【出外+家中都適用】日本節目教你穿衣保暖大法

2018-01-10

香港天文台天氣概況提到：「天氣寒冷、寒冷天氣將會持續數天」，氣溫直到星期日（1 月 14 日）才會明顯回升。因此相信大家這幾天會感到寒氣迫人，為了保暖不惜「犧牲形象」，穿齊家中所有衣物變米芝蓮人也在所不計。其實大家有否想過，日本明明比香港還要冷，但何解日本人可以穿極少衣物都感覺暖笠笠呢？原來日本電視節目早有答案。不論穿衣出外，還是在家中蓋被睡覺，都是靠 Layer 護身，現在就看看節目中所提之 3 招冬日保暖大法！

1）出外適用：4 層穿衣暖笠笠

其實未必穿得多衣服就等於保暖，只要施展小技，也可感到暖和。秘訣就是先穿貼身保暖內衣，之後穿一件寬鬆衣物，以寬鬆衣服和貼身內衣之間的空氣，帶動保暖作用。然後要穿一件手袖位收窄的衣物，透過收窄位置鎖住空氣不易散去，從而加強保暖，之後再穿自己喜歡的外套便可。那當然，這件外套也非薄薄的衣物，能夠擋風、禦寒的外套也是相當重要。

2）出外 + 家中適用：暖貼貼肚防寒

據節目中醫師所提及，如在腹部貼上暖貼，那就能溫暖內臟，讓身子感到溫暖，同時這方法也能舒解便秘，以及女性在生理期期間所產生的經痛或腹部漲痛不適。經紅外線體溫量度比較後，可見以暖貼貼在肚子上，能讓人體更感暖和。

3）家中適用：睡在毛毯上減熱力流失

睡覺時多蓋被保暖，是不少人常用的保溫大法，但其實蓋被保暖也有次序可言，正確次序應為睡在毛毯上，減少熱力流失，然後把厚被蓋上身體鎖住熱力，而最上層鋪上不太厚的毛毯保溫。因為最上層使用太厚的毛毯，只會壓走熱空氣，不能達致保暖效果的。如果真不夠暖的話，也不宜穿上襪子，改用頸套及 leg warmer 會更有保暖效果。

如果真不夠暖的話，也不宜穿上襪子，改用頸套及 leg warmer 會更有保暖效果。

(R之法則 / ezone)

【句句有骨】吳若希再開名鬧爆醫院！

2018-01-10

「越難越愛」嘅吳若希自從生仔結婚之後，都好少見佢係大台出鏡，劇集歌一姐地位被後浪菊梓喬頂上，工作量大減嘅Jinny專心喺屋企相夫教子，時不時都見佢喺社交平台分享同老公生活趣事，又或者囡囡嘅可愛相，樂得清閒。

雖然工作就少咗Job，但Jinny喺社交平台就相當活躍，早前佢就試過喺Facebook同網民隔空開火，為咗維護屋企人同囡囡甚至將網民人肉起底，實行用網絡暴力以暴易暴，唔少粉絲見到佢都大讚估唔到佢咁勇猛。

Jinny閒時鍾意喺社交網站同大家分享同老公嘅生活二三事。（網上圖片）

身為批鬥界KOL嘅Jinny前日（7/1）先開火評撃近日熱論嘅虐兒新聞，鬧佢「恨不得把那些罪犯放緊油鍋裏炸完餵禿鷹！」隔咗2日Jinny又有嘢睇唔過眼，直接開名大鬧澳門其中一間著名醫院，事源有朋友睇醫生發現腎功能唔好，話要洗腎，但Jinny向醫生查詢洗腎嘅好處同壞處時，醫生就Hea佢話決定洗腎先再解釋，要Jinny自己上網搵。今次Jinny雖然就冇直接鬧個醫生，但就講到明係地下住院部男醫生，句句說話都有骨，仲話：「想長命百歲一定要去鏡湖醫院。」引得網民紛紛一齊怒插鏡湖醫院，話有病都要搭船去香港睇醫生，呢招「笑裡藏刀」的確勁，批鬥界KOL嘅Jinny再得1分。

Jinny 發文控訴澳門醫院

部分網民叫Jinny返香港睇醫生~

(Instagram / HK01)

【從不喜歡孤單一個】胡定欣搵型男「尋歡」

2018-01-10

藝人胡定欣貴為無綫花旦，工作排山倒海，但呢日佢依然抽時間做運動，仲無懼寒冬騷出纖腰大晒結實腹肌，真係睇見都羨慕，佢留言話：「天氣凍，要離開暖粒粒既（嘅）被窩真係好難…唔好諗咁多，堅持，要起身做運動…」之後又不忘溫馨提示大家：「DONE!! 大家記得著（着）夠衫，要保暖啊！！❤」

寒冬都無礙定欣做gym，好勁呀！

之後單身嘅定欣就自爆搵「帥哥」「尋開心」，佢上載三人合照，留言話：「在我還沒有伴的日子，兩位帥哥就先陪我一下，說說笑笑，逗我開心，給我一點歡樂。好朋友就是這樣…陪伴！～」究竟呢「兩位帥哥」係邊個？就係各自都有拖拍嘅袁偉豪同陳山聰，雖然兩人都有女友，但絕對唔會有異性冇人性，果然係好朋友呀！山聰氹到定欣好開心

定欣微博照片

(東方日報)

【代表香港出戰華姐】港姐冠軍雷莊𠒇：希望贏冠軍返嚟！

2018-01-10

唔知大家仲記唔記得今屆港姐冠軍係邊個呢？馮盈盈定係麥明詩？答案係雷莊𠒇！自從去年雷莊𠒇(Juliette)，隨即引來各界批評，之後佢仲要透過instagram反擊，搞到事件越滾越大。唔知係咪咁所以之後都鮮有露面，今日係《2018國際中華小姐競選》記者會上，TVB就宣佈Juliette將代表香港出戰華姐。她接受訪問時都充滿自信，「我會好努力咁練習我嘅中文，希望可以係問答同才藝環節拎好成績，贏冠軍返嚟！」

雷莊𠒇將代表香港出戰華姐，比賽將會係2月3日舉行。

至於Juliette參選完華姐之後嘅工作計劃？佢就話一向都鍾意拍嘢，夢想係做演員。

Well…有信心係好事嚟嘅，問到怕唔怕之後參選時，去年的負面新聞又會被傳媒舊事重提？Juliette就話，「一向都唔怕呢啲消息，做好自己就夠啦。」提到男友今次會唔會特意返香港到場支持佢？她笑言，「佢今次返唔到嚟睇我，但佢同我講個日會好早起身睇電視支持我。」至於參加完華姐之後會有咩計劃？Juliette就話一向都鍾意拍嘢，夢想係做演員。咁會唔會有興趣做返老本行model？她就話，「我想㗎，如果有機會嘅話，但model要再瘦少少，但我覺得自己已經好瘦。」

師姐余思霆建議雷莊𠒇盡量放鬆及自然，做好自己便可以。問她快將卸任會否不捨得？她說不會，看到佳麗有夢想都開心，目前她正拍攝新劇《好日子》努力學廣東話，多與同事傾偈有明顯進步。說到她拍劇沒時間拍拖，男友Tyrese@天堂鳥有沒有微言？她稱沒有，大家都忙於工作。

雷莊𠒇的圖片搜尋結果

2017年中華小姐冠軍余思霆（左）

余思霆卸任在即

(HK01 / Headline)

【唔揀做闊太】開創另一片天只因爸爸教誨：老竇留低幾個字俾我…

2018-01-10

已經係三子之母嘅陳伶俐，上周四啱啱過咗41歲生日，08年同林敏驄離婚，結束10年婚姻關係嘅佢，12年低調再嫁新加坡隱形富豪胡嘉烈後人劉頌銘，並再誕下一子。喺人哋眼中嘅少奶奶，婚後未有加入闊太行列瘋狂high tea，佢開完畫廊後，最近喺銅鑼灣開食店，將新加坡宮保美食帶嚟香港，伶俐日前喺銅鑼灣新開嘅餐廳內接受《蘋果》專訪，問到佢點解有少奶唔做要做生意，仲要係最辛苦嘅飲食業？佢笑言：「因為我好鍾意做嘢，唔做唔係陳伶俐。」

自稱潮州妹嘅伶俐話父母喺佢細個時開百貨公司，一家人發揮潮州人精神，個個都好團結：「爸爸改我個名叫伶俐，都係想我聰明啲，我聽番家人講，話我3歲就識找錢俾人，人哋買7蚊嘢俾10蚊我，我真係識找3蚊俾人。」不過，提到離世多年嘅爸爸，伶俐忽然感觸落淚哽咽：「老竇留低幾個字俾我，就係『膽大、心細、臉皮厚』，而我夠膽大同臉皮厚，但唔夠心細，成日想做成績俾爸爸睇。」

咁o依家做到爸爸嘅3項格言未？佢即笑稱：「都有喇，自己都四十有一，識練多啲EQ，做嘢唔好咁急，唔好咁衝動，開畫廊都學咗好多嘢。」伶俐又爆自己廿幾歲已經有做生意，但係當時仲係藝員，所以唔係太多人知：「以前有做產品贊助，同埋做下公關，接啲job做。(有冇得罪人？）都有㗎，我一向好直，以前人人都係咁，後來知道要圓滑，說話有技巧，唔好得罪人，慢慢之中學到嘢，好彩我臉皮厚，會走埋去道歉，最緊要用誠意。」

講到開專門賣新加坡宮保美食嘅食店，伶俐話：「我同老公好鍾意食嘢，一年前喺新加坡遇到呢個師傅，終於用誠意打動到佢嚟香港，奶奶o依家係fans，一、兩日就嚟一次，以前要飛去新加坡食。」講到家庭方面，問到佢有冇為3個囝囝計劃將來？佢笑言：「可能我好細個就做阿媽，係責任，佢哋係原動力，令自己俾心機做嘢，不論成功與否，但過程小朋友睇到媽咪嘅努力都會欣賞，要身體力行，講係冇用，佢見到你有幾辛苦有幾努力，佢會更錫你，一齊起起落落，開心唔開心都同佢哋分享。」

咁有冇將爸爸嘅座右銘傳承落去？伶俐話：「我唔會做怪獸，好似自己鍾意做生意都想去做，最重要係back up佢哋，o依家小朋友好幸福，但唔捱得，好多小朋友有工人姐姐，冇乜經歷過，父母又同佢哋安排晒好多嘢，佢哋就好似冇咗自己咁，咁樣父母同小朋友都好痛苦，可能父母係錫佢哋，但小朋友可能唔想做一啲嘢。」伶俐又表示，只要囝囝唔做壞事、唔吸毒就冇所謂。

(蘋果日報)

【劇透慎入！】《溏心3》阿九入魔火姐：你贏咗官司輸咗個家！

2018-01-10

TVB《溏心風暴3》下周五(19日)才播映第40集大結局，內地版率先爆結局內容。家族情仇唔少得爭產與家庭決裂，下周結局篇劇情有得睇，凌乘風（黃宗澤）正衰仔，為爭權竟然跟火姐(李司棋)姊弟決裂。他早有預謀，在圍家（王浩信）往葡萄牙前，要求簽代管理股份的文件，附條文是一年後，股份可以轉到他名下，他成為大股東奪權做揸fit人。

火姐（李司棋）急召圍家返港，侄舅打官司，圍家敗訴。火姐在法庭外要兜巴摑乘風，怒斥他：「你贏咗官司，輸咗個家！」不過，乘風都唔威得好耐，圍家到加拿大搵救星沈沝（苗可秀），終於將乘風趕落台。乘風野心越大，做更多錯事，結果被揭發造假數而被檢控要坐監。

另外，正爸(夏雨)幾乎成間公司畀乘風(黃宗澤)搶走，他目睹舅仔走歪路更不忍心，反對他不擇手段要沾手賭業。正爸知道乘風要召開記者會公布爭澳門新賭牌，他要硬闖會場阻止。正爸在會場外跟保安推撞，跌倒撞向檯角，頭破血流不止。他昏迷被送到醫院，經搶救後脫離危險期仍不醒。圍家在正爸牀邊答應要救公司，父與子一幕好感人，但正爸卻沒有反應，只有等奇蹟出現。昏迷了長時間的正爸，大結局最後一幕許雅麟（李國麟）往探望，正爸突然睜開眼喊了聲﹕「恩公！」好嘢!大團圓結局。

（明報）

【真係開心速遞！】阮政峰：有可能發展

2018-01-10

藝人蘇韻姿及阮政峰喺無綫劇集《愛．回家之開心速遞》飾演一對情侶紅衫魚同池子孝，再加上早前佢兩個喺社交網站上載跳「愛的手勢舞」短片，跳到中間嗰陣阮政峰錫咗蘇韻姿一啖，蘇韻姿仲表現得好冧豬，令大批網友指佢兩個戲假情真！

日前二人首次以「情侶檔」接受專訪，期間表現Sweet爆攬頭攬頸，仲互笠高帽大讚對方。講到對方優點，蘇韻姿大讚阮政峰好細心，經常照顧自己，佢話：「有時我拍緊嗰場戲唔明，佢會主動問我，作為新人有人幫自己係好開心。好多人都話香港人惡，但我發現其實並唔係咁！」

至於阮政峰話好欣賞蘇韻姿，大讚佢係一個好強嘅女仔：「佢一個人由多倫多過嚟，參加選美繼而留低工作，要重新適應環境，但佢又唔怕。（有發展空間？）實有可能發展，我唔識睇相，唔會抹殺任何一個可能，但呢一刻大家係好嘅工作拍檔。」阮政峰又話好多人未正式了解佢，都會覺得佢內心有一道牆難以交心：「但蘇韻姿樂觀性格打破咗，所以我同佢可以交心做朋友。」佢又自爆有次想幫蘇韻姿，但點知畀佢拒絕：「有次見佢拎重嘢，我開聲話幫佢拎，點知佢話唔使，拒絕咗我。」在旁嘅蘇韻姿話其實有原因：「我唔想畀人覺冇用，所以自己嚟！」

講到二人被網民大讚好登對又夠Sweet，二人笑言：「大家覺得襯係因為我哋落嘅苦功開始見效，所以大家睇得開心，我哋都好開心。（背後落咩苦功？）唔係個個拍檔都啱傾，有好多事如果唔啱傾，拍攝以外溝通得唔好，就唔會拍得好。如果大家熟絡咗，咁件事就會好好多，起碼唔會尷尬。」

夠晒合拍

呢啲眼神，話冇拍拖都冇人信啦！

攬埋腰~

不如一齊啦

蘇韻姿

阮政峰

超Sweet!!

阮政峰話好欣賞蘇韻姿

(ON.CC)

【分手搞到要報警】陳嘉倩fb千字文控訴前度威嚇滋擾！

2018-01-10

前無綫新聞主播陳嘉倩，離開無綫後重返校園但女神其後卻惹上不少是非，男友陳志遠被揭發留有案底，今日再有雜誌報道，指有電視台女星哭訴陳嘉倩是第三者，搶人男友。陳嘉倩終於忍無可忍，在Facebook以千字文大控訴，指「所有新聞最初出的一刻，很快下了決定，再提出分開冷靜」

但分手後，「收到不斷的威嚇、滋擾，亦有人揚言要每天跟蹤我」，陳嘉倩表明已報警備案。

(今早陳嘉倩在友人陪同下已到中環警處備案)

蘋果日報指一直陪住陳嘉倩受訪的余浩宗話：「佢真係受到騷擾，之前專登搬去朋友屋企住，擔心人生安全，兩邊都係我朋友，冇諗過搞到咁，佢都受到好大壓力。」一行三人喺報案中心逗留約大半個小時離開。

(千字文純文字)

陳嘉倩千字長文：

才踏入2018，不知時運低還是甚麼，先後連續當了幾篇娛樂新聞主角。偏偏這一連串的報導矛頭都是指向我。我知道有人存心向傳媒放所謂的料，甚至不斷要脅及威嚇我。在這段時間內我突然經歷了被傳有喜、被人趕出家門、密會陌生男子、姣搶男友等惡名。一個星期未夠，我經歷了常人的十年。如果拍成電影，劇情絕對曲折離奇過至今我看過的任何電影。不是嗎？這邊殺出一個「閨蜜」，那邊一張鞋單泄密「爆料」我有喜，今日又不知哪裡衝個女士出來對我作淚的指控。我要澄清，與陳先生交往期間，我完全不知道有這樣一位「女友」存在。

我不斷同自己講要淡定要冷靜，清者自清，總之不去看不去聽不去辯，謠言自會不攻自破，但這談何容易？口講不介意，其實最介意。實情你我都知道清白對一個女孩何其重要。我陳嘉倩重申一次，這一連串新聞都屬不實報導。我不會讓自己陷入羅生門，更不會搬出任何照片及斷章取義的對話紀錄，因為我已將這半年來我所受的滋擾及威嚇交由警方處理。

於所有新聞最初出的一刻，我震驚，亦很快下了決定，再提出分開冷靜，期間沒有苦苦哀求。怎料提出分開後，就收到不斷的威嚇、滋擾，亦有人揚言要每天跟蹤我，我擔心自己的人身安全，今天才站出來，將所有對我的威脅行為報警備案，並希望造謠者能停止。我不怪那位哭泣的女士，更不怪這一連串新聞背後的造謠者，我只怪自己當初沒有帶眼識人。

圖為陳嘉倩與前度陳志遠

(蘋果日報/hk01)

【你估我26歲咩！】袁詠儀：一邊睇一邊喊，接受唔到

2018-01-10

袁詠儀昨日喺中環出席保險公司微電影《愛在當下》首映，靚靚同小演員Mia喺戲裏面對戲，溫情感動人心，靚靚睇完之後都眼濕濕。

喺活動上靚靚主動提到近日疑被虐殺的小女孩，哽咽話好心痛，靚靚話：「我覺得個社會要好好檢討，人與人之間嘅包容唔係好夠，真係好痛！我噚晚啱啱喺大陸返嚟，成晚睇新聞一邊睇一邊喊，我覺得唔可以，接受唔到，係唔夠愛，我好耐未試過好想講粗口兼鬧人，想打人，真係好有衝動，我有呢個怨恨心係唔啱嘅，但係呢個新聞真係唔夠愛，我真係唔明呀！大家真係要愛多啲。」

問到靚靚覺得係咪要嚴懲嗰對父母？靚靚話：「必須要，我喺度諗香港嘅法律可唔可以冇辯護，只得控方呢？你冇嘢好講㗎嘞，我希望呢對父母得到最大嘅懲罰係心理。」另外，提到微電影嘅拍攝，靚靚就好欣賞片中飾演佢囡囡嘅小演員Mia，仲話其中一場戲要鬧喊Mia，搞到「囡囡」好崩潰，自己就好似做錯事咁。

而靚靚仲自爆會將Mia嘅相放喺手機，問到囝囝會唔會呷醋？靚靚話：「放第二個男仔就會，佢知我鍾意女仔。」叫靚靚再追個女，佢就似乎打定輸數話：「你估我26歲咩！我諗唔好嘞，唔係冇問過，科技都太遲嘞。」

(蘋果日報)

【攬住一齊喊】陸永嫂PO片：大家以後唔好再見啦！

2018-01-10

有啲人分開先知對方係最好，有時感情同親情要到失去，領會才更深，原來呢一招都可以用喺教導小朋友嘅身上!「陸永嫂」陳莉娜(Reina)婚後生咗兩個活潑嘅囡囡陸一穎(Hannah)同陸一心(Simsim)，雖然Reina早前不幸小產，不過佢同陸永都好樂觀，走出小產陰霾。

Reina近日喺IG分享一個「教女心得」，話兩個囡囡喺回家途中嘈交，Reina以冇鬧冇惡嘅語氣，同兩個囡囡講：「如果你哋都唔鍾意大家，食埋呢餐之後，你哋就去執行李啦！一個去婆婆屋企住，一個去嫲嫲屋企住，大家以後唔好再見啦！你哋商量吓去邊個度住，我轉頭落嚟話我知！」

Reina講完兩姊妹喊到攬埋一嚿，Reina稱睇番條片都想喊，其實兩姊妹係好愛對方。今日Reina終於貼咗兩姊妹傾偈片，更解釋點解自己會咁做，事緣當日Reina落雨揸車睇路已經好辛苦，由中環到東隧，Hannah同Simsim喺後座不停嘈，不停投訴，雞蛋裡挑骨頭，出咗東隧之後，「好啦，你哋咁唔鍾意大家，一個搬去嫲嫲屋企住，一個搬去婆婆屋企住，以後唔好見啦」，Reina返到屋企叫佢哋商量好，食埋pizza就自己執行李，再車走佢哋，Reina就上咗房，喺房聽到佢哋喊住傾偈，但唔知佢哋講乜，呢條片係叫Maria收埋電話錄低，事後先發現感人嘅呢一幕，片中見Hannah先講：「我會唔捨得你，你係最得意。」

而Simsim都話會好掛住家姐，但係媽咪話呢，「你去婆婆屋企，我去嫲嫲屋企瞓，媽咪呢，話我哋以後冇得鬧交囉」，Hannah承諾：「我哋唔鬧交，仲做番好，好嘅妹妹，我做番好嘅家姐。」Simsim同家姐講：「我真係好想你陪我玩painting！」最後Hannah走上前，攬一攬細妹，一齊喊。唔少網民都覺得「陸永嫂」Reina冇做錯，可以訓練小朋友懂事，不過有網民就話：「傷心都係食住pizza喊。」

(蘋果日報)