藝人方中信接受電台訪問，講到家中有兩隻愛犬，他表示其中一隻是他領養回來，他都認同很多被遺棄的貓狗，所以他都支持領養，而其中一隻唐狗女叫Jesse，方中信稱當日流浪狗中心見到Jesse感覺很怕人，帶牠回家後仍是瑟縮一角，又匿在枱底不敢出來，要差不多經過九個月時間，Jesse才能適應及接受他們。方中信表示Jesse性格內向，就連食飯都好斯文，因食得太慢，就被另一隻愛犬比高搶食，兩隻狗不時都有「狗咬狗骨」。
至於方中信的女兒現已10歲，同樣很愛錫兩隻愛犬，早前他們「一家五口」便去影了一輯全家福，他謂：「其實每兩年都會影一次全家福，而兩隻狗都13、14歲想紀錄一下。」
講到方中信不時和周潤發去行山，可有帶埋狗狗出動？他坦言：「唔帶得喇，我行都覺得好辛苦，佢哋老狗都唔好喇。」方中信大讚發哥行山速度好快，自己就行到索晒氣。
喺90年代被捧為無綫當紅小生嘅劉錫明，當年因為同周慧敏(Vivian)拍《烏金血劍》傳緋聞，事後劉錫明公開承認對Vivian有好感，Vivian嘅男友倪震激到嬲嬲豬，結果連續3年喺旗下雜誌《YES！》唱衰，仲要硬加「毒瘤明」之名喺劉錫明身上，最後令到佢嘅事業插水，名譽受損，喺94年毅然放棄香港巿場，轉攻台灣發展。
劉錫明專登帶老婆同囡囡返香港過年！
正所謂坎坷過後有艇搭，劉錫明喺台灣同大陸嘅演藝發展好好，仲娶咗個台灣老婆張齊玲，兩人仲生咗一個女，一家三口過住幸福嘅生活。而倪震喺09年同Vivian結婚嘅時候，亦首次向劉錫明表示歉意，直認當年年少氣盛，冇安全感下先傷害對方，劉錫明亦好大方話對事件早已釋懷冇怨。
劉錫明一家三口喺年初一現身尖沙嘴 (蘋果圖片)
仲喺商場啲新年佈景前狂selfie(蘋果圖片)
之不過話晒離鄉別井生活咁多年，劉錫明當然好掛香港嘅屋企人，所以佢喺訪問曾經講過，喺農曆年會返香港陪媽咪，日前有《蘋果》讀者鄺小姐，就喺尖沙嘴嘅The ONE捕獲劉錫明，佢透過「爆相爆片」公開當時情況，當時劉錫明身邊有老婆同個女，鄺小姐話：「嗰日係下晝6點鐘左右，劉錫明同埋佢囡囡喺嗰啲商場佈置影相，佢真係好錫老婆同個女，跟住佢哋周圍轉揸機影相，仲踎低搵啲靚嘅角度，又幫老婆拎手袋。」
好溫馨!(蘋果圖片)
鄺小姐仲話：「可能劉錫明帶咗眼鏡，冇乜人認得佢，佢仲自備埋自拍器，搵埋角度就影全家福，大約影咗6、6分鐘走，之後見到佢好似仲有啲朋友一齊，不過影相只係得佢哋一家，其他人只係周圍睇吓啲佈置。」
幫老婆拎袋！(蘋果圖片)
劉錫明話囡囡今年已經15歲！
事後劉錫明接受《蘋果》嘅訪問，講到讀者讚佢係好爸爸，全程對囡囡都好呵護，佢話：「係呀，真係上世小情人，新年專登同太太及囡囡返嚟香港，同屋企人食吓飯見吓面，仲同囡囡入長洲逛吓，帶佢睇吓啲傳統嘢囉，佢去到見到好多好新鮮嘅嘢，初四嗰日我哋就離開香港。」睇到囡囡生得亭亭玉立，而且仲好標青，仲好有文青feel，佢就笑笑口話：「囡囡今年都15歲，佢食飯㗎嘛，佢算乖喇，老婆教得好，我老婆管佢好嚴！今次返嚟梗係逗咗好多利是，佢去邊都逗到！」跟住劉錫明順道同讀者拜年：「我喺度祝大家新一年越嚟越好，恭喜發財，萬事勝意。」
(蘋果日報)
大台劇《鐵馬尋橋》8年前拍完，演員多年嚟感情友好，關係猶如一家人，「章哥」鄭嘉穎、「阿棠」馬國明、「阿仁」黃嘉樂、「阿良」林子善同「阿雁」唐詩詠不時聚會，又會為對方慶祝生日，感情親密到好似兄弟妹咁。
細妹唐詩詠晏晝喺IG貼出大合照，留言”Full of love”，原來佢哋初四搞團拜，詩詠仲爆佢哋好難約，噚日先終於約到，笑言鄭嘉穎有帶「阿嫂」陳凱琳出嚟，相中見陳凱琳攬住嘉穎、黃嘉樂又同女友一齊現身，不過就唔見林子善未婚妻Kary及馬明女友黃心穎。
詩詠祝大哥嘉穎、二哥馬國明、三哥黃嘉樂快啲結婚，而今年四月就擺酒結婚嘅林子善，唐詩詠則祝子善快啲生仔，網民見詩詠向各人送上祝福，但自己仲未搵到Mr. Right，所以一眾網民希望詩詠事業更上一層樓之餘，亦快啲搵到真愛。
(蘋果日報)
藝人李璨琛今晨涉嫌醉駕被捕，消息指他進行酒精呼氣測試結果，超標近3倍。據知今早7時48分，李璨琛座駕途經新蒲崗太子道東，被警方路障截停，其後接受俗稱「吹波波」的酒精呼氣測試，顯示為86度。李璨琛其後再到警署接受酒精呼氣測試，結果亦達58度，警方隨即以涉嫌酒後駕駛將他拘捕，案件現正交由東九龍總區交通部跟進。
其實李璨琛昨晚跟一班好友食開年飯，更將相片貼上Instagram，而相中見到他臉紅紅，雙手豎起拇指讚好，而身邊朋友亦擺出反V手勢，氣氛相當熱烈。至於是否因為跟朋友玩通宵，在駕車返家途中被捕，則有待查證。
昨晚李璨琛在Instagram上載跟朋友食開年飯的相片，氣氛甚為熱烈。（Instagram圖片）
（IG / HK01）
江湖傳聞，當年攞完影后寸到飛起嘅袁詠儀（靚靚），連環得罪影壇大哥成龍同周星馳，95年同成龍合作拍《霹靂火》，傳成龍打電話叫靚靚補錄兩句對白，但打極靚靚都唔接電話。94年同星爺合作拍《國產凌凌漆》，有傳靚靚大言不慚話同星爺風格唔同，最好以後唔好再合作！日前靚靚接受《蘋果》「閃耀人生女人心」連載專訪，親口否認有得罪星爺：「我邊有咁薑呀，我傻啫，我未咁蠢㗎下話！」
性格率直嘅靚靚好易得罪人，仲要係畀人話得罪兩位影壇巨星，呢個傳聞傳足20幾年，依家靚靚親口解疑團，先講得罪星爺呢單，靚靚呼冤：「你問我，我就真係唔係好記得有冇得罪佢，我邊有咁夠薑呀！我傻啫，我未咁蠢㗎下話，我要澄清我係傻啫，唔係蠢！我一定唔會對有經驗嘅人講啲咁嘅說話，我自己係一個新人。」
咁嗰時同星爺合作，係覺得風格唔同呢？靚靚話：「我直頭…啲人成日講…我完全…冇發生過呢樣嘢，我反而覺得係合作得幾開心喎！」有乜開心呢？靚靚爆料：「佢哋話星爺未試過萬歲嘅，但佢就試過我提出有個美術指導生日，我話：『喂！星爺萬歲啦！』佢真係現兜兜攞咗$2,000出嚟萬歲喎，咁如果大家合作得唔愉快，根本就唔會有呢啲事，有一個美指打扮似男仔，我哋仲一齊將佢變番女仔，即係喺戲外面咁樣玩，應該唔會係不和啩，所以啲人成日話你同星爺點，我真係諗極都諗唔明，究竟係啲乜嘢不和！」
不過，事實真係之後兩人冇再合作，靚靚解釋：「我有聽過呢樣嘢，因為我嗰時要去拍《金枝2》，所以就冇咗一個機會啦，當然我亦都唔會去find out係咪咁樣。」
講完星爺講成龍，去年曾志偉約張智霖同大哥飯局，靚靚知道後主動問志偉，自己可唔可出席，結果斷交22年嘅靚靚同成龍，一見泯恩仇！靚靚坦言：「前排我會去問大哥，我係咪得罪咗佢呢？係因為我都唔知呀，我知我就唔會得罪人啦，我根本就係唔知，所以我先至好想去問大哥，因為啲人同我講過大哥成日話：『提起呢個人（靚靚）佢都嬲啊！』咁我喺另一個角度去睇，我覺得我都40啦，咁我諗大哥都唔細啦，我哋已經叫做行咗人生嘅一啲路，我唔想大哥到咗某個年紀，提起一個人嘅時候仲會嬲，即係喺佛學嗰度睇呢，千祈唔好對人起怨恨心，我唔想佢係咁，我想佢身體健康快快樂樂，如果嗰個人令到你咁嬲，點解你唔去令佢釋懷呢，所以我嗰日特登跑落去，就係問大哥呢樣嘢。」
咁依家有冇人令靚靚有怨恨心？佢坦言：「咁梗係有啦，但我選擇唔會憎一個人，我反而漠視佢，我覺得我仲快樂。我對朋友係100%付出，我唔係要你100%對我，但唔好出賣我，打個譬如就係，如果你嚟同我講佢嘅壞話，我唔理真好假好，我只有兩個反應，我一係就唔出聲，一係就同你撐到底，我係唔會同你一齊去講佢嘅壞話，我個人係咁㗎，如果俾我知道，我嗰個所謂朋友聽到一啲我嘅嘢，佢唔理係真定係假，佢唔去保護我，呢個人冇㗎啦，唔會喺我朋友list度。」
靚靚覺得身為朋友，應該好了解佢嘅人格：「但冇去幫我，仲去踩多一腳，我覺得仲慘過佢呃我錢。」靚靚話曾被兩三個朋友出賣，問到係咪已經冇朋友做？靚靚表示：「因為我老公曾經同我講過，多一個朋友好過多一個小人係你身邊，所以我依家會係…我會假囉對佢，唔好再俾佢插多刀囉。」
(蘋果日報)
由人父級的陳詠謙及細So主持的ViuTV節目《晚吹Daddy Kingdom》，以「不正經」角度大談湊仔經，今集邀請柳俊江任嘉賓，分享他與太太及一對仔女的親子家庭樂。一向給人穩重感覺的他笑言以前並非乖仔，有了家庭後「改邪歸正」：「我細個好愛自由，係想做就做嘅人，自己周遊列國旅行，父母覺得我冇為將來打算，有一年我成績差到差啲被踢出校，怕爸爸會鬧，最後爸爸鬧我，仲同我講『係咪盡咗力？盡咗力就得喇！』」他因為爸爸這一席話努力讀書，最後考到第一名。
他表示有了家庭後一切決定都以家人為重，並指湊小朋友不太困難，照顧太太才最難，因太太生完小朋友後，可能會緊張而影響情緒、賀爾蒙失調或餵人奶的不適等問題，作為男士未能身同感受之餘，更愛莫能助而感到灰心，他笑言自己更一度「撼頭埋牆」，他指當兩夫妻情緒激動時，他會平靜下來，切忌「贏咗場交，輸咗頭家」。現在他更在社交媒體中寫出人生道理，自認雖然未必一一做到，但可以定下目標，藉此警惕自己。
對於仔女期望，他表示現今已經沒有「老竇養仔，仔養老竇」的心態，只要仔女長大後，能夠背負自己責任就可以。
柳俊江與太太
(ON.CC)
以前拍劇題材比較貼近生活事，好似1994年《餐餐有宋家》呢套處境劇，就係講基層、白領中產等社會現象，同埋講出回流家庭返港面對嘅問題，講出當時港人心聲。
劇中講演「常開心」嘅盧宛茵早年喪夫，獨力撫養四個子女，有「宋金」尹揚明、「宋銀」林偉、「宋富」黃金己瑩、「宋貴」古天樂，而宣萱同古仔係拍《餐》而認識，演古仔表妹，角色討好，令宣萱同古仔火速入屋，成為匹配嘅螢幕情侶。
宣萱昨天貼出「餐餐有宋家」大合照，原來佢哋約埋出嚟飲茶，宣萱更祝大家開工大吉，相中有宣萱、尹揚明、盧宛茵、陳曼娜、梁葆貞、梁家仁、黃金己瑩同鄧兆尊，相隔24年，佢哋仍然感情友好。
唔少網民都問點解唔見「阿貴」古仔，至於曾演「牛頭角順嫂」嘅梁葆貞早年移居加拿大，現時只係每年返嚟香港，見下啲親友。
(蘋果日報)
不少藝人平日工作繁忙，但都會趁空閒時間低調行善，絕對值得嘉許！前港姐冠軍陳凱琳（Grace）日前趁新年假期與好友齊齊做義工，更素顏上陣，與張彥博、利穎怡（Joan）、郭千瑜（Mina）、伍庭熾（Tecki）及符曦月探訪深水埗區露宿者及長者，並出錢出力派發物資、食物及飲品，發放正能量，果然善心爆棚！
Grace表示Mina一直自發做義工，今次趁有假期特地參與活動，覺得非常有意義：「新年期間想送啲祝福畀露宿者同公公婆婆，大家都唔貪心，每人只係拎一份，亦都好有禮貌，令我哋都好溫暖，之後有時間都想多啲參與慈善活動。」至於Mina及Joan每逢節日都會做義工，新年行善更覺得份外有意義，Tecki說：「希望多啲人關心身邊被忽略嘅老人家，今次識到班社工，知道露宿者需要好多物資，除咗食物同水之外，仲有衣物同沖涼液，做過探訪之後，更加知道社會上係有好多露宿者需要幫忙，希望愈來愈多人會做善事幫更多嘅人。」
韓國前女團Wonder Girls（WG）嘅先藝，2013年結婚後就專注於家庭生活，現時育有兩個女嘅佢更係全職湊女。
先藝不時於Instagram公開兩個寶貝女嘅新相，今日佢就公開囡囡嘅賣萌新相，大晒家庭樂。
另外，先藝早前拍攝節目《異邦人》，於日前播出一集中，佢就提到自己於家中生B一事，表示：「喺屋企生BB令我感覺好舒服，因為加拿大對於我嚟講係陌生嘅環境，我唔想係唔熟識嘅地方，例如醫院生BB。」先藝又透露，如果生第三個BB時，佢都會揀喺屋企生。
先藝於節目中解釋堅持喺屋企生BB嘅原因
(Apple Daily)
