歌手何雁詩（阿詩）三年前加盟星夢娛樂，本來受公司力棒，隨着她與鄭俊弘公開戀情後，兩人不但遭公司打壓，阿詩更飽受粉絲攻擊，過去一年她更被公司「雪藏」，歌唱事業叫停。有傳她為保男友事業，拒絕同星夢續約。
東網就此事聯絡阿詩，她坦言：「之前公司同我傾過續約，但我哋本身仲有約㗎。（傳公司力捧新人戴祖儀取替你？）佢係今年新人，我係好耐冇出新歌，唱歌活動係少咗嘅，啲粉絲都成日問我，不過我搞緊新歌㗎喇，我都好心急出歌。」
雖然承認好耐冇出歌，不過就冇講自己願唔願意續約。
(on.cc東網)
【同Aimee餅印咁】小公主超萌搶哂鏡！
陳茵媺（Aimee）日前帶同三個仔女返加拿大放暑假，雖然一拖三外遊都幾吃力，但Aimee仍然應付到，難怪連老公陳豪也讚Aimee是「Super媽咪」。
今午Aimee在社交平台，上載仔女在加國的玩樂片段，三兄妹玩得好開心，玩水槍﹑玩車車﹑在地板上畫畫﹑跟媽咪逛超市等，節目好豈富，兩歲女兒Camilla十分可愛，跟媽咪Aimee好似樣，絕對是「餅印母女」。
Aimee笑言全靠咖啡，令她成功克服時差，她有感而發表示，見到三個仔女玩得高興，令她憶起自己的童年。
(明報)
【箍住陳展鵬】單文柔靠呢樣！？
搖身一變視帝女友嘅單文柔（Phoebe），喺2016年選港姐前，其實都係一個靚妹仔，塊面仲有啲脹卜卜，仲梳住個冬菇頭！
到佢參選時，相比其他佳麗，佢已經叫做微胖，不過憑住「鄰家女孩」形象唔只贏得網民歡心，仲成功俘虜埋陳展鵬！
經過選美「洗禮」嘅佢，學識扮靚示人，仲搣甩肥肉，雖然主持過兒童節目《Think Big天地》、《Big Big小明星》等，但始終未能上位，不過喺最新嘅《美女廚房》中，做美女學徒脫胎換骨，晒出長腿相當煞食，令人眼前一亮，少少甜卜卜脆，搞到大家暈佗佗！
雖然廚藝麻麻留唔住展鵬個胃，但使出「鉸剪腳」一樣箍住男友！
佢為人相當低調，除咗選港姐着過比堅尼，「性感」幾乎絕迹，佢喺社交網分享嘅生活照都係「普通貨仔」，貫徹其「鄰家女孩」形象，乖巧又清純！
(on.cc東網)
【去法國追多個女？】周汶錡留細仔喺香港
名模周汶錡以性感打扮出席護膚品牌活動，她透露近日忙於執行李，將會一家三口前往法國。
「今晚飛法國，只係帶大仔去，細仔留喺香港畀媽咪照顧，我帶兩個搞唔掂。（去探親？）係呀，去探爺爺同郊遊，阿仔好開心，佢仲記得上年去法國嘅嘢，去踩單車。（到時同老公又乘機追個女？ ）好忙，唔得閒。」
問細仔會否唔開心？她說：「佢唔會，咁細個仲未識，不過老公就好唔捨得細仔，仲問可唔可以縮短啲日子，我話唔得，因為追飛機位好煩。」
(on.cc東網)
【甘比同仔女都在場…】大劉超嬲大鬧：積你個福！
今日《蘋果》報道指，有讀者爆相爆片，指前日華人置業老闆劉鑾雄(大劉)，於銅鑼灣希慎廣場，因事同一位路過少女發生爭執，引嚟途人圍觀。而《蘋果》今日亦向大劉了解事件，但係大劉就未有回應，但據知短裙少女真係掛住玩手機時，不慎撞到大劉嘅仔女，所以先觸動到大劉，令佢破口大罵短裙少女。
事件發生於前日，即星期三下午五時多，讀者傅先生指離遠見到大劉與保鑣一行數人行入商場，當佢搭手電梯上1樓時，已聽到有人嘈交，去到2樓時，就發現原來係大劉正與人嘈交，當時身邊仲有佢太太甘比及其仔女秀樺同仲學。有指大劉本打算轉身離開，然而被罵嘅短裙少女卻說：「你唔敢呀？」仲叫佢「積福」，令到大劉十分生氣說：「積你個福！積你老母！佢（子女）受傷係咪你賠呀？」少女辯稱︰「我睇緊㗎！」大劉再爆一句︰「你掛住睇你嘅（手）機呀！」
雖然大劉戴住口罩，拎住枴杖，但依然中氣十足，仲睩大對眼，睇得出佢非常嬲，而甘比就全程都企喺大劉同少女中間，安撫丈夫，但似乎唔多成功。呢個時候，救星到喇，一位相信是大劉同甘比嘅囡囡秀樺，行埋大劉身邊，叫咗聲「爸爸」，原本怒火街頭嘅大劉，火氣即刻下降，轉身走人。短裙少女表現無奈兼擰晒頭，途人忍唔住話︰「有錢大晒！」傅先生估計，短裙少女喺搭扶手電梯時，掛住玩手機而阻住大劉一家嘅去路，仲撞到佢一對仔女，令一向愛子女心切嘅大劉扯火鬧人。不過傅先生認為，無論件事誰對誰錯，大劉係富豪兼名人，公然同途人嘈交始終有失身份，「幾十歲人同個女仔嘈，好心就收吓火啦」。
富豪與短裙少女街頭罵戰，即時引起網上熱話，有網民覺得有錢唔係大晒，但亦有網民認為「任何一個父親都可能鬧，點解佢鬧就係有錢人大曬(晒)？宜家唔通你冇佢有錢都大曬(晒)，做錯事唔認仲要話番人轉頭「有錢大曬(晒)」！大劉呢個人我唔鍾意，但呢件事佢無錯喎。」亦有網民覺得港人邊行邊玩手機，已成習慣，應要檢討。
(蘋果日報)
【相反鄭俊弘就…】何雁詩心灰意冷
2015年簽約星夢，本來備受公司力捧，但自從與Fred撻着後，兩人的事業、形象即毀於一旦，由於Fred被揭。。。
藝人何雁詩去年跟鄭俊弘（Fred）戀上後，「聲」途大受影響，一直盛傳遭星夢娛樂「冷待」的她，已經超過一年沒有新歌，長期坐冷板櫈令她意興闌珊。早前唱片公司跟阿詩傾續約事宜，有傳她不忿公司過去的打壓，遲遲未肯答應續簽新約，加上眼見男友的事業漸漸有回起色，寧願自我犧牲，最近更重拾高爾夫球夢，似為將來約滿後轉型鋪路。
感心灰意冷
阿詩2015年簽約星夢，本來備受公司力捧，但自從與Fred撻着後，兩人的事業、形象即毀於一旦，由於Fred被揭一腳踏兩船，背後有個富貴未婚妻，阿詩慘成第三者，最終兩人瞞住公司，公然手拖手在機場高調公開戀情，令公司震怒將兩人「雪藏」。
而早年自爆有抑鬱症及患過厭食症的阿詩，因飽受四方八面的攻擊，盛傳她抑鬱復發，更試過醉酒割脈自殺入院，左手縫了七、八針，至今仍留有疤痕。
兩人因戀情受壓，但Fred慶幸一直獲星夢老闆何哲圖疼錫，很快過完冷河後復工，反而阿詩的工作量大減，正播放的劇集《天命》也是去年初接拍。唱歌方面幾乎全面叫停，相對同公司的吳若希、菊梓喬等，劇集歌曲一首接一首，連樂壇新人戴祖儀也有新歌推出，阿詩眼見苦等多時始終未輪到自己，難免心灰意冷；劇集方面也只獲分派演出《牛下女高音》，但只屬女配角，故去年底她重操故業，今年初在「香港業餘高爾夫球女子賽」贏得冠軍，並取得「香港女子高爾夫球公開賽」資格，重燃高爾夫球夢。
健身操上癮
有意轉型的她看來操上癮，日前見她驅車往旺角一間健身中心，狂操三小時才離開。
另一日見她在西貢出現，似乎又去操練，非常勤力。
(on.cc東網)
【王子秘密來港「見家長」】Stephy留言…
現年34歲的女星鄧麗欣日前認愛，承認和29歲、台灣前棒棒堂成員邱勝翊（王子）發展姐弟戀後，王子趁近日冇工作在身，於星期一由台北來港和女友短聚，期間更乘機「見家長」！
杜汶澤於晚上在社交網上載跟王子的合照，相中阿澤不但搭着王子膊頭兼直豎拇指，他留言：「我鍾意！」
雖然鄧麗欣未有同框，不過和王子齊齊畀Like，王子留言回應：「我都鍾意你！」而鄧麗欣也搞笑的留言：「在這裡（裏）表白嗎你們！」
鄧麗欣憑阿澤執導的電影《空手道》初嘗影后滋味，當然視阿澤為恩師，故也趁王子來港時，順道給阿澤過目，有網民更打趣留言：「見『家長』喎！」、「有外父見女婿feel喎！」期間有網民則留言：「我覺得方力申好！」阿澤則回應：「咁你仲唔快啲嫁畀佢！」
(on.cc東網)
【竟然仲有驚喜！】陳榮峻吳香倫幸福滿瀉
62歲嘅陳榮峻同58歲嘅吳香倫，於本月10日喺堅道天主教堂舉行婚禮，黃昏戀修成正果，當晚好多圈中朋友亦有出席二人嘅婚宴，場面熱鬧。
陳榮峻同太太結婚時向傳媒透露，話佢哋將會到地中海度蜜月，原來佢哋已經出發咗去過甜蜜嘅二人世界喇！
連日來佢哋兩公婆齊齊喺社交網到貼出度蜜月嘅相，意大利西南部，參觀拿坡里龐貝古城、意大利哥倫布故居，又到西西里島及馬耳他，其後更展開郵輪之旅，陳榮峻留言話：「在意大利熱那亞GENOA 參觀完哥倫布故居，正式登上郵輪，展開郵輪之旅，船公司特意送上香檳及生果，祝賀我倆蜜月之旅」。度蜜月已經夠哂甜，估唔到仲有驚喜收～能夠同至愛周遊列國，真係隔住個Mon都感受到佢哋佢sweet呀！
(蘋果日報)
【除咗鍾嘉欣】李亞男仲同大緊肚嘅佢超老友~
有人講過人生其中一樣最開心嘅事就係可以同好朋友一齊大肚，難怪近日先宣布懷孕嘅李亞男咁開心！事關佢嘅兩個好朋友鍾嘉欣同宋熙年都一樣大緊肚，繼日前同嘉欣頂肚合照之外，亞男呢日再上載同宋熙年嘅合照，留言話：「與我的好朋友一起體驗母性，總是充滿喜悅和歡笑，愛你。」
相中嘅佢哋一臉幸福，仲互相摸對方個肚，又一齊飲果汁。
而宋熙年亦上載合照，佢留言話：「孕婦應該有權做任何事，只能放鬆一下，為自己的大肚子感到驕傲！」
真係完全Feel到佢哋嘅喜悅之情！
(on.cc東網)
【大碼B仔用手掩面似足陶大宇】晒超聲波相：佢好串
B仔喺肚裏面用手掩住半邊面，擺出陶大宇式omg表情，認真搞笑，網民都留言：「冇眼睇，好q」、「陶大宇」、「由個肚可愛到長大」。。。
28歲林芊妤（Coffee）與銀行高層老公翟志奉子成婚，兩人嘅愛情結晶品將於10月尾出世，Coffee在社交網晒B囝超聲波相，留言：「Oh my god!!今日醫生話我好叻，因為無咩點肥到，但個b竟然係大碼BB，長在胎兒不長肉，令我聽完最開心既係，知道肚腩仔健健康康。」
B仔喺Coffee肚裏面用手掩住半邊面，擺出陶大宇式omg表情，認真搞笑，網民都留言：「冇眼睇，好q」、「陶大宇」，由於B囝嘅超聲波相太得意，Coffee都有回覆網民留言，有網民話：「bb唔畀你睇佢個表情」，準媽媽Coffee答：「係呀，佢好串」，有網民就話：「由個肚可愛到長大」，Coffee則答：「哈哈，男生不用太可愛，聰明就好。」、「佢似爸爸一樣怕醜」。
而身為瑜伽導師嘅Coffee，大肚以來長胎唔長肉，現懷有6個月身孕，體重56kg，比懷孕前只係重咗8kg，真係羨慕死好多大肚婆。
由於係大碼BB，《蘋果》問Coffee有冇計劃順產？佢在電話回覆：「我想順產呀，不過好多因素，都未必係我話事，應該係BB話事，睇佢生唔生性呀，因為醫生話佢胎盤有少少低，可能阻到佢出嚟，有機會要開刀，不過胎盤都有機會返上去，所以如果可以，我都想順產嘅。」
(蘋果日報)