歌手張敬軒一連6場紅館「HINSIDEOUT張敬軒演唱會」完成最後一場，軒仔多次感動落淚，由於觀眾反應熱烈，唱至11時58分超時完場。

當時軒仔致詞多謝各合作單位，但講Credit之前，軒仔忽然話：「其實我前兩晚先至喺紅館見到神蹟。當Boy’z上到嚟之後呢，我見到就連傷殘位嘅人都企晒起身，我係第一次喺紅館見到神蹟！」之後軒仔再介紹一輪credit，講完之後，就問觀眾喇：「你哋想唔想有嘉賓呀？我就想睇下紅館點樣可以核爆！」語畢即走去台邊，邀請Kenny同Steven上嚟——留意番，軒仔係拉Kenny上台，Steven就係自己上台。一上到台，唔使講啦，未上已經核爆咁樣樣，Steven話：「Ai，我走先喇！」

軒仔轉身即追住Steven：「你唔好走呀，你好重要0架！冇你點成事，你哋係Boy’z！」明明觀眾已不停尖叫，軒仔仲嗌大家：「俾啲聲嚟聽下？！」全場嗌得更起勁。軒仔再話：「真係唔明點解，Boy’z同我會變成大家嘅集體回憶。我哋都唔係好老啫。」

此時觀眾又再瘋狂尖叫。軒仔笑言：「其實我哋都係00後。」軒仔又問：「大家想唔想再睇Boy’z開演唱會呀？」全場又嗌。此時Kenny忽然嗌：「我見到老闆（楊受成）呀！老闆不停咁點頭！」大會鏡頭亦馬上pan去拎住bom bom棒企咗起身嘅楊受成身上。

「上次就嘈到聽唔到，咁今晚我哋就唱多次《死性不改》。」噢，都係唔唱《預言書》。唱完喇，軒仔感謂：「唉，咁就已經十幾年喇。」Steven此時問：「如果我哋真係開演唱會，你嚟唔嚟做嘉賓？」軒仔話：「嚟！」再指住Kenny話：「我同佢合唱《眼紅館》都得吖！」

兩人落台後，觀眾仍不斷嗌encore，軒仔笑言：「紅館嘉賓俾人嗌encore都係第一次見。我哋上次之後有溝通過，佢哋真係好快會開演唱會0架，你哋等下啦！」

軒仔演唱會慶功宴上表示因為觀眾很好，所以每晚都好感觸好感動。講到Boy’z即興上台第二度任嘉賓，軒仔笑言:「第一晚驚喜啲，升上嚟，今晚Boy’z一早坐在觀眾席。本身諗住今晚冇嘉賓嘅」軒仔續說第一晚完騷後有老歌迷表示失望，很多想聽的歌軒仔都冇唱，所以第二日軒仔即調整Rundown，都係想令歌迷開心。

做女人上癮

提起「降兩度」的造型，軒仔笑稱：「我本人就係斯文啲嘅，而「降兩度」把口就賤啲，所以，有個分身係好玩嘅。（真係剃腳毛？）係呀，晚晚都剃，咁有啲睇唔到嘅位咪唔剃囉，即係格肋底呀！原來剃腳毛都要成個鐘，要換兩塊刀片。（咁硬？）我堅挺嘛！（太粗生？）係出得好快，鬚都好啲，腳因為想佢睇上嚟有光澤就着絲襪，但太粗試過刮爛對絲襪，真係女人不易做。」

親自搵Boy’z做嘉賓

講到是他親自找關智斌（Kenny）和Steven做嘉賓？軒仔說:「係呀。（冇推你？）冇，但Steven真係推劇組飛返嚟。（唔尷尬咩搵Kenny？）唔尷尬，不嬲都唔尷尬，係等緊啲機會，冇平時啲收收埋埋，邊會有今次咁爆嘅核彈呀！（咁你都編排咗十幾年喎？）咁真係有紀念意義先搵佢嘅。（點報答佢？）我哋之間唔講呢啲。（咁講乜呀？）講心囉！講心唔講金嘛，心意嚟。」因之前有傳兩人已「斷交」，是否再見亦是朋友？軒仔笑言：「等我諗下點答先……其實咁耐以嚟我哋都冇減少來往，只係有時啲報導唔想出到嚟答怕愈描愈黑咁。（關係一直Keep住？）咁多年都係好好、好好嘅朋友囉，好Close嘅朋友，新聞又好傳聞又好，有啲嘢愈講得多愈無私顯見私咁，同埋啲花邊新聞，蓋過咗我哋嘅努力，關智斌唔會因為張敬軒而見報，而張敬軒亦都唔需要因關智斌而見報，呢個係我哋大家有時封口嘅原因。」 

替胡定欣抱不平

而軒仔都逐一多謝容祖兒、陳慧琳、楊千嬅、胡定欣來做嘉賓，但問到可有留意網民說找胡定欣做嘉賓有點失望？軒仔稱都看不到太多，覺得網絡上的意見值得參考，但單看幾個留言就不太公平。

搞開騷門票好頭痛

至於有歌迷以「報失門票」入場而被拒門外，軒仔稱不太清楚這件事，但就他而言每次開騷門票都令他好頭痛，單他為歌迷會訂飛就墊支超過100萬元，但每次都有人甩底，今次他就硬食了幾萬元飛債，亦搞到開騷前凌晨三點他仍在分飛。

(on.cc東網/蘋果日報)