婚後兩年已經斷斷續續傳出過兩人離婚嘅消息，但兩位當事人都係否認。不過，最近收到消息，佢兩公婆確實係搞緊離婚，據知情者稱，其實佢哋已分居兩年幾。。。

現年43歲、敢愛敢恨兼性格很爽朗嘅周迅，2014年嫁美籍華裔演員高聖遠後，婚後兩年已經斷斷續續傳出過兩人離婚嘅消息，但兩位當事人都係否認。

不過，《蘋果》最近收到消息，佢兩公婆確實係搞緊離婚，因為佢哋喺杭州領證，所以要搵日去當地簽番紙先可以完成離婚手續。據知情者稱，其實佢哋已分居兩年幾，高聖遠依家都係住台灣同美國兩邊，好少留喺大陸，兩個人都知文化唔同，溝通有問題，所以已經同意辦離婚，只待適合時機，方正式向外公布。知情者稱，高聖遠已經有自己打算，佢喺台灣生活了一段時間，識咗好多朋友，所以不愁寂寞，其中有個靚仔洋人同佢都好夾，大家都玩得好埋，經常會相約一起飲酒。

至於留喺大陸發展嘅周迅，一樣唔使愁，因為近年佢同王菲囡囡竇靖童嘅忘年之交，關係真係仲親過屋企人，有時童童都會喺周迅屋企過夜，反而唔返媽咪王菲屋企瞓。所以想像到佢哋感情有幾好。其實2013年周迅戀上高聖遠時，隔年就話要結婚，有朋友已經擔心會唔會太衝動，畢竟一個長居美國，一個長居大陸，一個係講英文，一個講普通話，溝通已經係一個問題，唔好講其他生活習慣同唔同啦！

不過當時沉醉愛河嘅周迅點會理呢啲勸阻，結果婚後呢啲問題就浮現晒出嚟，佢哋兩個都有努力去嘗試去遷就對方，但發現真係唔得，男方兩年前就提出不如分居俾大家諗清楚可唔可以再喺埋一齊，到咗上年高聖遠就直接提出不如簽紙離婚，但周迅一直未諗好，所以始終未肯去辦手續離婚。

直至佢同童童「姊妹感情」越嚟越好，開心同唔開心嘅時候都可以有童童同佢分享，好似今年頭過農曆新年，原本應該係由佢老公高聖遠陪佢返鄉下探父母，結果老公冇影，反而係童童捱義氣，陪佢返老家陪兩老過年。如果周迅想放假去旅行，只要童童有時間，都會陪佢去，周迅開始發現冇咗老公喺身邊嘅日子一樣過得去，所以最近終於諗通，肯下定決心搞離婚啦！

蘋果今日問周迅嘅經理人徐時芬，周迅同老公高聖遠係咪搞緊離婚？而高聖遠喺台灣係咪有新對象？佢答：「我在開會，這個事情我不太清楚。」再問佢周迅同童童係乜關係？佢依然係話：「我在開會。」

周迅傳出同老公高聖遠搞緊離婚手續嘅消息，雖然就嚟回復單身，不過周迅唔愁寂寞，皆因佢有位細22年嘅「好姊妹」，現年21歲嘅竇靖童陪出陪入，唔少網民都好好奇佢哋年紀相差咁遠竟然可以做到閨蜜，但係講到奇，點都唔夠佢同童童阿媽王菲之間咁「有緣」。

周迅同王菲均貴為天后級藝人，不過一個喺影視圈，一個喺音樂界，理論上係冇乜交疊，將佢哋拉埋一齊全因一個「情」字。90年代周迅喺一個音樂節入面認識咗竇唯嘅堂弟竇鵬，佢哋就係咁樣開始拍拖。

期間王菲就同竇唯拍拖，96年佢哋奉子成婚仲生咗童童，之後周迅同王菲先後與竇氏男兒分開。

2003年套《射鵰英雄傳》劇集，周迅演黃蓉，郭靖則由李亞鵬飾演，佢哋日久生情撻着咗，但係當時李亞鵬已經有同為演員嘅女友瞿穎，最後李亞鵬放棄咗瞿穎揀咗同周迅一齊，到佢哋公開晒關係，正當大家都以為佢哋會行入教堂時，中途突然殺出個王菲，上一次佢哋前後腳睇中咗一對堂兄弟，今次佢哋直頭揀咗同一個男人李亞鵬，「劇情」嘅發展同之前瞿穎一樣，舊人周迅輸咗畀新人王菲，王菲同李亞鵬喺2015年仲結埋婚。

雖然結咗婚，但係佢哋都唔可以走到白頭，王菲與李亞鵬喺2013年離婚，而喺同一年，周迅突然傳出同王菲拍過拖嘅謝霆鋒秘密拍拖一年，仲話佢哋已經喺香港住埋同一幢大廈，雖然呢個傳聞最後不了了之，隔咗冇耐，王菲傳出同謝霆鋒再次翻撻嘅消息，喺2014年影到謝霆鋒喺王菲屋企嘅相，終於證實咗佢哋復合。

兜兜轉轉，周迅與王菲因一個情字處於敵對位置多年，但係周迅竟然可以同「敵人」個女竇靖童做到好姊妹，上述嘅「橋段」仲勁過電視劇集，唔知周迅同王菲會唔會都好似啲劇集咁，最終因為童童嘅關係，握握手做埋好朋友呢？

(蘋果日報/on.cc東網)