前港姐陳凱琳（Grace）早前就預告會同男友鄭嘉穎聖誕節去旅行，雖然佢冇透露目的地，但一直喺Instagram上載嘢食相，但原來佢哋度過咗個白色聖誕，仲喺外地浪漫過埋年添！
Grace連日嚟都只係分享嘢食相，直到呢日佢先上載獨照，仲用英文發長文，大致係引用聖經金句鼓勵自己，仲話新一年想要建立嘅一件事就係佢同上帝嘅關係。
睇相見到Grace着晒羽絨同戴埋頸巾，就知當地有幾凍，之後嘉穎就上載喺冰天雪地下擺晒甫士嘅相，留言話：「你們的地方有沒有下雪，玩到雪的舉個手看看！」
可以一齊過聖誕兼迎接新一年，落幾大雪都唔怕啦！網民都話覺得好Sweet，留言叫佢哋甫合照呀！
(on.cc東網)
「86歲開騷呢，老實講我都好有信心！」即將踏入86高齡嘅「修哥」胡楓，將於2月10及11日假紅館舉行《86破晒紀錄》演唱會，老而彌堅嘅修哥滿臉自信話：「我平時多做運動，夠健康，身體固然之係好，做演唱會應該問題唔大嘅，問題比較大啲呢就係要跳舞，唔知道自己跳成點，夠唔夠氣呀！」
由粵語片年代入行，同蕭芳芳拍過多部歌舞片，當年被封為「舞王修」，今日修哥笑騎騎話：「年紀大咗，有時記性有啲問題，唔緊要嘅，盡量勤力啲，舞王唔舞王就唔係問題，最緊要做得開心。」縱橫娛樂圈64年嘅修哥，最開心同最唔開心都因為一個人：「我最開心得到我太太，最開心得到我嘅事業，最開心得到我嘅家庭，最開心得到我嘅契仔契女，最開心識到一班好好嘅朋友，最唔開心最痛苦係唔見咗我太太！」
去年10月愛妻胡呂詠荷因病離世，失去老伴令修哥承受一生最痛，結婚59年鶼鰈情深：「最辛苦後生嘅時候，個個都搵我拍戲，一日兩三組閒閒哋，搞到自己唔夠瞓，直情冇家庭生活，錯過咗同仔女一齊嘅時刻，有時自己都覺得好內疚！」修哥給天上嘅太太掌聲：「真係好！從來未曾哦過我，我太太好諒解我㗎，知道我工作係日以繼夜，所以佢唔識講哦文，唔識哦哦哦，仲好好服侍㖭，哈哈哈，所以呢…」修哥再三拍手，笑到瞇瞇眼：「真係回味。」係咪好掛住太太？修哥坦言：「當然啦，經常有啲思念。」
究竟修哥拍過幾次拖，太太係咪初戀呢？風趣嘅修風話：「講拍拖就真係好多次，嗱！第一次同太太拍拖，第二次同芳艷芬，第三次同白雪仙，跟住羅艷卿、鄧碧雲、林鳳、嘉玲、江雪、吳君麗，全部拍過晒，你唔好睇小我呀，我係大情人嚟㗎，哈哈。」老婆有冇呷醋？修哥再讚太太：「冇，從來冇講半句。」結婚咁多年都好恩愛？修哥：「係，我覺得自己好恩愛㗎。」
以前有冇唱情歌畀太太聽？修哥笑笑話：「對住佢唱幾句咁啦，邊首呢，又係藏在我心裏嘅秘密，學友（契仔張學友）會知嘅，哈哈哈。」開騷時會否喺觀眾席留座位給太太？修哥含蓄表示：「睇吓點。」此外，修哥入行拍首部電影《男人心》已一炮而紅，係咪咁多年都冇受過氣呢？修哥表示：「新人一定會受吓氣，畀人教訓吓：『做好啲啦』，畀蔣偉光師傅話吓囉，師傅話到OK嘅，蔣偉光係好賣座嘅導演，啲人叫佢財神導演，我第一套戲係佢導演。」
究竟娛樂圈畀到乜嘢滿足感，令修哥咁多年都唔退休呢？修哥笑笑：「呢個係我演藝工作嚟，所以我唔會放棄嘅，我有嘢做就好開心，樂此不疲。屋企人叫我唔好咁操勞，老實講，人在江湖身不由己，又拍劇又演唱會都好辛苦，不過自己開心，將辛苦全部蓋過晒。」訪問當日，修哥通宵拍劇到朝早6點才收工，瞓了幾粒鐘就接受連串專訪，好友羅蘭同契女方國珊全程陪伴照顧。
場地：狀元樓@iSQUARE
胡楓：「86歲開騷呢，老實講我都好有信心！」
即將踏入86高齡嘅「修哥」胡楓，將於2月10及11日假紅館舉行《86破晒紀錄》演唱會
(Apple Daily)
藝人張景淳之前憑無綫神劇《天與地》角色家明彈起，之後喺《使徒行者2》入面憑「飛機哥」一角爆紅，最近又加盟處境劇《愛．回家之開心速遞》做奸仔，頻頻在公仔箱出現，甚得觀眾喜愛。
近日就傳出他事業愛情兩得意，與人氣歌手菊梓喬低調地在九龍塘拍拖睇戲後，女方更為他做司機載他回家兼入屋過夜。
張景淳接受東網訪問時便指有關消息在細節上並非事實：「首先我同佢唔係拍拖，我哋係識咗好耐嘅好朋友，亦因為我哋係朋友，所以間中都會出嚟睇戲、食飯，唔會話有咩特別避忌。（你追佢？）我唔係追人啦。」
提到有指他之前曾一腳踏兩船，張景淳澄清從未試過：「我所有關係都清清楚楚㗎。（好多人都話你係富二代？）我唔係啦，大家一直都誤會咗喇，只係我冇特登出嚟解釋番。」
(on.cc東網)
上年二月，43歲TVB主持人李漫芬(Fanny)同圈外男友談成坤(Alvin)結婚，九月再宣佈造人成功，將會喺出年三月做爸爸媽咪啦！日前李漫芬出席《溏心風暴3》宣傳活動，佢接受訪問時表示，老公幾乎包辦家中所有家務及粗重嘢，而佢因為打算順產，所以不時上網睇分娩嘅短片，仲話「驚，但必需要經歷！」真係好勇敢！
李漫芬 感激老公照顧
李漫芬接受訪問時話：「老公基本包辦家中所有家務，除咗洗碗，因為有家長話大肚婆最好唔好舉高手攞重嘢，咁老公都將物件放番落嚟！係好窩心！我都好感恩，好多謝佢作出嘅轉變！」Fanny話打算順產，所以上網睇分娩嘅短片「打底」，不過老公Alvin叫佢唔好睇，因為痛到聲嘶力竭，但Fanny直言：「我自己都驚，但我覺得必需要經歷，希望到時好順利啦！」
李漫芬懷孕，同場藝人都好細心，扶佢上台落台！
活動上，不少圈中好友都同準媽媽合照！
婚後火速造人
Fanny嘅老公Alvin係游泳教練！上年二月佢哋結婚時，Fanny話冇造人大計，一切順其自然，估唔到半年就宣布有BB，真係好幸福呀！當日Fanny仲話有老公嘅愛錫，冇以前咁大壓力，有個錫自己的人在家等佢，吃白粥都ok。因為「最辛苦時試過一個人住在90尺的劏房。」
囡囡名 二選一
Fanny在活動中宣佈陀B女，仲話老公已為B女改好名叫做「談凱嵐」，而Fanny亦諗咗叫囡囡做「談在心」，所以會喺兩個名之中揀一個。至於點解叫做「談在心」？原來喺Fanny覺得同人講嘢要用心，而且會好窩心。Fanny仲話佢哋開始睇育嬰書，做定功課，相信遲啲BB出咗世，佢哋都會湊得好好！
老公做晒家務
Fanny腹大便便，梗係唔可以做粗重嘢啦！咁佢老公Alvin都好貼心，幫太太做晒所有家務咁滯⋯除咗洗碗！日前Fanny喺佢IG上載老公拖地嘅短片，原來前一晚好友們去佢哋屋企開P，咁老公翌日就做善後工作！
藝人原子鏸（Marsha）去年4月接受訪問時講過同一位來自摩洛哥嘅男士拍緊拖，仲話男友已經過咗媽咪鄭佩佩嗰關，又自爆隨時Ready嫁！
原子鏸嘅舊愛鄧健泓上年十二月同石詠莉拉埋天窗，39歲原子鏸都有好消息傳出，佢獲男友求婚呀！鄭佩佩喺微博上載阿女被求婚嘅短片，片段中原子鏸同男友激咀，真係甜到漏！作為媽咪嘅鄭佩佩留言話：「這是我們今年第一個喜訊！」
而原子鏸亦開心上載同男友合照，佢留言話：「I said “yes” just 2 hrs before the start of 2018」而佢被求婚嘅地點正係男友家鄉摩洛哥，別具意義！
舊愛鄧健泓以短訊回覆，佢話：「祝她幸福快樂，Happy for her.」
記者聯絡鄭佩佩，並透過胞妹鄭保佩回覆：「1月6日係佩佩生日，每年呢個時候都會去旅行，依家佩佩同Marsha飛緊去倫敦，所以將電話飛咗我度，10號先返香港。（恭喜晒Marsha結婚！）多謝，未咁快，啱啱先求婚。（你喺現場？）唔係，佢哋喺歐洲，31號除夕派對當晚，原本佢男友獲空手道師傅頒發Purple Belt，喺呢個咁重要嘅moment，佢男友就跪地求婚，Marsha好surprise！」
(on.cc東網)
陳豪入行廿多年遇過不少高低起跌，幸能保持樂觀心態面對。他直言將無綫當作學堂看待，最近飾演反派望挑戰底線，要求自己任何情況都要有99分，但力勸新人小心運用「方法演技」。
最緊要多角度思考
陳豪相隔多年於無綫劇集《使徒行者2》做大反派，飾演一名Cool到爆的社團大佬，他指角色與想像有點出入，曾向監製提議增加紋身，以更兇狠、偏激的形象示人，雖然最終被拒絕，但他絕對信任劇組：「乘機挑戰吓自己，而且咁多年喺呢個學堂（無綫）學咗咁多，到底會去到乜嘢地步呢？我想試吓自己條底線去到邊，所以把握呢個機會，
乘機探索吓自己演反派會做成點，我將無綫當係學堂去看待。」現時播映中的台慶劇《誇世代》，他飾演銀行界奇才與歐陽震華大鬥演技，更晒肌以型格姿態現身，認為角色屬一大挑戰。
《使徒行者2》主力溝女
加入無綫17年定必經歷高低起伏，陳豪直認不諱，更表示無論如何都盡力做好自己：「有時唔係十足狀態，甚至有啲角色重複，好多類似情況出現喺自己身上。我同自己講無論任何情況，都要畀99分，盡量做好自己嗰Part。」又指未試過因太投入角色而出現情緒問題，他勸新人要小心運用「方法演技」：「呢個方法唔係唔好，但要知點運用。除非劇本好深入咁描寫角色，先可以跟劇本入到咁深。如果層面上唔使咁深入，但自己入到咁深會處於劣勢。」問到之前拍《使徒2》長時間保持Cool爆會否感壓抑？陳豪笑說：「都唔會嘅！今次套劇主力溝女，其次係殺人，OK嘅！」
《妙手仁心》見證人生
無綫不少小生、花旦相繼離巢外闖，問陳豪有否打算過離開無綫？他直言視乎合作是否開心，自己尋求好發展：「出面有好多選擇，會令我諗係咪要攞呢個機會，自己計算過，睇吓邊樣適合自己同家庭。」又坦言一直保持樂觀心態：「我一路抱住好開心同正面嘅態度面對所有事，冇嘢諗唔通，最緊要識多角度睇，多啲問人哋嘅意見，自己再分析。」
他有多部喜愛作品見證着人生的數個轉捩點：「由最開頭入無綫第一部《妙手仁心》，跟住《洛神》由時裝變古裝，再拍《絕世好爸》之後開始拍搞笑戲。」又感謝無綫多位恩師，包括曾勵珍、戚其義、劉家豪及梅小青等合作過的高層及監製。
湊仔不忘二人世界
所謂「養兒一百歲，長憂九十九」，陳豪坦言小朋友仍有很多東西可學習：「除咗學業，其他規矩等好多嘢要Catch up，所以我提議佢哋有時間多啲參加課外活動，例如游水同打波。（為子女將來打算？）絕對係，跟住有好多面試幫佢哋做。」香港讀書壓力大，問到會否送子女到外國升學？陳豪坦言是計劃之內：「係遲早嘅事，所以依家我哋希望喺香港呢段時間，盡量畀佢哋學好中文。」又指外國升學屬必經階段，地點則未有定案。
談到現今社會有不少怪獸家長，他希望盡量避免成為其中一分子：「成個社會環境令家長變怪獸，唔係佢哋想做怪獸家長，係我哋學點樣喺呢個教育制度下生存，每個家長都想仔女搵間好學校，好學校通常收尖子、好啲背景以及唔同啲嘅小朋友，所以我哋想提高小朋友嘅競爭力，希望佢哋學得更加快，確保佢哋達標。好坦白講，我可以好放鬆咁教育小朋友等佢慢慢長大，但去到面試嗰日，一個冇準備嘅小朋友可能遇到20至50個準備好嘅小朋友，到時咪真正知道優勢喺邊度囉。」
三個寶貝踢晒腳
談到今年產量較少，問他是否將大部分時間投放在家庭？他否認道：「一直交畀無綫安排，我每年拍兩至三套劇，咁啱《使徒2》同《誇世代》差唔多時間出街。（家人想你陪多啲？）減產就唔會，但一啲重要節日，例如仔女生日，佢哋返學嘅日子，我哋會做番應該做嘅嘢。」問到會否與太太陳茵媺（Aimee）因湊仔女而鬧交？他指雙方持不同意見時會有少少拗撬。至於兩公婆是否以小朋友行先？他表示除了放子女於首位外，亦要好好維繫夫妻關係，婚後仍要有二人世界：「好多人忽略咗呢樣嘢，夫妻之間要付出努力同時間，就算心情唔好，都要確保雙方將愛火延續落去。」雖然與Aimee很喜歡小朋友，但陳豪笑言三個已「踢晒腳」，又指最理想方案是與太太輪流工作，等子女長大些才過二人世界。
擴展咖啡王國
除了演藝事業外，陳豪亦開設咖啡工房及甜品店，他希望將烹調咖啡的理想變為事業，並透露有意開實體店：「要學識點管理時間，全心全意做好每樣嘢，我依家好好孕育我嘅生意。（想小朋友入娛樂圈定繼承你嘅生意？）佢哋決定，仔女嘅將來唔係由我哋話事，我哋只可以幫佢哋打好根基，佢哋將來想做乜要自己去闖，不斷嘗試失敗同孤獨，做家長係要訓練佢哋獨立成長同變得強大。」
場地：香港九龍東皇冠假日酒店
陳豪相隔多年演反派，直言想挑戰自我底線。
陳豪慶幸未試過因太投入角色而出現情緒問題。 
他一直抱着開心與正面的態度面對所有事。 
他表示感謝無綫多位恩師，包括曾勵珍、戚其義、劉家豪及梅小青等合作過的高層及監製。 
談到現今社會有不少怪獸家長，他希望盡量避免成為其中一分子。 
無綫不少小生、花旦相繼離巢外闖。 
陳豪直言是否離開無綫視乎合作是否開心。 
他表示會衝量怎樣較適合自己同家庭。 
陳豪將烹調咖啡的理想變為事業，更想開實體店。 
陳豪在無綫參演首部劇集《妙手仁心》（圖）至之前的《使徒行者2》，不經不覺已17年。（資料圖片） 
《使徒行者2》（資料圖片）
他們已計劃送仔女往外國升學。（資料圖片）
太太陳茵媺同三個仔女（資料圖片）
(ON.CC)
香蕉是許多人都喜歡的超營養水果，或許你有聽家中長輩提過，香蕉要放到長出黑色斑點之後再吃比較甜，不過國外網站Lifehack指出，除了香甜美味之外，長斑點的醜香蕉，才真正有營養價值！
香蕉含有天然糖、膳食纖維、維生素和礦物質，是大家熟知的「超級食物」，而日本帝京大學的醫學研究指出，帶有斑點或變黑的香蕉含有更多蛋白質，成熟的香蕉更擁有腫瘤壞死因子，可以有助於預防腫瘤產生。
此外，攝取「正確」的香蕉還可以有以下4種對健康的好處：
1. 香蕉含有豐富的鉀，能夠促進心臟健康和保持正常血壓，降低心臟病風險。
2. 香蕉有兩種身體必需的膳食纖維，可以幫助消化，使腸胃及身體保持健康。
3. 香蕉的澱粉和糖分高，但熱量和血糖數值低，每天適度攝取成熟的香蕉，可以讓糖尿病患者保持血糖穩定。
4. 香蕉可以刺激人體分泌「快樂荷爾蒙」－－多巴胺，因此吃完香蕉不只能夠給人飽足感，更會使人充滿能量、預防悲傷，並保持愉快積極的心情。
（EToday)
坦承除夕只是與親戚食飯，未正式簽字結婚，佢話。。。
現年30歲、2012年落選港姐楊斯雅(Cindy)，曾經做過J2台《安樂蝸》主持，但嫌人工奀，前年決定提前解約，與拍拖5年幾、無綫藝訓班出身嘅男友陳光耀(Samuel)一齊開性商品店，由於生意越做越好，連開三間分店後，仲成功上車置業，真係好勵志！Cindy與拍拖5年幾嘅Samuel喺去年除夕結婚，但有媒體爆料，指Samuel與另一名J小姐已婚，仲有一張疑似結婚相。
《蘋果》致電Cindy，佢起初欲言又止，直言自己婚事想低調，問同Samuel係咪已簽紙？佢話﹕「唔想講太多，我哋都唔係呢一行。」問到認唔認識J小姐？Cindy有啲忟憎話﹕「我唔想畀嗰個人得呈，明玩嘢，好騷擾我哋，佢有私下send啲嘢畀我哋，搞住我哋，仲扮其他人，但我已經唔再理佢…..我知佢玩到好大，我唔知佢點解咁迷戀我老公，今次玩大咗。」問到知唔知J小姐同Samuel係咪有小朋友？Cindy話﹕「em…你問番佢(Samuel)啦！」
之後Cindy再以短訊回覆，稱是與Samuel嘅共同回應﹕
1.我丈夫與這個女人早在認識我之前已經撇除所有情侶關係，現階段只是普通朋友。對此本人是知悉的。
2.他們之間沒有小朋友，對於這個指控，我們保留權利告對方誹謗。
3.不想再回應與事實無關的傳聞。新年快樂，身體健康！謝謝！
Cindy坦承除夕只是與親戚食飯，未正式簽字結婚，佢話﹕「打算度蜜月才簽字，希望在關島的Rainbow Chapel夢幻教堂結婚。」問係咪100%相信未婚夫？佢以一個笑到喊嘅公仔回覆﹕「男人從來不是可信的動物。」
(蘋果日報)
娛圈多女公林盛斌（Bob）今年追仔成功，屋企依家有四個寶貝，包括大女林霏兒（Faye）、二女林熹兒（Haye）、三女林機兒（Kaye）同細仔林道申（Jaye），估唔到佢哋四個都遺傳咗爸爸嘅演藝細胞，呢隊Bob4組合絕對係樂壇生力軍，而且仲青出於藍！
Faye與Haye鬥浮誇
呢日佢哋喺屋企一齊表演高難度「咪嘴」唱歌、跳舞同捽碟，連仲係BB嘅Jaye都配合三個家姐，露出天然呆表情，搞到負責拍片嘅爸爸都忍唔住爆笑！首先大家姐Faye登場，佢七情上面咁咪嘴唱英文歌，仲投入到合埋雙眼；跟住出場嘅係二家姐Haye，佢承接大家姐嘅「浮誇風」，着住睡衣嘅佢對鏡頭好敏感，唱到興起時，直頭坐埋喺地做出高難度動作，就係雙腳屈曲90度，可愛程度爆晒燈！
Kaye捽碟型過老竇
見到兩個家姐落足力表演，一向被指似內地女星周迅嘅三家姐Kaye都唔輸蝕，負責打碟嘅佢喺梳化上示範「真摔碟」，因為佢摔嗰隻真係食物碟嚟㗎！期間佢仲望住個鏡頭甜笑，星味絕對超越老竇！
Jaye天然呆好搶鏡
至於得4個幾月大嘅細佬Jaye可以做啲咩？知唔知咩叫贏在起跑線？Jaye顏值超高，天生眼大大嘅佢生得同三個家姐一樣咁得意，佢只要坐喺度望住鏡頭天然呆，已經係最美好嘅表演！網友都留言話好羨慕阿Bob同Bob嫂有四個咁趣致嘅子女，仲話希望林氏四姐弟可以多啲表演畀大家睇呀！
網民有話兒：
鄭X杏：兩個字：羨慕羨慕羨慕……點解可以咁得意咁可愛啊！
OcXXna Li： Bob哥你以後唔洗（使）憂，三個女咁叻，她們女搞笑，周迅卒（捽）碟，你是不是忍笑得好辛苦呢
陳X儀：Bob爺～一睇就知你將来唔駛（使）憂～！全部有晒你嘅遺傳呀～！
CL YXXXg：三個家姐都咁好笑，細佬日日都唔怕悶
GiXXy Yu：細佬扮觀眾最忍得笑
(ON.CC)
藝人姚子羚與唐詩詠同期出道，兼一齊拍攝她們的第一套無綫劇《當四葉草碰上劍尖時》。
談到子羚的遭遇可會跟詩詠相同，人工是否一樣咁奀？子羚稱：「實際幾錢就唔記得，應該冇3千幾咁少，但都唔夠畀錢屋企，所以屋企人都有微言！（好過詩詠？）佢好彩啲，哈哈！有人幫佢加人工喎！我就由低做起，嗰時冇錢畀屋企，細妹未出身，惟有靠家姐，所以嗰時捱嘅日子，有乜辛酸都唔敢同屋企講，好似冇錢買衫出騷，惟有問朋友借衫，但呢啲都唔算慘，而係拍攝時捱更抵夜，碰碰撞撞搞到周身瘀傷，只係自己喊都唔敢同屋企人講，因為條路自己揀！（有冇人幫？）當年有錢國偉搵我拍《四》，之後遇到監製陳維冠、文偉鴻，佢哋將我由柔弱角色轉去演強悍角色，都好感恩！」
(on.cc東網)
