「歌神」許冠傑係香港家傳戶曉歌手，作品《半斤八兩》、《浪子心聲》等經典歌反映時弊、獅子山下情懷故事。佢嘅41歲大仔許懷欣(Ryan)遺傳咗爸爸嘅音樂天分同熱誠，04年回流香港，以獨立歌手發展，歌曲風格以pop rock為主，06年出第一隻專輯《開竅》，近年就以樂隊The stay up發展，下月就有新歌《Crooked Smiles》喺網上以單曲形式推出。
Ryan日前接受《蘋果》專訪，踩入銅記，同鼓手友人Tim喺街頭busking，戴住聖誕老人面具做「蒙面歌手」唱聖誕歌，仲有自己嘅作品《Wake up》、《Hear me》等，到最後就除下面具唱佢爹地嘅《半斤八兩》，吸引唔少年長歌迷，有女歌迷更知Ryan係許冠傑大仔，邊拍手掌邊和唱。11歲就識彈結他嘅Ryan喺美國讀書時夾band都試過喺街頭busking，不過喺香港就係第一次。認識Ryan，大都係歌神之子關係，傍實爹地開騷，佢其實除咗幫屋企，自己仲有有做graphic design嘅正職，幫CD、黑膠碟設計封面，亦有幫板仔街牌Vans做設計工作，喺空餘時間夾band。
Ryan出道有10年，未簽過公司、經理人，一直都係以獨立歌手發展：「05年返嚟，有公司對我有興趣，想我唱返許冠傑嘅歌或者做idol，我唱返爸爸嘅歌係冇point，爸爸仲喺度，佢啲歌係佢style，自己學音樂係想表達自己message同style。」講到香港做歌手難，做獨立歌手難上加難：「喺香港做音樂係辛苦啲，我當做音樂唔係興趣，係我生命，香港做音樂唔可以survive for living，所以我有做其他design，幫人地玩音樂寫歌，幫屋企人做騷，都好開心，條路係辛苦啲。」自少聽爸爸嘅歌《半斤八兩》、《最緊要好玩》、貓王、The Beatles到Nirvana，Ryan大學夾band時穿脷環、紋晒身唱heavy metal：「我阿爸開頭都問咩事發生？覺得我over咗，o依家就明我係咁嘅人，知道係我性格。」Ryan作為星二代，難免會有壓力，被人拎爸爸嘅成就比較，佢就平常心面對：「Sam Hui有自己音樂，成功表達香港人嘅心態，It’s good有個咁犀利嘅爹地，我做緊Ryan Hui嘅音樂，壓力永遠都喺度，用返嚟推自己。
我爸爸出嚟時候，音樂係冇互聯網、文化唔同，冇得比較，我好鍾意聽佢唱歌，好榮幸日日見到佢唱歌，做音樂都係想表達返自己，如果好多人聽係Ok，唔係都會照做，音樂對我呢講係一個開心時間，放工返屋企好攰唔開心，但一寫歌彈結他就開心返，係一個治療令自己開心，Music is a big part of my life。」
Ryan有一對6歲孖仔許俊及許朗，佢哋將來路自己揀：「佢哋o依家識掃幾個chord鍾意音樂，不過一個鍾意做科學家，一個想做老師，最緊要係佢哋跟自己個心，開開心心，我細嗰時我阿爸冇逼我玩音樂，喺我11歲時先去玩，我哋夾band夾得好開心，到讀書時佢都話最緊要返學，要攞個degree，因為咁去美國讀marketing，反而仲好多玩音樂機會。」
音樂拉近兩父子距離：「o依家可以同我爹地share音樂，又可以同兩個仔share音樂，我覺得好開心，好似之前喺紅館開騷，我個仔企喺我隔離，三個generation喺度聽緊音樂同睇緊音樂，係好正，音樂係我哋嘅細胞，希望可以繼續做。」自細已封咗爹哋做偶像，聽佢嘅歌、睇佢戲學中文，Ryan近年跟爸爸世界各地走tour，更覺得對方係經典：「fans見到我阿爸一出現，啲人感覺返嚟，人哋移民去咗美國，可以諗返起香港， music is so powerful，可以有呢啲message同感覺出嚟。」最後，問到佢會不會有心願喺紅館開騷，Ryan笑言：「最緊要係表達到自己，寫多啲歌，當然去到紅館多啲人聽，自己由細到大，Sam Hui嘉賓係Ryan，如果有一日Ryan嘉賓係Sam Hui，that’s will be cool，不過都係《最緊要好玩》。」
(蘋果日報)
