宣佈離婚後，有網民就留言指覺得個小朋友好慘，佢前妻就於Instagram回應：「生孩子，我一次都冇後悔過，亦唔覺得丟臉。咩都唔知道嘅人，就話我兒子好可憐。」
韓國男團U-KISS嘅24歲前成員東浩，2015年時11月宣佈跟年長一歲嘅圈外女友奉子成婚，前年5月東浩榮升做爸爸，之後不時喺網上公開一家三口照晒幸福。
不過噚日東浩就被爆已於上月離婚，兒子歸前妻撫養。東浩噚日承認離婚消息，表示前妻於結婚期間吃咗唔少苦，二人對孩子都感到抱歉。
東浩宣佈離婚後，有網民就留言指覺得個小朋友好慘，東浩嘅前妻就於Instagram回應：「生孩子，我一次都冇後悔過，亦唔覺得丟臉。咩都唔知道嘅人，就話我兒子好可憐。」
東浩前妻表示佢對囝囝感到抱歉，唔理發生咩事，都會令兒子幸福，對於網上嘅惡意留言，佢就表示：「如果有人欺負我囝囝，我唔會坐視不理。」
(蘋果日報)
台灣天王周杰倫老婆昆凌一向係廿四孝媽媽，佢近日就連飛到米蘭出席時裝周活動，都一樣「仔不離身」，帶埋一歲囝囝「小小周」去。呢日，佢喺社交網晒出一張抱住囝囝喺名勝古蹟前影嘅靚相，並留言：「難得我們兩個約會！」
相中見小小周着上黑白背心，影相時仲要唔望鏡頭，反而對住遠方擺chok爆表情，真係有爸爸嘅影子。
雖然佢黐實媽媽，不過當佢見到有另一位小妹妹經過嘅時候，就立即賣甩媽媽過去撩女仔，難怪昆凌都忍唔住留言：「怎麼把你放下之後就去找妹妹。」
(on.cc東網)
港姐出身的無綫花旦朱晨麗30歲出頭，外貌標致，裙下之臣當然多，入行7年來緋聞不少，上至神秘富豪、官二代，下至藝人李日朗、黃子恆、何廣沛等，認真精彩！然而朱朱的愛情路上，並非外間認為般順利，相反一個「忙」字成為其死穴，完全抹殺她對感情的付出，絕對是女神唔易做。
半夜開工 舊愛懷疑
身為公司的力捧對象，朱朱當然視事業為先，不過，她對每段感情均百分百付出、真心經營，惟最後卻只能宣告死亡，她接受東網專訪時說：「之前朋友介紹嘗試同一個圈外人發展，但我太忙，佢唔明白我嘅工作性質，淨係知我成日半夜喺出面開工，唔聽電話同短訊，令佢有懷疑，就算我講事實出嚟都唔明，最後梗係分開，都唔係拍咗好耐。（咁何廣沛又點？）佢幾好，向事業發展緊，我希望可以同佢喺戲入面再續前緣。（伸延戲外？）都幾好，有上進心，靚仔同後生，愛唔愛真係唔知，識咗咁耐，依家係好兄弟囉！將來嘅嘢唔知，唔敢講得太實。」
自言追求簡單浪漫，笑指一支玫瑰花足已令她爆喊，相當貼地，可惜歷任男友統統沒出這招，反而多送奇特禮物，試過收家具甚至平價手鏈：「收過兩蚊雞嘅手鏈，佢仲講話喺街邊小販檔買，覺得好得意，我仲要扮好鍾意，其實平時我好少戴飾物，但佢要我出活動都要戴，不過我尊重佢，愛一個人會全心投入，但甩拖後就冇戴。」愛情果然令人盲目！
盼40歲前生仔
這位男友經濟有困難，朱朱沒有離棄他，在金錢與愛情之間，她選擇了愛情，甚至願意倒貼生活費：「試過好多次都要我幫，心諗我人工低過佢，點解我都可以幫？因為平時我唔出街，最大開支都只係交通。（點解幾次都可以接受？）唔知，愛情囉！（接受男仔經濟能力低？）依家就要慢慢諗，呢個世代獨立可以，但唔可以低過我，或者要我幫佢囉！不過我對婚姻都有憧憬，希望可以組織家庭生小朋友，但唔好太遲，40歲高齡產婦好危險，依家好好向前衝，但我要先解決時間呢樣嘢，覺得係需要放時間畀另一半，因為某程度上，陪伴唔係用錢嚟衡量。」
提起朱朱自爆收過前男友所送的兩蚊手鏈，並佩戴出席活動，何廣沛接受訪問時否認是由他所送，並好奇反問：「完全冇聽過有兩蚊嘅手鏈，咁平唔係啩？出手咁『高』，我都係第一次聽，好想知係乜一回事，點解咁平！」
問到是否覺得朱朱是好女仔？Matthew即刻大讚說：「當然係，係個好女仔、好同事。（佢係咪好貼地？）我有同佢一齊食過飯，都係食得好正常，唔會食貴嘢，佢唔係拜金嘅人。我唔係一個有錢嘅人，咁佢都揀我做朋友，可以證明佢好貼地。」
而另一位緋聞男友黃子恆也認為朱朱是事業型女性：「佢投資畫廊又開酒吧，唔係一個一心想做少奶奶嘅人，我好欣賞呢啲女仔，佢有能力去發展自己嘅事業，而唔係只會將重心放喺家庭。」
(on.cc東網)
現年10歲嘅Celine妹妹譚芷昀，去年參加美國才藝節目《全美一叮》（America’s Got Talent），備受注目，可惜未能勝出。相隔一年，佢轉戰日本亮相朝日台節目《關8 The莫札特音樂王No.1決定戰》今日播出，與其餘來自日本、具歌唱天份嘅七位中、小學生上節目進行較量。
《關8 The莫札特音樂王No.1決定戰》由尊尼組合關8成員村上信五、大倉忠義，與著名小提琴家葉加瀨太郎任主持，Celine妹妹亮相節目其中環節「最強唱歌兒童大會」踢館。喺第一個回合，Celine妹妹係第二組出場，與14歲日本參賽者田上陽菜爭奪小歌后寶座。 兩人選用Celine Dion名曲《My Heart Will Go On》對決，田上陽菜先出場，獲得98.250分，睇完對手比賽，Celine妹妹話緊張，但都有信心。
Celine妹妹出場顯巨肺唱功唱偶像嘅《My Heart Will Go On》，最終以98.438分，以輕微之差出線。
下一回合，佢會對另一賽前大熱，只得8歲嘅宇都宮聖。
於第二回合，Celine妹妹與另一賽前大熱、只得8歲宇都宮聖對決，佢曾經以演繹中島美嘉作品靠響亮聲線震撼日本全國，被視為天才兒童，呢個回合，佢哋演繹夏川里美作品《淚光閃閃》。
唔識日文嘅Celine妹妹，由拼音開始記歌詞，再理解其中意思，以字正腔圓日文獻唱，最終佢以97.998分，贏對手嘅97.476分晉級冠軍戰。
第三回合，Celine妹妹與15歲女學生上垣Hinata爭冠軍，佢哋選唱《魔雪奇緣》（Frozen）歌曲《Let It Go》，Celine妹妹話唱呢首歌唔易唱，因為好多高音同低音。
Celine妹妹以雄厚聲線唱出英文版嘅《Let It Go》，贏盡掌聲，評判都話Celine妹妹完全唔似只得10歲，相當利害。Celine妹妹都對自己表現好滿意，話為自己可以唱好高音部份而自豪，佢最後以98.731分，呢個全日比賽最高嘅分數勝出，對手就獲得98.249分。
(蘋果日報)
2004年因為拍電影而相戀，2007年被發現二人同居。不過兩人嘅戀情一直保持低調，直到2009年喺頒獎禮上，不避嫌獻上愛的抱抱，令戀情浮面。。。
52歲台灣導演戴立忍，同34歲金馬影后桂綸鎂，傳出二人14年情玩完。桂綸鎂昨日喺台灣出席活動時，一聽到戴立忍嘅名字，只說︰「不方便回答。」再問二人感情狀況？佢只說聲謝謝，隨即走入後台。
昨日下午《台灣蘋果日報》，去過戴立忍同桂綸鎂，於2007年被影到同居嘅深坑住所查看，已經係空屋無人住，打聽隔籬鄰居時，鄰居話︰「他已經搬走兩年以上，此前有在這裡（深坑）看過他。」隨後又表示戴立忍已搬去木柵區︰「好像自己在那邊買房子了。」據了解戴立忍以船為家，已經一段時間，但沒有見過桂綸美嘅蹤影。
戴立忍同桂綸鎂，2004年因為拍電影《經過》而相戀，2007年被台灣《蘋果》發現二人於深坑同居。不過兩人嘅戀情一直保持低調，直到2009年戴立忍憑電影《不能沒有你》奪下金馬獎最佳導演獎，桂綸鎂喺頒獎禮上，不避嫌獻上愛的抱抱，令戀情浮面。
兩人相戀以來，多次傳出分手，2010年戴立忍於七夕被影到同長髮女約會，當時女方去男方屋企，直至第二日一齊出門同遊，當時傳出二人分手消息。不過到2014年除夕，戴立忍被拍到去桂綸鎂豪宅，戴立忍仲喺社交網貼咗張，喺桂綸鎂屋企頂樓拍攝台北101嘅相，當晚二人喺零晨時分，一齊企窗邊睇煙花仲自拍合照，一齊迎2015年。
(蘋果日報)
劉愷威同老婆楊冪結婚4年幾，但近年屢傳兩公婆聚少離多而不時傳出婚變，不過兩公婆都一直否認傳聞，不過剛過去嘅12日，係楊冪嘅32歲生日，以往都會喺微博祝老婆生日快樂兼放閃嘅劉愷威，今年未有表示，搞到又被人揣測佢倆嘅婚姻狀況。
呢兩日大陸網上係咁傳，話劉愷威暗撻富家女Britney，更post出兩人嘅合照，仲貼埋網上對話，指「新歡」影合照呢張當日，就係去探劉愷威班，而爆料人post埋相，指Britney喺7月時已透露劉愷威同楊冪離婚兩年。
嗱，不過爆還爆，睇番呢位被指係新歡「Britney靜」嘅微博，標註自己來自英國，畢業於倫敦大學皇家霍洛威學院，現時從事金融業，而且係老闆級。
佢平日嘅生活，根據微博顯示，除咗不時坐私人飛機周圍去旅行之外，仲好鍾意做gym同搵星集郵。而佢同劉愷威嗰張合照，就已經係舊年10月嘅事，內文則寫住「帥帥的 #劉愷威#」，就咁睇張相真係好難發現佢哋有乜特殊關係，但就睇得出呢位「Britney靜」嘅身材非常突出。
據爆料人指，呢位「Britney靜」，7月時喺微博話過劉愷威已離婚兩年，翻查番，新歡並唔係喺微博回覆，而係出自另一個社交網站，但對話已刪，亦唔見佢同劉愷威合照嘅post，「死無對證」。
(蘋果日報)
結婚通常都會請個攝影師影吓靚相，點知早前為卓韻芝婚禮做姊妹嘅蔡卓妍（阿Sa）就被攝影師影落唔少「罪證」！
原來佢嗰日唔係負責幫手，而係密密食！佢上載幾條片到Instagram留言：「阿芝婚禮其中一個攝影師send咗條片比（畀）我⋯我以為係婚禮making-of⋯點知⋯⋯sorry 食咗你好多嘢。」
片中嘅佢不停咁食，點知有人問佢有冇睇實自己飲食，阿Sa竟然話冇仲話零運動，仲笑言「你睇我塊臉就知啦」真係得天獨厚呀！
不過其實佢唔係冇做嘢㗎，最尾都有幫手做「大會攝影師」幫新人同賓客影相嘅！
而阿芝亦都有喺社交網話有阿Sa就一定唔會餓親，如果肚餓搵阿Sa，佢就會帶佢搵嘢食：「各位親愛的賓客，此女乃本人姊妹，如感飢寒交迫，請向此姊妹討食物，她定必會引領閣下到達有食物的地方，並且將食物分一點給你。有什（甚）麼事，follow the 姊妹！」
(on.cc東網)
藝人姚子羚（Elanie）為無綫新劇《黃金有罪》試造型，她戴上假髮及眼鏡飾演Call台妹，被指似當年的《四葉草》造型，她說：「我會有三個造型，呢個係其中一個，我都要做定功課，冇用過Call機，我一用已經係手機。」Elanie透露稍後會與Edwin及曹永廉到瑞士拍遊旅節目，可以趁機與Edwin培養拍劇的默契，但Edwin就抵死地說：「我同阿廉都好擔心，子羚Dry咗一排，到時冇乜事，我就會嗌唔好，阿廉就嗌停，唔好停！」
野外大解
此外，提到Elanie早前與李施嬅到非洲看動物大遷徙，她稱是人生第一次：「我哋有日等咗五個鐘，等動物過河，河入面全部係鱷魚，等住睇啲動物畀鱷魚食，覺得自己好殘忍，所以最後冇睇，都有睇到動物交配，仲捕捉到呢個景象。我哋又喺大自然去廁所，感覺好正，其實以前拍古裝都試過。（有冇大解放？）大解就有，放低咗啲。」Edwin即時分享其拍攝時在戶外大解的經驗：「嗰次我大解到一半，有個旅行團喺我前面經過，我當時係條條揈。（有冇畀人睇蝕？）我前面有棵大樹遮住，草係遮唔到。」
問到Elanie在非洲有否艷遇時，她坦言有個來自盧旺達的黑人導遊事後有表示想念她們，Edwin笑問子羚是否頂得順？她說：「可以做住朋友先。我哋去到肯雅，導遊有傳短訊話好掛住我哋、又問候我哋，但我哋冇覆佢，但好多謝佢照顧我哋。（接唔接受到外籍人士？）我唔怕『黑』，但唔想要咁大棵樹去遮住。」
(on.cc東網)
歌手吳若希（Jinny）到中學出席有聲書活動，曾在內地生活的她認為用普通話錄有聲書不算難：「我細佬嘅普通話仲好過廣東話，佢有好多懶音，『一二三』變『一二山』。」她不擔心女兒學語言有問題，更自認嚴媽：「不過佢仲細，講hello會變『yoyo』，又成日講BB話，我問佢可唔可以講番中文。（識唔識翻譯BB話？）一啲啲啦，傭人姐姐叻啲。」
試足一個月追B嫌老公「唔勤力」
問到何時再追小朋友？她直言冇咁快，更大爆：「試過唔得！試咗一個月就放棄咗。（咁快？）老公唔勤力都冇計。（投訴？）唔係，我同佢分隔異地，結咗婚同有小朋友之後少咗時間畀對方，有時BB瞓咗就會落街行個圈拍拖。講到自己好老咁，其實我仲係廿幾歲！」
望幫助小朋友同單親家庭
提到曾閱讀陳美齡寫關於探訪第三世界國家的書，Jinny大讚對方探訪經驗豐富：「我有個慈善協會主力幫小朋友同單親家庭，睇佢嘅書令我好想諗多啲方法幫佢哋。我都想去探訪，但唔容易，我個協會冇，要經其他機構。」
(on.cc東網)
龍眼的果肉晶瑩剔透，味道甘甜，不僅好吃，還可入藥。在中醫看來，龍眼可以補心脾、補腦，益氣血，並且能用來做許多可口又治病的藥膳。但吃龍眼的時候，也有一些禁忌需要注意。
龍眼屬無患子科常綠喬木植物龍眼樹的果肉，為果中聖品，性味甘溫，入心、脾經，別名桂圓、燕卵、荔枝奴、馬麗珠、川彈子，因其益脾長智，又名益智，別名之多，可見頗受歡迎。
龍眼的外觀、習性、花與荔枝相似，故又名亞荔枝。新鮮生果稱龍眼；帶殼、帶核曬乾後稱龍眼乾；去殼去核只留果肉，曬乾後稱桂圓，也因龍眼犯忌，避諱而稱桂圓，桂也是廣西的別稱。
白露是吃龍眼的季節，夏秋採收以核小肉厚、味純甘者佳。龍眼可鮮食，或製成罐頭、浸酒、熬膏、作醬、乾肉、入煎湯、入丸劑；將成熟果實乾燥後去殼、核，曬至乾爽不黏；浸酒不必去核，用純糧食酒泡，新鮮龍眼與酒以2：5的比例浸泡。
龍眼能補心脾、益氣血、消除疲勞、養血、安神補腦、長智、補虛、滋營充液、開胃健脾、明目斂汗、壯陽、去濁、除蠱毒、潤膚美容、養血安胎、減輕宮縮、利胎兒發育；可治思慮勞傷心脾、心脾兩虛、氣血雙虧、健忘癡呆、精神失常、神經衰弱、貧血萎黃、腹瀉、腸風下血、產後血虧，也治氣血不足所致健忘、失眠、自汗、盜汗、心悸、怔忡、脾虛水腫、月經過多。《本經》載龍眼：「主五臟邪氣，安志、厭食，久服強魂魄、聰明。」
龍眼營養豐富，龍眼、花、葉、根、核皆可入藥。龍眼葉功能開胃健脾，補虛長智。龍眼含大量鐵、鉀，促血紅蛋白再生，養血力勝紅棗，也含大量有益人體微量元素，甜美可口，不滋膩、不壅氣，為滋補良藥，故有「南桂圓、北人參」之稱。
李時珍說：「食品以荔枝為貴，而資益則龍眼為良。蓋荔枝性熱，而龍眼性和也。」
● 體內有發炎、上火者，以及孕婦不宜多食龍眼。
● 龍眼屬濕熱，潤而膩滯，能助火生濕，多食易氣滯、上火。
● 龍眼甘溫濕潤，外感未清、外邪發熱者（編輯註：外感發燒或感冒沒好的人）忌。
● 龍眼不僅甘甜助火，亦能作痛，內有鬱火、胸悶腹脹、脹滿不飢，食少口膩、咳吐痰濁、痰飲氣滯、痰濕中阻、腎病者忌食。
近視：龍眼肉帶殼不敲碎5枚、枸杞3錢，煮水當茶飲；
白內障：龍眼20枚、枸杞7錢，水煎服。
記憶減退：龍眼15枚、栗10枚、粳米2兩，煮粥。
養心增智力：龍眼30枚、紅棗10枚、粳米3兩，煮粥。
腦神經衰弱致健忘：龍眼肉、胡桃肉各3錢，豬腦一副，燉食。
失眠多夢：龍眼3錢、酸棗仁3錢、五味子1.5錢、紅棗10枚，水煎服。
失眠、健忘、心煩：桂圓5錢、菊花2錢，沸水沖服。
貧血失眠：龍眼2錢、蓮子3錢、白米3兩，煮粥；或睡前食10枚龍眼肉。
心脾血虛失眠：龍眼、茯苓、紅棗各3錢，米3兩，煮粥；或龍眼3錢、桂枝3錢、陳皮2錢、豬心一副，煮湯。
神經衰弱失眠：龍眼肉、核桃肉、酸棗仁、茯神、燈蕊各3錢，以金銀器水煎服，重症加磁石、龍骨、生蠔各5錢，黃連、蓮心各1錢。
安神鎮靜：桂圓2兩、高粱酒600cc，或按此比例浸7天，每服10cc。
熬夜用腦過度：龍眼30枚，水煎服，或煮水當茶飲；或龍眼7錢，沸水沖泡5分鐘。
脫髮：龍眼半斤，飯鍋上蒸，蒸後曬，次日再蒸再曬，連8日，分4～5次服完。
貧血、老年血虛：龍眼7錢、紅棗10枚，隔水燉（編輯註：放碗裡隔著水燉）；或龍眼3錢、連衣花生米5錢，加點鹽煮食。
貧血、神經衰弱：龍眼、紅棗各1兩，煮食；或桂圓、核桃仁各4錢，瘦肉4兩，加薑片、鹽，煮湯。
貧血、臉蒼白：龍眼乾10枚、老薑3片、生薑3片、紅棗5枚，研末，每服2錢。
貧血頭暈脹痛：龍眼30枚，加水煮20分鐘，當茶飲。
心血不足致心悸、脾虛水腫：龍眼5錢、紅棗4枚、糙米3兩，煮粥。早上空腹服，晚上睡前熱食，冷食易致胃脘氣滯脹。
寧心養神：龍眼8枚、蓮子20枚、紅棗10枚、雲耳2錢，煮湯。
補氣血：龍眼3錢、枸杞5錢、蛋2枚，水煎服，可加冰糖。
補元氣：龍眼3錢、紅棗5錢、蓮子3錢，煮湯。
心脾兩虛：單用龍眼1兩煮水，增強藥力，可加紅棗10枚、人參3錢、黃芪5錢、當歸3錢、酸棗仁3錢。
病久體弱、年老衰弱：龍眼1兩，隔水燉，效同人參、黃芪。
氣血不足又陽虛：龍眼適量，泡白酒100天，每天喝50～100cc。
體寒貧血：龍眼、枸杞各3錢，人參2錢或黨參4錢，水煎服。
產婦養血：桂圓3錢、蛋1枚，煮湯。
脾虛洩瀉：桂圓5錢、薑2片，沸水沖泡10分鐘，再加白朮、淮山、苡仁各3錢，水煎服更佳。
老年脾虛腹瀉：龍眼、淮山、蓮子、薏仁各3錢，白米或糯米3兩，煮粥。
便血：龍眼肉3錢、西洋參1錢，隔水蒸。
白帶多清稀如水，伴腰酸：龍眼、蓮子各3錢，糯米2兩，煮粥。
月經不順：龍眼、荔枝、黑棗各1兩，蓮子、枸杞各3錢，入母雞腹內燉食。
經後腹痛：龍眼10枚、酒100cc，水煎服。
更年期症候群：龍眼1兩、蓮子1.5兩，水煎服；或龍眼乾1.5兩、核桃1兩，煮水喝。
補腎壯陽：龍眼7錢、海參1兩、白米3兩，煮粥，可加冰糖。
（大紀元）
