萬眾期待嘅劉德華跨年紅館演唱會「My Love Andy Lau劉德華World Tour-Hong Kong」，將會喺今年12月15日至1月3日舉行，Fans等咗8年至等到偶像再喺紅館開騷，自然等到頸到長，所以20場演唱會之前接受信用卡預訂，結果1日之內賣晒所有預訂飛，至於公開發售門票日期，就喺9月4日。

雖然距離公開發售仲有個幾星期，但各區嘅通利琴行外已經出現排隊黨，不過好多地方只係見到櫈仔、水樽一類嘅死物霸位，人就唔見喇！記者去過尖沙嘴通利琴行，亦只見到紙皮、水樽排隊，人影都唔多見。但係今日凌晨喺柴灣青年廣場卻發生排隊斬人事件。

就今日傷人事件，華仔透過短片回應，神色凝重嘅華仔話：「今日聽到一個好唔開心嘅消息，傷人嘅事件令到我個心好唔舒服，我希望喜歡我支持我嘅朋友，平平安安去購買演唱會飛，開開心心去睇我嘅演出，我知道每一個有關單位都花咗好多時間，我亦知好難有個好完美解決方式，所以喺呢段時間入面，我哋會盡量去再跟進呢件事，我希望警方兄弟姊妹能夠幫番全港，保護所有市民。當市民喺排隊過程裡面，如果感覺到安全感問題，就要報警，所以我再一次希望大家排隊過程保持冷靜，注意自己安全，你哋嘅安全，令到我開開心心去表演畀你哋睇。」

（apple daily）

周迅同霍建華主演嘅《如懿傳》因為呢輪同《延禧攻略》一齊播，兩劇日日都有好多唔同話題，今日又有台灣傳媒爆料話梁朝偉錯過咗《如懿傳》，最初係想搵佢演乾隆一角，搭檔周迅同董潔，但係呢兩個女演員先後同梁朝偉傳過緋聞，引來老婆劉嘉玲不滿偉仔接拍，極力阻止老公接呢齣劇，又話偉仔演唔成，有推薦劇組搵董潔演出。

聽講當時《如》劇製作人出價1.6億人民幣，希望打動好多年冇拍劇嘅偉仔會回心轉意，但最終因嘉玲唔高興所以冇接到，結果乾隆一角先會落到霍建華手中。

有指《如懿傳》乾隆呢個角色，最初唔係搵霍建華。(影片截圖)

但據《蘋果》所了解，當時劇組傾掂周迅演如懿一角後，開始諗演乾隆人選，其實第一人選係胡歌，只不過當時佢拍完《獵場》後患上抑鬱症，需要休息，所有戲都推晒，製人就開始搵其他人選，偉仔、古天樂同劉青雲都有搵過，但佢哋都冇興趣拍劇，後來周迅推薦咗霍建華嚟演。

傳媒聯絡劉嘉玲，問佢點睇呢啲傳聞。
佢話：「根本唔係事實，你覺得我係一個咁膚淺嘅女人？確實有製作公司曾經嚟搵我想搵梁生演乾隆皇帝一角，60集，但唔係你哋講嗰套劇，我仲游說佢去演，因為劇本、角色、條件都太好！不過梁生拒絕咗，佢都係選擇拍好電影，其實仲有好多、好多真人騷都通過我搵佢做，但佢都推晒，佢覺得自己唔適合，我一直好尊重佢嘅決定。」

梁朝偉 (資料圖片)

此外，周迅喺《如》劇俾人批評30幾歲仲扮演15歲，話佢太老啦！今日佢喺微博反駁：「變老是生命中不可跨過的一個過程。而作為演員，跨過時間的長河，就會變得無比自由。」
周迅喺微博反駁啲人批評佢扮後生個樣太老！(影片截圖)

（apple daily）