【開心回應傳媒】余德丞媽媽終於開心返

2018-08-12

藝人余德丞（Dickson）日前踢波突然暈倒昏迷入院，現仍在深切治療房（ICU）觀察，但已初步甦醒。今早雖然天氣不穩，但余媽媽仍風雨無改地前往醫院探兒子，手上還拿着一杯熱飲。

早上約11：50，她在2位親友陪伴下再次到達病房門外，背上背囊的她，還帶來了2個環保袋。問到兒子情況係咪好番好多？她沒有回答。再問到醫院有冇通知Dickson幾時可以轉病房？她則擰擰頭，然後匆匆進入了病房。

到了13：20，余媽媽和友人離開ICU。期間提到李希雯為日前來探病時，提到公開談Dickson病情，並為自己失言公開道歉，余媽媽只是點頭未有回應。到余媽媽走到電梯口，記者再追問Dickson情況OK嗎？余媽媽開心說：「可以傾到偈！多謝關心。（咁食到嘢未？）可以呀！」之後便轉身離開。

隨後，余媽媽向傳媒發出聲明：「每日到醫院探望兒子，見記者朋友日夜守侯，十分辛苦。真的非常多謝傳媒朋友對Dickson的關心，Dickson雖仍在深切治療部，但已可以與家人溝通和認到晒所有家人。」她又指他們一家都非常感恩，因此希望Dickson一天比一天進步，慢慢進步穩定，可以調離深切治療部，但康復期仍有一段漫長的道路，多謝大家關心，又指如有更好的消息，一定會再告訴大家。

(on.cc)

【Long D發展神速】鄧麗欣男友王子笑住答：生2個剛好

2018-08-12

鄧麗欣（Stephy）同台灣前偶像組合Lollipop成員邱勝翊（王子）去完泰國旅行，又被人見到同機去台灣，等咗差唔多個幾月先終於認拍拖。

王子之後又嚟到香港陪Stephy，為女友付出嘅時間一啲都唔少；而Stephy就將ig follow嘅人一次過清洗，只係留低男友王子、慈善機構點滴是生命同佢嘅歌迷會呢三個follow。

呢段姊弟戀愛得熾熱，王子噚日接受《台灣蘋果日報》專訪，講到Long D，佢話一定要做得足呢幾樣嘢：「信任很重要，也蠻常報備，了解對方的行程，但忙碌時也會給對方空間。」

嚟緊星期五（17日）係七夕，即係中國情人節，Stephy日前其實已經跟過王子去花蓮玩，但王子噚日出活動時就話呢次旅行唔係慶祝七夕，咁係咪正日再慶祝呢？王子喺訪問中話當日有工作在身，會提前慶祝，但就冇講係Stephy留喺台灣慶祝，定兩人再次旅行慶祝。王子又話自己美術唔叻，唔敢整DIY卡示愛，因為驚俾Stephy扣分。

訪問入面，王子講到同係Lollipop成員嘅弟弟邱宇辰，佢話細個時成日爭玩具，但大咗一齊承擔壓力，好珍惜兄弟情。記者亦都追問，如果結婚會生幾多個BB，王子就笑住答：「2個剛好。」

（apple daily）

【網民紛紛留言慰問】葉佩雯：Good Bye… #iloveyou

2018-08-12

「佢之前半邊面癱咗，要搵神經料醫生，都好頭痕，佢個嘴下垂影響到隻眼合唔埋瞓覺，有光眼症同眼潰瘍，幫佢做咗手術。」

葉佩雯（Grace）上載合相，並留言：「Good Bye NaNa」，佢加上「nana囡囡」及「iloveyou」嘅hashtag。唔少網民知道Grace一向視愛犬為兒女，網民紛紛留言慰問佢。

早前與歌手吳日言（Yan）一齊出席寵物店開幕活動，Yan表示喜歡細隻狗仔，當時笑指Grace愛犬Nana肥嘟嘟好重。
Grace解釋愛犬並不是食太多東西而肥，而是吃類固醇藥引致腫脹及經常肚餓：「佢之前半邊面癱咗，要搵神經料醫生，都好頭痕，佢個嘴下垂影響到隻眼合唔埋瞓覺，有光眼症同眼潰瘍，幫佢做咗手術。」

音樂人郭偉亮（Eric Kwok）同太太Grace一向來都係愛狗之人，不時喺社交網上載愛犬Nana嘅相片同網民分享。

最近Grace喺網上晒出為Nana洗白白嘅相，但係尋晚就收到Nana離世嘅不幸消息！
Nana一路好走！

(on.cc)

【陳凱琳爸爸給鄭嘉穎100分】傳收無銀碼支票禮金

2018-08-12

鄭嘉穎與拍拖3年的陳凱琳（Grace）今日於峇里結婚，附近的龍目島在個多星期內經歷三次地震，更一度發出海嘯警告，婚禮一度考慮改到布吉舉行，由於新娘子Grace情傾峇里，廿四孝老公嘉穎寧願加大保險，無懼天災如常出發，坐擁15億身家的陳爸爸接受訪問時，給嘉穎這個準女婿100分滿分！

48歲的鄭嘉穎與27歲的陳凱琳（Grace）的「父女戀」曾不被睇好，雙方年紀、家境都有一段距離，相戀三年終修成正果，今日（8月12日）於峇里舉行婚禮，這個婚禮得來不易，驚險重重，以「搵命搏」來形容都絕不誇張！

貴為「視帝」的嘉穎，早年憑劇集《步步驚心》成功打入大陸市場，為娶老婆以2,300萬購入何文田的豪宅作為婚後的愛巢，雙方家長商討禮金時，陳父只說隨意就可以，為表示誠意，嘉穎奉上一張無填銀碼的支票，浪漫又豪氣。
對於未來女婿，陳父表示會給對方100分，事關嘉穎對女兒很好，又很尊敬他們，至於對女婿的忠告，陳父笑言屆時會發表，更坦言去年年尾已經知道他們會結婚，禮金方面交由太太去傾，自己心情普通，都可以，平常心，最後問到陳父看着女兒出嫁會不會流下男兒淚？陳父說：「我不是這樣眼淺。」

（singtao）

【怪風最新消息】天文台考慮在下午及今晚…

2018-08-12

一號戒備信號現正生效，表示有一熱帶氣旋在香港約800公里內，可能影響本港。

今早(12日)在廣東西部沿海一帶徘徊的熱帶低氣壓，至早上9時45分，天文台指該熱帶低氣壓的路徑較為飄忽，今早採取較偏東的路徑移動，稍為靠近珠江口一帶。

該低氣壓於昨日(11日)中午登陸陽江市後未有進一步消散，反而返回南海重整，天文台更預測該熱帶低氣壓將「返轉頭」向東移向近珠江口，周一(13日)凌晨增強為熱帶風暴，並於周二(14日)於香港西南約200公里掠過。

在上午9時45分，位於南海北部的熱帶低氣壓集結在香港之西南約260公里，預料移動緩慢，在廣東西部沿海一帶徘徊，香港今日間中會有大驟雨及狂風。

在今早5時15分一度發出黃色暴雨警告，於6時45分取消。上午9時氣溫為27度，相對濕度94%，過去1小時京士柏錄得的平均紫外線指數是1，強度屬於低，雷暴警告現正生效。預測香港今日多雲，間中有狂風驟雨及幾陣雷暴，雨勢有時頗大，日間氣溫徘徊在27度左右，吹和緩至清勁東至東南風，離岸及高地間中吹強風，展望未來一兩日仍有驟雨及雷暴。

天文台會視乎香港風力的變化，在下午及今晚考慮是否改發三號強風信號。

(singtao)

【想乘機再造人？】陳豪：會向老婆補數

2018-08-12

上個月，陳茵媺（Aimee）一拖三返加探親及帶仔女去放暑假，獲網民大讚「Super Mum」，陳豪大嘆「空虛」。
眨吓眼，暑假已經過咗一半，今晚Aimee再度一拖三由多倫多返港，原定喺晚上7點着陸嘅航班，延遲咗40分鐘先到埗，而一早喺機場等候嘅「Mo爸」陳豪，就一早喺機場等候，期間有唔少途人認出佢，更有人要求合照同selfie，陳豪都有求必應。

陳豪受訪時話老婆冇助手嘅陪同下，去咗一個月：「去當地佢哋要適應時差好耐，自己係湊仔公，佢哋唔喺度感覺好無聊，不過因為啱啱有新劇，所以趁佢哋唔喺度好好準備自己，好彩聽日開工，今日可以接佢哋，因為自己唔想錯過接送佢哋嘅時間。」陳豪仲話，自己不時同仔女靠視像溝通，又會陪佢哋食早餐。

提到暑假仲未完，問陳豪仲會唔會同啲仔女去玩，陳豪話：「返嚟又要適應番時差，又要準備開學，計劃緊一個family trip（家庭旅行）但要同大仔度時間，唔可以去太長途。（係咪聖誕節？）會plan短途啲，亦會向老婆補數，同老婆二人世界，去番旅行。」

問到佢係咪想乘機再造人？陳豪即時紅都面晒，笑言記者：「你曳曳！二人世界啫…」講到生多啲熱鬧啲，陳豪話：「o依家屋企已經好熱鬧。」

當Aimee同仔女一出嚟，陳豪即刻趁前同老婆咀嘴，之後逐一錫3名子女。

影大合照時，陳豪大仔陳梓燁（Aiden）略見怕醜，匿喺爹哋身後，二仔陳浩鋒（Nathan）唔見哥哥，就企圖喺BB車起車搵哥哥。至於最淡定嘅係只得兩歲大嘅細女陳凱婷（Camilla），一直淡淡定坐喺BB車，任影唔嬲。

Aimee話：「今次係有啲攰嘅，因為佢哋有少少扭計。」提到陳豪話離開咗佢好空虛，Aimee話：「其實我哋都好掛住佢，佢都好掛住我哋，今次飛咗4星期。」問到小朋友有冇掛住爹哋，Aimee話：「其實嗰邊有公公婆婆，仲有幾個姨婆、契婆，佢哋成日都出街，有戶外活動，好多新鮮嘅嘢好開心，但成日都會講miss Daddy。」Aimee又話，已經pack晒啲行李返嚟，所以出閘唔會好多嘢，盡量輕便啲，佢仲話今次比較多手信，仲有陳豪啲咖啡。

（apple daily）

【雙喜臨門】準新郎黃德斌心情靚爆：係呀！多謝大家關心

2018-08-12

昨日下午佢哋就去到圓方嘅Grand Cinema謝票，呢一場全院滿座，觀眾完場後見到德斌同Jennifer都非常驚喜，連聲鼓掌，佢哋仲現場抽出三位觀眾交流，最後更有女觀眾主動大聲恭喜德斌，搞到即將結婚嘅德斌鬼咁開心。

黃德斌、吳鎮宇同余香凝（Jennifer）等主演嘅勵志電影《逆流大叔》贏盡口碑票房，上映兩星期，本周票房竟比上映首周上升，雖然今日一號風球又曝雨，但冇阻主角德斌、Jennifer同陳詠燊導演等興緻，「颱風式」連走6場謝票。

票房報捷，加上已入紙申請註冊結婚。

對德斌嚟講真係雙喜臨門，佢話：「係呀！多謝大家關心。」問到婚期，德斌就話唔講住：「依家搞緊，我乜嘢都唔講，係因為另一半唔係圈內人，亦都唔係話突然就結，大家成日問我，我都話隨時可以，我哋都係簡單同啲親戚朋友食飯。」

未婚妻Joyce (資料圖片)

而Jennifer就話已經恭喜咗德斌，佢仲話自己好貪心，希望票房達千萬，可以夾埋德斌嘅喜事一齊大搞慶功。

一眾演員都話期待開續集，導演笑言下一部叫《逆流大嫂》，德斌都話想原班人馬拍續集，就算再辛苦都冇所謂，仲話可以做大嫂背後嘅男人。陳詠燊導演就話：「係唔係拍大嫂就需要大家嘅支持，呢一部係為香港觀眾拍嘅電影，外人會睇唔明，希望大家支持香港電影，認識新演員。」

(apple daily)

【攝影師大有來頭】鄭嘉穎陳凱琳唯美婚照曝光！

2018-08-12

將於周三正式踏入49歲的鄭嘉穎，今日在峇里娶年輕他22年、13年港姐冠軍陳凱琳（Grace）。二人拍劇《殭》撻著，不過由於年紀相差大，加上家境懸殊，Grace的父親坐擁10多億資產，戀情一開始不被看好，但二人拍拖3年終於修成正果，今日將會在當地Bulgari Resort Bali酒店舉行婚禮。

雖然近日峇里發生多次地震，一對準新人未有動搖更改婚禮場地，並日前已率先出發作籌備工作，而Grace父母前日亦開心出發。

昨日，一對準新人今日先在峇里BVLGARI酒店海邊拍攝婚照，場地在懸崖邊，無敵海景一覽無遺，期間見一對新人都表現得很輕鬆，因為他們都沒有特定的動作，攝影師任由二人自己發揮，嘉穎與Grace興之所至，更在泳池旁邊跳起舞來，場面浪漫。

當中一對新人頭黐頭煙韌甜到爆。相中，Grace穿上象白超性感婚紗，大露背側身開衩剪裁，攬實嘉穎，而嘉穎就攬住未婚妻纖腰，情深樣錫面……

而一張就在酒店室內，嘉穎攬住Grace，而Grace就錫他的鼻尖，十分調皮~

最後一張就是Grace半身拎花球，新娘子更帶了兩款合共約50萬元的Bulgari鑽石耳環，4張相都構圖唯美。

據知，休息過後，嘉穎將於早上接新娘，再與Grace向雙方父母斟茶，至下午二時婚禮於酒店教堂正式開始，與現場約80名賓客分享喜悅，其後就是切蛋糕及影合照環節。而新娘子將會穿上著名婚紗設計師Noel Chu的作品出嫁。

另外，Grace原來早於4月時已到過峉里BVLGARI酒店視察場地，並拍下一張歎甜品的素顏照打卡，心情靚爆，看來當地已決定在此地搞婚禮。

此外，較早前一對新人發放的婚照充滿美感又夠Sweet，原來是由準人夫鄭嘉穎的攝影師表妹王賢詠操刀，賢詠曾舉行攝影展，難怪照片相當高質。

表妹王賢詠 (資料圖片)

(綜合報道 / apple daily / on.cc)

【搞B女百日宴請客？】黎明繼續好低調

2018-08-11

天王黎明又出關！他的好友雷頌德日前在社交網分享合照，以英語留言笑指雙方已有一段時間冇見面，但友誼及對方的靚仔樣依然冇變，唯一變的就是自己的體形。

由於背景似是在包廂食晚飯，有網民笑言是否今年四月底榮升父親的黎明為B女搞小型百日宴，更讚他為首席型爸，但同時有網民指合照非近日所拍，因雷頌德太太梁家玉上月初分享和黎明的合照，背景也相似！

有女萬事足的黎明行蹤低調，自B女出生後只出席公開活動一次，而他在本月底將在東莞開騷獻唱。

(on.cc東網)

【羨慕陳凱琳搵到Mr.Right 】李佳芯：男友唔好搞咁多

2018-08-11

李佳芯（Ali）同連詩雅（Shiga）今日喺尖沙嘴出席「Sailor Moon月光傳說」幻影時光派對。

李佳芯同連詩雅喺現場同fans玩遊戲，獲男fans跪地「求婚」兼講愛的宣言，又同fans跳舞整嘢食，Ali嘅fans話好愛佢，仲話想同佢生番個BB，Ali冧爆，仲話男友唔會向佢講呢啲說話，覺得fans好有誠意，好開心咁話，問到男友如果講呢翻說話向佢求婚，會唔會打動到即刻應承？Ali話：「對男友係另一回事，男友唔好搞咁多，我人生夠豐富，感情唔需要。」

但Ali對求婚呢回事都有要求，佢話：「起碼要畀我知佢求婚，乜嘢都唔使，因為我怕我招架唔住，正常生活簡單啲好。」Ali仲話生活裏嘅浪漫好重要，就算兩個人坐低靜靜打機已覺足夠，提到陳凱琳結婚，Ali就話：「好開心，咁快搵到Mr Right，睇吓我有冇咁嘅福氣，希望唔好太遲，但係依家好多工作，結婚需要時間，連兩星期假期都好奢侈，唔想咁倉卒，希望有生之年可以結婚。」

提到曾經合作過《誇世代》嘅余德丞昏迷已初步甦醒，Ali話：「好鼓舞，我擔心足咁耐，佢係happy boy，好擔心呀！我為佢做啲嘢，為咗鼓勵佢食素，希望佢大步檻過。」

另外，Shiga係美少女戰士迷，自己仲儲咗好多Sailor Moon嘅物品，連戰衣都保存住，提到有男fans跪地向佢「求婚」，仲叫Shiga照顧佢一生一世，Shiga覺得好搞笑，仲話好刻骨銘心，問佢如果男友要佢養一世能夠接受嗎？Shiga就話：「心態好重要，如果佢唔係唔想為家庭付出，只係有困難，我一定擔當照顧頭家。」

(蘋果日報)