今年書展，喺眾多o靚模當中有一個大眾相對熟悉嘅面孔，佢就係39歲嘅楊思琦。
初次推出寫真嘅思琦，喺佢本價值198大元嘅《Miss Szeki2018》當中除咗靚相之外，仲寫咗唔少佢嘅內心剖白，寫真更搵嚟家燕姐、曾志偉及陳志雲等當年喺大台同佢同事過嘅前輩寫序。喺寫真當中，思琦話自己其實一直都覺得自己好平凡，日常生活亦都好枯燥苦悶，自細亦唔識打扮，當年選港姐亦都係被阿媽推去，就連當日去面試嘅妝都係阿媽幫手化，佢話自己當初覺得自己又老土又肉酸，當時佢就心諗：「咁嘅樣，點選美啊？」
另外佢仲提到喺大台工作好忙，最初四年一路都冇假放，直到身體開始出現問題先知驚。思琦又主動提到當年「人生馬戲團事件」，佢就話係佢咁多年最接近死亡嘅一次。思琦憶述當晚與鍾嘉欣等人唱完卡拉OK之後，準備返酒店，一行出門口，見到對面馬路泊咗五架車以上，思琦表示當時仍未意識發生咩事，突然響起好急嘅開車門聲，「一群人便手拿開山刀、圓月彎刀、大鐵通，從貨車向我們衝過來！我不知道發生甚麼事，那一刻我只知道要逃亡，馬上便和Linda（鍾嘉欣）一齊走，就算中途拖鞋甩掉都不能回頭，因為跑慢一步都會被捉到，真係好似拍戲，我知道如果被人捉到，我一定『渣都冇』。其實我已經無力再跑，因為腳軟，全靠Linda死拉住我，後來見草叢就一齊跳進去。」說法同鍾嘉欣大同小異。
至於愛情，思琦就話自己其實一直都好想結婚，呢幾年亦一直有人追求，可惜都係搵唔到啱嘅人選，而對於另一半，思琦話自己搵嘅對象外貌係其次，最緊要係愛佢及囡囡，另外經濟方面，佢話佢唔係搵啲咩大富豪，不過最起碼都可以自己搞掂自己，對於愛情，佢仍然期待，但亦只能隨緣。
而喺寫真結尾，思琦仲大爆一個小秘密，原來家族當中唔只佢一個港姐冠軍，佢同大美人李嘉欣係親戚。思琦話其實李嘉欣係佢姑媽嘅姨甥女，佢哋兩個唔熟，不過偶爾喺家族聚會會見面，思琦仲話其實佢一直都避免講呢件事，不過就想將呢個小秘密作為寫真嘅結尾。
（蘋果日報）
