當年係TVB當家花旦嘅黎姿（GiGi）毅然放棄演藝事業，之後與富商馬廷強於08年結婚，二人婚後育有3名囡囡，分別係8歲孖女家蔚（Patricia）、家鎂（Gianna）同5歲細女Pegella。

佢同老公馬廷強花咗好多心力照顧細佬黎嬰同打理醫學美容公司，將公司發展到上市真係一啲都唔簡單。

身為事業女強人，GiGi就梗係好忙啦，但忙極都要見朋友嘅。早前佢就被捕獲同朋友喺銅鑼灣飯聚，同一時間約埋老公一齊，見老友又可以陪老公，一舉兩得。

當日下晝1時許GiGi同2女1男去到銅鑼灣皇冠假日酒店午飯，大約5分鐘之後老公馬廷強獨自到餐廳匯合。

呢一餐飯食得好悠閒，一直食到3點半GiGi先同3名友入離開。佢哋徒步行去禮頓中心方向，沿途GiGi同兩位女性友人依然傾得好開懷，雖然係3名小朋友母親，但係GiGi不減少女氣色，難怪可以成為公司嘅生招牌。

黎姿老公離開時，仲好霸氣咁橫跨禮頓道來回線。佢喺GiGi離開5分鐘之後先走，佢上咗泊係門口嘅七人車。

馬廷強七人車橫切雙白駛離酒店。

仲要橫越電車軌。

七人車橫距禮頓道，要閘停來回線汽車。

一般安全做法是左轉駛離酒店。

原本由酒店駛走，一般駕駛方法都係左轉入禮頓道，再左轉入黃泥涌道離開較安全。不過馬廷強嘅司機選擇由酒店右轉入禮頓道，霸氣橫越來回行車線，切過雙白線，再閘停一輛電車，往天后方向駛出，果然係快靚正「捷徑」一條。

(綜合報道/Apple daily)

身材嬌小的小儀樣子完全不似47歲，精靈活潑，96年加入商台做DJ，一份工至今做了22年，工作上搵到了長期飯碗，但愛情上仍然尋尋覓覓！

如果轉行，想做甚麼呢？小儀笑說：「梗係想做家庭主婦啦，哈哈哈！如果轉行嘅話，我希望可以做同動物有關，如果唔諗錢，做義工開心嘅，冇壓力，我好知足，比上不足比下有餘，同森美、林海峰比梗係唔得，但我一個屋邨妹，有依家生活已經好滿足。」

雖然想做家庭主婦，但小儀認為女人不一定要結婚：「女人最緊要有個伴，身份唔一定係老公，年紀越大發現老公不忠，離婚手續好繁複，如果係伴侶隨時拍下籮柚走，唔使畀筆錢律師賺，係相愛嘅話唔需要婚書，當然呢樣我要教育屋企，因為爸爸媽媽好傳統，覺得女人要有頭家才安穩，但我覺得有個伴緊要過老公。」

47歲的小儀仍未放棄愛情：「我努力中，仲有一口氣唔會放棄，因為身邊好多單身女仔選擇放棄，覺得自己40幾歲，自己唔係被揀之列，但我覺得唔好咁灰心，首先好多弟弟鍾意姐姐仔，失婚男士都唔差，有經歷反而為對方着想。身邊男人同我差唔多年紀，佢哋想識20幾歲，但真係追到原來唔開心，每日都擔驚受怕，因為知道女仔身邊有其他人追，而其他人後生過自己，成日猜度懷疑，最終都係散，所以搵差唔多年紀係舒服啲，人生去到埋尾階段都係希望風平浪靜，滑浪嗰啲都係後生時候玩。我唔係嫁唔出，未嫁啫，唔代表人生失敗，近年多咗獨立女性，安於自己歲數活得快樂，魅力先會出現。」

最後小儀畫出心目中的白馬王子：「塊面有好多鬚根，男人有好多毛髮好吸引，我唔要佢好似猩猩咁多心口毛手毛，但剃完鬚塊面有少少嚡嚡哋，感覺好有安全感，呢啲先係男人，如果滑過我，搵個女人都得啦，我幾鍾意有少少大男人性格，女人要有一個好man好強好多主見男人，先畀我有小鳥依人感覺，佢要生活上智慧叻，我係小富婆，唔使佢辛苦賺錢，最緊要氹到姐姐我開心，哈哈！」

(Apple daily)