【報警求助】黃建東好嬲：返到屋企嗰刻我都撳住自己

2018-03-31

冇諗過會發生喺佢身上，已經報警，佢坦言好忟憎，之後仲係覺得好嬲，返到屋企嗰刻都撳住自己。。。

藝人黃建東（Derek）較早時間在社交網透露母親誤墮「點數騙局」被騙八萬港元並已經報警求助。就此事Derek接受東網訪問，對於媽媽墮入騙局他坦言感到忟憎，從沒想過會發生在媽媽身上：「佢係一名跳舞老師，用緊iPhone，基本上唔係同社會脫節。」

他指媽媽當時收到姨丈WhatsApp要求買點數，在未過問的情況下立即去便利點過數：「本身上緊堂教跳舞，即刻去咗便利店買遊戲點數，嗰八萬係分開碌幾次，便利店職員又唔覺有問題，畀完晒先打畀阿姨同佢啲仔女，但已經太遲。」

Derek表示媽媽剛從警察報完案回家，但由於過數屬於自願，故難以追討損失。問媽媽現時心情如何？他說：「尚可以，但我就好嬲，返到屋企嗰刻我都撳住自己，八百蚊都話，點知係八萬蚊。（損失慘重？）係，佢本身係一個好慳嘅人，教跳舞教到腳斷先得雞碎咁多。（有冇氹佢？）都有，佢氹番我多，但都返唔到轉頭，當買個教訓，但買得都幾貴，媽咪就其實想件事告一段落。」

他亦表示曾收過朋友被Hack訊息，但一睇就知道騙案而未有上當：「媽咪話幾年冇睇警訊，我都叫佢下次有事即刻打畀我同細佬，奉勸所有爸爸媽媽有咩要同子女商量。」

(on.cc東網)

【Keep住咁靚】郭可盈郭羨妮一樣咁正~

2018-03-31

圈中嘅美魔女有唔少，但唔可以唔提同樣係靚媽嘅郭可盈同郭羨妮（Sonija），佢哋有咩共通點？皆因佢哋都係90年代嘅港姐，亦係當時無綫當家花旦之一，拍過唔少為人津津樂道嘅經典劇，如《刑事偵緝檔案》、《酒店風雲》、《尋秦記》、《天涯俠醫》等，最緊要係佢哋至今已為人母，但個樣咁多年嚟依然如一、仲要愈嚟愈靚，你估咁易咩？女人愛美係天性，真係好令人羨慕！

無綫「See See TVB」官方社交平台專頁上載咗一條可盈同Sonija嘅大回顧，大家真係要落力睇真啲，因為佢哋個樣真係冇變過㗎！

片中見到1993年參選香港小姐嘅可盈笑容燦爛，最後仲獲得「最受傳播媒介歡迎獎」同「最佳演藝潛質」獎項。依家喺深宵時段熱播嘅《刑事偵緝檔案》，當中飾演高婕一角嘅可盈人氣急升，嗰時嘅佢塊面仲有啲Baby fat，笑得不知幾可愛，簡直又Pure由True。到10年後，可盈拍咗《酒店風雲》，演技進步之餘，樣貌仲冇咩點變，雖然多咗份成熟味，但塊面都仍然有Baby fat。

而1999年參選香港小姐嘅Sonija，當年獲得港姐冠軍、「最上鏡小姐」、「國際親善小姐」同「千禧才智小姐」獎項，真係美貌與智慧並重。到2001年嘅劇集《尋秦記》，飾演秦清嘅Sonija樣貌青澀，笑起上嚟勁純真。

到2004年嘅《天涯俠醫》，佢個樣依然冇咩變化，仲要愈嚟愈靚。如今可盈同Sonija都榮升人母，散發女人味之餘，個樣仲Keep得好好，唔少網民都話兩個絕對係凍齡美女。兩位靚女喺每個階段都有唔同味道，絕對係真女神。網民仲話當年嘅陶大宇、古天樂同張家輝一樣咁正呀！

網民有話兒：
CXXWIAASX：郭可盈，港劇天后！女神！
TIMXS DDX：郭可盈年輕貌美，郭羨妮愈有女人味。
PIXXNMXX：可盈塊面仲愈嚟愈尖。
GGIFMXCXX：女人愛美係天性，兩個keep得好好！

(on.cc東網)

【游水滑雪踩單車樣樣都得】Yumiko爆終於有嘢難到梁浸浸

2018-03-31

藝人鄭希怡（Yumiko）嘅囡囡梁浸浸一向都古靈精怪，性格又非常活潑，年紀細細已經識踩單車、游水同滑雪，咁叻女，你話點可以唔鍾意佢？

呢日Yumiko就喺社交網上載浸浸爬樹嘅短片，片中見到浸浸想爬上棵樹度，不過佢爬極都爬唔度，但都依然冇放棄，不停用盡辦法，可惜最後都上唔到。

難怪Yumiko話：「無從入手，爬樹真係征服唔到。」之後老公梁學儲再晒出一段浸浸咬住支飲管，不停揈個水樽片，網友都話浸浸嘅精力真係多到不得了，可愛程度爆燈呀～～

(on.cc東網)

【都係上年十月】黎明將當年同樂基兒嘅紀念送咗俾Wing⋯

2018-03-31

黎明BB嘅媽媽典助手Wing，依家專心安胎，ig同fb都刪晒，求耳根耒靜唔好再俾傳媒起底搵番佢同有米前夫以及富二代男友嘅戀事。不過，收到風嘅，點止傳媒？仲有一班好愛黎明嘅fans。

就咁嘅，黎明同樂基兒熱戀期間，經常去一家叫做RIVA嘅法國餐廳約會，黎明為紀念兩人甜蜜溫馨嘅日子，於是買咗個車牌，就係R1VA。但，原來去年十月嗰陣，R1VA呢個車牌，已經轉咗去Wing嘅黑色福士！

呢個轉變，係黎明fans先發現，但呢架車係AMusic公司登記，所以最初大家都冇為意。今日有周刊報道咗歌迷呢個驚天發現……咦，去年十月？去年十月Wing仲同緊車房之子、富二代Vincent一齊去周國賢細妹個婚禮，但依家，Wing依家已經係黎明BB媽媽，懷孕六個幾月……一言難盡。

講番呢個「R1VA」自訂車牌，黎明喺2010年，曾豪擲500萬元購入法拉利458 Italia型號黑色超級跑車，當時都係掛上「R1VA」呢個車牌。嗰陣仲係Amusic高層王凱文同助手子泉代黎明收車同驗車。依家呢個咁有意義嘅車牌，已經去咗Wing度喇！

(蘋果日報)

【終於知道係咩婚紗~】今日結婚啦恭喜晒！

2018-03-31

英皇藝人羅力威今日迎娶拍拖7年的女友雨僑，早上於淺水灣行禮，繼早前羅力威的新郎look曝光後，網友都好想睇新娘雨僑究竟咁樣靚法呢？

羅力威好友鍾舒漫就喺ig上載一對新人簽字儀式，見雨僑穿上低胸婚紗淺露事業線，兩人笑容一致真係襯到絕，難怪鍾舒漫都話係郎才女貌啦！

而電台主持人梁泰來都將一對新人行禮的盛況拍片放上ig同大家開心分享。

(on.cc東網)

【坦言之前其實早已疊埋心水單身】親自陪試裙褂做到足！

2018-03-31

真係甜到漏！對於呢份心意，佢非常感動，亦不諱言之前其實早已疊埋心水單身，想不到命運有此安排。。。

62歲嘅無綫資深演員陳榮峻，與已屆57年、同屬無綫資深演員吳香倫（Helen）譜黃昏戀曲，拍拖三年，婚已經求咗，仲係黃翠如幫手做媒人添。嚟緊就要著手籌備婚禮喇。

早前兩人接受田蕊妮主持嘅《1+1的深情》訪問，陳榮峻個仔仲現身，多謝Helen陪爸爸行過人生低谷，跟住阿田又讀出陳榮峻嘅女兒嘅一封信，同樣亦多謝Helen兼祝福佢哋，令陳榮峻同Helen都感動流淚。婚事籌備得如火如荼，結過婚嘅陳榮峻話好緊張，因為Helen未結過婚，希望可以好似求婚一樣，俾一個美好回憶對方。佢又話希望喺教堂行禮，等未婚妻有機會披婚紗，婚禮預計四、五月舉行。

對於峻哥呢份心意，Helen非常感動，亦不諱言遇到陳榮峻之前，其實早已疊埋心水單身，想不到命運有此安排。今日讀者黃先生就喺灣仔冠南華撞到陳榮峻同準陳太試中式禮服，兩人全程笑不攏嘴，Helen仲試咗幾套「褂皇」、「大五福」（即褂后），精心細選。

由於中國人忌諱「返頭嫁」意頭唔好，所以新娘只可以着一次裙褂，試身時點算？唔著下半部分，以拼湊方法去度。

繡莊師傅會為新娘預留吋半腰圍「走盞」，所以Helen都係下半身照着便服，上半身着褂。至於陳榮峻就試咗兩套，其中一套似皇帝衫，好多職員搵佢哋影相，陳榮峻亦十分樂意合照，成間舖都洋溢一片喜氣洋洋。

(蘋果日報)

【承認添食】林淑敏：依家證明老公鍾意我多啲

2018-03-31

藝人林淑敏下午出席活動推廣台灣美食。

林淑敏原來曾在台灣求學兩年，故對台灣美食有一定認識：「不過嗰時放學就要去補習，要追成績，反而之後改去多倫多生活，就真正重獲自由，所以我同自己講，如果我有小朋友，會送佢去外國。（諗住生？）唔得，有病（患癌）之後唔生得嘞，我老公本身好鍾意小朋友，依家證明佢鍾意我多啲。」

談到《愛·回家之開心速遞》添食加集數，她承認此事：「但未知加幾多。（挑戰當年《真情》？）梗係想啦，我哋成組人合作1年，依家感情真係好好。」

(on.cc東網)

【覺得好核突好鬼尷尬】陳柏宇：總之唔好行埋一齊

2018-03-31

估唔到Jason會咁大反應好抗拒呢件事，不過為咗滿足老婆嘅要求有時都會畀佢得逞。。。

歌手陳柏宇（Jason）同老婆符曉薇（Leanne）兩公婆出名感情好，不過日前Jason出席活動受訪時被問到會否同老婆情侶裝出街，他就大呼怕怕：「佢成日都想同我着情侶裝出街㗎，我就成日都『吼』住睇下佢嗰日着咩衫我先至走去換衫嘅，不過有陣時都係會畀佢得逞，一次半次咁喇，通常如果我哋係着情侶裝大家都一定會喺社交網絡見到，因為都幾難得嘅。」

Jason又搞笑說：「所以盡可能都唔好同老婆買一樣款嘅衫。（點解咁抗拒情侶裝呢？）唔知喎，我覺得好核突，着情侶裝出街係會好鬼尷尬，如果係情侶裝出街嘅話我都一係行快啲、一係行慢啲，總之唔好行埋一齊！（出街唔會拖老婆？）我又好少話會拖住佢行，我成日都會行先囉，幫佢開路呀嘛。（唔驚轉個頭唔見咗老婆？）如果咁大個人都唔見得咁就死喇，唔會喇，我娶佢就係因為佢能幹呀嘛，識得照顧自己。（有時人多容易走散？）咁呀，就真係難搵啲嘅，我哋兩個都咁矮，惟有我盡量試吓跳高啲搵佢。」

(on.cc東網)

【網民勁大反應】心疼Jasper：他一直都覺得是真的

2018-03-31

俗語有云「慈母多敗兒」，咁「嚴母」教導下嘅兒子又會如何呢？

今日台灣藝人王子(邱勝翊)就貼咗一張佢同陳小春、應采兒嘅囝囝Jasper，一人拎住個手掣，好似打機打得好開心嘅相，但係識睇緊係睇留言啦。

王子留言話：「有位嚴母不讓兒子玩遊戲，放了段Video讓我們假玩，但Jasper一直都覺得是真的，心疼他」，然後王子仲@應采兒，網民睇完都好大反應，紛紛留言。

有啲網民就戥王子慘，「心疼你自己吧，陪着假打還不能說」、「那你也是非常優秀了，陪着假打，考驗演技的時候到了」。

亦有網民話：「哈哈哈，小孩的世界只有媽媽知道」，咁唔知老竇小春Jasper被騙又會有乜反應呢！

(蘋果日報)

【因為工人姐姐⋯】Bob嫂嬲爆PO文：我晚晚自己照顧到天光㗎大佬

2018-03-31

藝人林盛斌（Bob）早前透露7個月大嘅囝囝林道申（Jaye）入咗醫院，狂呻連搵幾間醫院都爆滿，不過尋日（30日）就表示囝囝已經出咗院喇，都算係一個好消息。

而太太Pearl都終於有時間update社交網，提番囝囝入醫院，原來佢都谷鬼氣啵！

話說Bob嫂寫咗千字文，講佢同囝囝入醫院嘅波折之餘，阿仔原來係中咗「人類間質肺炎病毒」，搞咗一大輪終於搵到醫院畀專業人士照顧喇，Bob嫂就大爆當佢餵囝囝食藥時，佢哋嘅工人姐姐就黑佢面，又唔幫手照顧囝囝，搞到Bob嫂心情都大受影響：「…我每次餵四少食藥，個BB喊到拆天；個工人塊面黑到我好似餵毒藥咁，算點先？唔幫手都唔好影響我心情啦﹗😤我晚晚自己照顧到天光㗎大佬。」

不過佢都有講到個人要有好心情、好思想先會有好事發生，依家囝囝身體朝向好嘅方面發展，佢都希望囝囝可以繼續keep住健康喇～

(on.cc東網)