佢笑指囝囝個樣好老積：「好似10幾歲咁，佢唔驚鏡頭o架，頭先舞獅都唔驚。」問到囝囝開始講嘢未？佢就話囝囝有疑似叫daddy，不過最鍾意係講「掟掟」：「好似講粗口咁，哈。」
藝人張達倫帶同太太及囝囝碩碩出席活動，快將一歲的碩碩面對鏡頭冇有怕，還不時望向鏡頭，精靈非常。問到會否讓囝囝拍廣告？張達倫笑謂：「都冇人搵，但其實我都唔介意，拍劇就唔好啦，廣告就OK。」
已剛從內地返港的他，透露與無綫已轉成藝員合約，故此行主要與內地製作單位見面，期望日後多點機會合作：「因為我想賺多啲，要搵奶粉錢。（香港演員去內地工作又有新政策？ ）我唔係主持，所以冇乜大影響。」
(蘋果日報/on.cc東網)
楊怡、張慧儀同莊思敏今日以代言人身份，喺尖沙嘴為李霖恩太太有份投資嘅醫學美容中心擔任開幕嘉賓。
楊怡噚晚喺社交平台貼咗憤怒鳥嘅圖片，指有傳媒闖入佢屋企門口偷影，佢今日講番嘅時候：「我係有啲震驚同嬲，係有啲侵犯咗私隱，我認得佢亦都影低咗，希望下次唔好再係咁啦。」
問到佢屋企最近有咩咁吸引傳媒追蹤拍攝？楊怡笑言：「雖然我哋係藝人，但喺屋企都好free，係有着衫嘅，不過都好隨意，有着衫唔代表係着晚裝㗎嘛，都係造成好大困擾。（阿謙有咩反應？）佢冇反應，淨係叫我息怒！」因為老公羅仲謙忙住開工唔得閒理，淨係叫佢息怒。講返今次為醫學美容中心代言，楊怡話好開心，仲高呼：「我要收緊呀！要由頭做到腳，仲想帶埋媽咪同老公嚟。我老公成日話要保持青春，貪靚呢樣嘢，千祈唔好睇小我身邊嗰個。」佢仲笑言做咗療程，下次被偷影嘅時候都可以保持V面。
張慧儀表示早前同李霖恩合作，所以今日要親身嚟支持：「最近都忙喺國內工作，拍廣告同一啲剪綵嘅活動，九月尾就會畀自己休息一下，因為囝囝10月就會做手術，希望畀多啲時間陪住佢。」佢坦言囝囝要接受手術有啲心痛，自己近日都可以因為壓力而變得忟憎：「囝囝係happy child，佢上次入院檢查都係麻醉咗，佢仲同我講瞓醒就做完，反而問返我心情。」張慧儀又話最近加入咗兒童心臟基金會，成為正式執行委員：「因為個仔，基金會幫咗我好多，自己亦都想回饋返社會，嚟緊都會幫手推廣下。」
(蘋果日報)
藝人呂慧儀現身《愛．回家之開心速遞》之「中秋人月慶團圓」，她表示中秋正日要開工，明天會提早與家人慶中秋：
「上星期經過賣燈籠嘅舖頭，老闆送咗個玩具畀囝囝，我又唔好意思，所以買咗兩個燈籠。以前屋企中秋會燒烤，但有咗囝囝後就冇，因為怕危險。
（係咪唔畀囝囝玩蠟燭？）唔得，除咗生日之外，唔會畀佢接觸蠟燭。佢今年四歲幾，未知咩係危險。如果佢要玩，我當然係決絕咁拒絕佢。所有危險嘢都要同囝囝保持距離。好似老公嘅啞鈴，囝囝好大力可以雙手捧起，我怕會責親佢同傷到手，所以我收得好埋。老公做運動，佢就喺側邊做啲唔合格嘅掌上壓。」
至於今年拉埋天窗的李健偉(左)在台上被爆將於10月結婚。
(on.cc東網)
31歲大台力捧小生張振朗自今年4月宣佈與拍拖3年嘅陳芷尤分手後，緋聞就冇停過。繼胡定欣之後，最近又被指睇中余香凝個妹、《美女廚房》學徒余潔滢（Zoe），話佢哋喺船P拍節目當日，張振朗雙眼冇離開過Zoe，仲被影到一手攬住女方，而Zoe亦好受落，一啲都冇抗拒。
張振朗今日回覆傳媒一口否認與Zoe過電，佢好決絕咁話：「我連佢電話同ig都冇，所以冇可能。」點解咁多緋聞？佢話：「係囉，都唔知點解…不過我真係冇時間去諗拍拖呢樣嘢，日日都要開工，想俾心機做好手頭上嘅工作，好難得先有o依家喺工作上嘅機會。」
男人以事業為重都好易理解，事實上，張振朗近年真係一劇接一劇，密密拍冇停手。但就勁在仲有時間操爆肌，佢噚日喺ig貼上一張隱約見到有六嚿腹肌嘅型仔相，話係由蔡思貝親自操刀，留言：「勁就唔係好勁，喺短時間內我盡咗力，下次我會再勤力啲。」張振朗再補充：「其實由拍《牛下女高音》就開始操，之後拍《包青天再起風雲》傷手冇操一排，之前要日日開劇都冇時間，有時收工到凌晨兩、三點操，過程好辛苦，但都堅持到，仲搵埋教練幫手。」
而咁啱，喺張振朗口中「冇可能」成為女友嘅Zoe，近日亦同好友尹倩君 (小小)一齊去台灣旅行。小小幫Zoe影咗輯喺浴缸嘅性感相，小背心加短褲，唔少網民睇完都話好索。
(蘋果日報)
月頭炒車入院8日冇人知，相當慘情，之後佢仲似有輕微嘅創傷後遺症，自爆坐車有陰影，更驚到流眼淚一直流……事隔差不多三個星期，依家情緒穩定咗好多嘅傅穎（Theresa），今日就係佢34歲正日生日，前一晚佢同親友慶生之餘，仲做咗第一次嘅物理治療添。
佢喺社交網上載咗幾張相，相中見佢又收花又切蛋糕，睇嚟佢都好開心。另外佢又甫咗去做物理治療嘅相，見佢趴喺床度接受唔同儀器嘅治療，佢仲自爆車禍後頸椎骨仲積住好多瘀血，真係慘豬：「『生活需要儀式感』，給我送花的朋友對我說。謝謝美純～
車禍後頸椎骨還積着許多瘀血，今天是第一天做物理治療～
這幾天不間斷的跟家人和朋友們吃生日飯，沒控制住，蛋糕沒吃剩的，足足重了1kg～
無論多少歲，我心裡還是住着一個少女，不同的是，現在這少女活得更快樂了，謝謝各位的祝福～麼麼噠😘💋💋💋」
唔少網友都留言祝福佢快啲好番，唔好再咁黑仔遇意外。
(on.cc東網)
結婚已經4年的內地藝人楊冪與劉愷威，其女兒小糯米現4歲，不過二人卻多次傳出離婚，由於他倆並沒有就此事回應過，故二人的互動一直受外間關注。
加上最近有網友爆料指兩人已離婚兩年，而這位爆料女子更在社交平台甫出與劉愷威的合照，指是她去探男方班時拍下的。（相關新聞：https://goo.gl/1St4WL)
有指這名女子是金融從業員，在其平台不時晒自己的奢華生活，如坐私人飛機，和與明星的合照，包括：張榕容、張藝謀、林書豪、易建聯、陳奕迅和郭富城。
對於以上說法，劉愷威內地工作室人員回覆東網稱：「愷威並不認識這位女士，這照片是在拍戲時，片方領導帶這位女士來現場，說希望合影，愷威禮貌配合而己，二人無任何交集。我們不知道她為甚麼要在社交媒體上說這種不負責的話，但我們確認的時候，發現她已經將相關評論刪除了，大概是心虛吧。」
楊冪忙工作，同劉愷威聚少離多。
(on.cc東網)
張衞健（Dicky）同太太張茜自2009年結婚至今，二人度過9個年頭仍然恩愛如初，Dicky不時都會喺社交網站同太太大曬恩愛。
最近張衞健接受網台訪問，大談當年與歐陽德勛一起入行、一起有共同理想的往事，笑指二人如同親兄弟。
Dicky亦提到與太太張茜的生活點滴，表示當夫婦二人意見不合時，自己會一直忍，待太太發完脾氣後，才把事情化解，更謂：「因為一鬧交就冇得瞓，好似夜晚11點嘈，就起碼到凌晨3點都冇得瞓。」
他提到其母親，表示有一晚食飯，飯桌上有鵝肝加麵包菜式，即使大夥兒也知油份相當高，惟他竟「整蠱」母親謂，叫她吃下滿布油份的鵝肝麵包，自己則齋吃鵝肝，結果被友人阻止，他解釋謂：「其實係阿媽唔食鵝肝，當晚呢樣嘢係頭盤，我驚佢肚餓先咁做。」
(on.cc東網)
宣佈離婚後，有網民就留言指覺得個小朋友好慘，佢前妻就於Instagram回應：「生孩子，我一次都冇後悔過，亦唔覺得丟臉。咩都唔知道嘅人，就話我兒子好可憐。」
韓國男團U-KISS嘅24歲前成員東浩，2015年時11月宣佈跟年長一歲嘅圈外女友奉子成婚，前年5月東浩榮升做爸爸，之後不時喺網上公開一家三口照晒幸福。
不過噚日東浩就被爆已於上月離婚，兒子歸前妻撫養。東浩噚日承認離婚消息，表示前妻於結婚期間吃咗唔少苦，二人對孩子都感到抱歉。
東浩宣佈離婚後，有網民就留言指覺得個小朋友好慘，東浩嘅前妻就於Instagram回應：「生孩子，我一次都冇後悔過，亦唔覺得丟臉。咩都唔知道嘅人，就話我兒子好可憐。」
東浩前妻表示佢對囝囝感到抱歉，唔理發生咩事，都會令兒子幸福，對於網上嘅惡意留言，佢就表示：「如果有人欺負我囝囝，我唔會坐視不理。」
(蘋果日報)
台灣天王周杰倫老婆昆凌一向係廿四孝媽媽，佢近日就連飛到米蘭出席時裝周活動，都一樣「仔不離身」，帶埋一歲囝囝「小小周」去。呢日，佢喺社交網晒出一張抱住囝囝喺名勝古蹟前影嘅靚相，並留言：「難得我們兩個約會！」
相中見小小周着上黑白背心，影相時仲要唔望鏡頭，反而對住遠方擺chok爆表情，真係有爸爸嘅影子。
雖然佢黐實媽媽，不過當佢見到有另一位小妹妹經過嘅時候，就立即賣甩媽媽過去撩女仔，難怪昆凌都忍唔住留言：「怎麼把你放下之後就去找妹妹。」
(on.cc東網)
港姐出身的無綫花旦朱晨麗30歲出頭，外貌標致，裙下之臣當然多，入行7年來緋聞不少，上至神秘富豪、官二代，下至藝人李日朗、黃子恆、何廣沛等，認真精彩！然而朱朱的愛情路上，並非外間認為般順利，相反一個「忙」字成為其死穴，完全抹殺她對感情的付出，絕對是女神唔易做。
半夜開工 舊愛懷疑
身為公司的力捧對象，朱朱當然視事業為先，不過，她對每段感情均百分百付出、真心經營，惟最後卻只能宣告死亡，她接受東網專訪時說：「之前朋友介紹嘗試同一個圈外人發展，但我太忙，佢唔明白我嘅工作性質，淨係知我成日半夜喺出面開工，唔聽電話同短訊，令佢有懷疑，就算我講事實出嚟都唔明，最後梗係分開，都唔係拍咗好耐。（咁何廣沛又點？）佢幾好，向事業發展緊，我希望可以同佢喺戲入面再續前緣。（伸延戲外？）都幾好，有上進心，靚仔同後生，愛唔愛真係唔知，識咗咁耐，依家係好兄弟囉！將來嘅嘢唔知，唔敢講得太實。」
自言追求簡單浪漫，笑指一支玫瑰花足已令她爆喊，相當貼地，可惜歷任男友統統沒出這招，反而多送奇特禮物，試過收家具甚至平價手鏈：「收過兩蚊雞嘅手鏈，佢仲講話喺街邊小販檔買，覺得好得意，我仲要扮好鍾意，其實平時我好少戴飾物，但佢要我出活動都要戴，不過我尊重佢，愛一個人會全心投入，但甩拖後就冇戴。」愛情果然令人盲目！
盼40歲前生仔
這位男友經濟有困難，朱朱沒有離棄他，在金錢與愛情之間，她選擇了愛情，甚至願意倒貼生活費：「試過好多次都要我幫，心諗我人工低過佢，點解我都可以幫？因為平時我唔出街，最大開支都只係交通。（點解幾次都可以接受？）唔知，愛情囉！（接受男仔經濟能力低？）依家就要慢慢諗，呢個世代獨立可以，但唔可以低過我，或者要我幫佢囉！不過我對婚姻都有憧憬，希望可以組織家庭生小朋友，但唔好太遲，40歲高齡產婦好危險，依家好好向前衝，但我要先解決時間呢樣嘢，覺得係需要放時間畀另一半，因為某程度上，陪伴唔係用錢嚟衡量。」
提起朱朱自爆收過前男友所送的兩蚊手鏈，並佩戴出席活動，何廣沛接受訪問時否認是由他所送，並好奇反問：「完全冇聽過有兩蚊嘅手鏈，咁平唔係啩？出手咁『高』，我都係第一次聽，好想知係乜一回事，點解咁平！」
問到是否覺得朱朱是好女仔？Matthew即刻大讚說：「當然係，係個好女仔、好同事。（佢係咪好貼地？）我有同佢一齊食過飯，都係食得好正常，唔會食貴嘢，佢唔係拜金嘅人。我唔係一個有錢嘅人，咁佢都揀我做朋友，可以證明佢好貼地。」
而另一位緋聞男友黃子恆也認為朱朱是事業型女性：「佢投資畫廊又開酒吧，唔係一個一心想做少奶奶嘅人，我好欣賞呢啲女仔，佢有能力去發展自己嘅事業，而唔係只會將重心放喺家庭。」
(on.cc東網)
