【緊急進行剖腹生產】早產男嬰染李斯特菌

2018-10-25

防護中心資料顯示，感染李斯特菌的孕婦一般症狀輕微，但可把病菌傳給胎兒或初生嬰兒，導致流產、胎兒夭折，所以孕婦飲食格外要小心！

衞生防護中心最新一期《傳染病直擊》公布，一名35歲孕婦在本月9日妊娠35周時出現胎動減少的情況，同日送往公立醫院緊急進行剖腹生產，男嬰出世後呼吸困難，送往新生嬰兒深切治療部留醫。產婦的胎盤拭子樣本及男嬰血液樣本均驗出李斯特菌，調查發現該產婦在潛伏期間曾進食過芝士，懷疑因而染病。

防護中心表示，該產婦過往健康良好，她與男嬰經抗生素治療後情況穩定，她留院3天即本月12日出院，直至事件公布時，男嬰仍在新生嬰兒深切治療部留醫。產婦在潛伏期間沒有外遊紀錄，其家居接觸者均沒有相關病徵，調查仍在進行。

此外，《傳染病直擊》同時公布一宗家居感染的百日咳個案，兩姊妹同受感染。一名3個月大女嬰在9月24日起出現陣發性咳嗽、嘔吐、流鼻水、呼吸急促及發紺，本月13日入住公立醫院，其鼻咽樣本證實感染百日咳博德特氏菌。她經抗生素治療後情況穩定，本月18日出院。

調查發現，女嬰的3歲大姊姊在本月12日亦出現咳嗽，防護中心將她轉介至公立醫院進行鼻拭子樣本化驗，證實同樣感染百日咳，毋須入院，只需處方抗生素治療，情況一直穩定。兩姊妹均已透過「香港兒童免疫接種計劃」接種了「白喉、破傷風、無細胞型百日咳及滅活小兒麻痹混合疫苗」。兩姊妹的父母在9月及10月均曾出現咳嗽症狀，但證實沒有感染百日咳。

(on.cc)

【時運高睇你唔到】大肚張名雅激氣：作為港人好想出句聲

2018-10-25

前港姐張名雅佗緊第二胎，雖然粗身大細，但不時都會一個人出街，早前佢就乘搭港鐵，不過佢喺社交網話冇人讓座：「個肚籮咁大都係冇人會讓位，有人落車我先有得坐。」豈料引起網民熱論，尋晚佢就喺社交網發表「讓座論」回應！

佢話：「敬老扶弱對我來講係基本亦希望盛傳給下一代，好多人有心人會選擇讓座（而你讓座人哋拒絕你又係另一回事），但有小部分人見到老人家、小朋友或大肚婆你真係會擰開望第二邊，時運高睇你唔到，我真係睇過！」佢又話好多網友私訊佢有類似經歷，感同身受嘅佢表示「見到人哋可能有需要但你冇選擇讓座，係唔可以話你錯，因為你絕對有權繼續坐到落車先起身」，最後佢就話如果需要嘅人係你親友或者自己，感受會唔會唔同？

佢仲上載咗張喺港鐵站嘅自拍，就話有小部分人留言問佢點解有車唔揸，鍾意去搭港鐵，又有人問佢點解大肚都要搭，「藝人點解唔用司機或者搭的士」？似乎有啲激氣嘅佢，就話：「我又想講，點解唔可以搭地鐵（港鐵）？作為港人好想出句聲，讓座給有需要嘅人不是必然，讓座是一種美德，是內涵同個人修養。」

（ig / on.cc）

【同老公執咗成晚垃圾】陸太苟芸慧：都幾浪漫同窩心

2018-10-25

苟芸慧（苟姑娘）與陸漢洋上月在加拿大秘密註冊「完婚」，二人日前在上水雙魚河鄉村會補擺兩場婚宴。

新婚無耐嘅陸太苟芸慧，今日神采飛揚現身灣仔出席護膚品發佈會，同埸現身嘉賓有王迪詩及馬詩慧。

苟姑娘仍然享受新婚喜悦，開始習慣俾人嗌「陸太」，問到改口叫丈夫做老公未？佢話：「慣咗叫『豬豬』，佢都係叫我做『豬豬』，未改到口住。」er………

婚禮當晚發生蝦碌趣事，兩夫婦返回酒店房休息，突然收到電話，指會場仍有紙皮箱同盒等垃圾未清，苟姑娘話：「我就敷住mask落去執垃圾。」豈不是虛度春宵，她甜笑：「都幾浪漫同窩心，佢都有落嚟幫手。平時佢都係少爺仔，好少做呢啲嘢，之後執到凌晨四點幾，好攰，一返房上床就瞓咗喇。」

新婚生活，苟姑娘未有下廚，但有為老公沖泡養生茶。至於何時度蜜月，她指夫婦兩人年尾都忙，所以之前到歐洲影婚紗相時便當預支蜜月。

婚禮後數天再舉行派對，邀請未能出席朋友們出席，她說：「佢哋好sweet，招呼自己朋友之餘，仲會照顧我啲朋友。」老公是否值100分？「101分，好細心。」

對於有報道指苟姑娘收千萬家用，她聽聞便笑說：「唔知喎，等我check下先，邊有呀，笑下就算。」講到平時會否有家用，佢話：「平時想買乜嘢，佢會畀張卡我買，不過我自己都有賺錢，財政獨立，亦都會投資。」

至於造人大計，苟姑娘稱：「老公暫時未準備好，想過多陣二人世界先，所以我哋會互相尊重對方。」

(Apple daily)

【被Torres寫「血書」通緝】楊千嬅：我個心係仲唔會舒服多啲

2018-10-25

剛從冰島做「跟得夫人」回港的千嬅大呻睇唔到北極光：「之後成個月都做嘢，見有幾日時間就去，自己都好恨去睇，覺得一世人一定要去一次。（覺得好可惜？）即係上天要我再去多次！（下次同埋仔仔去？）等佢大啲先，因為凍得滯，得1度，但嗰度嘅海鮮真係好好食！」

楊千嬅今日以代言人身份出席健康食品活動，吸引大批途人圍觀非常熱鬧！

講到今次同行有好多「電燈膽」，例如洪永城、何超蓮，千嬅笑話其他人要做嘢，自己就趁有一日空檔獨自出去市中心Shopping：「呢樣嘢都恨想做好耐，做女嗰陣成日都會一個人去旅行，但結咗婚、有小朋友之後就唔可以咁任性。其實一個人出去係攞到好多靈感，又可以減壓，因為今年真係拍咗好耐戲，個人都好攰。」千嬅雖然口講今年不再接拍戲劇，但身邊有好多朋友誠邀客串電影。

提到仔仔Torres寫「血書」通緝，千嬅笑話仔仔好勁，自己亦都上了一課：

「佢係雙子座好感性，唔會直接表達自己情緒，會兜個圈，寫張紙貼喺房門口，再叫姐姐（家傭）影相Send畀我，咁我個心係仲唔會舒服多啲，今次我學到嘢，出嚟做人、做事，直接係好，但原來都有技巧。（有冇回覆啲字條畀佢？）即刻講Sorry，同佢講媽媽要休息，返嚟會陪番佢。」續指小朋友錫還錫，都要解釋他知道媽媽有工作行程，將來到他長大後都要編排自己時間。

至於講到Torres識用紅色筆寫字強調嚴重性，千嬅大笑話：「咁啱佢用開嗰枝白板筆啫，佢唔知嘅，有次Halloween佢用嚟畫嘴，抹都抹唔甩，就咁返學。」

又講到仔仔現時緊貼潮流，會追韓星：「有啲佢講完我係唔識，仲會質疑我。（會為仔仔惡補？）會，多數都係受朋輩影響，都想知道佢哋個圈子，了解佢哋，如果真係唔適合就要同佢哋解釋，佢依家把口好勁㗎！」

講到最近好友余文樂於IG上坦言身體狀況差，問到私下可有關心？千嬅愕然指全不知情，表示會寄一箱健康食品給對方：「會問吓佢咩事，可能拍戲太衝，好容易會透支，我會同佢老婆講吓，叫佢一齊食健康食品。」

(on.cc)

【患上嚴重隱疾隨時會癱】空姐多次遇人不淑想拒愛媽媽鼓勵追求真愛

2018-10-25

來到《嫁到這世界邊端2》節目的最後一站，波蘭女主角為年輕美麗的空姐嘉瑩，可是在香港總是遇人不淑，但一次意外的邂逅，在意大利公幹期間遇上波蘭好好先生，現遠嫁到波蘭與老公Peter並誕下兩名可愛混血仔仔，至今已有9年光景。

嘉瑩同老公Peter的愛情故事，非常刻骨銘心。當空姐的嘉瑩，於過往的幾段感情都遇人不淑，她在節目中不禁大呻：「以前喺香港拍拖遇到好多差嘅男仔，試過有一個好花心，每晚都將電話入面所有通話記錄刪除，我問佢，佢就話有潔癖，鍾意乾淨。」

當時27嵗的嘉瑩有一次跟著一個女性朋友一起去羅馬假期時，因爲行李篋爆了及轆壞了，拖不動要在附近旅店入住，及後又因所有房已爆滿，只好入住一間十人房。單身的Peter也是室友之一，當時他已經對嘉瑩一見傾心。有一晚全部室友都出去玩，但嘉瑩感到不舒服，要多睡一會兒才到，然後只剩下Peter守候著，誰知道嘉瑩最後竟然睡過頭而失約，這個時候兩人就燃起愛火了。

即使嘉瑩回港，兩人仍保持通訊。

三個月後Peter更由波蘭來港探嘉瑩，並帶埋求婚戒指，那刻……嘉瑩內心很掙扎，跟一個相識三個月的人結婚，擔心被玩弄感情。由於她自己只是27歲，雖然多選擇，但她表示在香港拍拖多年，多次遇人不淑，試過遇上花心男，更試過遇上好色男。

嘉瑩還有一個隱憂，她說：「我由細到大，有嚴重脊柱側彎，做過一次大手術，醫生話冇百分百保證以後一定冇事，將來有機會行唔到，以前曾有一個香港男友，知道我有呢個問題，本來約約吓都冇再搵。」不過，嘉瑩選擇同Peter坦白交代病情，男方絲毫不介意，還承諾照顧她一生一世。

「老公就同我講，又唔係去街市買嚿豬肉，秤下邊件好啲，愛你就要衝破萬難，點都要娶你。我覺得自己遇到一個咁好嘅男仔，機會率真係好細，波蘭雖然比較落後、比較窮，我都願意嫁過去，我只想同老公一齊。佢真係好純好純，呢個世界好少有呢種男仔。」

嘉瑩媽媽知道女兒的隱憂之後，就鼓勵女兒去追求真愛，嘉瑩於是答應嫁去波蘭，她向公司遞信辭職，同事們都不看好她這段的婚姻，一方面認為波蘭是貧窮國家，另一方面認爲他們相識的日子太短好冒險。

最後她為了真愛決定成行，卻又一波三折，當地政府要所有外國人出示一張由自己國家發出，證明自己是身家清白和可以合法結婚的證書，但香港特區政府根本沒有這類證書，他們唯有向駐波蘭中國國領事館求救，Peter心急娶伊人，當時差點要跪求。

結婚之後就住在格丁尼亞，結婚時僅用了港幣60萬，就能買到當地一個面積600呎愛巢。

（綜合報道）

【所以陳豪唔離巢？】圓潤陳茵媺去中環睇醫生

2018-10-25

37歲幸福人妻陳茵媺（Aimee）同陳豪結婚5年，出咗名係恩愛夫妻。婚後三年抱三，Aimee就主力照顧小朋友，而陳豪就搵錢，Aimee不時都會喺IG貼佢同小朋友嘅相，晒下幸福咁。

佢哋兩公婆輪流接仔女返學放學，真係廿四孝父母！

今日有周刊報道話陳豪同陳茵媺已經有哂計劃會生第4個。

早前仲目睹陳茵媺去咗中環睇醫生，見到佢身體圓潤，可能好快會有好消息！

唔知係咪呢個原因，本來有傳陳豪明年約滿離巢，古天樂同蕭定一諗住重金向陳豪招手，不過陳豪最後留低喺無綫。

報道話除咗無綫出動重金留人之外，仲話陳豪因為會計劃生仔兼要養家，所以唔想有太大變化，所以最後決定續約唔走。

陳茵媺回應傳媒話：「其實嗰日係去睇哮喘，唔係睇婦產科，三個小朋友對我嚟講足夠，照顧佢哋已經好忙碌！」

(Apple daily)

【網民大讚靚過未生之前】宋熙年首晒產後收身成果

2018-10-25

陳智燊（Jason）與太太宋熙年（Sarah）8月誕下寶貝仔。
坐月時曾經破禁外出3小時同老公Jason撐抬腳…

可能當時還沒完全收身，她只是上載半身相，但當時已經面尖尖，無水腫，好省鏡！

到了今天，Sarah終於有信心貼出全身照，大晒收身成果！只是短短兩個月，已經好Fit！

她又留言，指出老公Jason叫她在停車場逛街前拍個照，Sarah一身黑色露肩的套裝，網民大讚好高貴！
還提到自己懷孕前後的體重變化，她說現在的體重只是比懷孕前重了六磅，但她不着急於減肥，因爲她很喜歡這個微胖的身形。網民紛紛讚Sarch現在靚過生之前！大家覺得呢？

(ig)

【恭喜恭喜】一邊拍劇一邊開分店愈撈愈掂！

2018-10-25

至今已經在無線做了21年。拍過無數劇集，更曾經被無線力捧！不過近年大多飾演一些不起眼的人物。

較為近期嘅就有《愛·回家之開心速遞》、《心理追兇》、《天命》等等。

喺《心理追兇》入面飾演迷戀王君馨嘅狂迷，表現亮眼，唔少網民都激讚佢表現。

如果要數到較為突出的角色，《愛·回家》的細楊生和《忠奸人》的十仔相信會比較令人深刻。

在無線做了廿年，如果只靠TVB的藝人底薪實在不足以養活，不過原來杜大偉（David）都投資有道，跟友人夾份開餐廳。

佢有份投資嘅火鍋店愈做愈紅，短短三年多已開第七間分店，最近又有新搞作開蒸氣鍋，日前位於太子的店舖開張，他說：「呢間前身係火鍋店，我哋想走多元化路線，將呢間小試牛刀，改做蒸氣火鍋，想有多個範疇，嚟緊十月尾又開第八間，會喺佐敦開8,000呎旗艦店，跟住又籌備大陸開分店。（咁積極目標係咪想上市？）所有股東志向都想上市。」

David要拍劇又要打理生意，問到時間是否兼顧到？他說：「我主要做宣傳同公關工作，開張嗰度時間就會忙啲，其他Partner佢哋負責好多嘢。（最近有咩劇集開？）一路拍緊《愛·回家之開心速遞》，仲有會拍《黃金有罪》，會到泰國取景。」

(綜合報道/on.cc)

【幾間名校爭住收】劉德華年繳13萬供寶貝女讀私校

2018-10-25

劉德華近日被拍到帶著老婆朱麗倩及6歲女兒劉向蕙（Hanna）到馬來西亞祭拜祖先，待了超過1星期。而Hanna穿著白色上衣加上牛仔外套現身，雖然有兩個工人姐姐，可是Hanna都不願跟隨，一定要拖實爸爸，一邊牽手一邊聊天，看來兩父女感情要好，女兒都非常癡爸爸。

近日有報道指出，劉向蕙開學才兩個月，就請假了好幾天。

報道指出劉德華每次與歌迷聚會或開演唱會，都會邀請女兒的同學、同學家長以及老師一起觀賞，他就跟普通家長一樣，為了孩子與學校圈子裡的人打好關係。

Hanna入讀的是位於深灣道的「維多利亞學校」，而她上的幼稚園，正正就是這間學校附屬的。

六月時劉德華與太太一同出席女兒的幼稚園畢業典禮（相片由讀者提供）

她很厲害，幼稚園畢業之後，經過一輪小學一年級面試，當時已經有幾間傳統名牌學校都給Hanna提供了學位。

不過，Hanna跟爸爸一樣很有主見，她希望跟幼稚園的同學一起直接升讀「維多利亞小學」，而爸爸劉德華最後就尊重女兒的意願。

據報道，這間私立學校的學費大概要付13萬港元一年，而學校最大的優點是全港第一間提供IB課程（開設從幼兒園到大學預科的課程，為3至19歲的學生提供各方面的教育，使其獲得學習、工作以及生存於世的各項能力）的私校，一方面與國際學校一樣提倡活動教學，另一方面又保留傳統學校的雙語教學，中英文一樣重視。

（綜合報道）

【好友都送上祝福】蘇玉華︰這是值得記念的一天

2018-10-25

潘燦良同蘇玉華拍咗拖22年，男友曾自爆喺日本雪地求過婚，當時蘇玉華感動到喊晒，而且求婚唔只一次，蘇玉華都有答應，不過潘燦良坦言話一直都未有動身去完成婚事：「結婚的儀式是絕對可以做的，不過或許我們雙方都比較懶，不時會想結婚的，但隔一陣子便會放下了。加上我們覺得現在的狀況很好，大家都認定對方是餘下來人生的另一半，對我來說她已是我的家人。」