台灣女星伊能靜自從生咗囡囡「小米粒」之後，大幅減少幕前工作，專心留喺屋企照顧囡囡。
呢日佢發現囡囡不知不覺間長大咗，高度甚至去到自己身高嘅一半，突然有感而發，喺社交網發長文抒發感受，佢提到：「孩子成長、父母老去是自然現象，更是每個人的必經之路，我們不但會老，還一定會死亡，不生病，器官也會消耗而漸熄。」
雖然佢明白生老病死係必經階段，不過為咗佢愛以及愛佢嘅人，一定會好好保持身體健康，佢表示：「我本來不怕老，但我現在怕了，因為我知道愛我的人會難捨。」
(on.cc東網)
【十年前只得我同佢】胡諾言冧爆陳琪：今日再嚟已經係五個人
藝人胡諾言（Jack）同太太陳琪一向恩愛，近日佢哋一家五口齊齊去咗新加坡，Jack就上載一張全家大合照，仲勁冧咁話：「約10年前哩（嚟）到呢個地方只得我同佢…今日再嚟已經係五個人…景點依舊，動物冇變，雖然人數變，但係情不變…多謝後面四隻嘢帶畀我哋美好嘅回憶…@chan_kei_june #唔係賣廣告時間」
「愛妻號」嘅真情告白好閃呀，相信太太睇完一定甜入心！網民紛紛留言大讚佢哋好溫馨、係幸福的一家，仲有人祝佢哋喺新加坡玩得開心添。
(on.cc東網)
【李亞男有喜】原來連苟芸慧都有咗「BB」！？
35歲苟芸慧（苟姑娘）將喺十月同賽車手男友陸漢洋結婚，雖然婚禮仲有約3個月，但喺7月11日時，男友為苟姑娘慶祝最後一個單身生日，嗰次女神已經「我的名字，你的姓氏」做「陸太」，原來仲有埋「BB」添。
嗰日陸漢洋由早到晚為未婚妻炮製生日驚喜，先送咗一個苟姑娘好鍾意嘅篋上門，篋上面印有「Mrs CKL」，即係苟姑娘英文名Christine Kuo，加埋男友個陸姓氏Lok，當女友揭開禮物時，仲大叫：「嘩，陸太呀！」苟姑娘點會唔冧到患糖尿病呢？
而生日「甜品」陸續有來，喺晚上佢哋過二人世界，除例牌嘅浪漫燭光晚餐外，仲有「甜心生日蛋糕」，原來個粉藍色棉花糖蛋糕內有「玄機」，「糕短情長」皆因陸漢洋曾講過覺得女友係「佢嘅棉花糖」、「棉花糖」代言「豬豬」同「BB」，代表屬豬同皮膚似BB嘅苟姑娘，呢個唔識講嘢嘅蛋糕就暗示咗男友嘅千言萬語。
而苟姑娘係虔誠基督教徒，佢想喺婚前同男友上婚前輔導班，初時男友覺得唔太需要，但女友好鬼堅持，男友又唔捨得逆女友意而屈服咗，另外二人雖然好鍾意細路，但苟姑娘婚後想過二人世界先，佢自己又想喺事業再衝刺，覺得可能有一日自己比男友仲「疊水」，所以放聲唔急造人，況且男友喺佢眼中已經係佢嘅「BB」，要好好照顧呢個大「仔」咁話。
(on.cc東網)
【細佬完全唔知發生咩事】葉翠翠爆小王子竟然會⋯
藝人葉翠翠上月誕下第二位囝囝，再度榮升人母嘅佢心情不知幾咁開心，呢日翠翠喺社交網分享兩位囝囝嘅相，相中見到翠翠嘅大仔想錫弟弟一啖，不過好快大仔又使出飛毛腿，踢向弟弟，真係一時溫馨一時搞笑。
難怪翠翠見到呢個畫面都話：「小王子真係同天氣一樣，估唔到下一刻係點。。。錫你一啖，然後伸你一腳。。小小王子瞓咗覺，完全唔知咩事。。將來睇番一定笑到肚痛。。。小王子：好多姐姐哥哥話掛住我，係咪真㗎！」網友都話翠翠見到兩個仔仔健康，真係有仔萬事足呀！
(on.cc東網)
【問到Stephy係咪同王子拍拖】區文詩就答⋯
前組合Cookies成員區文詩（Angela）絕對係姊妹間嘅代言人，吳雨霏（Kary）同楊愛瑾（Miki）係咪再見不是朋友、鄧麗欣（Stephy）同方力申分手後有冇見，Angela一一解答！
最近Instagram就有個「你問我答」新功能，Angela就被問：「點解咁唔鍾意Theresa（傅穎）？」
扮傻嘅Angela就冇正面回答：「吓？咩話？你講咩話？」
跟住又有網民問佢：「Stephy依家同王子一齊定同小牛一齊定係同你一齊呀？」
Angela就似乎有啲嬲豬Post咗張「私人重地 閒人免進」圖片：「你以為我真係茶水間KOL咩？就算係都要我畀你入我個茶水間先得㗎 閒人免進啦！」
而網民嘅提問都係離唔開Cookies，今次係問：「有冇探Kary BB？得意嗎？」Angela就上載咗張BB相，不過就遮咗BB樣貌！
(on.cc東網)
【蹺晒手超親密爆戀情】粉絲好興奮：大個仔啦
被爆撻着年長兩歲嘅女演員，網上流傳二人蹺晒手嘅片段，即時爆出戀情。粉絲對於第一次傳出緋聞顯得好興奮，佢哋都笑言出道6年，終於有第一次緋聞，證明大個仔。。。
韓國7人男團BTOB今年出道6年，成員終於爆出第一單緋聞。根據韓媒報道，27歲成員李昌燮被爆撻着年長兩歲嘅音樂劇演員鄭在恩，網上流傳二人蹺晒手嘅片段，即時爆出戀情。
不過二人都否認戀愛消息，當中李昌燮方面就指二人嘅戀愛傳聞係毫無根據，而鄭在恩方面亦都否認拍拖，並指二人只係通過音樂劇嘅合作後成為很好嘅朋友，但強調二人並唔係拍拖。
其實今次唔係鄭在恩第一次同男團成員傳出緋聞，佢喺大前年亦曾同男團「ZE:A帝國之子」嘅成員金桐俊傳過緋聞，當時亦指二人因為合作音樂劇而撻着。另外，BTOB嘅粉絲對於團隊第一次有成員傳出緋聞顯得好興奮，佢哋都笑言BTOB出道6年，終於有第一次緋聞，證明成員都大個仔。
(蘋果日報)
【結婚七個月】一索得男恭喜哂！
姐姐去年誕下囡囡，依家就到妹妹一索得男，喜事連連恭喜哂！兩母子都十分健康，她自言懷孕與生產的經歷非常美妙，成為不可取代的回憶。。。
現年32歲的日本名模道端Angelica，去年12月跟韓籍圈外人結婚，未夠兩個月已火速宣布造人成功，並在上月挺着大肚假夏威夷行禮。
今天，Angelica在Instagram公開一張抱B相，宣布已在日前順利誕下一名男孩子，正式榮升首任媽咪，恭喜恭喜！
Angelica與囝囝都十分健康，她自言懷孕與生產的經歷非常美妙，成為不可取代的回憶，並十分感謝兒子和丈夫讓她有此經歷。適逢Angelica的33歲胞姊道端Jessica，亦於去年為荷里活電影監製男友高凱麟（Ken Kao）誕下囡囡，道端一家喜事連連。
(on.cc東網)
【有跡可尋】大肚李亞男真係夠哂細心
王祖藍喺15年嘅情人節同華姐冠軍李亞男結婚，嗰陣佢哋話計劃先過兩年二人世界兼努力賺錢，結果今年終於騰空檔期，噚日喺社交網宣佈造人成功！
出名係愛妻號嘅祖藍，又會住買乜嘢獎勵老婆呢？事實上佢哋結婚冇耐就豪擲一億二千萬，祖藍送贈大埔逸瓏灣頂樓連私人空中泳池複式單位畀老婆，今次為王家繼後香燈，培育出「王二代」，呢份禮物真係唔簡單！喺佢哋仲未向外公佈喜訊嘅時候，《蘋果》記者日前喺沙田大圍發現祖藍同亞男一身平民裝束「掃街」，當時係晚上八點幾，佢哋先去豆腐花舖，之後再去買煎釀三寶同魚蛋。
喺李亞男心目中，祖藍永遠都係好叻、好Man同好搞笑，知道老公喺出面搵錢辛苦，難得同老公拍拖行街，就會服侍周到。現場所見，亞男真係好細心，雖然自己唔食豆腐花，但見老公畀緊錢，佢就即幫手加糖，唔使問已完全知道老公口味。
o依家睇番咪明白嗰陣因為大肚婆喺初期係唔可以食豆腐花，所以佢咪忍口，呢個準媽媽真係夠晒細心！
唔少街坊都認得佢哋，難得佢哋完全冇架子，同人吹水打招呼。而小食店旁咁啱係一間地產舖，祖藍同亞男似乎好有與趣，雖然冇行入舖內，但對住門口嘅新樓盤資訊都即密密斟，睇咗大約十分鐘先離去。
事後《蘋果》都有問祖藍係咪有意再買樓投資？佢回覆話：「我只係周圍食吓嘢，近排想了解一下樓市，因為身邊好多朋友想買樓，幫人睇啫。」
(蘋果日報)
【為咗小海綿強搶人手機】Angelababy就回應⋯
楊穎（Angelababy）同黃曉明結婚3年，育有囝囝「小海綿」，今年已經歲半，一直以嚟兩公婆都好保護囝囝，唔畀佢正面曝光。
日前有人喺網上聲稱Baby同囝囝喺上海長寧區嘅Mini Mars Kids Club餐廳食飯時，小海綿失控喺餐廳哭鬧。該網友話Baby為免醜事外傳，同埋唔想囝囝容貌畀人影到放上網，所以指示助手同喺餐廳侍應「協助」下，要求逐一檢查食客嘅手機，仲「威脅」爆料網友嘅朋友話「如果有視頻流出一定能找到她」。有網友狠批：「明星這麼跩」、「好奇葩啊，誰給她權利沒收翻看別人的手機」。
不過亦都有網友持唔同意見，覺得上海嘅女仕並唔係省油嘅燈，冇理由任Baby擺佈。Baby嘅工作室今日就喺微博出聲明，澄清事件嘅內龍去脈，承認有呢件事發生，但就冇好似嗰位爆料網友所講，有出言威脅：「當日，楊穎女士帶孩子與友人在該餐廳消費，期間有餐廳工作人員提醒二樓有客人用手機拍攝。出於對孩子的保護，隨行的工作人員同該客人進行禮貌溝通，希望對方不要將孩子照片發佈到網路上。溝通過程中，工作人員並未與客人發生爭執。關於『搶奪』、『沒收手機』等言論純屬子虛烏有。希望大家理解作為母親對孩子隱私的保護，望大家互相尊重，給孩子一個安全快樂的成長空間。」
聲明中仲話會針對以上謠言，工作室已經啟動法律程序，叫大家唔好隨便信謠言喎。
(蘋果日報)
【王浩信大動肝火要出律師信】陳自瑤：唔希望⋯
陳展鵬、譚俊彥、李施嬅、陳山聰、陳自瑤（YoYo）等出席新劇宣傳活動。日前YoYo與老公王浩信參加女兒嘅幼稚園畢業典禮，三人在會場合照流出，傳媒報道時亦未有打格。有網民笑囡囡唔似父母，有指王浩信大動肝火，揚言要出律師信。
日前YoYo出席活動，對於老公要發律師信一事表示不清楚，「相信只係小事。」又話唔希望囡囡個樣曝光，想保護小朋友。
今日傳媒再問YoYo發律師信一事，佢就澄清並無此事：「冇要出律師信，我都唔知道點解為咁嘅傳言。」
最後YoYo再懇請如果傳媒再有咁樣嘅照片，請為個女個樣打格。
(蘋果日報)