鄭嘉穎同陳凱琳將於8.12喺峇里結婚，雖然話係小型婚禮，但嘉穎喺娛樂圈打滾多年，與唔少圈中人稔熟。據聞除咗邀請《鐵馬尋橋》一班兄弟馬國明、黃嘉樂、林子善、唐詩詠外，仲有曹永廉、唐文龍、黃智賢、陳淑芬等都獲邀出席，而身邊有女朋友、老婆、仔女都可以帶埋一齊嚟；至於Grace嘅姊妹賴慰玲亦會同老公及囝囝一齊去，真係好熱鬧。
今日有報道指嘉穎一班朋友全部都有自費買機票去觀禮，並準備喺婚禮前一日，即係8月11日出發，大部份人會逗留三日兩夜。
不過，嘉穎同Grace始終都想低調，尤其喺Grace，一直想要一個私隱度好高嘅婚禮，可惜被傳媒踢爆，嘉穎為咗氹老婆開心，所以已向所有朋友下達封口令，一句都唔准講。
今日曹永廉回覆傳媒時都只係話﹕「問返嘉穎啦，我都唔係好方便答，都係問番主人家好啲。」認真夠朋友！至於賴慰玲就表示﹕「會去呀！會送利是啦！」
而陳嘉寶亦都話﹕「會去呀，送咩係秘密。其實大家都知佢哋想低調處理，尊重返佢哋，其他野唔講啦。」
(蘋果日報)
笑言不知道要玩新郎：「玩抽卡，3、4個人做瑜伽pose，我啲兄弟隊我出去，好彩我啲骨頭未硬。」問到有何愛的宣言？他說：「有情深剖白，我會將所有錢畀晒佢！（講到想喊？）我見到老婆想喊。」
DJ及歌手啤梨（葉文輝）與圈外女友Michelle去年底簽字結婚，今日（28日）在尖沙咀的酒店舉行結婚雞尾酒會及晚宴，科林及彭懷安（Eddie）等擔任兄弟，大批藝人朋友到場祝賀。提到今早接新娘，啤梨笑言不知道要玩新郎：「玩抽卡，3、4個人做瑜伽pose，我啲兄弟隊我出去，好彩我啲骨頭未硬。」問到有何愛的宣言？他說：「有情深剖白，我會將所有錢畀晒佢！（講到想喊？）我見到老婆想喊。」Michelle直言又感動又開心，啤梨續說：「我嘅人生只有Michelle，好多謝佢交人生畀我，我會用最大力量對佢好！」
興奮咀5次
一對新人蹺手現身，應傳媒要求咀足5次，又大騷婚戒。身穿黑色婚紗、谷胸上陣的Michelle表示喜歡黑金主題及這位設計師，而啤梨表示很開心：「終於擺酒喇，上年差唔多呢個時候求婚，依家一周年喇！原來訂酒席要成年，今次請咗好多朋友、同事同屋企人嚟分享喜悅。」
(on.cc東網)
一同到紅磡宣傳新劇，演員們先後展示身手挑戰踢木板，不過輪到佢時司儀卻說：「佢唔方便踢。」聞言摸摸肚子，其男友更在司儀要求下頂上，惹懷孕疑雲！
藝人歐陽巧瑩（Tammy）與男友林師傑等到紅磡宣傳新劇《特技人》，演員們先後展示身手挑戰踢木板，不過輪到Tammy時司儀楊玉梅卻說：「佢唔方便踢。」Tammy聞言摸摸肚子，師傑更在司儀要求下頂上，惹懷孕疑雲！
今晚有排解畫
二人受訪時否認懷孕，Tammy說：「梗係冇嘢啦，有咗你點會唔知呀！傅嘉莉聽到仲叫我小心好聲行。」師傑則說：「譚俊彥都細聲問我『真係有咗？』」問Tammy可有不適？她說：「我都唔知會有咁嘅安排，我都想大展身手，媽咪今晚睇完新聞，我又有排解畫！」
計劃結婚一年後生B
她直認有計劃生B：「我諗住2020年完約後年底結婚，結婚一年後有B。」師傑聞言說：「吓，唔係兩到三年咩？不過我哋真係有Planning，會想生仔都係因為譚俊彥，拍劇時佢個女晴晴嚟探班，又生個仔，佢又笑我都好快會結婚。」
直認鍾意小朋友
二人直認鍾意小朋友，已花費不少在親友的小朋友身上，提到有計劃便要努力工作，師傑說：「嚟緊有兩套劇出街，希望反應好就可以多啲工作啦！」
(on.cc東網)
型爸余文樂身形一向Fit到爆，就算做咗爸爸都繼續做Gym喪操，一雙麒麟臂就嚟粗過大髀，唔只可以攬實老婆，仲係湊仔嘅最強武器！
呢日佢就喺Instagram上載抱住囝囝余初見（Cody），一副慈父樣冧到爆，着上小背心嘅佢仲大晒強勁臂彎！不過竟然惹嚟周杰倫（周董）「不滿」仲留言：「別健身啦 多陪陪小孩吧⋯⋯」
點知樂爸就神回：「你是不是很想健身，但又沒時間，所以想我陪你一樣呢」
網民都笑言叫周董唔好拖人落水！
咁又難怪嘅，周董自從生咗兩個仔女後，成日都畀人話肥走晒樣，有網友就反過來叫樂爸勸周董唔好飲咁多奶茶（因為周董成日畀人影到揸住杯珍珠奶茶，唔少人都覺得係致肥原因），齊齊做吓Gym啦！
(on.cc東網)
現時佗緊第二胎嘅鍾嘉欣（Linda）唔經唔覺就快生得，佢今日喺Instagram上載大肚照，相中嘅佢着上露膊裝大晒香肩，肚大如籮，坐喺草地上非常寫意！
佢留言：「只要好天氣我就一定會外出運動曬曬太陽 BB差不多要出世了，補充體力同營養真係到最後一刻都唔能夠鬆懈！」佢仲Tag住「產前倒數」、「非常期待與小情人見面」，網民都讚佢係索媽，祝佢「生產順利，加油」呀！
(on.cc東網)
陳凱琳（Grace）同鄭嘉穎一直都想低調結婚，可惜紙係包唔住火，好快就被踢爆佢哋將於8.12喺峇里結婚。Grace終於喺ig承認婚訊，透露喺去年聖誕嘉穎向佢求婚，佢就一口答應，仲冧爆話﹕「He was THE ONE！」
Grace自從傳出婚事後一直都冇公開露面，即使傳媒喺佢屋企樓下日等夜等，都等唔到佢蹤影。但原來Grace都有出街嘅。
今日佢就喺ig story貼咗一大堆食物相，透露噚晚自己好有口福，約埋閨蜜陳嘉寶同賴慰玲一齊食飯。之前有傳Grace今次喺奉子成婚，但一對準新人就一直否認，不過見Grace真係勁好胃口，同桌有豬排、薯仔、雞、磨菇等美食，見到都流口水。
不過準鄭太就冇影新相，睇吓現在肥咗定瘦咗，確實令人有少少失望。
(蘋果日報)
昨日在Instagram自爆3年前秘婚，老公是圈外人。上載戴住婚戒的相片，留言話：「很重要的人送給我的禮物。」
當fans紛紛留言問對方係咩人嘅時候，佢就坦言已婚，呢位就係佢結婚三年嘅老公，而且照片仲見到佢手上戴有婚戒，隨即獲網民留言祝福。
近年形象神化的鬼束千尋，又自爆同北海道出身的圈外人老公成日嗌交，試過一個鐘內5次嗌離婚，有次她嗌交後離家出走，三個鐘頭在三軒茶屋後被老公尋回。
鬼束千尋18年前曾以《月光》一曲走紅，不過成名後其作風變得大膽，而且形象越變越激，去年佢更把頭髮剃光，鬼束千尋當時表示剃頭完全係為咗一位不幸患上癌症嘅重要友人。
(on.cc東網)
藝人蔡少芬（Ada）與囡囡楚兒和信兒參與內地真人騷《不可思議的媽媽》後，發覺囡囡比她還貪靚，會爭着敷面膜和補妝，而老公張晉亦非常貪靚，經常用她的護膚品，她說：「我哋早排去完杜拜旅行，乾柴烈火。（乾柴烈火？）面好乾要敷面膜。」
Ada宣布成為瑞士護膚品牌Suisse Reborn首位中國區代言人，大會送上一枚特別為Ada設計的鑽石腕錶，Ada戴上新錶後，開心得即時表演行catwalk。她興奮表示與品牌合作多年，今年添加內地代言是有進步，笑言酬勞亦有進步，她說覺得收到的腕錶不在於價值，在於有愛，並心存感激。
問到同老公在杜拜乾柴烈火，有否計劃再生B？她即笑言：「老公都講咗好多次唔生，佢話事，佢係一家之主，好配合佢，如果佢好想生嘅話，我都會配合。」她大讚兩位囡囡好乖，識照顧自己，讀書都好自動自覺。Ada說相信書中自有黃金屋，為鼓勵女兒多讀書，每看完一本書便獎勵一蚊，剛開始3、4天，讚大女已儲了不少錢，她又會向灌輸付出努力去賺取回報的正確觀念。
(on.cc東網)
常常聽說「成功靠父幹」，在不同家庭長大會影響你的人生是否富裕，原來連在家中排行第幾都會影響你的理財觀念。美國財務顧問期刊《Journal of Financial Therapy》的研究報告指，即使是同父同母，同一家庭中長大，但家中的大仔大女，排中間的和孻仔孻女的理財觀念可以有很大分別。看看自己有否中到以下的特點？
據報告中所指，作為家庭中第一個出世的孩子，因得盡父母的關注，同時亦因父母所給的期望和責任；長子長女通常比較成熟、穩重及有自信。家中排名最大做事會比較有條理，通常會選擇較保守事業如銀行業、會計業等。長子長女比較少「唔找數」或者「使大咗」，但長子長女亦有他們的缺點，習慣「做大佬、大家姐」。
排行中間的子女夾在其他兄弟姐妹之間，通常是「和事佬」，是天生的協調者和Problem solver。調查指排中間的子女愛儲蓄，有超過65%的人有每月儲蓄習慣。排行中間的子女的缺點是很容易妥協，很易就會借錢給人。
孻仔孻女很少要負擔家庭責任，而且最得父母寵，大多數會比其他兄弟姐妹更外向。但同時因被「縱」開，使錢比較「洗腳唔抺腳」，很易就集中在眼前忘記長遠的目標。
當然，報告的研究發現都是結合被訪者的答案，有沒有人的理財習慣跟以上的特點完全相反呢？
（經濟一週）
都市人食無定時，加上經常休息不足，不少人認為可靠服用維他命丸補充營養，改善體質，但「亂補一通」隨時出現反效果。
醫生指出一般人若不缺乏維他命，服用補充劑並無成效，過量攝取反危害健康，兒童亂食維他命更增肥胖風險。曾有對金屬過敏病人服食補充劑後，疑吸收了鉻金屬成份，致面部紅腫過敏。
免疫及過敏病科專科醫生鄔揚源表示，很多人擔心缺乏維他命會致病，如出現免疫系統或皮膚問題，「誤解自己營養唔夠所以患病，其實只要飲食均衡、冇長期病患，喺豐裕嘅現代社會好難會唔夠營養」。營養不良多見於腸胃病及長期病患者、厭食症或偏食人士，至於是否真正營養不足，更要經醫生診斷及驗血分析，切忌單憑自我診斷。
他表示，若無缺乏維他命，亂服補充劑不會有成效，「身體唔會變得更強」，過量攝取反影響健康，如維他命C太多可致腎石；海外研究更指維他命E太多可增早死及患癌風險。維他命K太多則會影響血液凝固。市民如獲醫生處方維他命補充劑，應按指示服用。
維他命補充劑更隨時變身致敏元凶。他表示，曾接獲金屬敏感病人，自行亂服補充劑後病發求診的個案，常見對「維他命B雜」內的鉻（Chromium）金屬有敏感反應。曾有一名30多歲女子，因面紅及脫皮等皮膚敏感症狀求診，檢查證實對鎳（Nickel）、鉻等金屬敏感，停用化妝品，避免接觸鉻後症狀消失。約三、四個月後，女病人再因面紅、面腫求診，揭發致敏原為亂服維他命，她因誤解服用後可健身及消脂，最終發現產品含鉻。
另有8歲外籍男童突患上羊癇症，多項檢查均未發現病因，要服食預防抽筋藥物控制病情，母親懷疑兒子病發與曾服用魚油丸有關，檢查證實男童對常見於魚油中的鰵魚（Codfish）敏感，停服魚油丸後無再抽筋。但母親於半年後再讓兒子服食魚油丸，終又誘發抽筋。他說，有醫學文獻曾記載魚肝油可引發羊癇症，籲家長勿讓子女亂食。
近期有外國研究質疑維他命補充劑的成效，科學家綜合分析27項研究，涉及45萬人，發現服用補充劑根本無助預防心血管疾病、癌症或減低死亡風險；吸煙人士服用胡蘿蔔素甚至增肺癌風險。他呼籲市民花費金錢購買補充劑服食前，應好好考慮。
（蘋果新聞）
