天王黎明又出關！他的好友雷頌德日前在社交網分享合照，以英語留言笑指雙方已有一段時間冇見面，但友誼及對方的靚仔樣依然冇變，唯一變的就是自己的體形。

由於背景似是在包廂食晚飯，有網民笑言是否今年四月底榮升父親的黎明為B女搞小型百日宴，更讚他為首席型爸，但同時有網民指合照非近日所拍，因雷頌德太太梁家玉上月初分享和黎明的合照，背景也相似！

有女萬事足的黎明行蹤低調，自B女出生後只出席公開活動一次，而他在本月底將在東莞開騷獻唱。

(on.cc東網)

恭喜27歲嘅李蘊再做媽咪，已有一女嘅佢，第二胎喺8月8日生咗個仔，囝囝重3.2kg，依家一仔一女嘅佢湊成個「好」字，真係可喜可賀。

佢已經生完仲出埋院，休息咗幾日，佢今日喺ig貼相分享喜悅（相關新聞︰【同家姐晞晞一樣都係⋯李蘊報喜：痛過第一胎】），李蘊接受電話訪問，講到今胎痛過生大女，佢話︰「係呀！終於都出咗世，今次經歷同上次好唔同，今次痛過上次好多，時間又短好多，見到阿仔出世，痛都值得。」

講到呢胎，李蘊都係選擇自然分娩，佢話︰「上一胎同今胎都冇打無痛分娩針，我覺得自己好堅強，醫護人員有問我真係唔打，我覺得頂到，個個女人都做得到，為咗自己小朋友，媽媽係最偉大嘅。用邊種方式，因人而異啦，最緊要量力而為，問醫生意見。」

講到2歲嘅大女見到細佬，知道做咗家姐點反應？李蘊笑稱︰「大女見到細佬好興奮，出到嚟係咁摸，醫院要隔住睇BB，姐姐猛話要抱細佬，返到屋企我畀佢抱吓，佢成日話要錫BB，我覺得佢係一個好家姐嚟嘅。」

(蘋果日報)

你三歲嗰陣，識唱乜嘢歌？

唱得之人田蕊妮，三歲識唱晒成首《月亮代表我的心》。38年後的昨天，田蕊妮與爸爸一齊合唱這首歌。在雲頂。2016年3月，田蕊妮母親病逝，一次訪問中，阿田感謂小時只覺得朋友、或者男朋友比雙親更重要；踏入社會工作之後就一直忙，忽略了父母。直至有日回家，看到雙親，才驚覺他們老了很多，令阿田深深自責。

「有時覺得他們很難溝通，但其實不是父母的問題，因為他們要求很簡單，只要令他們開心就是最重要。」自從母親走後，阿田一有時間就陪爸爸，月前父親節，她在社交網分享一張全家福，寫道：「我爸爸是一個不懂表達感情的人，他從不要求我們要做些甚麼或應該怎樣，他從來都只是要求我們對媽媽好，他最常說的是只要媽媽快樂一家人就會快樂，他是我見過最愛妻子和家庭的男人，親愛的爸爸，父親節快樂。」

昨晚，田蕊妮去雲頂登台，爸爸是座上客。唱唱下，阿田好想同爸爸合唱一曲，事就這樣成了。之後阿田仲喺社交網上載精采片段，田爸爸聲線低沉醇厚，非常好聽。

阿田還寫道：「我爸是一個很熱愛音樂的人，還記得小時候一家人晚飯後便會坐在一起聽我爸喜愛的黑膠唱片！三歳的我已能唱完整首《月亮代表我的心》。唱歌是我一直喜愛的事，很多父母可能覺得這當作是興趣並沒有問題，若孩子們想要把它當成職業就不太實際了。我的父母從不反對我做自己喜歡的事，而且還給予鼓勵與支持我去追尋夢想。我真的很幸運能成為他們的女兒。雖然媽媽已先行離去，今天我帶了我爸來到雲頂看我的演唱會，突然很想跟他合唱一曲。爸，謝謝你的合作！這將會是我一生中最難忘的回憶，願你也開心快樂，享受當下的每一刻！」

之前阿田曾在社交網Post同爸爸唱K嘅短片，片中只見田爸爸好有台型咁唱英文歌，全程投入，當時已有不少網民勁讚佢歌喉好，仲話阿田把靚聲係遺傳自老竇，阿田都留言話：「我老竇是歌手。」

(蘋果日報)