亞視出身的陳煒和袁文傑，當年以最有潛質的新人姿態，1997年首次合作劇集《雪花神劍》，相隔21年，二人凍齡的外貌卻充滿人生的歷練，如今再度合作無綫新劇有着很不同的感覺，享受大家「進化」之餘，更欣慰各有成就，煒哥感觸說：「係爭氣嘅成果！」

勇字行頭 關心後輩

1996年亞姐冠軍陳煒過檔無綫後，雖年屆中女，但依然躋身一眾小花中，以「江湖阿嫂」形象殺出血路，在無綫新劇《果欄中的江湖大嫂》擔當女一位置，就連影后楊千嬅都愛她年前劇集《梟雄》的演出，二人更會在無綫重頭劇《多功能老婆》演閨蜜，相信必定擦出火花，因煒哥與千嬅都是「勇」字行頭，戲內戲外相信同樣能成為閨蜜。

其實煒哥的歷練，打從選美至劇接劇而煉成，可說是給現今小花一個奮鬥目標。今次她在《果》劇與岑麗香和馮盈盈合作，煒哥坦言三人感情要好：「我哋都係選美出身，明白佢哋遇到嘅問題，大家都好多交流。佢兩個都好乖，做晒功課先入廠，佢哋都有自己嘅意見，唔敢講話咩提點，新人最需要係關心，我成日會請佢哋食嘢，佢哋已經覺得好Sweet。」

凍齡拍檔 添成熟味

煒哥何止是小花偶像，就連舊拍檔袁文傑亦視她為女神。早於1997年，二人首次在亞視合作劇集《雪花神劍》，當年大家都很年輕，如今相隔21年再次在無綫碰頭兼演情侶，兩人的外貌均冇走樣，只是多了一份成熟味道。袁文傑說：「我仲記得當時未簽無綫，入嚟傾約時坐喺餐廳周圍望，好記得嗰次我見到煒哥行過，佢同我講叫我快啲簽。」

後來袁文傑憑劇集《不懂撒嬌的女人》角色「游生」升呢，有這個成果，他非常感恩，故面對舊拍檔時憶起很多回憶，更特別多謝他的恩師：「我要多謝當年夠膽搵我呢個新人做男一嘅阿叔（蕭笙），佢真係我恩師。嗰時我乜嘢演戲經驗都冇就拍《雪》劇，阿叔畀好多機會我，我同煒哥當年合作，大家都新，互相關照啦。我覺得煒哥好有衝勁，仲記得當年我哋一齊幫手拉威吔，都係一種團隊精神嘅表現，拉邊個呢？好似係楊恭如，哈哈！時至今日，相隔咁多年，再喺無綫見番煒哥，嗰日一齊拍第一場戲，我真係好觸動，所以要即刻影番張相留念。」

人到中年 大把市場

煒哥重遇袁文傑又何嘗不是感觸萬分！她說：「今次見番佢，發展好似火箭咁上位，呢個係佢應得，本身亦有條件，係爭氣嘅成果，所以我好欣慰，因為之前佢都被埋沒咗一段時間，發展好似停頓咗。不過人生嘅際遇真係好緊要，真係冇得解釋，男士到呢個年紀仲有市場，我都好戥佢開心。」

其實煒哥不用羨慕袁文傑，因為即使年屆44歲「中女」的她同樣有市場，其心理質素亦保持最佳狀態，所以從少女角色「過渡」中女階段，煒哥可謂游刃有餘。她說：「持續到人氣我都好開心，因為我哋係真心喜歡演戲，放咗好多時間，成果係相輔相成。做呢行心態好重要，如果唔係全情投入，係好難做。不過呢行都好講運氣，男仔好啲，演齡長啲，女嘅就有掙扎位，要保持位置，一啲都唔易。都知自己唔係十八廿二，惟有盡量做好自己範疇，等監製認同自己。」

講到男神，一定唔可以唔提早前憑無綫劇《溏心風暴3》而人氣爆燈嘅唐文龍（Michael），皆因劇中佢不時大晒44吋胸肌，個樣咁多年都冇變過，好似食咗防腐劑一樣，好多觀眾都話依家嘅佢多咗份男人味，簡直Man爆！

參加過新秀

不過其實Michael除咗係實力演技派，原來都係唱得之人，佢喺1993年參加過新秀歌唱比賽，喺台灣出過國語唱片。近日佢上無綫節目《流行經典50年》，唱番當年佢喺台灣發行首張唱片入面嘅歌曲《我要怎麼知道你愛我如果我們永遠不說》，而無綫TVB Facebook官方專頁就上載咗呢段片畀觀眾重溫。其實唔少網民見到Michael首歌嘅歌名咁長嘅時候，都話覺得好搞笑。

眼神迷倒網民

到Michael一開聲，大家即大讚有料到喎！最緊要係Michael一口氣唱出成17個字咁長嘅歌詞，完全面不改容，唱得不知幾咁投入同深情，講真你估中間冇抖氣位，係咁易唱咩，要有番啲實力先唱到㗎！網民睇完呢段片唔止畀Michael嘅眼神迷倒，仲話愛你嘅說話一定會講出口，Love you，大家都係冷靜啲先！

網民有話兒：

KCXVBXXM：唐文龍依然有台風。
GIVVWXASXX：靚仔有型之外仲要唱得咁好。
NXXLE LXI：成熟男人魅力十足。
DISAXZZ BXX：水蛇春咁長嘅歌名，好好笑！