【唔係賴弘國】阿嬌傾慕發文求關注

2018-10-02

唔少網民見到都唔相信，仲話一定係阿嬌畀人偷咗帳號，隔咗一陣阿嬌再次留言，澄清自己冇畀人偷帳號，有啲尷尬咁留言。。。

藝人鍾欣潼（阿嬌）出道多年紅遍兩岸三地，就算今年同「醫界男神」賴弘國結咗婚升呢做人妻，佢啲粉絲數繼續係有增冇減，本身係偶像，咁佢嘅偶像係邊個呢？尋日佢喺微博開估，仲主動發文求一位男士關注添，而呢位男士嘅外形，網民搞笑用「老公最安心」嚟形容！

令阿嬌傾慕嘅男士名叫孟非，佢好直接喺孟非微博留言自稱死忠粉絲，希望可以互相關注，唔少網民見到都唔相信，仲話一定係阿嬌畀人偷咗帳號。

隔咗一陣阿嬌再次留言，澄清自己冇畀人偷帳號，解釋咁做嘅原因係最快最容易可以接觸到孟非，有啲尷尬咁留言：「老師，不好意思，冒昧的要求把你拉出來了！」

仲話已經私訊咗孟非等緊佢回覆，十足平時粉絲對佢嘅態度一樣勁搞笑！

最終阿嬌都得償所願互相關注，有網民留言話好彩阿嬌迷嘅係外表唔出眾嘅孟非，如果唔係賴弘國隨時會嬲嬲豬！

講番少少關於孟非嘅資料，佢係內地一位出名嘅主持人，標誌性嘅光頭形象深入民心，佢以口才見稱，主持嘅節目《南京零距離》成為當地收視率最高同埋當時全國廣告價格最高嘅電視新聞節目，你都咪話唔巴閉！

(on.cc東網)

【迎接新成員】雙喜臨門：家人負責請陪月

2018-10-02

繼獲鄧萃雯等為她於主題樂園慶生外，正日下午她則與家人及教會好姊妹等齊齊燒烤再慶祝。仲自爆即將迎接新成員。。。

剛於9月30日度過生日的張文慈（Pinky），繼獲鄧萃雯等為她於主題樂園慶生外，正日下午她則與家人及教會好姊妹等齊齊燒烤再慶祝。談到這個生日，她感恩表示：「好圓滿，集齊晒家人、朋友及粉絲嘅祝福，依家人大咗，我要求嘅嘢好簡單，唔需要大鑼大鼓華麗咁慶祝，但求身邊有三五知己已足夠。」

由於弟婦將於月中臨盆，Pinky近日忙拍劇之餘，更幫手為新成員加入做準備：「因為仲拍緊劇集《解決師》嘅關係，所以可以幫手嘅嘢都有限，都係家人負責買嘢、請陪月，而我出唔到力就出吓錢囉，不過都係開心嘅。」

(on.cc東網)

【戴白色情侶帽十指緊扣】捕獲大台小花撻著…

2018-10-02

形象清純，獲讚純過蒸餾水，戴上白色情侶帽的二人步往餐廳時邊行邊談情，心花怒放的她還情不自禁主動拖着男友傾到冧爆甜笑。。。

現年23歲的江嘉敏形象清純，獲宅男力讚純過蒸餾水，被視為「宅男咪神」的她入行日子雖短但緋聞卻一大籮，更曾被指與王浩信拍攝《兄弟》時做「小三」，主動獻殷勤又私下短訊男方。

緋聞多多的她雖不時表示自己單身，但原來她近月已秘密開「dry」，暗撻名為Anthony的六呎男，男友更是著名電競公司的高層，家住太子道西價值千多萬港元的豪宅，平時駕駛寶馬房車出入。江嘉敏為免戀情曝光影響上位，一直與家人居於跑馬地的她，為了密冚戀情還於西貢租了一間偏僻村屋作為私竇，方便與男友談情。

一臉滿足甜笑

日前下午約四時，江嘉敏穿上粉紅色上衣，戴上帽及口罩，與男友雙雙離開私竇，她驅車送男友離開後即返電視城開工，至晚上八時許收工又急急驅車往男友寓所，及後Anthony駕駛其寶馬載女友往旺角醫肚後再返回寓所，江嘉敏下車時極為警醒，四處張望一番後才手拖手與男友上樓，兩人逗留個多小時才離開，男方還換了衫，女方亦一臉滿足甜甜笑，之後再驅車返西貢私竇繼續煙韌。

戴白色情侶帽

事隔數天江嘉敏又穿上其粉紅色冧仔戰衣，與男友於下午三時離開私竇，見她不時嘴角含春甜笑，並由男友驅車接載下往西貢市茶餐廳搵食，期間被鄰枱男食客認出時她即拉低帽子遮樣，醫肚後Anthony送女友回電視城開工，他則返回太子道西寓所，待晚上再接女友收工返私竇。

兩人於翌日下午二時許前後腳步出，男友再做柴可夫車女友往西貢醫肚，泊車後江嘉敏先往購物後才再會合男友，戴上白色情侶帽的二人步往餐廳時邊行邊談情，心花怒放的她還情不自禁主動拖着男友傾到冧爆甜笑，兩人之後於餐廳醫肚後離開。

步出時江嘉敏發現記者在場，便煞有介事與男友前後腳上車，男友及後四處兜圈遊花園，最終載了女友返電視城，江嘉敏下車時亦雙重戒備，已戴了帽的她還笠上外套帽，包到冚頭耷耷跑入電視城內。

(on.cc東網)

【仍然有激動落淚】楊盼盼燒傷後首開腔：演員唔好咁傻

2018-10-01

60歲武打女星楊盼盼上月中在大馬拍電影《大地回春》一場火災戲發生意外，導致臉部二度燒傷，手腳同樣受傷；入院半個月嘅盼盼姐首開腔接受大馬傳媒訪問，坦言入院第三日，諗起被火燒情況時，仍然有激動落淚，尤其睇到有老人家被燒傷倒在地上，令佢心痛不已！

經過連日治療，盼盼姐嘅傷勢逐漸康復，日內就可以出院，佢表示一切很好，笑言本來係拍喜劇賀歲片，估唔到變咗災難片，更向監製林德榮「索償」，因為佢為咗拍呢部戲，推咗郵輪騷演出，笑言要監製賠償損失。盼盼姐坦言沒怪任何人，只怪自己太相信劇組，所以疏忽咗呢場戲嘅危險性，令自己冇咗警惕心，沒有在拍攝前，憑自己豐富經驗了解狀況。盼盼姐給大馬劇組建議，認為拍呢類大場面應該安排專業特技人員負責。

今次意外係對大家一個考驗，令劇組感情突飛猛進，盼盼姐忠告：「希望大家唔好怕，就當係警惕，唔好變成一個包袱，多啲去了解同學習，新人應該要更專注每個部份嘅執行性，演員亦都唔好咁儍聽導演講：『等多一下，拍完才走！』」今次意外，盼盼姐感受到大馬人嘅善良同感性，因為佢睇到大家不顧危險撲前救人：「大馬人嘅使命感很強，外面嘅人很專業卻很冷血，執行性強，計算得好清楚。」

另外，同戲受傷的馬來西亞藝人梁祖儀透露出院不夠一天又再入院，回到家感到頭暈、嘔、肚痛、及發燒，她在社交網留言：「喺過去兩個星期喺醫院未有感覺身子弱，只覺得痛，但仍然有笑容，不過今次我覺得成身冇力，亦再笑唔出。」又指：「瞓喺度打呢篇文，感覺好似舒服咗，亦感到唔好意思send過恭喜我出院短訊畀我嘅人，因為我又再次入院，不過唔使擔心，我會好快康復。」她更post了與媽媽的合照，精神看似不錯，不少網民都送上祝福！

(蘋果日報/on.cc東網)

【但網民錯哂重點⋯】小S話佘詩曼塊面好繃

2018-10-01

台灣藝人小S（徐熙娣）言論一向大膽，完全唔怕得罪人，所以佢主持嘅節目一向受歡迎，令觀眾睇得好過癮！最近小S就去咗巴黎時裝騷，巧遇「魏瓔珞」吳謹言和「嫻妃」佘詩曼，原來小S都係《延禧攻略》嘅粉絲，所以見到兩位都忍唔住要合照，但佢竟然敢話阿佘塊面好繃！

佢喺社交網留言話：「陪我渡（度）過好ㄧ陣子的延禧攻略，今天在Valentino的秀相遇，吳謹言還真瘦！佘詩曼臉好繃，但我好時髦喔！」最搞笑係粉絲竟然唔係睇3個靚女，而係留意到左上角一個瘋狂自拍的路人，仲搞笑話：「我只注意到後面那位⋯，天啊兩張照片她都好搶鏡頭。」

(on.cc東網)

【羅天宇湯洛雯大方企喺⋯】網民勁問係咪有機會

2018-10-01

網民都話靚湯都有現身，係咁問佢哋係咪有機會復合，仲搞笑話今年雖然冇靚湯送吻，但有好兄弟送吻都好過冇啦～

藝人羅天宇（Joey）今日31歲生日，獲得一班好友同佢搞生日派對，當中包括溫家偉，蘇韻姿、何雁詩等亦有出席，仲喺社交網分多張派對相片。其中大合照拎住蛋糕嘅主角Joey就喺中間，後面仲見到Joey前女友湯洛雯（靚湯）都有出現，上年嘅佢喺男友生日時就送上「肉嘴」，不知幾Sweet！

不過雖然佢哋如今分咗手，但佢哋都曾表示再見亦是朋友，見到靚湯大方出現企喺後排，而緋聞情侶劉佩玥同男友周志文亦有出席，真係好齊人。

而溫家偉亦有甫出錫錫Joey塊面嘅相，並留言：「Love u brother!happy birthday!（生日快樂，愛你兄弟！）」

(on.cc東網)

【老公激罕出鏡】黎姿冧爆：多謝老公

2018-10-01

Happy Birthday！今日係《珠光寶氣》個Constance……啊唔係，係黎姿（現名：馬黎珈而）嘅47歲生日。

黎姿今日喺Instagram同微博等社交網站分別貼相，並簡單留言話：「多謝老公和好友們和我一同度過一個開心的晚上。」佢放嘅相都好簡單，分別係生日蛋糕、壽星女and生日蛋糕，以及（最重要嘅）壽星女and老公。

其實馬廷強在08年與黎姿註冊結婚以來，兩人好少一齊出席公開場合，而近日黎姿有玩社交媒體都好，頂多都係放3個寶貝女嘅背影照。

馬廷強鮮有出鏡，今次因為老婆黎姿生日先「現身」。

雖然張相暗咗啲，但睇得出黎姿同老公都好開心、好sweet！

不過啲相就唔見黎姿嗰3位千金，唔知佢哋送咗啲咩俾媽咪呢？

(蘋果日報)

【低調再婚】IG曬婚戒勁收祝福

2018-10-01

現場保密工夫做到足。新人的婚紗禮服Look未有曝光，而星級賓客亦未見於社交網晒婚禮照片，終於在Instagram有更新，上載自己與老公。。。

奧斯卡影后桂莉芙白德露（Gwyneth Paltrow）前日與監製未婚夫Brad Falchuk在位於紐約的大宅舉行婚禮，現場保密工夫做到足。

新人的婚紗禮服Look未有曝光，而星級賓客亦未見於社交網晒婚禮照片，僅見男星Rob Lowe開心Share與「鐵甲奇俠」羅拔唐尼（Robert Downey Jr.）的合照。

而桂莉芙再做人妻之外，終於在Instagram有更新，上載自己與老公Brad戴上簡單婚戒的手仔相，證明雙方已經封盤，不少粉絲紛紛留言祝賀！

桂莉芙與Brad拍了四年拖，今次是桂莉芙與Brad第二段婚姻，2003年12月5日，她與英國歌手Chris Martin於南加州一間酒店結婚，並於2015年4月離婚。

至於Brad曾與電視監製Suzanne Bukinik Falchuk結過婚，亦同樣育有一子一女。

《歡樂合唱團》（Glee）男星Matthew Morrison、珍妮花露柏絲（Jennifer Lopez）男友Alex Rodriguez等都有留言送祝福！

(on.cc東網)

【鄭俊弘避席朋友間聚會】何雁詩：我都要高富帥㗎

2018-10-01

泳兒、何雁詩、谷微、胡鴻鈞同周志康噚晚喺黄竹坑擔任綜藝晚會表演嘉賓，今個月生日嘅泳兒，希望可以同公司申請到一個較長嘅假期，同男朋友到歐洲旅行，佢話：「之前皮膚好差經常敏感，有朋友話浸死海有幫助，所以我都想去。」旅程當然由男友負責，但男友生日將至，佢又到咗要煩惱買禮物嘅時候，佢話：「我啱啱收到新電話，叫男友幫我拆，點知佢面色一沉，原來佢諗住送畀我，仲好似出咗手。」每逢年尾由生日起，到聖誕節及情人節，佢哋都會互相送禮物，男友曾經試過忘記送禮物，最後改為請去旅行補鑊。

何雁詩身穿長褸，佢笑指近日做gym操得連膊頭都闊咗，佢話：「因為半年前要打哥爾夫比賽，想練大隻啲，後來變成習慣，都鍾意自己有muscle，o依家fit先係new sexy，有少少肌肉先好睇。」問到最想操邊度？佢笑說：「我操pat pat，要有健碩嘅蜜桃股。（依家成效如何？）都蜜桃㗎，熟熟地。」佢又指要收埋成果，費時畀咁多人睇，留畀自己睇。咁男友鄭俊弘滿意嗎？佢話：「佢冇comment，冇留意，我哋都成日見，我話自己肥咗，但係佢好識講嘢，都話係咁靚，所以信佢一成，雙目失明，亦都搞到我個人開始囂張。」問到佢有冇讚番男友？佢甜笑話：「佢幾時都咁靚仔。」

何雁詩指男友都會避席朋友間聚會，免得兩人不時放閃，但當中以陳瀅最無所謂，因為她太苦悶。佢又指陳瀅好慘，成日傳緋聞但無次真，問到可有介紹男仔給她？佢話：「佢要求好高，我哋taste又好唔同，同埋我哋太多mutual friends。」講到陳瀅係咪鍾意高富帥？佢話：「我都要高富帥㗎，不過唔同taste啫。」

(蘋果日報)