離開大台三年多嘅楊思琦，一手兼顧工作同家庭，由一開始戴著港姐冠軍的光環，喺公司獲照顧同安排好一切事宜，到今天憑自己一細步一細步走出一片自由天地，令佢擁有此無比毅力嘅能量就係愛女卓穎。思琦日前喺九龍灣拍攝新一年造型相，佢仲帶埋放聖誕假嘅穎穎一齊影相，思琦甜笑話：「佢眨下眼每分每秒都大得好快，想襯影靚相時候同佢影多O的珍藏相，等佢將來大個睇番自己開頭O黎到我肚臍、到心口、膊頭到高過媽咪啦，一個好似歷程咁。」每逢工作忙，尤其唔喺香港嘅時候，思琦就好似其他父母一樣，不停打開手機翻看仔女嘅相，佢現時手機畫面仲係一歲幾嘅穎穎，因為穎穎永遠喺佢心目中都係BB，想時間能夠停留久一點。

相比起喺舊公司嘅十幾年，思琦都覺得呢三年多自由身的確成長唔少，佢話：「呢三年好眨眼就過，喺舊公司有好多人打點一切，照顧晒任何嘢，有計劃有安排。o依家轉到自己身上，初時好騰雞，好雞手鴨腳，好驚青，到o依家放緩心態，定啲定啲，會慢少少節奏，會覺得個人係成長咗，喺處事或者係其他諗法上，更加成熟。」但呢三年來唯一令思琦感覺點努力都唔夠用嘅就係時間，每天都同時間競賽，呢三年多大部份時間都喺內地接拍劇集、電影同微電影等，甚少時間喺香港陪伴父母同穎穎。

工作上，之前接拍角色都離唔開女警，思琦希望新一年能夠喺角色上有更多嘗試，可能大家畀咗佢一個框框，港姐應該係靚靚斯文嘅，思琦話：「我覺得可以試下易容，或者試下做賊，又可以唔駛化妝，甚至做醜女同鄉村好簡樸女農村民。」之前錄了一首國語歌，思琦都希望有機會有自己嘅廣東歌，因為每逢登台，客戶都詢問可唔可以獻唱，而思琦本身都鍾意唱歌，而呢份興趣亦遺傳給咗穎穎，兩母女不時喺屋企開騷合唱，亦將兩人感情更加拉近，思琦都期待將來有機會同穎穎喺台上演出，讓佢哋兩母女之間留美好回憶。

思琦希望新一年能夠喺角色上有更多嘗試

(Apple Daily)

藝人呂慧儀出席活動，她表示在後台與幾位小朋友介紹時被叫做Auntie，笑言已經適應及對稱呼免疫：「見到班小朋友都好開心，唔怕凍又識跳舞好犀利，要向佢哋學習。」她直言三歲的兒子Anton開始甚麼事都會問她點解：「每日聽得最多就係呢啲。（最難答係咩？）試過點解要刷牙，但其實每日都要做，好多冇諗過點解要做都會問，咁就會諗一個說服到嘅答案去講，例如話唔刷牙就唔靚仔。（讀書上會唔會問？）佢依家返學都幾開心，冇咩功課都幾享受都唔會點問，開頭有問點解佢要返學但媽咪唔使。」

食飯唔畀玩iPad

呂慧儀笑言最難答的問題是iPad密碼，如果告訴他就會自己開鎖玩：「依家都唔畀佢玩，佢攞到都得物無所用，成日問我都會答唔知。（會問爸爸？）都唔會，同佢講咗爹哋都唔知，媽咪都唔記得，用手指模就開到，佢就會問我借手指畀佢。」她表示早前屋企定下食飯時不可玩iPad的規矩，但有時老人家都會縱容他：「但佢知爸爸媽媽一定唔可以，佢都會專心食飯同我傾吓食物，同玩吓，好過對住電話等人餵，享受食飯樂趣。」她認為第時讀書大把時間讓兒子學習電腦，現時盡量令他與人溝通及觀察四周事物，她放工回家及睡前都會陪他看故事書。

為兒子Keep住拍劇

問是否為兒子才Keep住拍劇，呂慧儀說：「都係自己鍾意嘅，同埋可以鍛煉吓演技，返工時間又可以方便到自己時間，我拍出嚟嘅阿仔都睇得，係一個合家歡嘅劇集。」她表示兒子近日放假，與他一齊收看無綫劇《溏心3》：「見到陳敏之喊，我又跟住一齊喊，佢就問點解Auntie敏之同我都喊，好好笑，我叫佢下次見到敏之問番點解會喊。（同你日日睇電視？）係，佢識得晒《愛．回家之開心速遞》啲角色名。（會叫你劇中個名？）唔會，但會問點解叫呢個名。」

呂慧儀同囝囝（資料圖片）

(ON.CC)