藝人伍詠薇（伍姑娘）最近接受電台錄音問訪，節目中，她透露89年參選亞姐，是因為接受與她年紀相差31年的首任丈夫翁江培提議，之後二人於1990年結婚，但婚後13天，翁江培於陪同她到深圳登台期間心臟病發猝死，當時伍姑娘年僅21歲，她坦言當年年紀太輕，不懂應對措手不及的劇變：「嗰時結咗婚十幾日，丈夫同佢嘅家人同幾位朋友就陪我去登台。嗰時我都未唱完，我先生突然離場，我仲以為佢可能想出去呼吸新鮮空氣、去一下廁所。點知唱完後，屋企人就同我講：『佢突然唔舒服、抖唔到氣，依家去咗醫院。』到達醫院，已經睇到佢喺度進行心臟電擊搶救，之後醫生就同我講：『呢個人已經離開咗。』太突然加上當年太年輕，係唔識反應。

自揭當年受盡委屈

翁江培離世後，外界一直盛傳伍詠薇繼承了亡夫的1億7000萬遺產，伍詠薇否認傳聞之餘，更自揭當中承受不少委屈，形成今天硬淨的性格：「冇呢件事發生過，就係被屈，莫講話一億七千萬，就算我畀屈盜竊，冇做過，我都一定唔會妥協。之後，周圍啲人都變咗編劇，話我剋死佢、『劏豬凳』、話我『有一億七，都唔使出嚟拍戲！』我通通有苦自己知，都唔會同屋企人提傷心事。鍾意我嘅人會覺得我強、我型，但唔鍾意我嘅人會覺得我好討厭。我試過喺街上竟然有唔認識嘅人鬧我八婆，我嗰幾年就係咁樣過。你依家睇我嬉笑怒罵，其實係感謝嗰幾年幫我練出嚟。」

重申「無隻眼開隻眼閉」

今年是伍詠薇跟現任丈夫練海棠相識20年及結婚19周年，二人人前恩愛，但多年來，練海棠曾兩次被指出軌，對上2016年一次，伍姑娘更代為向公眾道歉。

正當人人以為伍姑娘縱容老公，對出軌新聞容忍跨過婚姻危機時，伍姑娘重申：「我無隻眼開隻眼閉！要我『隻眼開隻眼閉』，你會睇得出我係唔舒服嘅。我點解要『隻眼開隻眼閉』？有啲人會死頂，但我唔會！不過，當第一次面對呢啲問題，我第一反應係起晒雞皮。第一次有人畀我睇嗰啲相（老公出軌照）嘅時候，我係會起雞皮。之後，我就要保護自己，回應時要小心一啲，返去跟老公坦白咁傾：『可唔可以繼續走落去？發生咩事？』就算佢呃我，都要講，其實我自己都有責任，嗰個階段我好鍾意拍攝工作，變咗比較少時間陪佢。而最近嗰次出軌嘅報導，我就同佢講：『走唔甩啦！唔係我睇到，係記者發現！』係好心痛、好失望。但丈夫係自己揀嘅，與其諗係唔係一面倒佢錯，倒不如檢討吓自己有冇錯。我呢個人係傻，但我都好均真、好包容，所以我覺得發生呢種事，當中我都有問題。唔係話相唔相信佢，我信呢件事屬真，但件事發生咗，我係要去包容佢、再同佢相處，坦誠溝通後，再睇吓我哋可唔可以再一起走落去。」

(on.cc東網)

今日真係非常熱鬧，36歲陳自瑤(YoYo)同34歲老公王浩信最近傳出婚變消息，敵不過七年之癢。男方對分居傳聞不作回應，女方就不時在ig貼上感性金句，如「最大的放生是放過自己」，令人猜想連篇。

今早王浩信喺YoYo現身前三個鐘，喺instagram貼出一張陽光普照風景相，留言：「無論任何人的關係都是一面鏡，它映照了你的本質，好好感恩你每一天仍然能夠存在，去感受，去活着，去愛，去驗體狂喜，我就感恩今日太陽終於出返嚟。」似暗示雨過天晴。至於陳自瑤ig則未有更新。

今午二時，YoYo準時現身，明顯消瘦，未有戴婚戒，一直保持笑容，但明顯有眼圈，應是睡不好。講到世界盃舉行在即，YoYo話佢支持阿根廷，鼓勵小朋友做運動，自己囡囡鍾意球類運動同有轆運動，好似roller咁。講到父親節方面，YoYo自言思想好傳統，所以會一家人過。
事有湊巧，港台節目《舊日的足跡》王浩信嘅主持車淑梅訪問亦於今日發新聞稿，內容大致都係否認婚變，稱同太太當呢啲新聞係笑話咁睇，又表示不想私生活繼續成為大家茶餘飯後嘅娛樂。問到點去提升夫妻關係？王浩信諗咗一輪後話：「溝通最重要，我哋咩都會拎出嚟傾。喺我得獎之後呢段時間，我有好大嘅啟發，呢段時間亦令我哋溝通多咗，關係越嚟越清晰。」

活動後Yoyo接受訪問，佢話：「多謝大家關心，首先，第一冇提出離婚，第二冇趕老公出門口，第三小朋友都係同我哋一齊住。」否認分居。

係咪樓上樓下住？佢話：「佢有個地方係做office，喺屋企樓上樓下。」買樓事件搞成咁？佢話：「我知嘅。（係咪冇寫你名？）送畀父母係應該嘅。（有話送層樓畀你？）我相信佢做到。」

有冇搵師傅指點婚姻？佢話：「因為做節目先問到，係好正常嘅事，唔係一個大問題。（師傅話係返到香港有搵佢？）我冇問過，唔知中間有冇誤會。」做咩唔戴婚戒？佢話：「平時都冇戴，怕整唔見，好少會戴。」

訪問期間，陳自瑤講咗五次或以上稱「近日所有報道係失實」，但扔拒用「恩愛」形容夫妻關係，只係話「老夫老妻」，又指對上一次對方做令佢感動嘅事係上年八月生日。陳自瑤又否認消瘦，話係著衫技巧。

至於ig上嘅感性文字，陳自瑤表示只係有感而發，並非暗示夫妻關係有變，又指傳媒斷章取義，未有顧及前文後理。講到話少放兩公婆合照，陳稱一向都少，更反問係咪如果佢少咗擺同女兒合照，是否就代表母女關係有問題呢？

(蘋果日報/on.cc東網)

36歲陳自瑤(YoYo)同34歲老公王浩信最近傳出婚變消息，敵不過七年之癢。傳出係主動提出離婚嘅YoYo今日下午兩點會現身馬鞍山一個活動，親身為離婚事件解畫，而王浩信就選擇喺老婆現身前三個鐘，喺instagram貼出一張陽光普照風景相，留言：「無論任何人的關係都是一面鏡，它映照了你的本質，好好感恩你每一天仍然能夠存在，去感受，去活着，去愛，去驗體狂喜，我就感恩今日太陽終於出返嚟。」

而噚日王浩信亦喺ig貼出陪囡囡做功課嘅相片，一個好爸爸模樣，o依家又話太陽終於出返嚟，究竟係雨過天青，定係等老婆親身公告「重大」消息，一次過交代所有是非呢！回帶講番，今次爆出婚變，起因唔係同女星嘅緋聞，而係王浩信事先張揚要買獨立屋俾老婆，點知轉頭購入清水灣傲瀧高層單位送俾媽咪，事前老婆YoYo更毫不知情，張張「空頭支票」，主動提出離婚。

之後日日有新發展，王浩信稱近年信基督教，開始學識放下，明白要活在當下，接受好同壞嘅情況，強調婚姻關係冇改變，認為婚姻係會有困境，要學習同汲取教訓，但翌日就有報道指，王浩信同陳自瑤處於分居階段，女兒靖喬升小學後，就交由王浩信爸媽照顧。對此王浩信稱：「唔回應啦，多謝大家關心!」

(蘋果日報)