」
而新任爸爸都忍唔住要錫啖囡囡，場面非常溫馨。
(綜合報道)
藝人洪永城（Tony）日前被爆有新戀情！捕獲佢哋約會，對方係模特兒兼長跑教練梁諾妍（Inez）～作為舊愛嘅唐詩詠亦大方祝福！
相關新聞:
【同唐詩詠分手之後被爆撻著…洪永城甜笑冧爆！】https://goo.gl/QpFDEe
【洪永城被爆有新戀情 唐詩詠回應…】https://goo.gl/5ZTxCj
【但問到呢樣就…洪永城現身超風騷：要講都講一、兩個鐘】https://goo.gl/m79Gwo
昨日唐詩詠就喺社交網PO咗張相。
相中見佢企喺街頭露出招牌笑容，仲見到街頭對面有其廣告牌，原來…佢影呢張相係有原因！
唐詩詠透露：「當有人威脅你，唔影相唔去食pancake時，為咗嗰個幸福的pancake，我唯有照做同用笑容去遮掩我嘅尷尬。」
而好友黃翠如亦留言：「威脅你個（嗰）個應該係魚，亦都應該得魚敢，因為係好姊妹所以冇禁忌嘅！」
網民都話睇完翠如個留言，估詩詠講嗰個9成係佢，大家仲話天氣咁凍，叫貪靚嘅詩詠咪着咁少衫呀！
果然係好姊妹！
(綜合報道/IG)
藝人陳展鵬太太單文柔（Phoebe）現時懷孕中，早前出席活動時透露已經重咗2KG！
之前Phoebe喺社交網曬白色BB裙，仲留言話：「我鍾意白色，好乾淨嘅感覺，唔知道小豬比鍾唔鍾意呢？」
等到成班網民都勁估佢呢胎係咪B女！
不過佢之後解釋其實係贊助商送禮，對方都唔知佗B仔定B女，之前都PO過佢哋送嘅禮物，佢一開始只見到有張被仔，冇為意係裙仔定褲仔，其實BB褲仔、裙仔兩款都有，又因最近朋友送禮物頗多，佢仲未分類，只大概影了一張相片。
佢都有做孕婦瑜珈，而飲食方面，單文柔話自己本身好鍾意食甜嘢，但依家懷孕後老公就禁止佢再食：「成日都好想食，但佢依家每日都叫我唔好食甜嘢同雪糕，每日都同我喺度拉鋸緊。」
其實佢報喜之後都講過一直好容易覺得累，又吃不好：「初時都好辛苦，成日都唔係好舒服，係依家先好少少，又好似唔係好吸收咁，所以都瘦咗！」不過最近開始適應了身體，咁展鵬就應該放心啲啦！
Phoebe向來嗜甜，但孕婦就最忌吃太甜，所以展鵬不時廿四孝老公上身，照顧及看管太太的飲食。除咗甜嘢，其實仲有好多嘢都唔食得！
Phoebe現時不能食榴槤、麻辣火鍋、魚生、芒果糯米糍、雪糕等，要戒哂口真係唔容易！
佢唔食得之餘，展鵬都唔可以食，問到展鵬會唔會出去「偷食」時，他佢就話：「我差不多每一餐都同佢一齊食，點樣偷食呀！我依家同佢一樣，都唔食得呢啲嘢！」為咗老婆一齊戒口，聽到都覺得好Sweet啊！
呢啲咪愛囉！
(綜合報道/on.cc)
藝人陸永與老婆Rainah婚後育有兩個囡囡Hannah同Simsim，Rainah時不時都會喺社交網開心些牙佢哋一家嘅生活趣事。
網民都好Like佢哋一家嘅互動！
不過昨日Rainah就Post咗幾張相。
相中見到竟然係囡囡喊得好淒涼。。。
Rainah話Simsim呆咗幾分鐘之後爆喊，姐姐Hannah見到Simsim狂喊，又跟住個妹一齊喊，大聲問：「點解會死㗎？」
原來係佢地屋企養嘅甲蟲死咗。
仲話屋企啲大人見到兩個𡃁妹喊到咁淒涼都跟住眼濕濕。其中一張相爸爸陸永唔小心攝咗入鏡，個樣都好傷感！
唔少網民都話見到佢哋兩個喊到咁都好心痛，不過就話係幫兩個小朋友上咗寶貴嘅一課，令佢哋了解到生命係無常，又讚佢兩個囡囡有同理心，善良又純真，希望佢哋可以Keep住呢顆赤子之心健康成長。
(IG/on.cc)
昨日陳凱琳（Grace）、陳柏宇太太符曉薇（Leanne）同倪晨曦等喺尖沙嘴出席活動。
Leanne產後首次現身，問到佢習慣做人媽咪未？佢話：「有時諗有冇得放假㗎？因為個女早產好難湊，陪月叫我下胎生完唔可以咁快清胎毒，因為未夠37週，BB會成日喊，餐餐嘔，所以o依家兩個鐘頭要餵一次奶，完全冇時間。今日凌晨3點佢仲對住我笑，我o氹到佢5點先有得瞓。」佢仲爆老公陳柏宇當時掛住瞓覺，過咗頭一個月，老公已經冇幫手，不過就仲識o氹佢做媽咪做得好叻。
Leanne話囡囡Abigail已經兩個月大，自己全人奶餵哺，佢話：「我o依家好討厭自己個胸部，自己都唔知道原來係有JJ cup，其實我陀嘅時候已經升咗好多，最近去買bra嘅時候，個sales同我講係I，我仲問係乜嘢嚟？但係原來我係要JJ，連個sales都話好誇張！我有個concept係想停餵人奶。」
問到老公對佢嘅身形滿意嗎？Leanne就話：「唔會，佢唔會介意嘅，我有諗過生完第二胎去縮胸，但係朋友講畀我聽收咗人奶之後會自然縮番，我之前係C cup，o依家升咗8 cup，終於明白媽媽嘅辛苦，亦都接受身形嘅變化，但見到BB健康就會開心，咩都唔緊要。」
至於準媽咪Grace自公佈懷孕後頻頻出席活動，問到BB係咪好旺？佢笑話：「好開心，老公話我可以分擔搵奶粉錢嘅壓力。」問到嘉穎係咪好緊張？佢話：「佢知我身邊有好多人照顧，但係就要強調我一定要帶對平底鞋，活動完之後一定要着返。」
佢話o依家每次到咗活動場地都要向老公報到，暫時只會留喺香港工作，Grace仲透露老公啱啱去完馬來西亞工作，遲啲會去美國登台，問到聖誕節如何度過？佢話：「本來佢聖誕之後先返，不過o依家聖誕前夕已經返嚟，否則我會叫佢帶埋我一齊去。」有冇準備聖誕禮物？Grace即刻抱住個肚甜笑話：「呢個已經係我哋兩個最大嘅聖誕禮物。」
見Grace身材豐滿，佢自言身形有變化，已經重咗10磅，仲要買過啲衫，但就唔確定上圍有冇升cup。提到Leanne自爆產後上圍升咗8級，佢就好驚訝咁話：「等我問吓佢先，我應該冇咁嘅福份，都好嘅，因為喺陀BB嘅時候飲食營養好，我自己都希望餵人奶，因為營養好豐富。」
(IG/Apple daily)
無綫藝人黃智雯（Mandy）入行十年，默默耕耘演好每個角色，愈來愈得到觀眾認同，《搜下留情》的鵪鶉妹、《缺宅男女》的關二嫂，《降魔的》的芷若，到今年的《三個女人一個「因」》的方以因，她一人分演三個截然不同的性格大放異彩，早前連贏新加坡及馬來西亞視后，大有機會在《萬千星輝頒獎典禮2018》中再下一城！
Mandy以中了兩次六合彩頭獎來形容得獎，問到有否信心成為三料視后？她說：「唔敢諗太多，我不嬲冇咩抽獎運，一晚有兩個獎已經超額完成，要中三元難度真係好高！係有信心咗，但都要抱住平常心。（有冇諗到套劇帶畀你咁多？）冇呀！我只係知道係一個好好機會，對演員好重要、好有挑戰嘅角色，所以要做到最好，否則會對唔住相信我嘅人，本身套劇種比較另類，估唔到播放之後反應咁好，好多謝好多網友支持，依家開始有得享受甜美嘅果實。」對於其他視后對手，Mandy認為要成就一個好角色都不容易，幾位大熱如陳煒、李佳芯都絕對值得欣賞。
Mandy回想仍是新人時演技未如理想，拍攝《東山飄雨西關晴》時更亂晒龍，Mandy表示幸運遇到很多很厲害的前輩，助她慢慢進步：「開頭自己做得唔好，都有諗過演員係咪唔適合我呢？就算到之後都有樽頸位，覺得自己不停重複，都有忟過，所以去上心理堂、戲劇堂，希望令自己多啲突破。」
問到哪個時刻令她「開竅」，她表示拍攝《巴不得爸爸》時跟胡杏兒合作，令當時情緒崩緊的她放鬆，再度享受拍劇：「我明明好鍾意做戲，但拍咗幾套劇開始冇信心，慢慢驚咗啲攝錄機，直至呢套劇同杏兒拍，大家熟咗，我開始Enjoy番拍戲嘅感覺。」
講到一班胡說八道會姊妹杏兒、胡定欣、胡蓓蔚、李施嬅及姚子羚，Mandy指她們都很有感染力，特別是做事態度，對她有一定影響：「佢哋比較果斷主動，對工作好執着，呢樣我本身係比較缺少，呢兩年我都被感染到更有衝勁。」
講到跟圈外男友拍拖六年，她直言關係穩定，又大讚另一半聰明，思想比自己宏觀，問到奪視后後會否影響婚期？她說：「冇影響嘅，細個有諗過30歲前結婚，但好忙就冇時間諗，而且另一半畀我好大安全感，令我可以更放手去衝刺，我哋都有共識先做好事業，結婚隨緣，Timing到就會發生，就算結婚都未必會好舖張。（有冇七年之癢，有冇悶？）雙方都有責任Keep住新鮮度，保持話題，同埋唔好成日見面，我覺得見面質素重要過對住嘅時間幾長，亦要畀對方自由度。」
(on.cc)
藝人林峯在尖沙咀出席人氣搜尋大獎嘅頒獎禮，佢話：「今年拍咗4部作品，希望出年畀到驚喜大家，因為會睇到同平時唔同嘅林峯。」
佢獲頒「熱搜藝人」獎項，佢就話好開心，因為今年好少時間喺香港，中間又有幾個月唔喺香港拍攝。
對於被揭與女友張馨月蜜遊日本，講到網民都好關心佢嘅戀情，佢就笑得好冧咁話：「多謝大家關心，香港嘅傳媒朋友好勁，連我去邊旅行都知。因為之前拍咗四部影視作品，自己都要抖抖氣，所以就同身邊人、同屋企人一齊去旅行放輕鬆吓，因為不停拍戲精神壓力都幾大，有三個角色幾大挑戰，大家未見過我咁演戲，係大家冇見過嘅林峯。」
問到係咪見家長，佢就話：「私人嘢我再重複，記者朋友影到我會承認嘅，但係唔會主動分享我工作以外嘅嘢，多謝大家關心，總之我依家生活非常之好，好開心。」
(綜合報道)
方力申（小方）昨日喺尖沙嘴出席服裝品牌活動，佢話暫時完成手頭上拍攝工作，預告今年會過一個lonely Christmas，因為今年顧及工作又要搞游泳班，完全冇時間搵另一半。
係咪舊愛都搵到好歸宿又幸福，因而激發佢想快啲結識女友？小方話：「唔需要同人比，人哋快樂唔代表自己快樂，自己快樂可以影響身邊人，主要睇自己。」
至於舊愛鍾欣潼（阿嬌）即將結婚，有冇請佢飲？佢就：「啱啱返香港，冇check email，唔會假設性回答。」
另外，同場仲有李佳芯、袁偉豪，提到黃子恆食女事件牽連李佳芯喺緋聞之列，佢話：「我一向冇乜緋聞，無端端傳咗我，多咗棵緋聞樹，希望只係做樹底嗰啲，我哋以前係同一經理人，大家有飯局聚會，佢係我前輩，正常交往講一啲戲劇溝通，冇其他。」
之後講到李佳芯同袁偉豪近日頻頻出來賺外快，袁偉豪話：「年尾要積穀防饑，老婆唔食，阿媽都要食。」李佳芯就話好難得出嚟搵外快，順便為自己拉票。台慶頒獎禮戰衣嘅安排，李佳芯話：「仲未準備好，人人都戥我擔心，唔會好性感。」然後佢自嘲冇身材：「露前露後都差唔多，但我會話畀大家聽，驚大家分辨唔到，效果一樣。」
本來袁偉豪諗住幫李佳芯解圍，點知李佳芯突然話想睇袁偉豪着蘇格蘭裙，但入面唔着任何嘢好free咁，仲話：「人哋話唔着鞋都可以輕鬆啲，想睇吓你咁樣可唔可以緩和緊張氣氛。」袁偉豪話：「換完着過去過去畀你過目啦，大家都係將軍澳福利會。」
（Apple daily）
藝人鍾欣潼（阿嬌）為TVB娛樂新聞台節目《StarTalk》擔任嘉賓，大談相隔四年推出國語新碟及嫁作人妻感受。阿嬌說：「我覺得自己啲國語好咗，好開心，老爺話我有進步，啲口音冇咗。不過今次錄音都難，因為有啲歌曲風格變咗，好似《幸福出發》就要唱得甜甜的，真係未試過，把聲自己都認唔到，希望將幸福同人分享。」
談到另一半賴弘國，阿嬌直言剛與對方拍拖一周年，她說：「都算閃婚，其實係我之前去台灣拍戲時，信樂團嘅阿信同女友介紹畀我識，嗰時佢成日嚟探我，我哋有共同嘅興趣，就係睇綜藝節目，我哋好鍾意睇《非誠勿擾》。」
問到另一半為自己做過最冧事情時，她說：「去夏威夷旅行玩跳傘，不過佢畏高，佢本身冇諗過同我一齊跳，但佢怕我中途有咩事，所以最終決定一齊跳，我睇番啲片，佢個樣真係好好笑，不過真係好感動。另外，佢又成日都會Book啲餐廳同我食飯，我亦想打扮得靚靚去，但我唔識化妝，唔識畫眼線，通常等到餐廳閂門我都未化好，搞到佢都嬲嬲哋。」
對於二人屬異地戀，阿嬌說：「佢願意維繫呢段感情，佢成日都飛過嚟香港陪我！（有冇諗過去台灣住？) 我哋仲搵緊地方，其實婚後會繼續拍戲同唱歌，佢都有叫過我唔使做，話會照顧我，不過我覺得結咗婚係要做嘢，我唔想倚賴。婚後始終要有個家，要生BB，不過唔會係呢兩年嘅計劃，生小朋友要冇壓力，因為一有壓力就生唔到，睇緣分。」
(on.cc)
50歲林文龍錫到8歲囡囡林天若（乳名津津）燶，日前佢哋父女咇出動去匡湖居附近超巿購物，未見媽咪郭可盈同行，當時大約4時許，估計係津津啱啱放學，爹哋就同佢去超巿買嘢食。
林文龍一身街坊裝，T恤短褲襯波鞋，佢哋入咗超巿，津津拎咗架小朋友購物手推車，跟住爹哋尾去濕平，津津越大越靚女，係「縮水可盈」。
兩父女到底買啲乜？林文龍心中有數，買菜同肉類，當佢揀揀吓嘢，就收到電話，現場聽到佢話：「買啫喱呀？好好。」估計呢個電話係媽咪郭可盈打嚟搖控落「柯打」，應該係溫馨提示林文龍唔好為津津買漏啫喱，林文龍跟住收咗線就立即行動，佢同津津去凍櫃揀啫喱，又揀零食，林文龍仲拎住問囡囡鍾唔鍾意，津津擰頭，林文龍就放番上貨架，認真廿四孝老竇。
林文龍去畀錢，但津津仍周圍望，當畀好錢，林文龍就伸手拖實囡囡，因為剛落完雨，街上地面濕滑，林文龍好細心拖實囡囡，怕小朋友紮紮跳易跣親，兩父女好溫馨，佢哋慢慢行，津津幫手拎遮，林文龍就拎住環保袋裝嘅食物。
沿途行時，林文龍不時俯身同囡囡傾偈，佢撞到街坊又打招呼，兩父女非常親民。
(Apple daily)
