30歲藝人張名雅出席無綫劇集《BB來了》宣傳活動，宣布懷上第二胎，目前已懷孕四個月，兩年抱兩，相當幸福，手腳纖幼的她未見凸肚，名雅的老公Joe亦有前來支持。
她直言今次是意外懷孕，她說：「其實我都好鍾意小朋友，依家仔仔一歲三個月，都有諗住生多個，但係冇諗住咁快，知道有BB之後好開心，係天賜嘅禮物，嚟緊12月就生，同仔仔年紀相近！」
被問到可會影響工作？她表示還好，目前未有劇在身，加上家人、傭人都有幫忙，自己取得平衡。至於可有特別不適，她表示初初懷孕時會作嘔作悶，冇胃口，目前小食多餐，談到她身形沒有太大改變，她說：「做產檢醫生都話我冇重過，但係BB正常 今次去磅重就有重咗啦！（老公唔放心過嚟睇住你？）唔係，因為落雨，咁佢車我過嚟，有陣時佢都會陪我開工！」
(on.cc東網)
選港姐出身，雖然三甲不入但備受無綫力捧，拍劇拍足幾十年嘅佢當年係花旦嚟添。網民都讚佢如果喺係呢個年代，佢一定係「仙氣女神」！
無綫熱播劇《BB來了》大受歡迎，主角李佳芯演技更獲大讚，但其實佢「阿媽」陳秀珠仲好戲，而佢個樣都冇咩點變，Keep得勁好！
皆因凌晨重播1999年套《刑事偵緝檔案IV》，都見到佢蹤影，佢飾演宣萱表姨，兩個角色已經隔咗廿年喇！
年屆59嘅佢選港姐出身，雖然三甲不入但備受無綫力捧，仲係《體育世界》第一代主持人！拍劇拍足幾十年嘅佢當年係花旦嚟添，依家就做綠葉，經常都飾演媽媽角色，潑辣又得溫柔又得，網民都讚佢如果喺係呢個年代，佢一定係「仙氣女神」！
雖然有人話臉有癦唔好，不過佢就冇脫到，粒銷魂癦仲係佢標誌添！
不過佢就未攞過任何獎項，網民都戥佢可惜，覺得佢係滄海遺「珠」呀！
(on.cc東網)
電台節目主持人梁泰來請得歌手鄧健泓（Patrick）任嘉賓，曾試過一日賣一萬六千張專輯的他，在節目中稱在事業上做了錯的決定，導致在事業上多年陷低潮，後悔當初走紅時太幼稚，沒顧及宣傳人員的感受：「當年第一次上《勁歌金曲》，我帶當時嘅另一半Marsha（原子鏸）去分享我嘅喜悅，宣傳人員成哥話『可不可以唔帶佢去錄影廠？好似唔係咁好。』當時冇諗佢出發點為我好，冇諗佢係想外界注意我首歌，都冇諗過呢個想法係為我將來着想。嗰時我只係諗『點解？我就係鍾意帶佢進入錄影廠！』事後諗唔到新聞焦點放喺我同我我另一半身上，呢個係唔成熟。」
Patrick被指成為了陳志雲的「愛將」，他強調不是有經濟困難，想所有機會是靠自己而非別人：「因為我需要生活，所以我就返去TVB，好感激陳生畀好多工作機會我，將我生活重回正軌。但因為咁我似唔係自己創造機會嘅人，惹嚟好多是非，我真係沒權去選擇。」在節目中亦多次因感激大家姐經濟上的支持而哽咽。
(on.cc東網)
佢接受周刊訪問，決定專心做人妻，承認為咗家庭同生B，而下定決心離開TVB，月初約滿之後，決定唔再續約，不過佢就強調。。。
31歲林夏薇大前年下嫁有米老公莫贊生(Jason)，雖然老公貴為多間上市公司董事，絕對可以過住少奶奶生活，但呢位人妻依然醉心幕前工作，登台又拍劇，根本無停過，不過終於…終於都要停落嚟喇！
今日有周刊報道，林夏薇決定專心做人妻，準備調理身體為莫家湊個家庭成員，所以月初已經同大台講拜拜啦！林夏薇之前接受訪問時講過，因為連續幾部劇咁啱都撞咗要喺啲大時大節開工，搞到無機會陪老公過節，自己已經好內疚，加上早排撞車整親條頸同手臂麻痺，令到老公好擔心，所以決心休息養傷，咁就順理成章，調理身體，跟住全力「造人」。
林夏薇接受周刊訪問，承認為咗家庭同生B，而下定決心離開TVB，月初約滿之後，決定唔再續約，不過佢就強調同TVB關係依然良好，特別感激自己嘅伯樂曾勵珍，一直以嚟對佢愛護有嘉。
(蘋果日報)
台灣女星伊能靜自從生咗囡囡「小米粒」之後，大幅減少幕前工作，專心留喺屋企照顧囡囡。
呢日佢發現囡囡不知不覺間長大咗，高度甚至去到自己身高嘅一半，突然有感而發，喺社交網發長文抒發感受，佢提到：「孩子成長、父母老去是自然現象，更是每個人的必經之路，我們不但會老，還一定會死亡，不生病，器官也會消耗而漸熄。」
雖然佢明白生老病死係必經階段，不過為咗佢愛以及愛佢嘅人，一定會好好保持身體健康，佢表示：「我本來不怕老，但我現在怕了，因為我知道愛我的人會難捨。」
(on.cc東網)
藝人胡諾言（Jack）同太太陳琪一向恩愛，近日佢哋一家五口齊齊去咗新加坡，Jack就上載一張全家大合照，仲勁冧咁話：「約10年前哩（嚟）到呢個地方只得我同佢…今日再嚟已經係五個人…景點依舊，動物冇變，雖然人數變，但係情不變…多謝後面四隻嘢帶畀我哋美好嘅回憶…@chan_kei_june #唔係賣廣告時間」
「愛妻號」嘅真情告白好閃呀，相信太太睇完一定甜入心！網民紛紛留言大讚佢哋好溫馨、係幸福的一家，仲有人祝佢哋喺新加坡玩得開心添。
(on.cc東網)
35歲苟芸慧（苟姑娘）將喺十月同賽車手男友陸漢洋結婚，雖然婚禮仲有約3個月，但喺7月11日時，男友為苟姑娘慶祝最後一個單身生日，嗰次女神已經「我的名字，你的姓氏」做「陸太」，原來仲有埋「BB」添。
嗰日陸漢洋由早到晚為未婚妻炮製生日驚喜，先送咗一個苟姑娘好鍾意嘅篋上門，篋上面印有「Mrs CKL」，即係苟姑娘英文名Christine Kuo，加埋男友個陸姓氏Lok，當女友揭開禮物時，仲大叫：「嘩，陸太呀！」苟姑娘點會唔冧到患糖尿病呢？
而生日「甜品」陸續有來，喺晚上佢哋過二人世界，除例牌嘅浪漫燭光晚餐外，仲有「甜心生日蛋糕」，原來個粉藍色棉花糖蛋糕內有「玄機」，「糕短情長」皆因陸漢洋曾講過覺得女友係「佢嘅棉花糖」、「棉花糖」代言「豬豬」同「BB」，代表屬豬同皮膚似BB嘅苟姑娘，呢個唔識講嘢嘅蛋糕就暗示咗男友嘅千言萬語。
而苟姑娘係虔誠基督教徒，佢想喺婚前同男友上婚前輔導班，初時男友覺得唔太需要，但女友好鬼堅持，男友又唔捨得逆女友意而屈服咗，另外二人雖然好鍾意細路，但苟姑娘婚後想過二人世界先，佢自己又想喺事業再衝刺，覺得可能有一日自己比男友仲「疊水」，所以放聲唔急造人，況且男友喺佢眼中已經係佢嘅「BB」，要好好照顧呢個大「仔」咁話。
(on.cc東網)
藝人葉翠翠上月誕下第二位囝囝，再度榮升人母嘅佢心情不知幾咁開心，呢日翠翠喺社交網分享兩位囝囝嘅相，相中見到翠翠嘅大仔想錫弟弟一啖，不過好快大仔又使出飛毛腿，踢向弟弟，真係一時溫馨一時搞笑。
難怪翠翠見到呢個畫面都話：「小王子真係同天氣一樣，估唔到下一刻係點。。。錫你一啖，然後伸你一腳。。小小王子瞓咗覺，完全唔知咩事。。將來睇番一定笑到肚痛。。。小王子：好多姐姐哥哥話掛住我，係咪真㗎！」網友都話翠翠見到兩個仔仔健康，真係有仔萬事足呀！
(on.cc東網)
前組合Cookies成員區文詩（Angela）絕對係姊妹間嘅代言人，吳雨霏（Kary）同楊愛瑾（Miki）係咪再見不是朋友、鄧麗欣（Stephy）同方力申分手後有冇見，Angela一一解答！
最近Instagram就有個「你問我答」新功能，Angela就被問：「點解咁唔鍾意Theresa（傅穎）？」
扮傻嘅Angela就冇正面回答：「吓？咩話？你講咩話？」
跟住又有網民問佢：「Stephy依家同王子一齊定同小牛一齊定係同你一齊呀？」
Angela就似乎有啲嬲豬Post咗張「私人重地 閒人免進」圖片：「你以為我真係茶水間KOL咩？就算係都要我畀你入我個茶水間先得㗎 閒人免進啦！」
而網民嘅提問都係離唔開Cookies，今次係問：「有冇探Kary BB？得意嗎？」Angela就上載咗張BB相，不過就遮咗BB樣貌！
(on.cc東網)
被爆撻着年長兩歲嘅女演員，網上流傳二人蹺晒手嘅片段，即時爆出戀情。粉絲對於第一次傳出緋聞顯得好興奮，佢哋都笑言出道6年，終於有第一次緋聞，證明大個仔。。。
韓國7人男團BTOB今年出道6年，成員終於爆出第一單緋聞。根據韓媒報道，27歲成員李昌燮被爆撻着年長兩歲嘅音樂劇演員鄭在恩，網上流傳二人蹺晒手嘅片段，即時爆出戀情。
不過二人都否認戀愛消息，當中李昌燮方面就指二人嘅戀愛傳聞係毫無根據，而鄭在恩方面亦都否認拍拖，並指二人只係通過音樂劇嘅合作後成為很好嘅朋友，但強調二人並唔係拍拖。
其實今次唔係鄭在恩第一次同男團成員傳出緋聞，佢喺大前年亦曾同男團「ZE:A帝國之子」嘅成員金桐俊傳過緋聞，當時亦指二人因為合作音樂劇而撻着。另外，BTOB嘅粉絲對於團隊第一次有成員傳出緋聞顯得好興奮，佢哋都笑言BTOB出道6年，終於有第一次緋聞，證明成員都大個仔。
(蘋果日報)
