藝人陳瀅接受訪問時，透露今年係第一次參加比賽，所以叫咗幾位朋友一齊參加。
問到點解唔叫埋緋聞男友羅天宇一齊參加？陳瀅即話：「哈哈哈哈！唔好咁講啦，本身都係friend，唔係好鍾意畀人講。（有傳羅天宇冧你？）冇咁嘅事，可能係上年一齊拍劇時演情侶有呢個位畀人寫，加上自己又單身。（有冇feel？）冇！」
勁冧方力申
提到陳瀅還是單身，她即指住方力申（小方），並話對方係自己嘅男神。問到係咪因為羅天宇同湯洛雯分手所以要劃清界線？陳瀅坦言三人同屬朋友，自己透過湯洛雯認識羅天宇：「唔好無啦啦介入，睇到都覺得肉酸。你話套劇播做宣傳就話OK啫，依家又未播，所以有少少唔舒服。（羅天宇係你嗰type？）佢係好乖嘅男仔，比較慢，但係我好快，拍劇嗰時已經夾唔到，做朋友都OK。」
其後，陳瀅又話好欣賞小方經常做善事，心地又好。然後兩人影合照時，小方就笑言：「佢好識講嘢！」
(on.cc東網)
藝人方力申（小方）、鄧麗欣（Stephy）、任賢齊（小齊）、陳瀅、歐鎧淳及胡子彤早上出席慈善步行活動，舉行開步儀式時，Stephy先上台，然後小方就主動同Stephy握手，Stephy見到小方同自己握手，感到好驚訝，然後再猶豫咗1秒，再揞住心口，先伸手同小方握手。
其後當司儀伍家謙叫小齊上台，小方就示意小齊唔好上台住，之後就繼續同Stephy合照。
小方夠大方
接受訪問時，提到大會安排同Stephy唔同時段受訪，小方就話覺得分開做訪問好正常，因為大家唔同公司，笑言：「我都想一齊做，你知我個人好冇所謂。（咁一陣合照？）好，上年都有合照啦！」講到Stephy獲電影評論學會頒發影后獎項，小方就大讚對方當之無愧。
《美女廚房》改變自己
至於談到無綫開拍新一輯《美女廚房》大批網民都覺得應該要搵番小方做主持，小方表示網民都會有唔同反應：「不過做《美女廚房》改變咗我好多，以前個人好悶好拘謹，幫我成長咗好多，10年前嘅事喇，依家係唔同年代。」另外，他透露今日會挑戰15公里，但就因為拍戲同放假而冇乜操練，去年原本諗住可以拎到頭15名，不過今年就冇諗，寄望下年有好成績。
小方太大隻嚇親Stephy
Stephy接受訪問時，問到喺台上被小方嚇到，她笑言：「可能我唔夠瞓，呆吓呆吓，一擰轉身就見到個咁大隻嘅人，就嚇一嚇。（佢大隻咗好多？ ）可能係今日件衫嘅問題顯得有啲大隻，同埋原本rundown佢未上台嘅，佢早咗上台。」問到小方有冇恭喜Stephy奪獎，她直言對方一早就恭賀咗，兩人亦有私下見面，謂：「之前都見過面，係喺啲私人團體活動，唔係公開活動。」另外，問到Stephy唔夠精神可能完成步行，她指今次冇乜點樣操練。當記者話到小方都講咗同一番說話嘅時候，並提議Stephy同小方一齊操練，她笑言：「畀埋啲水佢拎，盡力而為啦！」
(on.cc東網)
灣仔駱克道175號-191號京城大廈4樓一間酒店，凌晨零時許，一名6歲男童被發現昏迷房內，頸有勒痕，其同行52歲外婆則懷疑曾用刀自戕，但無大礙；外婆其後跑出房間求助，職員於是報警。警方到場將昏迷男童及外婆送院救治，大批警員正在醫院及現場展開調查。至凌晨2時許，男童經搶救後不治，警方已將案件改列謀殺，交由灣仔警區重案組第2隊跟進。
據了解，兩婆孫居於沙田區，男童昨(17日)日由外婆帶往港島區遊玩，至下午5時許入住該酒店，至今日凌晨時分，男童被揭發疑遭人用繩勒頸致不省人事，警方曾在房間及升降機槽找尋該兇器。
據悉，男童疑患有過度活躍症，外婆疑獨力照顧孫仔至心力交瘁，有人聲稱「唔想佢(外孫)咁辛苦」才狠心下毒手。
據消息指，慘死6歲男童來自單親家庭，跟隨母親生活，與外婆同住。事發後，數名親友接報趕抵醫院了解事件。而涉謀殺外婆送院治理後，今晨3時許，由探員鎖上手扣及蒙頭押返警署通宵扣查，警員於醫院檢走一袋證物，包括疑屬於死者的迷彩背囊及布帶等證物，數名鑑證科人員抵達酒店搜證。
重案探員於酒店房間搜證，於床上發現一條疑勒斃男童的背囊帶，並檢走兩袋證物，包括床單，被鋪及一盒玩具等證物。一名年約40歲女管房由探員帶返警署協助調查。男童遺體由仵工舁送往殮房。
大廈閉路電視片段，拍到外婆於昨午5時16分，手抱熟睡中的孫兒進入酒店，並且孭有懷疑用來勒斃孫兒的背包。
據悉，男童疑患有過度活躍症，近日曾接受評估，但未確診，其外婆近日則需要接受精神科治療。
(東方日報)
余文樂喺舊年12月突然喺ig宣佈迎娶拍拖一年嘅台灣女友王棠云（Sarah），嗰陣有傳樂仔今次係雙喜臨門，不過當事人一直都有證實。早前樂嫂王棠云上載一張自拍照，透露自己已經好多年冇剪過短髮，於是有網民猜測佢係為懷孕做好準備。
日前Sarah又再更新ig，今次唔再係得半身嘅相，嗰張全身相雖然比較模糊，不過睇到佢著住鬆身衫，隱約見到佢肚凸凸添！
今日有周刊喺泰國見到余文樂同Sarah，好清楚見到Sarah肚凸凸，一如過往，當事人仍然封嘴唔講，只係喺ig貼咗啲旅行相。
原來今次唔係二人世界，同行嘅仲有樂媽、妹妹一家，樂仔同老婆貼咗啲泳衣相，Sarah當然只係得上半身嘅大頭相，妹妹就寫咗一大段hashtag，多謝二哥嘅安排，仲話多謝二嫂操刀影相添！
(蘋果日報)
45歲潮媽陳慧琳（Kelly）身型keep得好弗，大仔劉昇（蝦餃仔）話咁快已經8歲，細仔劉琛（小龍包）星期三（21日）就6歲生日，最近Kelly忙於籌備新碟，老公劉建浩（Alex）就做暖爸單拖湊仔，日前三父子趁周日到數碼港商場行街，被讀者李小姐透過「爆相爆片」分享，仲大讚Alex湊仔表現鐵漢柔情㖭。
李小姐接受《蘋果》電話訪問表示，星期日（11日）喺數碼港巧遇三父子：「大約5點，喺數碼港商場見到佢哋搭扶手電梯，開頭點解會留意到佢哋，因為兩個小朋友好大聲講英文，望一望咁熟口面，原來個男人係陳慧琳老公，但就唔見陳慧琳出現，Alex一個人湊兩個小朋友都幾矚目，聽到小龍包不停嗲要搵媽咪，蝦餃仔都嗲爸爸用英文講：『你乜嘢都話唔畀我！』」
只有8歲嘅蝦餃仔，遺傳咗媽咪嘅身型，生得又高又瘦，李小姐表示：「之後聽到爸爸：『好啦，不如我去下面戲院買可樂畀你，同埋我哋都返去啦，好冇呀？』」落咗扶身電梯之後，蝦餃仔乖乖跟喺爸爸身後行，小龍包就跳跳紥咁快步行去搭lift落戲院，李小姐大讚Alex：「佢好有耐性湊小朋友。」
《蘋果》聯絡Kelly了解，佢話嗰日要開工，所以由爸爸帶兩個仔去玩，仲大讚老公係暖男㖭，問到平日係咪冇畀囝囝飲汽水？Kelly坦言：「因為weekend先有得飲，小朋友飲太多汽水唔係咁好嘛。」講到小龍包不停嗲叫「媽咪」，Kelly即刻甜笑話：「好sweet呀！」
原來另一邊廂，Kelly亦都喺數碼港忙於籌備新碟，同日下晝5點幾，Kelly喺數碼港拍新歌MV，佢只係着住一件單薄嘅白色裇衫襯西褲，手持公事喼，戴副粗框眼鏡，成個女強人咁款英姿颯颯。攝製隊有成20幾人，十分大陣仗，佢哋喺一棟商業大廈嘅扶手電梯位拍攝，被工作人員重重包圍嘅Kelly，拍攝上扶手電梯嘅場景。
因為呢日係星期日，上面嘅寫字樓全部休息，冇乜人出入，所以Kelly拍攝時冇受到打擾。見到Kelly拍攝時，擺出側側頭望大玻璃窗似諗嘢嘅神情，見佢拍攝時都好勤力兼冇架子，應導演要求上上落落兩三次，都係拍同一個shot，務求攞最好嘅畫面，而一停機就即刻抽空背稿。
由於Kelly件白裇衫都好單薄，加上佢又超級怕凍，所以拍完呢個鏡頭後，助手馬上攞件褸畀Kelly披住保暖，大約拍咗10分鐘就搞掂離去轉景。照番時間推斷，Alex應該係帶兩個囝囝探媽咪班，等到媽咪取完景就父子三一齊走。
(蘋果日報)
杜汶澤自導自演嘅《空手道》入圍第13屆大阪亞洲電影節「競賽單元」部份，阿澤獲得電影節大會頒贈嘅「亞洲明星大獎」(Asia Star Award)，呢個獎旨在表揚喺電影有傑出表現嘅人，佢同老婆田蕊妮一齊到咗大阪接受榮譽。
阿澤幾個鐘前仲開心拎獎，點知個獎拎喺手未夠一日就「落地開花」……即係阿澤此行帶埋視后老婆田蕊妮去大阪，點知老婆摸下佢個獎就跣手跌落地，阿澤就爆哂粗留言話：「所以話每個成功嘅男人背後，都會有一個女人支持。我亦都唔例外。亞洲之星呢個獎，係表揚我過去對香港電影界嘅貢獻，點知食完飯，俾我老婆跣手一X掟爛X咗！佢差啲爆喊，而我心諗，我都未喊你喊乜膠呀？我只能夠講一句：『世事無常，到處都是修行的道場！』唯有繼續努力，第日有機會再攞過啦！我頂你個肺…….」
認真慘慘豬！而過咗一陣，田蕊妮都有轉貼阿澤嘅facebook po，仲話：「對唔住，對唔住，我真係好對唔住！」
講咗三次，真心道歉啊，相信阿澤都唔會放喺心嘅。
(蘋果日報)
張繼聰同李佳芯(Ali)今日喺銅鑼灣皇室堡出席活動，同現場觀眾玩遊戲兼唱歌，阿聰表示今年喺工作上有更多新嘗試，佢話：「尤其係電影同網劇上，有好多演員以前從未合作過，包括胡杏兒同阿Sa。」
Ali見到阿聰家庭樂，會唔會有衝動早日做媽媽？佢話：「我啱啱拍完《BB來了》，經歷到由完全未接觸過小朋友到熟晒手，但真係要做媽媽就一步步嚟，暫時工作行先。」近來拍緊劇會唔會冷落男朋友陳炳銓？佢話：「如果真係冷落嘅都冷落咗一段時間，OK嘅大家成年人，我哋亦都有共識唔需要日日見面。」但早前有報道指男友撻著趙碩之，Ali話：「據我所知嗰啲係舊相，當時做完嘢送人返屋企，至於係咪真撻著你就要問番當時人，我對佢好有信心，So Far我哋都好好，間唔中有呢啲報道都幾得意，為我哋平淡嘅生活增添情趣。」
男友陳炳銓（資料圖片）
(Apple Daily)
尋日3月16日係咩日子？咪就係胡杏兒老公Philip Lee（李乘德）生日囉，杏兒就為老公搞咗個生日派對，當然仔仔Brendan Lee都有為爸爸慶祝生日呢，佢哋一家三口都穿上家庭裝，杏兒穿深藍色低胸裙，Philip同仔仔就分別穿深藍色西裝同T恤，真係襯到絕一絕呀！見Brendan長大不少，眼仔睩睩嘴扁扁咁勁可愛，手腳仲好有肉地添，杏兒仲代仔仔留言話：「爹爹生日快樂！」
(on.cc)
入行42年的藝人余安安在電台明早播出的《舊日的足跡》接受主持車淑梅訪問，期間大談與契仔凌文龍的相識經過，以及重談多年來的感情經歷。
同爾冬陞初戀有段古
問到可有為自己尋找人生的理想伴侶？安安坦白說：「如果話冇追求者，係呃你嘅，但就緣分嚟講，咁多年嚟都未遇到一個值得一齊走完下半生嘅人。」余安安坦言自己的擇偶條件十分簡單，就是二人是否合得來，並且「有feel」。她回想14歲時，因香港酒店前的一具浮屍，便展開了與導演爾冬陞的初戀︰「當時我放學到海邊咖啡廳打躉，忽然有人大叫有浮屍，我哋走到人群中睇，我後面企咗一個猥瑣人，所以揮手請當時唔認識嘅小寶（爾冬陞）企喺我後面，就係咁我哋就開始拍拖。」金童玉女的八年戀情，終在意見和思想不合下結束，但二人至今見面仍是朋友。
同發哥閃婚閃離感「迷」
至於與周潤發（發哥）的閃婚經歷，余安安直言不願多提︰「就係因為太快咪出事囉，九個月內閃電結婚，又閃電離婚，感覺就係『迷』，哈哈，反正拖拉落去都冇乜意思，大家仲有漫長嘅人生要過。」經歷兩次婚姻觸礁，余安安感恩每位曾出現的伴侶，她認為無論能否走到最後，對方都是人生旅途上珍貴的伴侶。
為養家重返幕前
結束16年的婚姻後，余安安為了養家決定重返幕前︰「我十分感激當年梁家輝嘅鼓勵，令我度過心理關口，佢話『安安你呃我話緊張，其實乜事都冇，你咁掂使乜驚呀？』」就是這樣，余安安便開展了第二輪的演藝生涯，她笑言復出那天，竟然重返首次拍戲、穿着泳衣在大浪灣嬉水的同一位置，更有重生的感覺。
(on.cc)
童顔萬歲！！最近《三個女人一個因》都有擔當重要角色！！
35歲「宅男女神」孫慧雪於2016年同拍拖六年嘅圈外男友羅天彥(Edwin)拉埋天窗，婚後三個月即造人成功，點知初為人母，生完B曾患輕度產後抑鬱，情緒起伏較大，幸好老公體諒，盡量抽時間湊囝囝，阿雪本身性格都幾樂觀，所以病情並冇嚴重落去，現時已經冇晒事，可以做全職媽咪，陪住囝囝成長。
孫慧雪不時喺網上貼出囝囝相，更為囝囝開咗IG記錄生活點滴，今日孫慧雪喺IG貼出同囝囝Riley合照，留言：「今日媽媽陪BB一齊返playgroup~BB玩得好開心呀!」相中見囝囝啲表情同阿雪一樣，唔少網民都讚阿雪個樣好後生，生完B都冇咩點變，「雪媽媽同Riley寶寶都好可愛」、「表情好似」，另有網民稱阿雪好似逆齡生長：「明明睇落係兩姊弟。」
(Apple Daily)
