【郭富城分享話係雙喜臨門】傳城嫂方媛懷第二胎

2018-09-05

劉德華51歲得千金（計番出生月份呢，確切嚟講華仔係50歲做爸爸）

黎明都係51歲做爸爸，餅印B女上周已如演唱會上向歌迷許下嘅承諾，貼上fb同大家開心share。

至於郭富城，咁啱都係51歲做爸爸，囡囡Chantelle剛喺迪士尼慶祝1歲生日。

張學友就最早結婚都係最早做爸爸，同女兒年紀相差最近，不過教女方法都令學友好頭痛…

不過，《蘋果》收到消息，「四大外父」之一郭富城，好快又做爸爸喎！

下個月就53歲嘅佢，囡囡剛好1歲，又成功令老婆Moka（方媛）懷孕喇。

有傳媒收到消息稱，城城喺囡囡嘅生日派對上，同好友分享話「雙喜臨門」！

城城疼鍚囡囡Chantelle，但其實佢都好鍾意囝囝。既然第一胎生女，自然就想努力追番個仔啦。

25歲嘅城城，仲未定性，對做爸爸興趣不大；依家52嵗喇，想法唔同咗，越嚟越喜歡小朋友，身邊友人亦子女成群，令城城更加心急，近50歲左右，已經計劃要急起直追，搵啱對象就馬上結婚生仔，努力造人，等郭媽媽弄孫為樂；依家Moka先至31歲，城城亦抱持開放態度，欣迎天賜的禮物。

為咗達成心願，亦唔想同子女年紀相差太遠，自然「勤力」得多，配合不設防措施，所以囡囡啱啱一歲，已經準備迎接第二個小生命喇！

(apple daily)

【仔仔同爸爸一樣咁…】梁小冰：煮完餐飯已經背好我要記三日嘅台詞

2018-09-05

貝安琪（Ankie）、梁小冰同趙式芝等，噚晚喺演藝學院欣賞音樂劇《Beyond the Barricade》，小冰同老公陳嘉輝、囝囝一家三口到場，但老公同個仔堅持唔影相，提到老公好多劇拍，小冰話：「佢入咗無綫5年，不斷有劇出，奈何我冇乜睇，反而小朋友就好捧daddy場，個仔先至係佢嘅忠實fans，佢演技好，我唔使睇都ok啦。」相反，嘉輝之前就睇晒小冰有份演嘅《導火新聞線》，仲讚佢演得「衰」。

小冰冇睇晒老公嘅演出，但原來佢又好仰慕老公，佢話：「佢有對台詞過目不忘嘅特異功能，我服咗佢，我要用3日時間先可以記到，佢真係好勁！喺屋企會朗讀台詞，18年前同佢合作演《梁山伯與祝英台》，啲對白超多，但係佢超快已經記到，佢可以用我煮一餐飯嘅時間，記晒幾頁台詞，我就要用3日。」

小冰仲話囝囝遺傳嘉煇嘅「特異功能」，默書成績好好，佢話：「佢默書好高分，老公負責個仔嘅所有科目補習，最近喺facebook見到好多家長因為開學，搞到失眠，我就冇太擔心，全權交畀老公，學校冇名次，所以都冇咁大壓力，暑假我哋就去咗幾次旅行放鬆。阿仔一動一靜，佢升六年班，鋼琴準備考八級，係遺傳咗daddy，另外一樣就係跳舞，佢跳hip hop，呢個就係遺傳咗我，不過亦都有遺傳咗我有少懶，鍾意瞓晏覺同埋玩到癲。」

(蘋果日報)

【全部搞錯晒】周勵淇一臉驚訝︰要好好解釋一下

2018-09-05

剛剛度過39歲生日嘅周勵淇（Niki），同家人、朋友及Fans先後開生日party慶祝。

姐姐周汶錡同妹妹慶祝生日

唔少得好朋友阿Sa

個蛋糕好靚呀！

過完生日週之後，呢兩日佢已經投入工作，飛咗去北京。而佢有份演出嘅新劇《再創世紀》，上月底已經喺大陸嘅央視電視劇頻道CCTV-8及愛奇藝率先播緊。

相信大陸觀眾對佢並唔陌生，點知……

最近Niki喺社交網貼咗張相，相中嘅佢身處入住嘅酒店房內，佢面前係開咗機嘅電視機畫面，而佢一臉驚訝，擘大口瞪大雙眼，原來電視機畫面嘅歡迎詞寫住︰「尊敬的周麗淇先生」，所以Niki都忍唔住留言︰「先生？要好好解釋一下了。」唔少網友睇到紛紛留言︰「你變咗性」、「周生咁靚女」。

本身係女人嘅Niki，幾時變咗男人？其次係佢最近嘅中文名都改咗，叫周勵淇而唔係周麗淇，估唔到北京咁大嘅城市，呢間唔知幾多星嘅酒店，連客人性別、名字都全部搞錯，認真抵打。

（ig/ apple daily）

【網民大讚超可愛】Chantelle同一般小女孩唔一樣…

2018-09-05

郭富城日前在迪士尼為寶貝囡Chantelle慶祝1歲生日，小公主出世至今，被親親爸爸嚴密保護，城城從來冇在社交網晒囡囡正面相。

今早老婆方媛解禁，在Ig晒囡囡彈琴仔嘅短片，小公主低着頭彈琴仔，繼承天王爸爸音樂天份，只依稀見到Chantelle嘅清秀嘅眉毛、高高鼻仔同白雪雪嘅面珠，超可愛！

城嫂方媛一副驕傲口吻留言：「好認真彈琴的樣子」網民都紛讚：「好棒！要學爸爸的狂野之城呀！」「好可愛啊！小公主」由於短片只得幾秒，但都見到Chantelle彈琴嘅手仔肥嘟嘟，雖然係城城嘅小公主，但就沒有好似普通小女孩留長頭髮，反而剪了短髮到，頭頂夾了一個蝴蝶夾仔，而短片內還見到有架車仔，似乎Chantelle性格活潑好動，似老竇咁鍾意玩車車多過玩公仔。

去年4月城城同方媛結婚，同年9月22日喺社交網宣告生女，貼一家三口手牽手相，並寫道：「開心、微妙、感恩！我們三人！成長、家庭、守護！」反而城嫂就忍唔住，在母親節於微博晒抱囡背影相，唔知幾時城城會貼囡囡正相靚相呢！

（蘋果日報）

【結婚七周年陸永有驚喜】點知老婆就…

2018-09-05

藝人陸永同太太Reina一向非常恩愛，平時都經常出雙入對，不過呢日嚟到二人結婚7周年嘅紀念日，陸永一早準備咗一大紮紅玫瑰打算氹老婆。

點知Reina竟然寧願瞓覺都唔理老公，唔通佢哋鬧咗交？其實係因為Reina全日冇停過！

身為好老公嘅陸永當然冇怪佢，仲喺社交網寫上愛的宣言多謝老婆：「今朝一早佢車個女返學，跟住接放學，再車第二個女返學，再接放學，再車返屋企煮晚飯畀佢哋食……我收工返嚟，佢已經攰到瞓死咗了，辛苦你了。結婚七周年快樂，我愛你。」

嘩！Sweet到呢…Reina今朝瞓醒起身後都覺得好冧，佢晒相兼留言：「陪我一齊早起湊女，陪我一齊食早餐，陪我hea住打機等女放學，就算冇花我都覺得好浪漫…#所有時候精力已畀兩個女耗盡　#慶唔慶祝已經唔重要　#瞓飽緊要　#七週（周）年快樂　#904＠6wing_fama」

(on.cc東網)

【17年後的今天】前港姐長大後才明白媽媽每次狠心「Cut線」的苦心

2018-09-05

前港姐這一在社交網感觸發長文，指9月4日是她人生中好重要的日子，原來是因為17年前的這一天就是她離開家人，到英國留學寄宿的大日子。

她分別上載17年前後同屋企人合照嘅對比圖，並留言憶述留學的種種往事和心事。她指自己當時非常不捨得家人，日日哭著打電話給媽媽要求回到香港，而媽媽每次都狠下心腸「Cut線」，為的就是令她盡快學懂獨立。

前港姐許芷熒（Whitney，前名：許亦妮）又提到小時候經常誤解媽媽，直到長大後才明白媽媽的苦心。

Whitney並向媽媽送上感謝：「以前想不通為什麼媽媽要對我這般嚴厲。小時候更想不通為什麼我年紀那樣小，父母就把我帶到英國一個人生活讀書。今天回想起來，才明白媽媽是用心良苦！真的要對媽媽說一聲，多謝。」

前港姐許芷熒（Whitney，前名：許亦妮）

(ig / on.cc)

【原來同港姐早有淵源】朱千雪：覺得好凝重

2018-09-05

原來她與港姐早有淵源：「當時有一班佳麗同一班小朋友，依家見到呢班小朋友，都希望20年後會有人同我講番『當年係朱千雪拖我出嚟』！」

前港姐季軍朱千雪早前出席big big channel活動，她透露與小朋友拍攝而戴起后冠，問到有多久未戴過？她說：「選完之後冇戴過后冠。（戴番有咩感覺？）戴番覺得自己好後生，一戴起就覺得好凝重，因為係一件幾多錢都唔會賣嘅寶物。」

今次千雪與一班Little Miss Hong Kong合作，原來她與港姐早有淵源：「其實我1995年曾經做過Little Miss Hong Kong，有機會同當屆港姐一齊亮相，當時有一班佳麗同一班小朋友，依家見到呢班小朋友，都希望20年後會有人同我講番『當年係朱千雪拖我出嚟』！」

(on.cc東網)

【想帶埋去畀爸爸睇】恭喜哂超蓮~

2018-09-05

超蓮話爸爸仲未知道呢個喜訊，因為佢想帶埋去畀佢睇，而問到媽媽三太陳婉珍滿唔滿意，超蓮就話。。。

賭王何鴻燊千金何超蓮早排幫屋企人打理一間澳洲嘅酒店，仲好威水咁得獎，噚晚佢喺尖沙嘴攞獎，超蓮當然盛裝出席，連耳環都係媽咪幫佢揀，超蓮仲話呢個獎項係國際性獎項，又指呢間佢打理嘅酒店就好似佢嘅BB咁。

問到媽媽三太陳婉珍對超蓮嘅成績滿唔滿意，超蓮就話：「係媽咪嘅成績，我交功課咋，我係攞咗媽咪嘅感覺去經營，成間酒店以白色為主。」超蓮話o依家唔使成日去澳洲，大約3個月就會飛過去一次，而每星期都會用電話開會。

問到爸爸知道佢得獎未，超蓮就話未知，因為想攞住個獎去畀佢睇。

超蓮就話o依家除咗呢間酒店同自己嘅牛肉麵生意，都冇乜點做其他嘢，同埋超蓮想搞慈善，之後仲想搞埋甜品生意，因為自己好鍾意食，到時自己應該會落場。不過就因為成日都要食，所以都要keep住減肥。

(蘋果日報)

【岑杏賢按讚好】黃心穎被咒：祝福你同馬國明分手

2018-09-05

落選港姐工藤佑采被指黑面hea跳引來負評，師姐黃心穎指佢態度差，但就引來工藤佑采喺網上「爆seed」開火反擊，掀起罵戰！

點知「一波未平一波又起」，日前黃心穎喺社交網上載咗一張日落相。

其後更有網民留意到港姐岑杏賢都有讚好呢則留言，即引起大批網民討論！

雖然事後岑杏賢對該留言嘅讚好已被刪走，但早就畀其中一位以工藤佑采照片做頭像嘅用戶截圖，並轉發兼留言：「『祝福你同馬國明分手』留言，岑杏賢Jennifer都按LIKE，好嘢，證明TVB同事都想你地散，你不信可以睇吓，個留言已經有一百多個人讚，你形象插水啦。」

岑杏賢接受訪問時表示：「我真係錯手唔小心撳咗一啲唔知咩嘅Post，好在有個網民同我講呢件事，我即刻打畀心穎同佢講唔好意思，好在本身同佢都好熟，佢都冇誤會呢件事。自己事後Unlike番呢個comment。」
岑杏賢和黃心穎同為港姐出身（左一及左二）（資料圖片）

(on.cc)

【新婚心情有轉變】鄭嘉穎語出驚人：要承受番個後果，自己揀啦！

2018-09-04

藝人鄭嘉穎出席電影慶功宴，講到昨日與一眾《鐵馬尋橋》的兄弟姊妹補食生日飯，他表示難得可以齊腳，又指一年都會起碼有六次飯聚，問到為何不見太太陳凱琳（Grace），是否未痊愈？他說：「佢有嘢做去唔到。（咁佢好番未？）感冒咗幾日好快好。（係咪新婚蜜月冇幫佢冚被？）唔答呢啲！」

講到Grace於港姐決賽當晚擔任「最上鏡小姐」評判，回家後可有再討論？嘉穎說：「冇再傾，但佢做完騷有講話佢啲心水都中咗。」追問有否討論「黑面事件」？他即話：「黑面黑得過我？黑面我出名㗎啦！仲有人黑過我？（但你出鏡上台唔黑面嘛。）唔係㗎喎！睇心情㗎喎，有咩話出唔出鏡㗎？黑就黑㗎啦！」果然語出驚人！

講到落選港姐工藤佑采被人話Hea跳舞唔專業，他就表示對事情唔了解，所以不作回應，但都有講一番勉勵說話：「做番自己性格唔係唔得，但要人哋清楚你唔係一朝一夕，要時間，要好連貫，唔好周時變，一時黑面一時又笑，要連貫番你個人先真實，好似我廿幾年都係咁，觀眾就接受咗。」剛新婚心情有轉變？他重申都是睇心情：「如果你要做呢樣嘢，就要承受番個後果，自己揀啦！（太太有冇話你黑面？）咁我又唔會對佢黑面，都係對啲唔鍾意嘅人先黑面。」

(on.cc)