藝人鍾欣潼（阿嬌）今日37歲生日，好姊妹蔡卓妍（阿Sa）踏正十二點喺ig晒相送上祝賀，阿嬌留言：「我親愛的小嬌嬌 @q_gill 生日大快樂🎂 祝妳身體健康 事事順利❤️ 從18號開始陪妳切蛋糕到正日生日 哈哈 每個蛋糕都好好吃😋」睇番啲相，就未見到阿嬌男友賴弘國嘅蹤影，唔知係咪兩個都忙住做嘢，遲吓先補祝番生日呢？
而賴弘國上次更新ig，已經係2017年12月19日喇，唔通真係咁忙？？
仲要係單人黑白照 ！
(INSTAGRAM/ON.CC)
吳尊早排同兩女一仔一齊參加咗《爸爸去哪兒5》，節目中7歲嘅NeiNei已經帶住4歲嘅二弟Max形影不離，從節目中可以睇到呢對小姐弟好有禮貌同愛心，好明顯係父母教得好，而作為爸爸嘅吳尊對仔女嘅表現係好溫柔同耐心，令好多人睇到好感動，就因為呢個節目，佢同對仔女喺大陸都好高人氣。
可能因為啱啱做完節目，所以吳尊陪個女同老婆嚟香港度假，日前（19號），有讀者陳小姐爆相爆片影到佢一家三口出現喺尖沙咀海港城嘅玩具反斗城。
據讀者陳小姐話：「我下畫4點左右喺海港城撞見吳尊抱住個女，同老婆一齊行入玩具反斗城揀玩具，行街時睇到佢一路好照顧小朋友，買完玩具，佢哋一家人又入咗一個雪糕店買雪糕食。喺海港城逗留咗一粒鐘先至走。」
不過吳尊太太依然都係好神秘，點都睇唔到樣…
(蘋果日報)
現年48歲的台灣女星伊能靜於2016年誕下細女「小米粒」，有女萬事足嘅佢不時喺網上大晒同囡囡玩嘅相。呢日伊能靜就甫咗幾張同小米粒着住母女裝一齊行街街嘅相，網友都讚啲相好溫馨，仲話小米粒得意又可愛。
不過竟然有網民惡意留言，直指小米粒「像智障」，出名愛護囡囡嘅伊能靜即時爆發，喺網上留言反問該網友，話點解有人可以對小朋友講啲咁難聽嘅說話，仲問究竟係乜嘢教育可以令到人咁冇禮貌，又話：「真的希望你父母知道，你眼睛所看去的世界，為甚麼只有惡意。」
唔少網民都留言撐伊能靜話佢講得啱。之後伊能靜再發咗一段超長文字表示，希望大家面對小朋友時，無論對方外表如何，又或者身體有沒有問題，都可以用愛心去對待。
(on.cc東網)
星期日就係《萬千星輝頒獎禮2017》，唔少藝人都落力拉票，不過「游生」袁文傑就拉票之餘，順便「放閃」！
星期六晚「游生」係網上留言，話2017年對佢嚟講，好似「李斯特城奪英超」般咁神奇：「很感恩可以接到「游俊傑」游生這角色，多謝監製選中了我，亦令觀眾重新認識了袁文傑。而觀眾及網民的力撐，令我很感動，原來你們還記得我！」
佢又話：「更令我加入TVB不久就得到「最佳男配角」及「最受歡迎電視男角色」的提名，真的讓我喜出望外！很多謝「不懂撒嬌的女人」的台前幕後，在心中！」
之後「游生」開始「放閃」，話有一個人佢一直都想多謝，呢個就係佢女友張潔蓮：「以前我工作不多，而又醉心於網上電台講波，她十分支持我的興趣，追逐我的夢想；我喜歡阿仙奴，她會陪住我睇波；她不介意陪著我迫地鐵； 不介意陪著我食茶餐廳；現在我工作多了，但陪伴她的時間少了，她亦如舊地默默在背後支持著我！」
最後佢話：「所以無論今次得獎與否，我都得到了很多額外的獎勵，最大的獎勵當然在背後的妳！而如果有幸得獎，希望可以將獎送給妳！」
另外，星期六佢同滕麗名、呂慧儀、單立文及林淑敏等趕劇，仲咁岩撞正係滕麗名42歲生日，成班齊齊為佢送上蛋糕慶祝，阿滕老公朱建崑亦驚喜到場！
(SINA)
喺90年代移民咗去溫哥華嘅菊姐關菊英，喺07年喺《溏心風暴》嘅細契角色而多咗人氣，連帶佢嘅私生活都受到關注。
菊姐24歲嗰年同黎小田結婚，但呢段婚姻只係維持咗好短時間。2007年，有傳菊姐同已故「公仔麵」大王周文軒嘅侄女周偉利（Willy）交往，直到08年，菊姐大方承認Willy嘅密友地位：「最緊要對我好錫我，男女冇所謂。」日前菊姐接受商台《1圈圈》訪問，重提當年與Willy關係曝光，佢話：「唔介意，如果唔係，我都唔會照直講喇，不過希望大家可以俾啲空間我哋。」
當年菊姐話過，只要對佢好，男女都冇所謂。到咗今日，菊姐依然好認同，仲話人生伴侶無性別之分：「最緊要係返到屋企有個伴，講吓今天發生啲乜嘢事，無論係開心、唔開心嘅嘢，都可以拎出嚟一齊分享。當你有病嘅時候，有一個人去關心你、陪你去睇醫生，噓寒問暖，呢啲係親人先會做得到！」
菊姐仲話：「我嘅父母喺2013及2014年先後過身，嗰陣有啲失落。人生事業高高低低，我都冇乜嘢強求，最重要係身邊有個人，好似親人咁錫我！」早前曾經有傳菊姐同Willy註冊結婚，菊姐笑笑口話：「呢啲只係傳言，對我嚟講，冇再婚嘅需要！」
(蘋果日報)
歌手謝安琪（Kay）到尖沙咀出席活動，與粉絲玩遊戲及獻唱《勢不兩立》。她直言掛住粉絲，唱歌期間更走到台下握手，氹得在場過百粉絲非常開心，尖叫不斷！受訪時，Kay透露正為女兒張靖搵過年服裝：「佢影相好上鏡，但真人仲係細細粒，依家9公斤左右，唔算大隻，要搵咁細嘅中國服都好頭痛。（自己造？）都可以，我媽咪針黹好叻。」
乜嘢都嗌爸爸
Kay形容家中氣氛因有BB而很開心，但坦言為女兒未懂叫自己而沮喪：「明明我湊最多，應該輪都輪我先，但唔知點解佢不停嗌爸爸張繼聰（阿聰），乜嘢都係嗌爸爸。冇計，可能我敵不過前世情人嘅魅力，但我長線應該會得嘅。」問到阿聰是否很囂張？Kay笑指對方不敢，因為自己真是辛苦湊女：「佢可能叫個女嗌媽咪，但心裏暗爽咁囉。（仔仔張瞻當時叫邊個先？）我先，一人一個啦，公平嘅。」
謝安琪感到好沮喪! 
合照~ 
同粉絲握手！ 
勤做運動
訪問期間Kay笑言緊張到流汗，其實是體質變好了：「我做好多運動，今朝7點幾就做Gym，跑步、舉鐵同焗桑拿，可能因為咁好熱。」她自言以前很怕凍，現在由寒底徹底改變，建議媽媽們多做運動：「冬天唔使着好多衫都夠暖。（老公有人肉暖包？）係咪好老婆？冬暖夏涼！（成日攬住你？）係囉，幾好吖。」至於過年會否一家去旅行？Kay指今年比較難，因為阿聰忙於拍劇：「乜都要就佢時間。（佢忙過你？）咁咪好囉！可以精簡工作。」
今年內出碟
至於出碟方面，Kay強調要一段時間：「我講定先，因為我啲歌迷好鍾意『追殺』我，如果我話『做緊』，佢哋第日就問我。（今年內出？）係。」她指麥浚龍（Juno）仍在拍電影，雙方已傾好新碟概念，兩人會共同監製，但未有時間與整個團隊傾：「我等緊佢返嚟，佢成日都喺外地，我推個責任畀佢先。（你身邊啲男人都好忙！）我旺囉！」
粉絲期待新碟！
（ON.CC）
「美魔女」周海媚（海味）雖然已經年屆半百，不過佢凍齡得宜，歲月好似喺佢身上、面上都冇乜留低痕跡咁，有3字頭嘅讀者，應該都有印象海味喺1994年播出嘅《倚天屠龍記》中演過周芷若，想當年，佢仲獲封為「最美的周芷若」，傳頌至今。
不過，周芷若都已經出咗唔止一代，都一樣會長大，當年嘅周芷若，今日已經「升呢」到做滅絕師太！
消息指，新一輯《倚天屠龍記》喺橫店開機拍攝，新一代嘅張無忌係現年20歲嘅曾舜晞，趙敏則係大陸女演員陳鈺琪，而海味升呢演滅絕師太，令唔少網友大嗌「升級了」，更有人話係好似新抱升做奶奶嘅感覺。
(蘋果日報)
本月23號是黃心穎的29歲生日，她在活動上表示會同緋聞男友馬國明簡單食飯祝賀，出席活動後更換上粉紅戰衣，於晚上7時許與三家姐黃心慧乘的士前往尖沙咀。心情大靚的心穎與家姐落車後，記者問她來這裏做甚麼？她說：「預早慶祝生日食飯，我依家好肚餓，好想快啲食嘢！」然後與家姐急急腳步往餐廳。
心穎擘大眼講大話
至晚上9時，心穎與屋企人齊齊步出。問到今日係咩日子？她說：「咁我就嚟生日，今日屋企人食啫！（馬國明呢？）佢（約咗）喺另外一日啦！（馬國明今日冇嚟？）…冇呀！我嚟緊都要飛，除咗聽日，如果咁樣都未必食到飯喇！」問到有冇同馬國明講過邊個攞獎，邊個就請食飯？心穎表示：「都會慶祝嘅，如果攞到獎嘅話，但係有冇獎都好，我自己生日都要慶祝嘅！」
馬國明忽然走後門
在心穎接受傳媒訪問時，馬國明為避開記者耳目，即鬼祟從另一門口急步閃出附近街頭跳上的士，他上車後即叫司機快啲開車，但當記者拍照時，坐在車上的他尷尬地揮手。
(on.cc東網)
男神余文樂早前同王棠云正式入紙註冊，成為夫妻！一直盛傳有喜嘅「樂嫂」王棠云早前瘋狂食嘢，又去玩B取經學做媽媽。
去做運動。
(on.cc)
藝人宣萱以評判身份到電台出席中學生聲演比賽。宣萱甫出現即難過地表示日前自己一隻十歲的狗過咗身：「隻狗突然之間走咗，因為之前都走過九隻，今次係第十次喇，但未試過咁突然，亦都係我第一隻狗自己選擇離開，唔使打針，之前每一隻都係老或者病，然後決定幫佢哋安樂死，呢隻就唔使。只可以向好嗰方面睇，之前唔知咩事，臨走照ultrasound（超聲波）先知係生咗腫瘤，依家同動物組織傾緊，因為我之前都有一隻試過係咁，希望find out到究竟係咩原因。」
宣萱坦言心情未平復：「心裏面唔舒服嘅，每一次都好唔開心，但會過度到嘅，呢一隻係我第一次選擇去領養一隻中年狗，希望做到一個先河去宣揚令啲愛狗嘅人去選擇呢啲中年嘅狗，因為佢哋通常都係最後先畀人揀，希望啲人唔好淨係要狗仔，都畀年紀大嘅一個家。（呢隻狗你養咗幾耐？）呢隻四、五年左右，我冇後悔就係自己畀到四、五年好開心嘅生活佢。」
另一隻狗狗愁爆
宣萱又眼紅紅憶述愛犬離世經過：「佢係喺診所走嘅，有一晚我半夜返到去發覺佢有啲唔妥，佢突然之間喺度好似搵窿捐咁，我就有不祥嘅感覺，我知道唐狗如果知道自己要走就會想匿埋，半夜兩點幾我選擇帶佢去睇急症，急症都睇唔出啲咩，話今晚可能冇事嘅，畀咗啲藥我，話可能係發炎。第二朝我突然紮醒，喺我房聞到一陣狗或者人將要離去嘅時候會發出嘅氣味，係好強，因為之前都試過，我就嘭一聲彈起身，即刻開門，佢就瞓喺我門邊，佢從來冇試過，我諗係佢知道自己好有問題，見到我就成隻狗好似『發羊吊』，周圍撞，當時好難搞，我冇經歷過，先至再去睇，去照x-ray，照咗之後就發現有個腫瘤，搞到佢『發羊吊，已經冇嘢可以做到。身邊朋友都好好，即刻出來陪我傾偈。（要開始處理佢嘅身後事？）今日啱啱約咗時間，排期一個禮拜左右去火化。都慶幸佢唔使suffer好耐，十幾個鐘之後就去咗，如果唔係咁可能要遭受好幾個月嘅折磨。自己都不斷反省究竟呢一兩年有冇留意到佢有咩唔同，其實係有，但你就係唔會聯想到係呢樣嘢，瞓多咗都以為只係年紀大咗。都經歷過九次，我識handle，只係依家返到去間屋突然靜咗好多。（屋企仲有養狗？）有嘅，仲有一隻，嗰隻就好慘，因為佢哋好friend，嗰隻後生啲，睇得出佢都好徬徨，唔知點算，到我哋返來話佢知嗰隻走咗喇，佢到今日仲係好愁好唔開心，因為冇咗個朋友。（點樣安撫佢？）冇呀攬佢多啲錫佢多啲，希望狗會容易過到，但呢隻就比較多嘢諗。」
眼紅紅地說狗狗病逝
但她卻未肯定會否出席明天（21日）無綫台慶頒獎禮，「見到就見，見不到就出年見啦！不過好多謝安仔（郭晉安）、鮑姐（鮑起靜）點名支持我，已覺得好滿足，出街好多街坊都說睇好我，我好開心﹗（是否打定輸數？）隨緣啦﹗攞獎這些事講好多因素，覺得現在應該先處理好生活上的事先，不應該只顧頒獎禮，最近我有隻狗病逝，家中剩下最後一隻狗，失去朋友很不開心，我都需要花時間照顧。」
（ON.CC / 明報）
