宋熙年（Sarah）同陳智燊（Jason）於16年拉埋天窗，今年8月誕下囝囝Damon，一家三口好幸福。
兩公婆不時喺社交網貼出囝囝相晒溫馨，轉眼Damon都近3個月大，長得精靈可愛！
宋熙年噚日好搞笑，貼咗一張Damon嘴部大特寫，佢上脣位置有點烏黑，搞笑媽咪即留言：「Damon says, it’s #movember!」取笑囝囝生鬚，其實呢啲係BB汗毛。
宋熙年都話囝囝好man，形容佢係my little man。
爸爸Jason早前都試過留鬚，玩男人味，唔知係咪基因勁，囝囝都毛髮旺盛？其實宋熙年講嘅movember，有個古仔，呢個字係將11月英文November同鬍子英文mustache兩個字結合而成，活動最初係04年喺澳洲墨爾本，由一個為數30人嘅組織發起，佢哋喺11月嘅30日內唔剃鬚，藉以提升社會對睪丸癌同憂鬱症嘅關注。
(Apple daily)
一班港姐出身嘅靚女陳茵媺、張嘉兒、朱凱婷、曹敏莉同戚黛黛感情好好，時不時都會出嚟聚一聚，互相見證住大家嘅成長。
睇番佢哋全部都係大有來頭，先講陳茵媺就係2006年香港小姐冠軍同國際親善小姐，係雙料冠軍；張嘉兒就係2007香港小姐冠軍；朱凱婷係2001年香港小姐季軍；曹敏莉就係2003年香港小姐冠軍、戚黛黛就係同年嘅香港小姐季軍，真係不得了，個個都咁索！
月初宣布再佗B嘅前港姐張嘉兒過兩日（18日）就踏入35歲，日前佢就同朱千雪、湯洛雯、岑杏賢及蔣家旻飯敍。
尋晚就獲幾位相識近10年嘅姊妹為佢提早慶祝！佢哋就係人妻團陳茵媺、曹敏莉、戚黛黛及朱凱婷喇！
朱凱婷（左起）、陳茵媺、曹敏莉及張嘉兒都有小朋友，唔知戚黛黛幾時生呢？
嘉兒喺Instagram上載大合照，佢話呢班姊妹見證佢由單身變結婚、由一個小孩變兩個小孩，好感恩有佢哋喺身邊，每年都為佢慶祝。仲話叫咗佢哋唔好送禮物，不過最後都帶埋禮物嚟赴會，令佢好驚喜呀！
(綜合報道/on.cc)
宋熙年（Sarah）今年8月為老公陳智燊（Jason）剖腹誕下囝囝Damon，Sarah都坐完月，專心湊仔之餘仲開始做運動操番靚個Body。
唔少媽媽生完BB後都努力Keep Fit，希望回復最佳狀態！Sarah都唔例外～
早前講過體重只係比懷孕前重6磅嘅佢，喺Instagram上載最新收身成果，佢着上sport bra露出個肚，雖然未至於fit到漏，仲有少許贅肉，不過對於一個新手媽媽嚟講其實相當唔錯！
佢話出咗一身汗好爽，不過坦言身體唔似懷孕前咁好，但唔會抱怨，仲覺得好感恩，因為康復進度好好，而且冇特別節食，不過仍然食緊坐月嘅餐單！
(on.cc)
林芊妤（Coffee）上月16日一索得男，生咗7磅重「咖啡仔」！
Coffee就揀咗餵母乳，之前佢成功吸出初乳，護士都讚佢叻。
而佢亦貼咗「製成品」嘅相上ig，足足有100ml，好犀利！
Coffee產後極速修身，仲透露囝囝已經改咗中文名翟德彥。
今日係彥彥滿月大日子，坐完月嘅Coffee就喺Ig貼咗一張溫馨滿滿嘅餵母乳相。
呢張充滿愛嘅溫馨照，上載咗短短兩個鐘，已經吸引3萬幾個網民讚好，好多網民都留言，大讚Coffee偉大，唔少媽咪仲話希望多啲人支持餵哺母乳，其他留言就包括「哺乳媽媽最美」、「滿滿的母愛」、「好羨慕啊 個胸型重咁靚」…….
當然，呢啲嘢永遠都有正反方，亦有網民接受唔到Coffee將餵母乳嘅相公開，留言質疑佢點解要咁做，好似話「餵咪餵點解要咁影俾人睇，都做咗人阿媽都仲係咁」，又話要unfollow佢。
不過，大部份網民都好支持Coffee，仲因為力挺Coffee而與反對嘅網民爆罵戰，Coffee亦有回應網民：「其實只係一張好正常嘅相，相信我以前嘅泳衣相都性感過呢張啩？哈哈，我覺得今日係我第一個BB滿月嘅日子，想好好地喺自己平台post呢張相嚟紀念今日，因為其實係好幸福嘅事。」
(Apple daily)
有「絕世好女友」之稱嘅唐詩詠喺舊年5月同洪永城宣佈分手，結束兩年半情。
雖然洪永城講明分手不涉迫婚，亦不涉第三者，不過仍然有消息指詩詠與洗米華愛將盧啟邦暗撻一個月，其後洪永城力撐前度話：「以我所知，唐詩詠係單身！」
今年年初有報道話呢對過去戀人被撞破約會，似乎有復合嘅跡象，點知佢哋異口同聲話只係好簡單嘅朋友聚會，大家唔使諗咁多，跟住都冇再聽到佢哋有新戀情傳出。
前晚唐詩詠喺觀塘道外遇到連環車禍，嚇親伊人，不過喺呢次不幸事件之前，唐詩詠就食咗餐好滿足嘅晚飯，因為前晚有讀者聲稱在又一城見到唐詩詠同林子萱食飯，坐唐詩詠旁邊嘅，仲有一個圈外男子「四眼吳卓羲」。
讀者話唔知呢個係咪唐詩詠新男友，最初係詩詠同林子萱先到餐廳，大約過咗一個鐘左右，「四眼吳卓羲」就現身，聽到詩詠向林子萱介紹「四眼吳卓羲」叫Samuel，其間林子萱離開張枱，佢哋即刻變得好sweet，久唔久仲深情對望，傾到興起仲見到「四眼吳卓羲」摸一摸詩詠個頭，冇耐又見到搭住詩詠嘅膊頭，最後由「四眼吳卓羲」埋單，好有風度。
不過佢哋離開餐廳嗰陣，即刻變得有啲避忌，詩詠行先，林子萱跟住行，「四眼吳卓羲」離開餐廳，但係臨走都有同林子萱講Nice to meet you，之後林子萱同兩人拜拜後離去，「四眼吳卓羲」就陪唐詩詠搭lift去到停車場，之後唐詩詠獨自駕車走。
唔知呢個係唔係新男友呢？唐詩詠回覆傳媒時否認：「梗係唔係喇，污糟咗之嘛，佢係我同Kiki嘅朋友，只係同朋友開心飯聚，其他事無回應。」
(Apple daily)
湯怡跟洪卓立日前宣布結束11年情，曾經以為佢哋打風都打唔甩，差在幾時宣佈結婚，不過正因為咁，令粉絲大為震驚！
之後隨即引起很多揣測，甚至兩人同門好友陳家樂都被扯落水，指佢最近頻頻孖住湯怡出席活動而鬧出緋聞(相關新聞:https://goo.gl/S1FczK)。
好多粉絲仲抽絲剝繭，想搵出兩人突傳「分」訊的原因。不過湯怡同洪卓立二人都封口不提。
之後有讀者爆料，聲稱湯怡有男性密友，兩人穿上情侶波鞋去跑山，還提供兩張照片，兩人都係企隔籬，當中仲見到歌手馮允謙同DJ Donald。
據知對方叫Gavin So，原來佢同圈中人都有關係，係王菀之嘅叔仔，即係佢老公Eric So（蘇卓航）嘅胞弟，Gavin任職連鎖食店高層，已婚同有一子，同圈中人蔡穎恩、徐濠縈、DJ細So等人相當熟稔。
湯怡嘅經理人霍汶希回覆：「嗰個朋友我哋都好熟㗎，佢哋只係行山友，而且一直有運動品牌贊助佢哋，所以佢哋都會着呢個品牌去行山、跑步，人哋結咗婚，唔好亂寫。」
相關新聞:
【宣布分訊後首現身 洪卓立強顏歡笑 急賣…】https://goo.gl/dH8Ubh
【傳有第三者 洪卓立一提到湯怡即激動落淚】https://goo.gl/cNghPd
(on.cc)
42歲藝人楊張新悅，今年7月誕下女兒Lola，成為四女之母。
其實女人每次生育都非常傷身，對骨骼及子宮損耗相當大，已生了四胎的新悅面臨哺乳問題，又有腰背痛，加上要防患子宮下垂，尋找解決方法刻不容緩！
日前她被拍得現身銅鑼灣，與女助手步入一幢商業大廈，雖然當日天氣不算冷，但她仍穿上長褸遮掩身形。她去了催乳中心睇症，逗留約大半小時後離開，沿路與女助手雞啄唔斷，之後再到九龍區買保健用品，見她對多個種類的補充品都頗有興趣，售貨員亦逐一介紹。之後又去附近睇脊醫，相當注重個人健康。
新悅事後接受訪問，表示生了四胎後更注意健康，又坦言奶水不足，但覺得餵母乳對BB有益，所以一直堅持：「以前我用盡方法食咗咩通乳嘅湯，都只係派吓『點心』，頭三胎用盡方法都奶水唔夠，搞到個胸又痛又餵唔到，所以今次要搵催乳師幫手通乳腺。Lola出世嗰陣唔係好大隻，5磅幾，佢依家好食得，我一日要餵足6、7餐，都想BB快高長大。」
暫時封肚唔追仔
「周身唔妥」的新悅又表示除了催乳療程，亦有睇脊醫，主要是護理腰部及做子宮修復，她聽聞女士多次生育後有機會子宮下垂，生了四胎的她都急急醫好副偈：「好多女士都忽略子宮修復，女人生得多子宮有機會下垂，尤其我生咁多，最重要係將內臟移番正確位置，定番形，再把握個黃金期做紮肚，撫平肚皮同收窄個盆骨！生完BB真係好多嘢搞，最好就一條龍咁催乳、陪月、睇脊醫、做子宮修復，依家紮埋肚，好咗好多，差唔多回復未生之前嘅狀態。」
問到是否心急追仔？她即耍手擰頭說：「唔會住啦！其實每次都係順其自然，依家Lola好得意好可愛，努力做媽媽，同埋養好身子先。」
（on.cc）
藝人鄧麗欣（Stephy）公開同台灣藝人邱勝翊（王子）嘅戀情之後，愈愛愈高調。
時不時都會喺IG放下閃~
唔少情侶拍拖耐咗，都會有夫妻相！
而本來一啲都唔似樣嘅Stephy同王子竟然都愈嚟愈似！
Stephy今日喺Instagram上載佢拎住自己嘅陳年封套自拍照，自嘲以前包包面，不過重點係佢側面第一眼望落去竟然有王子Feel，加埋髮色同埋中間分界。
唔少網民都好驚訝「跟王子好像」、「有夫妻相」，仲笑言以為係王子拎住張相，又送祝福叫佢哋繼續幸福落去！
唔知王子睇到張相有咩感覺呢？
(on.cc)
型男古天樂（古仔）今日出席宣傳活動，受訪時見古仔頸部有塊細小長形膚色膠布。
他自爆因頸椎骨移位，故剛到美國進行完大手術，是人生的「第一刀」：「生日完兩日之後發現頸椎骨移位1cm，就壓住神經線，兩日內就決定去美國做大手術，喺條頸入面鑲入鈦金屬，已經做咗一個禮拜，之後都要時間去休養。初頭自己同屋企人都有啲擔心嘅，但因為痛得太緊要先做，成日頸痛，就連十隻手指都麻痹晒，其實都持續咗1至2年。」
古仔承認移位跟過去的傷患有關，手術後兩星期亦推了不少宣傳工作休息，之後會再開工，若然有動作戲都會遷就。問到之後拍戲可會錫身？他表示：「醫生話6至8個禮拜會好，半年就完全好番。（會唔會留疤？）應該唔係好覺。」另外，他表示做手術時都有擔心會影響聲帶：「喺頸度開刀，醫生做手術嗰陣要撥開食道，但佢話冇咩影響。」
(on.cc)
電影《怪獸與葛林戴華德之罪》首映禮噚晚喺尖沙嘴一間戲院舉行，出席嘉賓包括余香凝（Jennifer）、廖子妤（Fish）、簡淑兒、張沛樂、李碧琪、陳嘉桓、寇鴻萍、顏子菲、胡渭康、俄仔Ansheles、吳嘉龍及莊端兒等。
余香凝同廖子妤孖公仔一齊嚟睇戲，Jennifer話二人好耐冇見，好耐冇一齊食飯打邊爐傾偈，Jennifer話：「我哋兩個係好互相支持對方嘅朋友，不過我唔鍾意佢扮可愛，因為佢喺我心目中好有型。」Fish話：「我哋從來冇鬧過交，我都好驚會同佢鬧交，我都就快冇得扮可愛，俾我扮埋呢段時間。」對於Jennifer成日做電燈膽，Fish話反而驚Jennifer唔黐住佢。
湯怡同洪卓立拍拖11年分手，有傳陳家樂係第三者，Jennifer為前男友護航：「希望大家俾湯怡同洪卓立空間，大家都係好朋友，希望大家唔好猜測咁多。」
Fish亦表示兩人拍拖逾十年，一定都是付出真心才可以走這麼長時間。
簡淑兒最近忙於拍劇，但佢趁空檔時間依然去考潛水牌，簡淑兒話：「自己鍾意玩啲大膽運動，例如滑水、潛水、騎馬，自己鍾意自由自在嘅感覺，試過第一次潛水之後，覺得水底世界好靚。」
(Apple daily)
