超強颱風「山竹」上月襲港，天文台一度發出10號颶風信號，對香港多處造成破壞。
（網上圖片）
交通更大受影響，使打工仔返工遙遙無期。至今香港市民仍然歷歷在目……
天文台在社交網專頁指出，位於關島附近的超強颱風「玉兔」會在未來數天向偏西方向移動，橫過西北太平洋，大致移向呂宋以東海域。根據路徑概率預測圖，「玉兔」在下週初的路徑存在變數，可能會較早轉向東北方向移動，但亦有可能進入南海北部，呼籲下星期打算到日本或台灣的朋友請特別留意「玉兔」的動向。
現正逐漸靠近台灣一帶，又透露「玉兔」的強度比「山竹」相當或略高。
（天文台 / 綜合報道）
姜皓文（黑仔）入行三十多年、參演過逾80部電影，今年首獲得金像獎最佳男配角，終於吐氣揚眉，苦盡甘來。得獎後立即攬錫太太殷寧，台上致辭更高呼：「老婆我得咗喇！」
更激動表示：「我冇乜運氣，啲運氣唔知去晒邊度，但呢幾年遇到好多錫我嘅人，運氣好到自己都驚會唔會死。老婆…攞咗嘞！」
辛酸與風光背後全因為有老婆支持！
今日黑仔就在社交網上載與老婆的恩愛合照，慶祝兩人結婚19周年，黑仔留言話：「我一定要你繼續幸福下去，今日⋯ Happy 19th Anniversary 」
上年姜皓文在結婚18周年的時候，就送上檳城一層樓給殷寧，今次兩人就在馬來西亞慶祝，亞姐出身的殷寧，與黑仔識於亞視年代，二人曾共患難，現在則共富貴，不時一起去旅行，十分恩愛。
19年來一直都咁恩愛，殷寧之前都分享過兩夫妻嘅相處之道，問到可擔心老公會惹來「飛來蜢」？殷寧則表示：「飛來蜢都唔會因為係靚仔，好多嘢都係睇人嘅。所以我身為姜氏美人，都要不斷增值自己，女人應該要自強不息，唔可以乜都唔識，要出嚟見多啲人，咁多年嚟我哋嘅相處模式都不斷修改，尤其係佢轉變得好大，比以前更緊張我，最緊要懂得互相包容同學習。」
(綜合報道/on.cc)
藝人徐榮一家四口出席連鎖茶餐廳活動。
問到徐榮跟太太誰下廚比較多？他表示：「太太煮得多啲，不過我以前係廚師，都會炒番兩味，忍唔住手，我淨係唔鍾意整材料嗰一Part，煮嘢食OK。」他直言仔女較鍾意食媽媽煮的東西：「我嗰啲比較濃味，不過都係一半半啦，有時大家都會落樓下茶餐廳食。」
徐榮又指仔女正值發育階段，所以很注重食材，主要買有機的食物，因聽過有報道說食得太多激素不好。問到小朋友可有偏食問題？他表示：「包包咩都食，反而哥哥就唔鍾意食軟嘅食物，好似豆腐嗰啲。」
三歲包包即場餵爸爸食臘味飯，令徐榮甜在心。
講到早前包包三歲生日，徐榮指女兒還未意識到生日是甚麼，但當日一家四口一起吃飯：「趁劇組有幾日假期，仲去咗沖繩旅行，佢玩得好開心，因為當地有好多公園。」他又說包包現時以心情行先：「佢今日見到有小朋友陪佢玩就好一啲，多大人就差啲。」
包包一見到有小朋友就笑容滿臉，手拖著手
徐榮又被問到可會幫包包追多個細佬妹？他笑說：「當初都係哥哥求咗好耐先有包包。（如果包包話想要呢？）我會叫佢慳啲啦，養小朋友唔簡單，依家佢兩、三歲已經好多自己諗法，又要考慮教育，如果再多一個我真係Handle唔到，我可能要退休先得，媽咪依家已經全職湊佢哋，不過佢近排忙幫手打理教育中心，好彩哥哥會幫手照顧，行出行埋都靠佢。」
原來包包得來不易，全靠哥哥！
（綜合報道 / on.cc）
前港姐張名雅於2016年與律師男友蔡錦豪（Joe）拉埋天窗，婚後誕下囝囝Mario。
今年七月張名雅宣佈再度有喜！佢表示預產期喺今年12月。
雖然仲有個零月左右就「卸貨」，不過呢位大肚媽媽都係周圍去，日前佢仲喺IG PO咗啲泳照，撇低囝囝，同老公去咗泰國過二人世界！(相關新聞: https://goo.gl/cNzRD6)
睇到張名雅個肚已經籮咁大，但係啲手腳好鬼纖瘦，又真係幾得天獨厚喎！
日前讀者李小姐喺機場捕獲張名雅同老公，嗰陣佢哋係喺泰國同機返香港，李小姐話：「我喺泰國機場嗰邊已經見佢哋，上到飛機已經有突出，一來又大住肚，二來又戴住太陽眼鏡，所以啲空姐有叫人讓一讓路，你都知道飛機啲位都好窄，所以佢都好堅。」
估唔到返香港，拎行李嗰陣又見到張名雅，嗰陣佢仲坐喺架行李車上面，李小姐就話：「我聽到有啲人都叫佢小心啲，唔好坐喺行李輸送帶，費事啲人拎行李嗰陣撞親佢。」
雖然佢老公全程負責拎行李，張名雅就乜都唔使拎，但係李小姐話佢哋兩公婆全程都冇乜傾偈，唔知係咪太攰。
講到同老公冇乜偈傾，張名雅就笑笑口話：「哈哈，咁坐機可以傾到啲乜嘢？唔通眾目睽睽咁攬住錫咩？我哋都有一齊睇戲、傾吓偈，睇返之前影咗啲相，之後咪休息吓。」至於咁大膽咁坐住行李車，張名雅就話：「咁我個人又冇乜所謂，見有地方咪坐吓。」
(Apple Daily)
97年港姐季軍佘詩曼曾兩奪無綫頒獎禮視后，分別是2006年《鳳凰四重奏》及2014年《使徒行者》。但冇幾耐之後阿佘就正式離巢。
阿佘最近喺大陸宮鬥劇《延禧攻略》飾演奸角嫻妃再次爆紅，名利雙收，不過阿佘日前成為《魯豫有約一日行》嘉賓，佢接受訪問時自爆曾經因為14年前拍《金枝慾孽》，因為一個鏡頭，而搞到冇咗個月餅廣告。
依家無論喺中港台都爆紅嘅阿佘，最近接受大陸主持人魯豫訪問時提到接拍《延禧》，原來阿佘都曾經卻步，雖然佢同主持人魯豫指要接拍《延禧》時冇考慮到「會唔會紅」之類嘅現實問題，但佢就話當年因為喺《金枝慾孽》中，因為推黎姿落樓，而被廣告客嫌棄。
話說當年《金枝慾孽》第19集，阿佘演嘅爾淳假傳聖旨呃由黎姿飾演玉瑩小主去「暢音閣」講數，阿佘叫黎姿放過林保怡演嘅孫白颺，而且出口都唔夠，仲出手企圖推佢嘅死對頭黎姿落樓恐嚇佢添。
嗱，本來呢個只係成套劇嘅其中一部份，但就因為佢推黎姿呢一下出現咗喺宣傳片，阿佘話當時正傾緊一個月餅廣告，但因為個客睇到呢個鏡頭後覺得佢好衰，所以最後話：「我們不要她了」，就係咁，阿佘眼白白咁睇住個月餅廣告飛走咗！
阿佘話當刻自己就諗，原來個嚴重性會咁大，所以接《延禧》嗰陣都有諗過呢一點，不過佢之後就考慮到年代唔同咗，觀眾嘅諗法亦都應該有改變，所以最後都拍咗。
除咗諗奸角會影響形象外，阿佘亦透露因為拍《延禧》時自己正身處馬來西亞拍電影，所以若接拍《延禧》的話，佢就要馬拉、橫店兩邊飛足足五次咁多、又要將自己「撕開」兩邊去演繹角色，除此之外，當時又喺7月，橫店有成40幾度，要喺高溫下拍古裝的確好辛苦，再加上《延禧》中嘅台詞又係普通話，佢又將台詞譯返廣東話去演所以更困難。
而最重要嘅一點係，因為阿佘曾經喺13年炒車搞到頸椎移位，所以佢冇辦法可以戴住太重嘅頭飾，但好彩制作人于正表示《延禧》嘅髮髻好細，台詞亦可以配音解決，大家最後先睇到阿佘咁精采嘅演出咋！
另外，黎姿同阿佘喺《金枝慾孽》入面表現同樣亮眼，當年台慶一齊爭視后，當年有指台慶前夕佢哋原同為一美容產品活動任剪綵嘉賓，但黎姿突然劈價、主動提出減價，附帶條件係要單拖上陣。結果，黎姿成功撇甩阿佘做剪綵嘉賓。
(綜合報道/Apple daily)
藝人黃心美出席一個澳洲品牌的健康食品活動時，透露剛從墨爾本出席完三妹黃心慧婚禮回港，她笑言要多謝三妹，集合了一家人齊齊整整去旅行，她說：「對上一次全家旅行已經係8年前，我哋幾姊妹各有各忙，媽咪又長住溫哥華，所以好難得集埋一齊，我留咗五日，星期二（23日）先返香港。」
墨爾本婚禮除了心穎的男友馬國明有份出席外…
原來心美的另一半亦有同行，甚少談及感情事的心美說：「我哋都拍咗年幾拖，男友唔係圈中人，唔想帶佢出嚟影響佢嘅生活，其實以前離婚又好（相關新聞：https://goo.gl/vFtz7L ），依家拍拖又好，我都會坦白，但唔想用嚟消費，（男友都好入屋，見晒家長？）我妹請佢，佢得閒咪一齊去囉！」神秘男友終於公開現身黃家喇！參加婚禮順道見家長，可能下一個到心美結婚喎！
問到會否有再婚的想法，她直言並沒有結婚的憧憬，不會覺得婚姻是童話，也不想結婚似做騷：「可能做好多event，去三妹婚禮，我對着乜都好麻木，我妹先係主角，自己着乜都冇所謂。」
她說三妹選擇在外地結婚，甚有難度，由於沒有請wedding planner，故發生不少蝦碌事件，如新娘子漏了揸花球在酒店，因車程太遠，最後要再做一個全新花球，笑言：「用錢解決到就世界和平啦！」見慣大場面的心美，直言看到二妹心妙為新娘上頭時，自己一度失控流眼淚，又爆二妹飲茶時，又喊到收唔到聲，心美說：「二妹飲妹妹杯茶時，二妹係咁喊，喊完又笑，仲笑到噴茶，佢個小朋友坐喺佢大髀，啲茶噴到小朋友身上。」
她揚言大家都是笑中有淚，四姊妹感情愈大愈好。提到健康食品，心美笑言自己已29+7，年紀不輕，故一直有服用健康食品的習慣，保養皮膚、頭髮和指甲，她說每年11月是最忙的月份，故會訂定一日三餐的健康餐送上門，好讓工作後回家有啖好食。
（綜合報道 / on.cc）
她出席啟動禮，擔任中西區交通安全運動議會交通安全大使，首次擔任大使的她表示穿上制服就很有壓力，但亦感到榮幸：「係好大嘅責任，有時睇到啲新聞，見到意外都會幾日唔開心，平時揸車我都會好小心，依家坐多，有時坐朋友車，佢哋揸得小心都會加分，如果一個男仔揸車好都係細心嘅表現。（揀男朋友都要揀駕駛小心嗰啲？）係㗎。」她亦表示之前有時會貪快：「眨燈都想過馬路，但依家知道唔可以一時貪快，我之前屋企樓下係大斜路，未起天橋前啲人就咁過馬路都試過發生意外，依家見到屋企人貪快都會捉住佢哋。」
另外，提到有指她撻着富二代髮型師，藝人傅嘉莉（Kelly）即笑住澄清：「我哋工作中認識嘅，一出道佢已經幫我染髮，大家係朋友，大家睇到都係笑，我仲諗髮型師同我出入更加多，會唔會都傳埋佢？其實真係唔係，係誤會。」
工作方面，她很開心在《萬千星輝頒獎典禮2018馬來西亞》，憑《特技人》首次被提名「最佳女主角」，她開心表示：「我仲以為係女配角，但原來係女主角，我自己都唔敢相信。（同朱晨麗一齊入圍？）係呀，好開心《特技人》畀到我好多禮物，有提名已經好開心，得獎係目標，但呢刻未夠level接受呢個獎。」問到有何對手？她表示睇好胡定欣及黃智雯，亦謂上年是提名女配角，一直坐台下有很大感觸，但亦戥得獎者開心，講到她「升呢」提名女主角，她笑言會繼續努力。又透露11月尾會開拍新劇。
（on.cc）
前藝人翁靜晶曾經於香港電影《喝采》及無綫電視劇集《荳芽夢》中擔任女主角，之後與武打電影導演劉家良結婚。二人育有兩個囡囡劉萬儀、劉幸儀。
細女劉幸儀今跟拍拖4年嘅意籍男友Roberto在英國舉行婚禮，榮升外母嘅翁靜晶在社交網分享相片並留言：「小女兒結婚了，以最簡樸無華的儀式，謙卑卻真實地締結了姻緣。」
翁靜晶指整個婚禮，只有新娘和新郎，相中所見，幸儀沒有穿婚紗，只是簡約嘅白色喱士衫襯白色半截裙，平凡但洋溢幸福，翁靜晶寫道：「然而，一段婚姻，不正是兩個人的締盟嗎？兩小口，由零開始，共同努力去創建未來，比較起有父母幫忙大排宴席、買樓買車置傢具，他們更能夠享受一個自力的過程。」
女兒出嫁，本來夢想舉行童話婚禮，翁靜晶寫道：「人生最重要的經歷，正是成長到老的過程。慶幸地，女兒明白她原本的童話婚禮，那筆禮金已經轉變為『公義事業』，沒有任何埋怨，只有鼎力的支持。一段美好的婚姻，勝過一個豪華的婚禮。她懂事，證明是長大了。祝福他們！百年好合，兒孫滿堂。」
28歲嘅幸儀在英國完成法律系學位，但對健身有濃厚興趣嘅佢，操得一排朱古力腹肌，連最難搞嘅李小龍式蝙蝠肌都練到，前年參加英國一個健美小姐比賽打入頭五名，其後宣布跟男友訂婚。由於英國傳統嫁女由女家負責請客，惟近年翁靜晶為了跟定慧寺打官司使咗好多錢，去年重操故業做執業律師，更自爆連劉家良師傅生前留給兩女嘅200萬嫁妝都耗盡。
當時翁靜晶接受訪問表示，細女夢想舉行童話婚禮，自己卻冇能力支付酒席費用：「細女都面對現實，喺英國搵咗份法律嘅工作，但唔好意思細女嫁期要無限期延後，不過我覺得使嘅錢係崇高同純潔，有能力搵番。」
(Apple daily)
前港姐李美慧（Vivi）日前為年長25歲嘅商人老公曾文豪誕下囡囡「小糖心」，Vivi早已上載咗兩張同老公抱住囡囡嘅側面相。
今日終於將囡囡嘅正面曝光，果然同Vivi所講一樣，B女似足爸爸曾文豪，相當之可愛！
父母目光一齊望住囡囡，幸福滿瀉，Vivi感觸留言：「好大感觸，前幾晚同樣的地方，那時的她還在我的肚子裏，而我每晚都幻想她是甚麼樣子？😄沒有想到相隔幾日，❤️小糖心已經在我身邊了🐣十分之可愛和神奇，小糖心像一粒小豆一樣」。網民都激讚小糖心勁可愛！
(on.cc)
他在九展舉行首個演唱會，騷後接受訪問 ，問到可希望如李克勤所言，不久再開騷？他表示：「希望一年左右啦，我今次都籌備咗10個月。（下次想紅館？）如果紅館就更加好，今日開到演唱會已經係奇蹟，如果奇蹟再發生多次我唔介意，我都好希望可以踏足紅館。」
講到太太日前昏迷，幸好開騷前幾日醒番，對此他坦言放下心頭大石：「太太喺10月9號喺屋企昏迷，真係好大件事，嚇死我，即刻叫救護車送佢入醫院。」
黎瑞恩、細龍生鄭世豪都撐場
歌手黃翊續謂太太入院後即送入深切治療部：「醫院即刻照佢個腦，驚佢爆血管，因為我發現佢昏迷時，見到成床都係血，唔知點解佢會嘔血，所以就照，驚佢內出血，但照完之後乜事都冇，原來係佢昏迷時抽筋，咬到條脷，所以流咗咁多血。」
演唱會上大曬一家三口幸福家庭照
幸好開騷前幾日太太終於醒番，情況日漸好轉，他表示：「起初醒番佢好瘦，冇氣冇力，但依家已經可以同我講電話，康復進度十分理想，好開心可以喺演唱會前有番意識，變咗做演唱會唔使有牽掛。」
他又謂這段時間實在太操勞，搞到聲沙，用了很多方法都不可行，希望大家不要介意。
(on.cc)
