依家生活好幸福。。。

現年38歲嘅小雪（原名蔡雪敏）肓有一子一女，經過多年尋尋覓覓，15年三度出嫁，同年輕四歲嘅韓籍老公Robin Cheung再組家庭，去年12月底更於韓國補辦婚宴，當日小雪著上韓式結婚服，以韓文宣讀誓言，場面感人。

小雪趁喺澳洲升學嘅一對子女有長假期，日前攜同佢哋返港度假兼探望家人及朋友，當中包括當年同佢同一間唱片公司嘅漢洋，兩人仲相約到卡拉OK，重唱當年經典hit爆K場嘅合唱歌《其實我介意》。

睇返自己當年個樣，小雪不禁大笑，指自己似村姑，又笑漢洋嘅髮型太搞笑。漢洋就憶述當年跟小雪合唱出現一波幾折，笑指：「佢當年係公司最紅，度佢嘅期好難！」在旁嘅小雪即時否認，仲話自己只係平民百姓。不過，漢洋就爆二人合唱嘅《其實我介意》，呢個版本其實係小雪嘅試唱版，因為她根本冇時間錄音，最後唯有用試唱版推出。

小雪又被漢洋爆當年經常「跳掣」，有時會發脾氣，小雪亦承認當時年紀細，責任心冇咁重：「嗰時只係覺得打份工，甚至唔當自己係一個歌手，只係覺得有啲簡單嘅嘢點解做咁耐，做咗阿媽諗法當然唔同晒，有人同我講番我以前做嘅嘢，我都唔信自己會咁做。」不過，小雪慶幸當年大家都知道佢冇心，如果唔係身邊就冇咁多舊朋友。

2004年同唱片公司解約後，嫁俾永安旅遊榮譽主席陳若偉兒子陳迅元，並淡出娛樂圈，同年誕下女兒Ronni。正當外界以為小雪專心做少奶奶、湊女為樂之時，陳迅元被揭偷食「大乳牛」蔡慧敏，其後離婚收場。

到08年小雪帶住女兒Ronni再嫁，第二任丈夫為陳姓澳洲籍華人，兩人之間育有一子Rocco。不過呢段婚姻都係唔幸福，只係掛名夫妻，最後捱到2014年3月小雪再度離婚。

當年為愛情放棄事業，小雪表示冇後悔，亦不會再憎恨任何人：「如果冇以前嗰兩個人（兩個前夫）我可能唔會成長得咁快，我o依家教仔女都係，唔好去埋怨，好似去一間人人話好味嘅餐廳食飯，最後覺得唔好味就下餐去第二度食過，因為有得食已經好幸福。」

小雪話佢最開心係一對子女冇因為親生爸爸唔喺身邊而唔開心，因為佢哋自細已經習慣同小雪一起生活，而且現任老公亦都好疼鍚一對子女。

不過小雪早前喺韓國補行婚禮，用韓文宣誓有啲「甩cut」，佢笑言：「我嗰個年代鍾意日文㗎嘛，我日文就講到，但韓文真係冇乜興趣，次次想學都想瞓覺，不過嚟緊都會學，冇理由第日結婚10年都仲未識講，反而對仔女都講到喇！」

(蘋果日報)

吳佩慈為百億男友紀曉波目前生咗兩男一女，不過未有「封肚」，早前疑似喺大陸一個網上平台分享扮靚心得，介紹護理懷孕肚皮嘅產品，原來吳佩慈仲想追多一個。

佢自知生完三個B之後，要一直堅持用護理產品養好肚皮，「連續生了3個小孩子，肚皮怎麼都不比從前，畢竟4年連續吹脹3次還是破壞度不小的」，之但係吳佩慈仲未生夠，喺文中預告ready生第四胎，「我得把它養好了應付生老四啊」，佢直言人生已經進入「肚皮比臉皮重要」嘅階段。

有網民好奇問：「已經懷第四胎了嗎？」吳佩慈回應：「沒有，尚未休息夠。」亦有網民疑問為甚麼咁愛生小朋友，吳佩慈就話：「我愛，我喜歡大家庭的感覺。」

另一網民話冇諗過一直貪靚嘅吳佩慈又想再生B，話生B好辛苦，問吳佩慈生三個唔夠嗎?吳佩慈寫道：「哈哈，我媽也一直這麼說。」

不過呢個大陸平台中，呢個吳佩慈用戶雖然有「官方認證」不過係咪真係佢本人真係有待確認。

吳佩慈未婚夫紀曉波、準婆婆崔麗杰喺塞班島投資興建酒店、度假村與賭場等，吳佩慈為紀家繼後香燈，紀家送禮從不手軟，無論係紀曉波當初送價值696萬港元嘅10卡鑽戒、約110萬港元卡地亞美洲豹腕錶、市值4120萬港元豪宅，ANNA HU貴芙蓉公主版與皇后版母女戒等，去年生完細仔Hudson，「婆婆」崔麗杰更送價約2600萬港元嘅10.4克拉巨鑽，可見吳佩慈喺紀家嘅地位幾重要。

(蘋果日報)