【豪花6位數出新歌】點知同Ella送畀仔女嘅歌…

2018-02-23

Shine即將喺3月2、3號假紅館舉行入行15週年演唱會《Shine Moments Live 2018》，正密鑼緊鼓為演出做準備嘅成員徐天佑同黃又南，噚晚喺土瓜灣接受訪問，講到為咗今次演唱會特登製作新歌《不怕》，搵嚟黃偉文填詞，天佑話：「我哋好希望做一首類似《燕尾蝶》咁樣嘅歌，因為時代唔同咗，新歌希望以呢一代人對呢個城市嘅感情為主題，係一首正面嘅歌。」

佢哋話今次新歌係自資製作，花費十幾萬，為咗呢首歌特登喺英國請咗一名藝術家設計單曲封面，正當一切準備就緒嘅時候，佢哋發現原來新歌竟然同官恩娜啱啱派台嘅《寶貝兒》鬧出雙胞胎，即係同一位作曲人嘅作品。成員又南表示：「我哋都係新歌監製喺年三十晚從收音機聽到Ella呢首歌，先至知道竟然同我哋啱啱錄好嘅新歌係一模一樣，喺經過查詢下原來Ella早喺一年前已經收咗呢首歌，但因為佢生BB，所以斷斷續續到啱啱月中先推出咗，時間上啱啱畀我哋早咗少少。

事件發現之後Shine表示已經即時查詢作曲人同華納方面，發現其實係作曲人徐繼宗不慎出現行政上嘅錯誤，天佑表示：「其實唱片公司都有一份歌單交畀歌手，歌手們就係呢啲歌單上面揀Demo，當時Ella揀到呢首歌之後，歌曲冇喺歌單上刪除，咁啱到我哋亦揀中咗仲錄好埋，於是就發生今日嘅事。」又南表示：「作曲人事發後已經第一時間同我哋Say Sorry，其實呢件事唔係華納同我哋嘅錯，o依家大家仲喺度商討緊究竟應該點算，因為撞正農曆新年假期，唱片公司方面同我哋仲商量緊，希望下個星期會有好消息，因為首歌我哋真係好鍾意，而且相關嘅產品已經製作中，好希望可以完滿解決。」

佢哋表示同一首歌鬧出雙胞胎好罕見，天佑表示：「上一次有同類事情已經係陳慧嫻嘅《千千闕歌》同梅姐嘅《夕陽之歌》，希望有呢一個案例，可以令事情有一個完滿嘅解決方法。」至於官恩娜所屬嘅華納唱片公司發言人回應表示：「歌曲係喺去年收到，歌曲接近錄好階段時Ella發現自己懷孕，於是錄音工作暫停直到今年1月誕下第二位囡囡後，Ella希望將歌曲當做送畀兩位仔女嘅禮物於是將歌曲派台，後來收到東亞唱片版權部查詢，先知道Shine亦錄好咗同一首歌鬧出雙胞胎事件。」

華納發言人續稱：「向來同Shine關係好好，而且兩件都係喜事，Ella係慶祝第二個囡囡出世，而Shine就係慶祝紅館演唱會，雖然鬧出雙胞胎事件係尷尬，但都無辦法。」

(蘋果日報)

【喺大台八年】離巢前最後一套劇扮醜女：有更大突破

2018-02-23

無綫熱播劇集《波士早晨》中藝人何傲兒「自毀」犧牲靚女形象，以醜女形象扮演李佳芯妹妹，令唔少網民紛紛討論，正反兩方各持己見，有網友指見到何傲兒扮演醜女竟然話食唔落飯，亦有網友為佢抱不平：「咁樣醜化傲兒好似好唔抵，感覺係咪有心整蠱人！」平時出席活動靚靚示人嘅何傲兒，唔介意公開扮醜嘅過程，仲見佢開心晒V，似乎好享受做醜女角色！

今次引起網民討論，何傲兒接受東網訪問話好多謝大家，會繼續努力，她說：「一定係多謝無綫同監製畀一個咁好嘅機會我，令我演技同扮相都有更大突破，其實呢個角色令我內心成長咗好多，好多謝網民關注，仲收到好多朋友叫我繼續加油，無論自己身在任何崗位同位置都會繼續努力。」

講到《波》劇係何傲兒離開無綫最後嘅作品，依家睇番係咪感觸良多？她說：「當然有啦，始終喺呢個大家庭屈指一算都有八年，我仲記得離開公司嘅最後一日，自己都仍然拍攝緊呢部劇，最深刻就係拍緊最後一個鏡頭，眼淚喺心裏面流出來，其實同劇演員都唔知我係最後一日，除咗監製之外。亦係因為呢個角色咁特別，令我更加確定自己係好鍾意演戲，所以我好愛『阿鳳』（指角色名）。」

何傲兒話雖然離開咗無綫，但仍然都有同同劇嘅演員聯絡：「套劇出街之後自己有睇番開工時同大家影嘅相，又諗番起工作時嘅點點滴滴，覺得好溫馨同開心，忍唔住Send番相畀佢哋，都希望我哋喺唔同嘅崗位都搵到發揮自己嘅空間啦！」

(on.cc東網)

【同細廿年富二代分手？】52歲羅霖：滿嘴真愛，其實一點虧都不肯吃

2018-02-23

「如果有人真愛你，那他無論忍受多少，都不會願意跟你分開。那種嘴上說愛，其實離你越來越遠的，不過是謊言。那種滿嘴真愛，其實一點虧都不肯吃的，無非是路過。真愛，就是奔結果去的。沒結果的，只能叫曾愛過。無論你愛過誰，結果只有一個。陪你到最後的，才是真愛。」句句都咁夭心夭肺，似乎係出自己一個有經歷嘅人。

呢番感言，出自羅霖微博，佢昨早貼咗兩張雪地新相，仲Post咗呢段文字。出處係「哲言心語」— 拍攝地點係法國滑雪勝地Courchevel。之前羅霖同細佢20年內地富二代男友王嶠（J君）拍拖，之前仲俾《蘋果》爆佢帶埋細仔Jonathan秘遊曼谷，J君大獻殷勤幫手湊仔拎行李，融入家中，而羅霖當時回覆指二人係好朋友，因為要拍劇半年，會以事業為重。

新年流流年初七羅霖貼啲咁嘅嘢，一係，就係有感而發；一係，就係分手後羅霖滑滑下雪上網見到段文有所感觸；一係，就係J君帶羅霖上雪山講分手。唔係咁浪漫嘛？應該唔係，因為羅霖事先張揚今年農曆年同細仔去法國滑雪。

咁究竟發生咩事？身在法國嘅羅霖接受《蘋果》電話訪時問時話，唔係情變：「我時不時都會抒發呢啲感情嘅嘢，有時寫啲人生嘅嘢，有時睇到啲文字我又覺得幾啱幾受用。」

至於同J君關係，羅霖話：「至於我同佢，都仲係朋友嘅關係，我都未係…肯定係佢。都要澄清，佢唔係我男朋友，係我好朋友之一。」

至於結婚，羅霖感謂：「嚟緊我都有工作安排，我諗住冇乜工作先至諗呢個問題，但我諗依家要擱置囉。」羅霖仲話感情都係随缘：「大部分原因是要努力工作给三兒子學費和生活費，所以會放棄自己的感情或愛情」，似乎佢同富二代感情真係有啲暗湧喎！

其實戀情曝光之初，羅霖講過佢係想搵一段簡單感情關係：「J君都有喺呢方面（財政）提出想幫我，我同佢講冇需要，亦都唔想。」

又話自己有三年計劃，可以儲錢畀首期買樓，亦唔擔心J君會走咗去：「佢細過我等得，佢急我唔急，我都結過婚，又唔會考慮生小朋友，我都生唔出。」去年中可能因為拍《宮心計2》太辛苦，諗番呢五年嚟日日開工都冇得休息，都想搵個伴，當時羅霖仲話「之前嗰個（J君？）都好大機會」……o依家……

(蘋果日報)

【四個月個肚就鑼咁大】陳倩揚：係我之前佗五、六個月咁上下大

2018-02-23

藝人陳倩揚到中環為活動擔任司儀，正懷有第三胎的她現時佗B四個多月，雖然手腳仍然纖細，但已肚凸凸，連她自己都笑言：「呢個size應該係我之前佗五、六個月咁上下大，可能因為已經嚟到第三個，入面比較鬆動啲啩！總之希望一切順利健康，依家飲食同瞓覺都好正常，好滿足喇，等到三月頭就可以照到仔定女，暫時我咩都未準備。」

她表示知道自己生產完後坐月時是暑假，所以要趁現在多多陪伴兩個兒子，又謂兩個兒子對即將到來的小生命都好期待：「尤其係細仔，佢成日都同人講『你唔好叫我細佬喇，我係哥哥喇！』有時我喺架車度講嘢，叫哥哥嘅時候，佢又會話『你叫緊邊個哥哥呀？』真係好可愛，佢依家三歲多啲，開始多嘢講，真係日日都有笑料。個個都話細佬似媽咪，佢模仿能力好強，有一次同佢玩煮飯仔，佢攞住平底鑊同隻蛋，喺度扮拋鑊，我問佢點解會識，佢話『你喺廚房都係咁。』但係我已經好幾個月冇入廚，估唔到佢係觀察力咁強同埋記咁耐，希望佢會承繼佢媽咪咁鍾意煮嘢食，有相士話過我係旺煮嘢食㗎，睇吓會唔會承佢貴言。」

問到第三胎希望開刀還是順產，她就說不會太執着：「我頭兩個都係順產，呢個合作嘅話都希望順產，咁就好圓滿，但係如果身體有情況需要開刀我都唔會太執着，最緊要順利健康。」

雖然懷孕，她謂工作是一種對媽媽的肯定：「有人相信我哋嘅工作能力係會令懷孕嘅媽媽心情特別開心，而且都係胎教嘅一種，嗰種工作嘅energy佢係會感受得到，所以我會繼續做嘢。」

(on.cc東網)

【小海綿超可愛！】黃曉明Angelababy幸福曬一家三口照

2018-02-23

內地男星黃曉明同老婆Angelababy（Baby）日前分別喺社交網上載拖住媽媽嘅相片，睇相見到佢哋應該同家人一齊去旅行，呢日曉明又再上載同一地點嘅旅行相，不過呢次就多咗囝囝「小海綿」嘅背影！

相片中佢兩公婆一人一隻手拖實囝囝喺雪地上漫步，而企喺父母中間嘅小海綿仲行到歪歪斜斜，真係好得意！

曉明留言話：「當你這樣牽着你的孩子蹣跚學步的時候，是否想到爸爸媽媽也曾經這樣牽着你的手。」

網民就留言話呢個一家三口嘅背影圖真係超有愛！

(on.cc東網)

【發生意外Call白車】佗B葉翠翠：真係差啲嚇到我肚痛暈低

2018-02-23

藝人葉翠翠現時佗住第二胎，預產期係今年5至6月，翠翠依家主要留喺屋企安胎，不過今日就發生一件家居意外，令到翠翠嚇到肚痛！

佢喺社交網上載囝囝同救護人員嘅相片，留言話：「頭先真係嚇死媽mi（咪）了。。下午工人姐姐準備小王子的粥仔，用blender整碎牛肉時，唔小心整到手指，真係差啲嚇到我暈低。。。流超多血，又唔知傷口幾深，但目測傷口非常長，我真係擔心工人姐姐會失血過多暈低，由整到直至救護員來到都有15分鐘，因我不是即時打999，用了幾個方法都不能止血，過左（咗）5分鐘都係要打。。真係嚇到我肚痛。。。」

翠翠仲話：「但係呢個小王子（囝囝）沒有幫手之餘，仲要救護員哥哥抱抱。。。雙手舉起咁樣。。。唔知救護員哥哥明唔明，但係媽mi知道小王子想做乜。。。本來想同工人姐姐一起去醫院，救護員說去洗傷口和要打破傷風針，唔知要不要縫針，但又沒辦法帶小王子一起，所以比（畀）定錢佢，睇完醫生就搭的士回來。幾位救護員非常細心，把之後程度（序）都告訴我，還叫我不用擔心！」網民都留言祝福工人姐姐快啲好番，仲叫翠翠保持冷靜，唔好動胎氣呀！

(on.cc東網)

【血液循環好唔好只要睇小腿就知道】

2018-02-22

〔即時新聞／綜合報導〕血液循環對人體健康非常重要，但你知道要怎麼分辨血液循環好不好嗎？其實只要觀察小腿即可，如果發現太瘦小或是腫脹，就可能是血液循環有問題。

腳是人體的第二心臟，心臟有沒有力、循環好不好，只要看腳就可知道。（資料照）

據《優活健康網》報導，人體最容易觀察血液循環好壞的地方是末梢，如果手腳容易麻木或抽筋，就是循環不暢通的最初期症狀。假如一個人動脈阻塞，小腿就會變得比較瘦，因為血液循環不佳、養分到不了，造成下肢像營養不良一樣瘦小。但如果是小腿腫脹也不對勁，可能是有靜脈阻塞的問題，因為末梢得不到充足氧氣，長期下來還會變成瘀積性皮膚炎。

報導指出，腳是人體的第二顆心臟，心臟有沒有力、循環好不好，只要看腿或腳就可以知道。人的臟腑、血管也與人體末梢有密切連帶關係，因此一個人的末梢循環不只決定了血管年齡，也顯現身體的真實年齡。

(自由時報)

【原來囡囡叫…】城城多謝古巨基

2018-02-22

天王郭富城有女萬事足，今日是初七人日，城城特別在社交網祝大家生日快樂。

一直以來大家都以為城城的千金英文名叫Chant，原來是Chantelle才對，城城留言：「初七人日，繼續祝福人人開開心心過狗年。趁這個人人生日的吉日，亦特別謝謝基仔@古巨基LeoKu的餅店@Alice Wild為囡囡Baby Chantelle烘焙製的寶寶百日曲奇，相當美味精緻，謝謝uncle Leo。也謝謝設計師@Larry Ho的精心包裝設計，這些日子收到很多祝福，再三謝謝大家，希望大家也開心如意、身體健康。」

(on.cc東網)

【高手在民間！】翠如BB餵「沙漠海豚」！？

2018-02-22

黃翠如拍旅遊節目就拍得多，近日展開現實版「帶住爸媽去旅行」，一家人去咗「富豪天堂」杜拜，日前去咗沙漠玩Desert Safari，呢個喺沙漠坐車穿梭嘅感覺得，真係去中東地區獨特嘅體驗嚟，早前翠如BB貼出父母喺沙漠一齊睇日落嘅相，今日凌晨佢又貼出一張玩沙嘅相，原來係佢哋個司機影，睇完呢張相，網民都忍唔住讚「高手在民間」，原來司機係隱世高手。翠如凌晨喺IG貼出玩沙相。

翠如近日同家人去咗杜拜。IG圖片

佢睇中東建築。IG圖片

IG圖片翠如BB貼出父母喺沙漠一齊睇日落。IG圖片

翠如BB話呢張相係載佢哋嘅司機影：「拿了我的相機，要求我跪在日落前的沙上，擺這個拋沙pose，然後很自信地按了一下快門，再跟我說，你一定願意付錢買這張相。」佢稱呢位係有自信嘅杜拜男人，相中見翠如BB玩沙，拋起嗰堆沙，有網民覺得吹起嘅沙似獅子、又有人話似金毛尋回犬，更有人聯想係個形狀似尼斯湖水怪，之不過較多網民覺得啲沙似「沙漠中海豚」，留言「個畫面好似妳喺度餵緊一隻海豚」、「張相真係好靚，好似一條海豚喺水入面飛躍跳起咁」，另有人指似《盜墓迷城》中嘅木乃伊望住翠如BB。

阿Sa凌晨貼出睇日落嘅相。IG圖片

有網民笑問影呢張相下一秒係咪食晒啲沙，亦有網民反問翠如BB點解會有6隻手指，應該係影呢張相嗰陣，兩隻手捧住啲沙，所以先見到6隻手指。翠如今日回覆傳媒就話真係食晒啲沙，今次係同屋企人去旅行，上一次全家齊人係十年前，之前家人有啲唔喺香港，所以終於聚埋一齊，感覺很好，一家人仲租咗民宿。此外，蜜運中嘅阿Sa(蔡卓妍)凌晨都貼出睇日落嘅相，留言”Nice beach!Nice sunset!”近日阿Sa就忙住同林峯拍新劇，難得有時間去享受一下，着上三點式大晒玉背，未知呢張相係唔係男友石恆聰「操刀」。翠如BB一家租住民宿。IG截圖

(蘋果日報)

【Aimee超大反應】陳豪陰陰嘴咁笑：大家冷靜啲…

2018-02-22

陳豪同陳茵媺(Aimee)今日夫妻檔現身銅鑼灣，為時代廣場「金龍醒獅賀新歲」活動擔任主禮嘉賓，兩夫妻齊為金龍點睛後，更分別舞龍珠同龍頭行大運，又接過醒獅送嘅三隻賀歲狗公仔送俾仔女。

陳豪同Aimee表現恩愛，全程十指緊扣，當Aimee感到有啲凍，陳豪就即刻為太太披上外衣。

為咗遷就仔女嘅時間表，今年陳豪一家留港度歲，Aimee覺得喺香港過年，可以同親友拜年兼佈置屋企，更有過年氣氛。陳豪就話仔女開心之餘，佢最期待係太太一年一度下廚整廣東菜，佢話：「上年整盆菜，由唔識整到好食，畀110分佢，佢煮得越嚟越好，越嚟越正。」Aimee就話今年嘅餸菜仲有蒸石斑同鮑魚㖭，真係聽到都流口水呀！

已有三個小朋友嘅陳氏伉儷，問佢哋狗年會唔會再添新成員，Aimee聽到即刻好大反應話：「What?」身旁嘅老公就陰陰嘴笑住叫大家冷靜啲，仲話唔係生唔生嘅問題，Aimee望住老公笑住話：「What do you say?」陳豪急急解釋是要花腦力同努力去照顧同教育，Aimee即認同暫時三個仔女便夠，問到是否有意再生？陳豪話：「畀啲時間我做埋仔女啲功課先。」

Aimee希望今年能兼顧工作及家庭，將會接拍廣告及出席活動，亦有傾談電影，有可能同老公一齊演出，陳豪笑指避了夫妻檔多年，也是避不了，Aimee覺得若果真實夫妻演感情戲可能太真。陳豪即笑說:「唔好閂後門，睇劇本再決定。」他不介意夫妻檔合作，甚至有接吻戲，他指最重要是藝術成份有幾高，作為演員當然會做最真一面，但要有限度地。

(蘋果日報)