【12年婚姻長期分隔兩地】承認已經簽紙離婚

2018-01-23

宣佈結束十二年婚姻，二人於2006年3月結婚，不過婚後因分隔兩地。。。

現年42歲嘅綜藝節目《兩天一夜》男星金俊浩，今日跟話劇演員金恩英正式簽紙離婚，結束近12年嘅婚姻。

金俊浩跟金恩英於2006年3月結婚，不過結婚後金恩英為事業而長居海外，二人因分隔兩地而且性格不合，最終協議離婚，經過一個多月嘅調停程序，於今日正式簽紙離婚。金俊浩其後承認離婚一事，表示雙方係協議離婚，希望外界唔好有過多揣測。

(蘋果日報)

【刻意保持距離】鄭俊弘何雁詩秘遊日本

2018-01-23

何雁詩同鄭俊弘（Fred）前年10月到美國拍大台節目秘撻，兩人瞞戀近半年，Fred被當時嘅未婚妻踢爆偷食，最後Fred情歸新歡何雁詩，去年4月兩人終於拖手認愛；不過，佢哋公開戀情後承受唔少壓力，拍拖冇耐已頻傳情變，但踏入2018年，兩人原來趁新年後蜜遊東京，撥行火為戀情升溫。

日前讀者波先生喺新宿見到何雁詩同鄭俊弘，透過「爆相爆片」分享兩人嘅戀事，25歲嘅何雁詩少女心爆棚鍾意玩夾公仔：「嗰晚11點幾，見到佢哋喺新宿一間舖頭夾比卡超公仔，當時何小姐好努力咁夾公仔，但鄭生就企喺側邊冇幫手夾，有時望兩眼女友夾成點，但幾乎全程都係周圍望，好似驚死被香港人發現影相咁。」

從讀者提供相片所見，兩人都戴咗韓星至愛嘅黑色口罩遮樣，反而更加令人留意佢哋，何雁詩着住銀色羽絨好搶眼，讀者表示：「佢哋夾咗一陣公仔，何小姐夾極都夾唔到隻比卡超，最後空手而回，兩人離開鋪頭冇拖手冇攬腰，刻意保持距離。」

曾經患情緒病嘅何雁詩，因為戀上鄭俊弘被指係第三者，公開戀情後受到唔少壓力，甚至有傳何雁詩因情緒問題自殘，每次露面都係着長袖衫遮手臂，去年尾兩人更傳虐狗風波，依家雙雙去日本風流快活，相信感情應該經得起考驗。問到何雁詩係咪同男友去預支蜜月？佢以微笑同拜託手勢emoji回覆，似乎想低調保護戀情。

(蘋果日報)

【湊仔經】模媽張穎沁最擔心囝囝識女：驚佢學壞！

2018-01-23

模特兒張穎沁（Pamela）雖然有童顏外表，但其實已育有一歲大的兒子Adam，早前Pamela推出新書分享新手媽咪的心路歷程並舉行活動宣傳，請來林奕匡太太Rikko擔任司儀，問到為何會想寫這本書？

張穎沁就話最驚就係囝囝學壞！

Pamela說：「一直都想寫書，但未搵到適合題材，到大肚時覺得好似我去到一個未去過嘅領域，想紀錄呢幾年經過嘅嘢，分享畀一班準媽媽，畀佢哋多啲心理準備。」

最近佢就出咗新書。

活動上Adam亦有粉墨登場，還主動笑晒跟觀眾Say Hi，完全不怕見到陌生人，氹到現場人士非常開心，超級可愛！問Pamela最擔心囝囝甚麼？她笑說：「擔心佢識女仔，好快有女友，仲有驚佢會變壞，希望佢乖乖地健健康康。」

囝囝仲喺活動期間上台獻花！好可愛呀～

此外，當日Pamela老公不在港，但特別預早訂了花送驚喜，並由囝囝負責送上，Pamela說：「老公將我手機號碼畀咗花店，所以我知有人送花，但冇諗到係老公，所以都好Surprise！」

(東方日報)

【喺麗思卡爾頓酒店擺酒】升呢做人妻：我忍唔住喊咗

2018-01-23

可以找到人生另一半並非易事。。。

名模熊黛林的師妹陳詩雅（Sarah）昨日與圈外男友Leslie拉埋天窗。早上先進行接新娘及玩新郎儀式，晚上再於麗思卡爾頓酒店筵開逾20席廣宴親朋。

Sarah表示心情非常開心，因為可以找到人生另一半並非易事，而且之前為籌備婚禮而忙得不可開交，現在終於完成一件人生大事。除了開心，Sarah亦流下感動的眼淚，她說：「我斟完茶畀父母，媽媽將嫲嫲生前買畀我嘅嫁妝送畀我嘅時候，我忍唔住喊咗，同埋都感受到父母好唔捨得我。」

問到老公有否向她發表愛的宣言？她坦言：「本來玩新郎環節上要佢講愛的宣言，但因為佢太緊張，臨時要講但佢乜都諗唔到，所以我最後都係放過佢。」

雖然老公講唔出愛的宣言，但Sarah一樣畀老公超滿分：「我畀佢105分！佢最大優點係畀到安全感我，而且佢容許我任性，對於佢嘅體諒，我係好欣賞。」

至於婚後，Sarah稱會繼續工作，但都希望可以盡快生B，展開人生另一階段。

(on.cc東網)

【過唔到酒精測試】Benz失控撞欄　梁漢文涉嫌醉駕被捕！

2018-01-23

歌手梁漢文（Edmond）涉嫌醉駕被捕。消息指於凌晨1時許，Edmond駕駛平治房車沿港島半山羅便臣道行駛，途至近花園台一個彎位時，突然失控撞向左邊鐵欄後停下。房車內的安全氣袋彈出、左邊車頭嚴重損毀，車上司機Edmond並無受傷。警員到場調查後，惟他未能通過酒精呼氣測試，更出現「吹爆錶」狀況，較法定上限22度高出數倍。Edmond涉嫌「酒後駕駛」被捕送往中區警署調查。

梁漢文獲准保釋。

梁漢文乘的士離開。

平治左車頭損毀。

現場位於羅便臣道近花園道交界花園台。

房車安全氣袋彈出。

約凌晨5時，Edmond獲准保釋後，戴着太陽眼鏡及冷帽的他獨自截乘的士離開警署，期間他於後座用手機與人傾談，當發現有記者在警署閘外守候並拍攝時，隨即以手機遮面及耷低頭躲避。而東網正就事件致電梁漢文，但暫時未有回覆。

(東方日報)

【鬼祟去…】凌晨捕獲陳凱琳鄭嘉穎~

2018-01-23

48歲的鄭嘉穎與26歲的陳凱琳（Grace）雖然相差22歲，但無阻父女戀發展，二人拍拖兩年多以來亦甜蜜蜜，早前Grace已開到口自爆計劃兩年內拉埋天窗，更憧憬陽光與海灘的婚禮，感情穩定的兩人早已於男方位於大坑的寓所同居，日前他倆還於深夜時分，急趕往銅鑼灣通宵營業的超市大掃必需品。

當晚大約凌晨十二時，雙雙戴上鴨舌帽的鄭嘉穎及Grace，拍住拖前往銅鑼灣的超市，見兩人推着購物車四處穿梭，期間亦有商有量傾唔停，Grace還拿着食品與男友研究，不過嘉穎全程表現得極為鬼祟，見他不時頭耷耷，未幾兩人已掃了不少食品及家居必需品。

及後他們往排隊付款時，嘉穎見引來顧客目光，更顯得甚為避忌拉低帽子，反而緊隨男友的Grace則頻頻四圍望，付款後他們極速抽着大袋戰利品閃人，急趕乘車返歸二人世界。

此外另一日Grace於銅鑼灣工作後，便於友人陪同下往乘的士，匆匆趕回男友大坑寓所。

(on.cc東網)

【樓價難負擔】國際報告：悉尼僅次香港排第二

2018-01-23

Victoria Harbour, Hong Kong, shot from the Peak.

最新數字顯示，澳洲五大城巿的房價仍然保持在「嚴重不可負擔的水平」，當中雪梨房價難負擔的程度，繼續僅次於香港排世界第二。

今次是研究組織 Demographia 連續第 14 年發表「國際房巿負擔能力報告」。報告指香港樓價與家庭入息中位數比較為 19.4 倍排第一、雪梨為 12.9 倍排第二、溫哥華 12.6 倍排第三、墨爾本以 9.9 倍排第五，有機會衝突 10 倍的歷史關口。

去年發表報告時，墨爾本首度超越溫哥華，今次再度被溫哥華趕上。至於阿德雷德、布里斯本和柏斯，就分別排第 16、18 和 21，房價與家庭入息中位數分別是 6.6 倍、6.3 倍和 5.9 倍。

根據報告定義，樓價與家庭入息中位數的比例達至 5.1 倍，就屬於「嚴重不可負擔」。

1 香港　19.4
2 雪梨　12.9
3 溫哥華 12.6
4 聖荷西 10.3
5 墨爾本 9.9
6 洛磯山 9.4
7 檀香山 9.2
8 三蕃巿 9.1
9 奧克蘭 8.8
10 倫敦 8.5
16 阿德雷德 6.6
18 布里斯本 6.3
21 柏斯 5.9

（SBS）

【旁人急叫報警】馬景濤強吻劉嘉玲尷尬：嚇死我了！

2018-01-22

劉嘉玲貴為影后級巨星，一向高貴大方、處事淡定，不過噚晚去騰訊節目《吐槽大會》，馬景濤一見劉嘉玲，即撲上前將嘉玲成個人抱起，轉咗一圈，更向鏡頭大叫「克制克制克制」，再大叫「劉嘉玲」，情緒相當亢奮，仲捉住嘉玲強吻，見慣風浪嘅嘉玲都被佢嚇死，但係依然大方企喺佢隔籬，未有太大反應，反而旁人起哄叫「報警吧」。

劉嘉玲當日做節目嘉賓，由於節目係「吐槽」為主，難免互相戲弄同開玩笑，主持人先笑言因為冇錢，請唔到影帝梁朝偉，但是請到同嘉玲有淵源嘅「咆哮帝」馬景濤，接著馬景濤被cue上台，點知場面即一發不可收拾，馬景濤先又抱又錫嘉玲，展開Talk Show，馬景濤仍然好自high，不斷大叫同一句話，自嘲：「我算甚麼啊，我不過就是一個懂得歇斯底里，懂得去咆哮的一個人！」

成個Talk Show氣氛都好尷尬，其他來賓「你眼望我眼」，好似唔知點算好，全場氣氛冷卻，有來賓甚至遮面同反白眼。有網民懷疑馬景濤可能飲醉咗先上節目，或者自high當咗係個人Talk Show咁去演出，疑似「發台瘟」，唔少人都戥嘉玲被強吻而心痛。

馬景濤微博截圖

馬景濤今日喺微博直認當日不小心表現過火，有爭取補錄去半夜3點，對於網上負評，佢表示接受：「失敗就是失敗了，也願意為此擔當首次脫口秀(Talk Show)不良結果。不論是喜歡我的、討厭我的，因此離開我的粉絲，我都為此真誠地向大家道個歉！」對於網民懷疑佢「喝了再上」，他指「這個鍋我不背」，並透露錄影前根本「沒吃東西」。

馬景濤微博截圖

(蘋果日報)

【五年抱四】啱啱生咗第五胎喇！

2018-01-22

現年38歲日模椋名凜（Rin），10年奉子成婚嫁給同鄉老公高村直樹，結婚五年抱四，已育有一子一女及一對龍鳳胎，生完孖B，Rin已話要封肚，點知話口未完，佢去年又宣佈懷有第五胎，前日仲生咗重約5.7磅孻女，母女平安。孻女五官好精緻，似足媽咪咁靚女。

Rin生完立即貼相(椋名凜IG圖片)

前日生咗5.7磅孻女

Rin日前喺社交網站報喜，佢生完立即貼相，可能生產經驗豐富，所以Rin話入院四粒鐘就生咗囡囡，真係好快，Rin用日文話：「長子看了初生妹妹，他最初有點害怕，但後來有親手撫摸妹妹的頭，他就很開心，現在我們是一家七口大家庭。」生產力驚人的Rin，佢本來預產期喺今日，但孻女點知早幾咗三日出世，趕住出嚟一家團聚。Rin現有6歲嘅長子哉衣，5歲嘅二女香里奈5歲，同一對2歲龍鳳胎就2歲，雖然子女年齡一級級，但Rin咁多個子女全部親力親自己湊，一於多啲嚟密啲手，佢笑言多湊一個都冇難度。