嚟到36集大結局，劇情主要都係交代各人下場，好似噚晚嗰集話陳煒喺大殿度俾人揭發佢嘅陰謀，原來成件事係局中局、假死嘅蕭正楠收買咗李美慧，等陳煒以為可以嫁禍俾馬浚偉。

東窗事發後，李龍基將大權交咗俾馬浚偉，由馬仔發落陳煒嘅下場。

坐上皇位嘅馬浚偉，遵從對馬國明嘅諾言，本來諗住將胡定欣治罪，點知定欣拎住當年為馬浚偉擋咗一刀、而獲頒嘅免罪符，結果馬浚偉冇廢除皇后，仲永遠只有一個皇后，但胡定欣永遠要喺冷宮生活。

本來出咗宮嘅陳煒，知道自己死路一條，寧願死喺皇宮，仲自備咗一條白綾，自縊身亡。

為咗可以有安穩生活，蕭正楠喺李天翔嘅幫忙下，成功隱瞞身份，可以同心悠出宮。

康華、張慧儀同羅霖恩准出宮，康華第一時間去咗搵韋家雄，點知原來佢一早染病死咗，所謂嘅家書都係臨終前寫好，再托朋友定時寄俾佢。

謝雪心就留喺廟，為當年害死兩個皇后嘅事補過。張慧儀同羅霖去咗開店做首飾，同麥玲玲有啲爭生意嘅戲。

馬國明亦申請咗出宮歸隱，而馬浚偉就解釋咗自己咁多年辱負重，甚至當日係佢殺死心悠嘅姐姐，亦係佢指示張文慈嫁禍俾陳煒，如今馬浚偉雖然大權在握，但已眾叛親離。

講到今次角色結局有別過往，有唔少人留言覺有驚喜，馬浚偉接受《蘋果》訪問話：「多謝！我都好開心，今次刻意轉戲路，好多人喜歡，我自己都收到好多回應，大家都話估唔到，作為一個演員，得到咁多迴響，梗係覺得開心。」

馬仔仲話今次係刻意轉戲路，試吓呢啲亦正亦邪嘅角色：「喺最尾嗰兩集真係過足戲癮，之前都諗咗好多耐，睇吓放啲出嚟係最好，忍咗咁多集終於可以爆，真係好多謝導演同監製俾好大自由度我去玩。」

(蘋果日報)

藝人陳貝兒（Janis）雖然經歷婚姻失敗，對愛情仍抱有希望，還設下目標學煮法國甜品，想有段中法情緣，在法國開咖啡店更是她的夢想！

食素的Janis，下廚手藝自嘲徘徊天堂與地獄之間：「我多數煮中式，簡單潮州菜，自己食素，就算煮唔熟，啲菜都可以食。」

想喺法國開Cafe

現時她向甜品進發，早前在煤氣烹飪中心報讀「法國Disciples Escoffier專業烹飪文憑」課程，她說：「今次主力學甜品，可以畀我盡情發揮，法國甜品全球數一數二，希望有機會可以喺法國開Cafe，呢個係我嘅夢想。（嫁個法國人？）隨緣，咁都想，不嬲對法國情有獨鍾，覺得好浪漫，啲人好有品味，無論地方或男士都有好好印象。（試過法國情緣？）冇，所以呢個係開始，為我人生爭取啲嘢，裝備自己。」

被生死戀觸動

最近Janis忙於走訪不同國家拍攝《嫁到這世界邊端2》，由於第一輯反應好，令她甚有壓力：「想帶多啲精彩、賺人熱淚嘅故事畀大家。呢個節目令我睇到呢個世界仲有真愛，眼見好多離離合合嘅故事，如果眼淚多過開心嘅話，諗過不如自己一個人過，但當節目中見到啲女仔，佢哋去到咁遠嘅地方都可以搵到真愛，就覺得搵真愛仍然有希望。」

第二輯已拍攝了幾個地方，她最難忘是在韓國：「拍咗個故事好似韓劇生死戀劇情咁，好誇張，真係有個男人同你經歷生死，最後自己都忍唔住爆喊咗，真係被觸動到！」Janis見過不少感人愛情故事，問到最大的得着，她說：「佢哋嘅相識話我知，通常喺你最估唔到嘅時間就會發生，當緣分要嚟，自然會出現，唔使強求。」

(on.cc東網)