【14歲囡囡拍拖】徐濠縈大讚：我一早就知

2018-11-22

歌手陳奕迅與太太徐濠縈（阿徐）視女兒陳康堤（包包）如掌上明珠，一家三口幸福美滿～

阿徐仲成日接囡囡放學，兩母女感情超好！

日前就有周刊報道話康堤拍拖啦！仲話個男仔係「嫩版彭于晏」，真係有眼光！

徐濠縈昨日喺尖沙嘴出席一個品牌活動，佢着住一套綠色嘅西裝到場。

問到14歲女兒陳康堤被拍得情竇初開拍拖，阿徐就笑笑口咁話：「尋日朝早一擘大眼，就有好多朋友好心畀段新聞我睇，其實我知佢拍拖，冇嚇親，我嚇親係點解你哋會收到風佢喺邊個球場比賽？你知我哋係禁止去睇佢比賽㗎嘛，點知畀你哋影到，仲要跟足全程，影埋佢朋友。」

問到包包睇完新聞之後點，阿徐話包包擔心對方多啲，因為唔知對方家長會點諗。阿徐又話見過個男仔，不過Eason就未見過，阿徐仲話：「不過都唔擔心，睇Eason就知佢開放，呢個年紀都可以拍拖喇，佢又唔係小學生，都中三，有自己鍾意嘅人都好正常。」

問到阿徐點睇個男仔，佢就話：「要我講人哋？（報道話個男仔係嫩版彭于晏。）咁咪好囉，佢都靚仔㗎，我同阿女都好有眼光，最緊要大家開心，希望大家高抬貴手，因為佢哋小朋友唔識，嗰日阿女都有發現有人影，但就冇為意，都有叫佢喺公眾場合檢點啲。」

咁包包o依家拍拖感覺點，阿徐就話：「我就OK，反而我身邊啲朋友唔OK，特別係睇住佢大嗰啲，佢哋記憶中包包仲係梁浸浸咁大，其實佢已經有少女心事。」至於有冇心理準備10年後抱孫，阿徐就話：「吓，我要諗呢啲喇？我冇諗過啊，不過都係福份嚟。」

(綜合報道)

【叫自己勇敢啲】靜靜開刀誕7磅囝囝：一出世就疴咗篤尿落我個頭度

2018-11-22

於今年5月宣佈懷第二胎，近日原來靜靜開刀順利誕下7磅兒子，生第二胎的Zoey直言生產過程順利：「有過一次經驗，所以比較淡定，我不停叫自己勇敢啲，生嘅過程都唔算辛苦。」

她續說：「老公有陪我入產房同剪臍帶，最搞笑係BB一出世就請我『飲茶』，醫生抱BB畀我睇嘅時候，BB竟然疴咗篤尿落我個頭度，好搞笑！成個手術室嘅人都忍唔住大笑。（BB似你定老公多啲？）好多朋友都話今次BB似我多啲。」

大家認爲細仔似爸爸還是媽媽呢？
媽媽表示BB尚未改名，會交由師傅負責，講到對BB的期望，她說：「都係希望佢平安健康、肥肥白白咁長大。」

藝人岑潔儀（Zoey）又指會餵哺母乳。

已找來專業人士幫忙催乳：「依家每兩個鐘餵一次，有催乳師教我點餵，點樣唔會咬損乳頭，所以暫時都好順利。」

一家四口好幸福！恭喜恭喜~

（ig / 綜合報道）

【終於終於！】張衞健講到眼濕濕：亦有可能never again

2018-11-21

藝人張衞健、洪永城、曹永廉、蔡思貝和楊秀惠等現身電視城，為即將推出的劇集《大帥哥》宣傳。無綫兩大高層樂易玲和曾勵珍現身撐場外，有關方面更請來樂隊及軍車接載張衞健出場，期間又舞獅點睛，足證他的地位。

張衞健於台上感性表示：「由開機嗰日開始，我已經唔捨得，因為唔知幾時再用廣東話拍劇，有可能係明年，亦有可能never again！」他接受訪問時說：「頭先我真係眼濕濕，因為真係唔知幾時再拍。有其他唔係娛樂圈嘅工作等我做，包括慈善及教會嘅事。」

對於今次返港拍劇，他形容為「還畀觀眾」：「當年我拍完《西遊記》就走咗去，好似不辭而別咁，所以好想再拍番一套劇畀大家。（對收視有信心？）冇理講呢啲，因為拍嘅目的唔係為呢樣。（唔再拍好可惜。）我話1年1部嘅話，大家都唔珍惜啦，少食多滋味，等同如果我拍得多，自己都唔珍惜表演機會啦。」

(on.cc)

【連續兩日】阿Sa超開心：太好喇你哋！！

2018-11-21

咩叫好朋友呢？唔一定要日日見嘅，有心比較重要。

好似聽日36歲生日嘅蔡卓妍（Sa）咁，雖然要忙於為《神探大戰》開工，但係獲得一班好朋友，包括容祖兒、關智斌（Kenny）、張致恒（Steven）同鄭希怡（Yumiko）到片場探班，仲帶埋蛋糕去為壽星女預祝，係咪又warm又窩心先？

阿Sa今日喺Instagram度貼相，簡簡單單一句「太好喇你哋！！多謝」嚟表達謝意，至於喺Yumiko嘅IG度，就向阿Sa送上祝福話：「生日快樂，最正嘅SA！」

其實祖兒等人已經係連續第二日去探阿Sa班，佢哋前日探第一次次，噚日佢哋貼相上IG時，仲玩今期流行嘅「汪阿tag」！

難得開工時間都可以見到一班老友，仲要前日見完，噚日又見，仲有咁多人送吻賀壽，難怪阿Sa咁開心！

不過吹蠟燭許願時發生一段小插曲，祖兒一時情急下，搶先吹熄蠟燭，搞到主角阿Sa擔心自己的願望會否成真，Steven搞笑指如果阿Sa要幾百萬，可以問祖兒攞，祖兒隨即豪氣答應「冇問題」。問到阿Sa有咩生日願望？佢話：「健健康康、開開心心、食得瞓得玩得，已經好足夠！」

至於祖兒今日另外再貼相，係佢去探Yumiko囡囡梁浸浸時嘅合照，見到已經3歲嘅梁浸浸坐定定玩氣球，合照時都好乖好淡定，不過祖兒就留言話：「一眨眼，她要變成少女了，多眨一下，她就談會戀愛，還會嫌我幼稚（其實已經嫌棄中），時間這東西……」

(Apple daily)

【聽晚喺尖沙嘴酒店擺酒】婚紗照曝光！

2018-11-21

26歲大台《3日2夜》歐陽巧瑩（Tammy）明日升呢做人妻，跟30歲「木偶哥」林師傑有情人終成眷屬，晚上在尖沙嘴某酒店筵開30多圍囍宴。兩人既甜蜜又鬼馬嘅婚紗相曝光，Tammy換咗幾套靚靚婚紗，不但盡顯完美body，仲好似八爪魚咁夾實未來老公影相，煙韌爆燈。

婚禮前夕，準人妻Tammy接受傳媒訪問，踢爆木偶哥今早8點先返到屋企，冧爆表示：「佢作咗首歌畀我，噚日排band（bigday live band）排到今朝先返屋企，心痛！」問到情歌叫乜名？Tammy話：「我乜都唔知㗎，保持神秘感。心情未得閒緊張住，不過係有少少興奮，因為籌備咗咁耐，終於到聽日了！」

睇番兩人嘅婚紗相，Tammy甜絲絲話：「最難忘嘅係睇相嗰下，見到佢個樣好開心，佢仲download咗落嚟做wallpaper，覺得佢好迷戀我，我好高興，哈哈！」

明日做老襯嘅木偶哥為咗向老婆表愛意，寫咗《美麗的你》同《So in Love》兩首歌在婚禮上告白，木偶哥接受傳媒訪問表示：「一直都想寫歌畀TamTam，3年前已經寫咗《So》，為婚禮再寫《美》送畀佢，音樂對我哋好重要，佢鍾意我嘅其中一個原因，係睇到我keep住對音樂團火，《美》係講我哋嘅故事，自己中文唔係十分叻，點知真係迫到去8、9月，因為搞結婚我哋經歷多咗，自己用15分鐘寫好呢首歌，我仲搵咗譚俊彥喺婚禮上彈solo，希望自己可以唱得好好畀TamTam聽。」

(Apple daily)

【胡說八道會】李施嬅：希望你要乜有乜

2018-11-21

胡說八道會開心事輪住嚟！

早前係杏兒生日，一班好姊妹為佢開生日P！

前晚賀黃智雯拎視后。今次就到姚子羚～

姚子羚今日（11月21日）38歲正日生日，胡說八道會好姊妹胡定欣、胡蓓蔚、黃智雯、李施嬅及胡杏兒昨晚為她慶生，又送花又送吻，令壽星女大為開心。

李施嬅在社交網分享這晚開心時刻，並留言：「祝10分勁嘅姚子羚生日快樂。呢位美女同我嘅口味同喜愛嘅東西（除咗男人）都好相似，所以一齊經歷很多。希望你要乜有乜，開心健康，真命天子快啲出現啦（喂，真命天子，睇到呢段message快啲報到啦！）love you babe @elaine_yiu @myoliemyolie @nwuuu @paisleyhu @wong_manman #happybirthday #胡說八道會」