胡定欣、田蕊妮﹑古天樂﹑吳卓羲﹑陳慧珊﹑張兆輝夫婦﹑陳煒﹑苗僑偉﹑劉偉強﹑丁子高﹑黎諾懿夫婦﹑伍詠薇、余思霆﹑吳岱融﹑梁烈唯﹑王浩信﹑陳展鵬﹑姚子羚﹑李施嬅等到賀，星光熠熠。。。
丁子高、歐陽震華、伍詠薇、苗橋偉、陳欣健、張兆輝同太太嚟賀樂易玲嘅59歲生日，問到佢會唔會接拍《飛虎2》，佢就表示：「唔得喇，同其他工作嘅期撞咗。」再問佢會唔會感到可惜，張兆輝直言無辦法：「有時工作成日都係咁，一個人做唔晒咁多嘢。」提到佢受歡迎，講到點擊率高，佢話：「咁就係仲有機會，希望佢繼續有好成績，仲會拍第三輯、第四輯，拍落去，到時我咪有機會做到，因為其實撞咗期嘅工作喺香港，接嘅時候都係好突然通知，所以無辦法。」
講到早前，佢同太太登報澄清自己太太家姐、即佢大姨欠債一事無關，佢表示：「都無辦法喇，唯有好好警惕，唔好先使未來錢，要自己按返自己能力同步驟。」再問到佢哋驚唔驚有人以後追債，受到騷擾，張兆輝表示：「騷擾我都無辦法，其實唔關我事，應該要搵返嗰個人，始終呢啲嘢，一人做事一人當，不過總言之講就係咁樣講，希望就唔好搵我哋。」
田蕊妮就單人嚟賀樂小姐生日，佢就帶咗支酒到賀，佢話：「生日唔知送乜，送支酒大家開心啲。」提到近況，佢就話早前同老公杜汶澤去咗美國兩星期，阿田說：「年年都會去，去打坐，健康啲。」問到佢幾時再拍劇，佢就笑言自己係佛系演員：「緣份到就會拍，其實都差唔多，都應該付吓責任拍下，老公之前同我講，話我差唔多停咗一年，係唔係唔拍？唔拍就不妨話畀佢聽，其實依家係錄緊歌，仲未錄完。」講到佢係唔係要揀劇本同揀對手，佢就笑言唔係：「點有得揀劇本，我呢啲，邊有得揀對手，有啱就會拍。」
(蘋果日報/明報)
