歌手吳若希（Jinny）不時喺公開活動投訴老公Alex，一時話被對方背叛，一時就話未婚時老公同時追兩個，最近嗰次就呻唔接佢機，將家事搬上枱，數到老公一文不值！
忍無可忍嘅佢今次出招「警告」老公，上載咗張一家三口「溫馨」合照。
見到Alex畀兩母女騎住「大石砸死蟹」，變咗食物鏈最底層郁都冇得郁，睇嚟Jinny要話畀Alex知邊個先係一家之主！
網民都話：「淼淼既（嘅）眼神係可憐Alex 但你個樣好明顯係嘲笑Alex」、「呢張相睇到你地（哋）各人係屋企既（嘅）地位」，笑容背後原來暗藏殺機！
不過其實Jinny同老公好Sweet，所有嘅投訴咪又係耍花槍，睇Alex任勞任怨就知啦！
(on.cc)
好難過，佢更忍唔住喊，片中見佢扁晒嘴，頻頻用手抹眼淚。。。
歌手何雁詩（Stephanie）先前飛到美國洛杉磯報讀演藝課程，佢尋日喺社交網表示已經完成四星期嘅課程。
佢喺洛杉磯一直邊玩邊學習，生活多姿多采，佢仲帶朋友去打邊爐，又教大家炸響鈴落3秒就食得。不過開心嘅時光過得特別快，話咁快就要返香港。
Stephanie呢日佢喺社交網上載多張同朋友嘅合照，因為佢好唔捨得喺當地認識嘅朋友，臨走時更難過到喊。片中見到佢扁晒嘴，頻頻用手抹眼淚，一旁嘅朋友都顯得難捨難離。
Stephanie並英文留言話：「我唔知點解我會喊，我已經大個女喇！我好憎自己咁愛你哋！各位再見，我哋會再見！」
(on.cc)
身材嬌小的小儀樣子完全不似47歲，精靈活潑，96年加入商台做DJ，一份工至今做了22年，工作上搵到了長期飯碗，但愛情上仍然尋尋覓覓！
如果轉行，想做甚麼呢？小儀笑說：「梗係想做家庭主婦啦，哈哈哈！如果轉行嘅話，我希望可以做同動物有關，如果唔諗錢，做義工開心嘅，冇壓力，我好知足，比上不足比下有餘，同森美、林海峰比梗係唔得，但我一個屋邨妹，有依家生活已經好滿足。」
雖然想做家庭主婦，但小儀認為女人不一定要結婚：「女人最緊要有個伴，身份唔一定係老公，年紀越大發現老公不忠，離婚手續好繁複，如果係伴侶隨時拍下籮柚走，唔使畀筆錢律師賺，係相愛嘅話唔需要婚書，當然呢樣我要教育屋企，因為爸爸媽媽好傳統，覺得女人要有頭家才安穩，但我覺得有個伴緊要過老公。」
47歲的小儀仍未放棄愛情：「我努力中，仲有一口氣唔會放棄，因為身邊好多單身女仔選擇放棄，覺得自己40幾歲，自己唔係被揀之列，但我覺得唔好咁灰心，首先好多弟弟鍾意姐姐仔，失婚男士都唔差，有經歷反而為對方着想。身邊男人同我差唔多年紀，佢哋想識20幾歲，但真係追到原來唔開心，每日都擔驚受怕，因為知道女仔身邊有其他人追，而其他人後生過自己，成日猜度懷疑，最終都係散，所以搵差唔多年紀係舒服啲，人生去到埋尾階段都係希望風平浪靜，滑浪嗰啲都係後生時候玩。我唔係嫁唔出，未嫁啫，唔代表人生失敗，近年多咗獨立女性，安於自己歲數活得快樂，魅力先會出現。」
最後小儀畫出心目中的白馬王子：「塊面有好多鬚根，男人有好多毛髮好吸引，我唔要佢好似猩猩咁多心口毛手毛，但剃完鬚塊面有少少嚡嚡哋，感覺好有安全感，呢啲先係男人，如果滑過我，搵個女人都得啦，我幾鍾意有少少大男人性格，女人要有一個好man好強好多主見男人，先畀我有小鳥依人感覺，佢要生活上智慧叻，我係小富婆，唔使佢辛苦賺錢，最緊要氹到姐姐我開心，哈哈！」
(Apple daily)
真係星光熠熠！相識滿天下的她，獲一眾好友特意前來親自到賀，包括羅霖、胡楓、林家棟、關寶慧、文頌嫻、周家蔚、黃淑儀及老公、鮑起靜及林小明等。
陳曼娜日前舉行盛大生日派對，她表示這是她今年第二個生日派對，之前無綫一眾台前幕後已為她搞派對慶祝。
最令她感到驚喜的，就是久未露面的一代性感女星于莉，成為神秘嘉賓「突襲」派對！
曾拍電影《刀劍笑》、劇集《絕代雙驕》等作品的于莉，近年已很少在幕前演出，最近一部作品已是在2014年和內地女星楊冪合演內地劇集《微時代之戀》。
于莉喺劇集《絕代雙驕》中飾演邀月宫主。
少有在港露面的她，雖已是55歲，但風采依然，皮膚白晳兼保養得宜。
對於于莉突然現身，她說：「我真係好開心好驚喜，佢特登由北京飛嚟，我哋都好耐冇見。佢係我契妹，感情一直都深厚，依家更加啱傾，因為佢同我一樣信咗基督教，所以我更開心！」
她續說也要多謝兩位「囡囡」文頌嫻及周家蔚，因為她們別具心思的為她訂造兩層設計精緻的蛋糕，她說：「以前拍劇文頌嫻做我個女，大家一直都有聯絡，我當佢同周家蔚好似自己個女咁，好錫佢哋。」
全晚最令陳曼娜感到甜絲絲的，當然是女兒鄭祖兒和外孫女「棉花糖」也有出席派對，穿上紅裙的「棉花糖」伴着她一起唱生日歌，手舞足蹈，非常可愛！她說：「今年我生日願望係身體健康，因為呢輪成日咳，咳到黐肺！（幾時再拍劇？）其實都有幾年冇拍，最近ViuTV都有搵我，想我同劉美君合作，依家傾緊，我心大心細！」
(on.cc)
台慶劇《是咁的，法官閣下》雖然冇乜大卡士、大製作，但貼地題材，觀眾反而幾buy。
當中飾演實習律師潘琪嘅陳華鑫（Gloria），為咗呃like，竟然喺庭上偷影相兼偷竊，最後被判罪名成立，罰款二千蚊，有機會影響獲取大律師資格。
Gloria今日喺IG貼咗一張大肚相，穿上一件白色內衣配薄紗外套，用手輕托巨肚，流露幸福笑容。
Gloria留言：「期待小生命的來臨，寶寶乖，瞓多一個月先出嚟玩。」陳華鑫回覆傳媒時承認，因為醫生診斷出宮頸開始短，令佢心情緊張，佢又話希望可以順產，但最終要等醫生決定。
其實Gloria入行已經六年，佢係2012年落選港姐，今年1月嫁畀生意人周國榮，婚後二人極速造人成功，8月宣佈有喜。
Gloria早前透露預產期係12月尾，但由於子宮頸短，BB有機會早產，所以都要臥床休息。
(apple daily)
大美人李嘉欣出席商場聖誕亮燈活動，講到她與許晉亨本月23日結婚十周年，問到會點慶祝？她說：「應該會喺香港，唔知佢有咩安排，我諗非常簡單咁慶祝。（二人世界？）老公有預埋個仔，我聽完都忟，嗰陣時佢都未出世點解會預佢，諗起一啲都唔浪漫，不過佢應該檢討咗。（有冇咩禮物想要？）保持依家咁已經好好，佢係好爸爸又係好老公。」
同阿仔有戀愛感覺
問到阿仔乖唔乖？佢話：「一半一半喇，我當然希望佢樣樣都好，但好難，咁自己都會有情緒，小朋友都係，面對佢哋都唔可以太順從，佢有事求你時就會好Sweet，佢會話我係佢女朋友，好似頭先喺車度同佢Face Time，佢不停對住電話錫我，佢話返屋企要攬我，補償番，同佢有種戀愛嘅感覺，可愛時好似天使，但唔係經常。」
過單身聖誕都得
問到早前老公許晉亨陪兒子參加學校活動，點解冇去？嘉欣話：「爸爸好偉大，等佢兩父子曬吓太陽。（你驚引起混亂所以唔去？）畀機會佢哋兩個人，我平時都會參與，我係以小朋友立場去睇，佢開心我會去做，我個身份係媽咪。」她又透露聖誕節未必會去滑雪：「五勞七傷，都想變吓，不過小朋友鍾意。（會遷就小朋友？）我可以一個人過單身聖誕都得，等佢哋知道我唔喺度會掛住我更加愛我。」
(on.cc)
回復單身嘅唐詩詠與異性約會都好正常，前晚與「四眼吳卓羲」一齊食飯，全程眉來眼去，男方摸詩詠頭，詩詠就嘟起嘴，個樣好冧。
原來「四眼吳卓羲」名為Samuel Chan 陳思銘，年約30歲，都幾叻仔㗎，喺英國大學畢業後，短短三年創立Britannia Study Link(英識教育)，成為數一數二的升學顧問中心。有指佢每年收入超過八位數字，因為外形唔差，被行內人稱為「教育界王力宏」。
問係咪同詩詠拍拖？Samuel以短訊回覆﹕「It was really just a dinner with friends.(我只係同朋友食飯)。」問到覺得詩詠係咪好女仔，會否展開追求？佢答：「I don’t know her enough to comment.As a friend, she is great. That’s all I can say.thank you.(我對佢所知不多。作為一個朋友，佢好好，呢個係我唯一可以講，多謝)」。
睇番Samuel嘅ig，經常都會同網民分享自己生活同小秘密，經常上載跑步相，與麥明詩和林作亦認識。今年5月，Samuel透露與讀大學時期嘅索女友分手，直言公司是二人艱苦創立，但當Samuel事業有起色，二人卻分手。
Samuel慨嘆謂：「男人就是這麼幼稚和膚淺，以為錢可以彌補之前欠了對方的一切。她加入健身中心，我幫她付了錢，她發現後全數退還；我買甚麼她都堅持不要，在那個時候我才明白，原來人生有一種無力感叫做無以為報。」
(Apple daily)
香港Rapper火炭麗琪噚日喺IG動態貼文字圖鬧人，矛頭直指向來形象斯斯文文嘅王敏奕(相關新聞:https://goo.gl/3dNFa2)。
火炭麗琪亦有喺王敏奕男友曾國祥Ig留言問「do u know ur girlfriend cheat u before？Lol（你知道你女朋友之前有欺騙你？）」直中要害問曾國祥有「帽」事。
接受傳媒訪問時，火炭麗琪更直認王敏奕嘅前男友就係佢男友，不過啱啱分咗手。
沉默咗一日，曾國祥今日終於畀「反應」，喺Ig貼咗一張同女友王敏奕坐喺機艙嘅相。相片由戴住黑超嘅曾國祥負責拍攝，王敏奕就閉目冧爆咁攬住男友，一副無聲勝有聲嘅樣子。
曾國祥續留言：「寬容笑著面對世間喧噪…台北見！」以簡單一句說明對女友的信任。唔少網民都即刻留言表示支持，仲叫佢唔使理其他人講無謂嘢。
(Apple daily)
54歲張曼玉，近年鮮有現身公開活動。而佢3、4年前出活動時，因為過瘦顯得有點憔悴，加上臉部紋路明顯而被指「變殘」。對上一次見到佢蹤影都係靠網友喺香港偶遇甫出合照，不過原來佢尋日（15日）已經飛咗去上海出席品牌活動，成為全場焦點！仲要由頭到腳潮味十足，隔住個Mon都Feel到佢幾咁有型！
着上黑色貼身皮褸嘅張曼玉，身形依然以纖瘦，襯上一頭微微爆炸嘅曲髮，望落非常Rock，加上佢喺活動中左右穿插，舉手投足都似影緊劇照咁，氣場強勁，狀態大勇，輕易成為全場焦點。
在活動紅地毯上，張曼玉透露最近工作計劃，忙於音樂方面，望今年可以出EP。其實張曼玉的演技是華人影壇傳奇，佢先後獲得康城同柏林影后，還有5次金馬影后及5次金像獎影后等多個影后殊榮。
但近年佢對音樂充滿熱誠，自從佢2004年拍前夫執導嘅電影《錯過又如何》後，開始接觸獨立音樂人，並在電影中演唱四首歌，此後佢開始用電腦軟件製作音樂，2012年佢曾與樂隊在北京首次公開現場獻唱。2014年張曼玉以搖滾歌手身份，獲邀在上海草莓音樂節中獻唱《甜蜜蜜》等，其低沉嗓音雖然遭到批評，不過佢始終有一顆搖滾心，2015年佢仲為電影《戀愛中的城市》創作兼主唱主題曲《如果沒了你》，仍在追音樂夢。
（綜合報道）
周汶錡(Kathy)有兩個仔仔，一個3歲大、一個20個月大。Kathy之前提過兩個囝囝都開始返學，細仔喜歡返學，好動同鍾意游水，反而大仔Jacques開初不太願意上堂，比較斯文，還未融入到校園生活。
模特兒劉雯、周汶錡及王賢誌等，噚晚去咗尖沙嘴出席時裝品牌活動。
Kathy話：「因為我想佢學廣東話，Jacques讀全廣東話學校，所以佢未係好同到同學仔溝通。不過佢嘅廣東話進步咗好多，我之前飛咗去外地兩個星期，佢識講多咗好多嘢，仲識唱唔少學校嘅中文歌，都叫有啲成績。」
「我喺屋企都會同佢講廣東話，佢同爹哋就會講英文，我想佢讀本地小學，識聽識寫中文，到佢讀中學嘅時候再自己選擇。」
(apple daily)
