人家眼中她百份百是少奶奶，但她卻笑住否認：「唔係少奶奶，係一般家庭主婦，而且最終我想做嘅係阿媽、老婆，真正嘅家庭主婦，我志願係做個好媽媽。」

這位就是52歲人稱鳳梨的前無綫花旦張鳳妮，她拍過《他來自江湖》、《餐餐有宋家》、《天地男兒》等劇集，也是87年港姐最受歡迎佳麗獎得主。

21年前，張鳳妮離開娛樂圈，翌年嫁去大馬做少奶奶，先後為老公傅仰峰生下3個女——18歲的Emily、17歲的Ashleigh和13歲的Ally。雖然鳳梨婚後沒再踏足娛樂圈，但就不時返港探親朋戚友，上個月，鳳梨便專程返港出席前無綫金牌監製潘嘉德70大壽壽宴（相關新聞：https://goo.gl/p1EdFG），以及捧老友劉玉翠和關寶慧主演的舞台劇《她媽的葬禮》。

近日社交網上見到鳳梨，依然明艷照人，尤如食了防腐劑般。「千祈唔好幫我執相喎，我好怕㗎。」今時今日美圖世界，竟然仲有人講呢啲，唔話佢係異類都唔得。

真人比相片更索，完全係「無添加」。「你哋寫細咗我兩年，其實我52㗎喇。」鳳梨主動澄清。

對於保養秘訣，鳳梨笑言自己既不勤力做運動，也不愛節食。「但生活習慣又唔會好夜瞓，唔係日日去劈酒，咁facial梗係會做啦，一個月兩、三次，打吓麻雀，個人冇乜要求，你會覺得心境開朗啲，冇乜大壓力，人都會老得冇咁快。」

鳳梨老公傅仰峰是大馬富商，人家眼中她百份百是少奶奶，但鳳梨卻笑住否認：「唔係少奶奶，係一般家庭主婦，一樣煮飯，我又鍾意煮飯，由以前做呢行鍾意睇fashion book ，而家就成屋cook book，因為做阿媽你唔可以一啲嘢都唔識㗎嘛。初初諗住細路仔要食，咁我咪學囉，後來發覺煮嘢好好玩，同埋細路仔話畀我知佢鍾意邊個餸，我會好開心。」

鳳梨是《嫁到這世界邊端》藝人版，嫁去大馬20年，她說早年生活難以適應。「嗰時電視得兩個中文channel，悶到你嘔，所以嗰時租TVB啲錄影帶返嚟睇，好悶好悶，所以咁快趣有細路仔，有咗細路仔，出邊世界係點你都唔會理。」巧合地，鳳梨87年同一屆港姐冠軍楊寶玲、亞軍李美鳳及季軍林穎嫺，全都是過埠新娘，還有退選的邱淑貞，個個都是幸福人妻。

鳳妮18歲大女Emily(右)跟母親一樣美人胚子，二女Ashleigh(左)亦亭亭玉立。

回味那些年港姐日子，鳳梨說她參選一屆有很多突破，例如第一次出埠拍外景，原本任職秘書的鳳梨，正正被首次衝出香港到泰國布吉拍外景的港姐宣傳廣告吸引而「落疊」；至於另一突破，是港姐首次以超性感比堅尼示人，當年電視觀眾個個睇到嘩嘩聲。

「我哋個個睇到啲泳衣都『吓？』初初有少少抗拒，出嚟都唔係好自在……不過好玩嘅，冇試過咁多女人一齊坐飛機，又唔係成日拍，大家成日喺房傾偈食嘢，人生一個好好嘅回憶。」

論風頭，鳳梨當然拍不上李美鳳、邱淑貞、楊寶玲、關秀媚等風頭躉，但勝在人緣極佳，所以贏得最受佳麗歡迎獎，之後鳳梨加入無綫做藝人，雖然上過一線做女主角，但始終未能大紅大紫，加上入行以來沒有花邊新聞，演藝生涯一切都是平平穩穩，平平淡淡。

「因為我冇乜野心，佢哋（無綫）擺我邊我都做，做呢行唔可以pea住嚟做，你比我做，我做到最好，希望你可以睇到，變咗你會比更好嘅嘢我。觀眾唔受都冇得爭、冇得去求，而且最終我想做嘅係阿媽、老婆，真正嘅家庭主婦，我志願係做個好媽媽。」

鳳梨96年離開無綫時，屬包薪藝員，亦即是親生仔女。「當年親生仔女畀好多機會，但我簽咗5年之後，我試過做一線，可能我自己唔夠好啦，當時好多人去咗台灣同馬來西亞拍嘢，我一個月2萬8，人哋去到嗰度（大馬）8萬一個劇，喺TVB仲要抽commission……後來公司叫我唔好簽包薪改簽部頭，咁即係減我人工，要一個個劇去計。唔包你薪可能萬幾蚊一個月，我唔係好甘心，我唔想36歲都仲係拍呀拍，如果自己搵多少少錢，可以放低屋企人，做自己鍾意做嘅嘢，比如生小朋友，我唔知將來丈夫有冇錢㗎嘛，香港生活指數咁高，OK啦，搵錢先啦。」

就這樣，鳳梨去了大馬發展拍劇，就這樣，認識了現在的老公，然後息影結婚生女。

最近景黛音和李婉華也相繼復出拍劇，未知鳳梨可有興趣？她笑說：「我哋呢啲50幾歲，06、28（即朝早6點拍到凌晨4點）真係唔得，死得人㗎，玩吓幾集就OK嘅，如果啲對手我鍾意嘅話。」

(Apple daily)